An Pagmate daw Nindo Namimisinterpretar Kamo?

NAPUPURISAW si Antonio. Bigla asin dai ikapaliwanag, an saiyang dayupot na katood na si Leonardo nanlipot sa saiya. * Sa laen-laen na okasyon an pagtaratara ni Antonio dai inintindi, asin kun sinda magkaibanan, garo baga igwa na ngonyan nin lanob sa tahaw ninda. Nagpoon na mahandal si Antonio na siertong may nagibo o nasabi sia na namisinterpretar kan saiyang katood. Alagad ano?

An mga pagkamisinterpretar ordinaryo na sana. An dakol saradit asin madaling ikorehir. An iba puedeng nakapanluluyang marhay sa boot, nangorogna kun an salang impresyon nagdadanay sa ibong kan gabos na paghihingoa na haleon iyan. Taano ta nagkakaigwa nin mga pagkamisinterpretar? Paano daw kaiyan naaapektaran an imbueltong mga indibiduwal? Ano an puede nindong gibohon kun may ginigibo kamo na namimisinterpretar kan iba? Sa bagay importante daw talaga kun ano an iniisip kan iba manongod sa saindo?

Dai Malilikayan na Katunayan

Huli ta dai nababasa nin ibang tawo an satong mga kaisipan asin intension, maabot an panahon na mamimisinterpretar kan iba an mga sinasabi o ginigibo ta. Kadakol kan posibilidad na magkaigwa nin mga pagkamisinterpretar. Kun beses, dai ta talaga ikinakapahayag an satong kaisipan sa klaro asin eksaktong paagi na gusto ta. An ribok sa palibot asin an iba pang disturbo tibaad nagpapagin depisil para sa iba na itao an saindang bilog na atension sa sato.

May mga ugale asin hiro-hiro man na puedeng mamisinterpretar. Halimbawa, an sarong masusopgon na tawo tibaad husgaran nin bakong tama bilang antipatiko, indiperente, o mapalangkaw. An nakaaging personal na mga eksperyensia tibaad magbunga nin emosyonal imbes na rasonableng reaksion sa nagkapirang situwasyon. An pagkakalaen sa kultura asin sa lenguahe nangangahulogan na an pakaintindi dai puedeng ipamugtak na segurado. Idugang pa digdi an salang mga sumbong asin tsismis, asin dai ta maninigong ipagngalas na an mga pakahulogan na iinaatribwir sa mga bagay na sinabi o ginibo kun beses laen sa orihinal na intension. Siempre, gabos ini daing gayo nakararanga sa mga nakamamate na an saindang intension namisinterpretar.

Halimbawa, si Anna inosenteng nagkomento manongod sa popularidad kan sarong kaamiga na bakong presente. An komento inotro na laen na sa talagang intension kaiyan, dangan, sa pagkabigla  asin panluluya nin boot ni Anna, anggot na sinahotan sia kan kaamiga niang iyan sa atubangan kan nagkapirang nagmamasid nin pagigin nauuri sa atension na nakukua kan kaamiga hale sa sarong kamidbid na lalaki. An komento ni Anna biyong namisinterpretar, asin an gabos na paghihingoa nia na aseguraron an saiyang kaamiga na mayo siang intension na makakolog daing ibinunga. An situwasyon na iyan nagin dahelan nin grabeng kakologan nin boot, asin dakol na panahon an uminagi bago biyong ikinatanos ni Anna an pagkamisinterpretar.

An paghusgar sa saindo kan iba sa parate minadepende sa naririsa nindang intension nindo. Kaya natural sanang magkolog an boot kun tawan nin salang kahulogan kan mga tawo an saindong motibo. Tibaad maggurobgutob kamo, na nagsasaboot na mayo man nin dahelan kun taano ta maninigong may makamisinterpretar sa saindo. Para sa saindo, an siring na paghusgar may kinakampihan, mapagtatsar, o biyong sala, asin iyan puedeng makakolog na marhay sa boot​—partikularmente kun halangkaw an pagheling nindo sa opinyon kan mga nagtatao nin bakong makatanosan na paghusgar.

Minsan ngani tibaad nauuyam kamo sa paagi nin paghusgar sa saindo kan mga tawo, angay pa man giraray na igalang an opinyon nin iba. Bako nanggad sa Kristiano an dai pag-intindi sa saboot nin iba, asin nungka tang gugustohon na an satong mga sinasabi o ginigibo magkaigwa nin nakadadanyar na epekto sa iba. (Mateo 7:​12; 1 Corinto 8:12) Kaya may okasyon na tibaad kaipuhan nindong gumibo nin paghihingoa tanganing itanos an napasalang opinyon nin siisay man manongod sa saindo. Minsan siring, an sobrang pagparaisip na ika aprobaran nakaoolang logod, na minagiya sa pagkawara nin paggalang sa sadiri o pakamate na hinahaboan. Total, an saindong tunay na halaga dai minadepende sa kun ano an saboot nin iba.

Sa ibong na lado, tibaad rekonoseron nindo na masarig an basehan kan pagkritika tumang saindo. Iyan puede man na ikakolog nin boot, alagad kun gikan sa boot asin onestong aadmitiron nindo an saindo mismong pagkabakong sangkap, an siring na mga eksperyensia puedeng magin positibo, na magpapahiro sa saindo na gumibo nin kinakaipuhan na mga pagbabago.

Negatibong mga Resulta

An mga pagkamisinterpretar puede o puedeng dai magbunga nin seryosong mga resulta. Halimbawa, kun makadangog kamo nin sarong lalaki na nagtataram nin makosogon sa restawran, tibaad isipon nindo na sia magsalang sobra kamakiamigo o mapagpasikat. Tibaad nasasala kamo. Puedeng an kinakaolay nia may problema sa pagdangog. O tibaad an sarong katabang sa tindahan garo baga bakong marahay an ugale, alagad tibaad maraot an pagmate nia. Maski ngani an siring na mga misinterpretasyon nagbubunga nin negatibong mga impresyon, posibleng marhay na iyan dai mabunga nin seryoso o nagdadanay na epekto. Pero, kun beses an mga pagkamisinterpretar puedeng magprobokar nin grabeng kapahamakan. Estudyare an duwang pangyayari sa kasaysayan kan suanoy na Israel.

Kan nagadan si Nahas, na hade kan Amon, nagsugo si David nin mga mensahero tanganing rangahon an aki kaining si Hanun, na nagpoon nang mamahala bilang kasalida kan saiyang ama. Minsan siring, namisinterpretar an pagsongko kan mga mensahero bilang sarong pag-espiya nin kalaban sa teritoryo kan mga Amonita, na nagpahiro ki Hanun na enot supogon an mga mensahero dangan makiguerra sa Israel. Bilang resulta, kisuerra 47,000 katawo an nagadan​—huli gabos sa pagkamisinterpretar sa marahay na mga intension.​—1 Cronica 19:​1-19.

Sa kapinonan kan kasaysayan kan Israel, saro pang pagkamisinterpretar an naresolberan sa medyo laen na paagi. Nagtogdok an tribo ni Ruben asin Gad saka an kabanga kan tribo ni Manases nin sarong altar na risang-risa sa gilid kan  Salog nin Jordan. Minansay ini kan ibang Israelita bilang akto nin pagigin bakong fiel, sarong pagrebelde tumang ki Jehova. Kun siring sinda nagtiripon para sa aksion militar. Bago gumibo nin anoman na madahas na lakdang, an ibang mga Israelitang ini nagpadara nin mga mensahero tanganing ipahayag an saindang gurobgutob sa hinohonang akto nin pagtraydor. Marahay ngani ta ginibo ninda iyan, ta an mga kagtogdok kan altar nagsimbag na mayo sindang intension na tumalikod sa dalisay na pagsamba. Al kontraryo, an altar maserbing nagdadanay na girumdoman kan saindang pagigin fiel ki Jehova. An pagkamisinterpretar na ini puede kutanang nagresulta sa grabeng garadanan, alagad naolang nin kadonongan an siring na makamomondong kaaabtan.​—Josue 22:​10-34.

Klaripikaron an mga Isyu sa Espiritu nin Pagkamoot

Nakapagtotokdo an pagkomparar sa mga pagkasaysay na ini. Siempre pa, an pagklaripikar sa mga isyu iyo an madonong na gibohon. Sa huring tinokar na pangyayari, siisay baga an nakaaaram kun pirang buhay an ikinaligtas huli sana ta an duwang lado nag-olay? Sa dakol na kaso, daing buhay na nakataya kun dai nindo masabotan an tunay na intension nin iba, alagad tibaad nakataya an pagkakatood. Kaya kun an pagmate nindo may nagibong sala sa saindo an saro, nakasisierto daw kamo na nasasabotan nindo an totoong situwasyon, o namimisinterpretar nindo iyan? Ano an motibo kan tawong iyan? Hapoton nindo sia. An pagmate daw nindo namimisinterpretar kamo? Ipakipag-olay iyan. Dai pagtogotan na makaolang an kapalangkawan.

Nagtao si Jesus nin marahayon na pan-enganyar sa pagresolber sa mga dai pagkasinabotan: “Kun siring, kun dinadara mo an saimong balaog sa altar asin dian saimong magirumdoman na an saimong tugang igwa nin ano man tumang sa saimo, bayaan mo nguna an saimong balaog sa atubangan kan altar, asin maghale ka; makipagkatoninongan ka nguna sa saimong tugang, dangan, kun nakabalik ka na, idolot mo na an saimong balaog.” (Mateo 5:​23, 24) Kaya an tamang gibohon iyo na dolokon sa pribado an tawong iyan, na dai iniimbuelto an iba. Dai makatatabang kun enot na madadangog kan nagkasalang lado an saindong reklamo hale sa ibang tawo. (Talinhaga 17:9) An saindong pasohan maninigo na makipagkatoninongan sa espiritu nin pagkamoot. Kalmadong ipaliwanag an problema sa klarado, simple, dai nag-aakusar na mga tataramon. Ipaliwanag kun ano an saindong namamatean manongod sa situwasyon. Dangan makatanosan na maghinanyog sa punto de vista kan tawong iyan. Dai maghumari sa pag-atribwir nin salang motibo. Magin andam na ipamugtak na an tawong iyan daing maraot na intension. Girumdomon, an pagkamoot “nagtutubod kan gabos na bagay.”​—1 Corinto 13:7.

Siempre, dawa nahusay na an mga pagkamisinterpretar, tibaad igwa pa man giraray nin kakologan nin boot o nagdadanay na negatibong mga epekto. Ano an puedeng gibohon? Kun kinakaipuhan, angay nanggad an paghagad nin sinserong dispensasyon, kaiba kan ano man na ibang aksion na puedeng rasonableng gibohon sa paghusay kan mga bagay-bagay. Sa gabos na siring na situwasyon, an pinagkasalaan na lado maninigong sunodon an ipinasabong na konseho: “Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro. Kun paanong kamo sueltong pinatawad ni Jehova, siring man an gibohon nindo. Alagad, laen pa sa gabos na bagay na ini, isulog nindo an pagkamoot, huli ta iyan sangkap na bungkos nin pagkasararo.”​—Colosas 3:​13, 14; 1 Pedro 4:8.

Sagkod na kita bakong sangkap, magkakaigwa nin mga pagkamisinterpretar asin makokolgan na boot. An siisay man puedeng masala o makapagtaram na garo daing labot o daing kabootan. Sinasabi kan Biblia: “Kita gabos nasisingkog nin dakol na beses. Kun an siisay man dai nasisingkog sa pagtaram, an sarong ini sangkap na tawo, na nakakabusal man kan bilog niang hawak.” (Santiago 3:2) Mantang aram ining marhay ni Jehova Dios, itinao nia sa sato an mga instruksion na ini: “Dai ka maghidale sa saimong espiritu na makolgan an boot, huli ta an pagkolog kan boot iyo an nasa daghan kan mga kablas. Siring man, dai mo ipagkiling an saimong puso sa gabos na tataramon na itinataram nin mga tawo, tangani na dai mo madangog an saimong oripon na nagtataram nin maraot sa saimo. Huli ta an saimong puso nakaaram nanggad na sa dakol na pangyayari ika, ika nanggad, nagtaram nin maraot sa iba.”​—Eclesiastes 7:​9, 21, 22.

 “Si Jehova Nagsisiyasat sa mga Puso”

Paano kun garo baga imposibleng ikorehir an maraot na impresyon sa saindo nin sarong tawo? Dai mawaran nin paglaom. Padagos na kultibaron asin ipaheling an Kristianong mga kualidad sagkod sa pinakamakakaya nindo. Hagadon ki Jehova na tabangan kamong umoswag kun saen nindo kinakaipuhan iyan. An tunay na halaga nindo bilang sarong persona sa katapustapusi bakong an ibang tawo an madeterminar. Solamente si Jehova an puedeng gumibo nin eksaktong ‘pagsiyasat sa mga puso.’ (Talinhaga 21:2) Dawa si Jesus minenos asin hinamak nin mga tawo, alagad dai iyan nakaapektar sa pagmansay ni Jehova sa saiya. (Isaias 53:3) Maski ngani tibaad mapasala sa paghusgar sa saindo an nagkapira, puede nindong ‘ipahayag an laog kan saindong puso’ ki Jehova, na kompiadong maiintindihan nia kamo, “huli ta an pagheling nin Dios bakong arog kan pagheling nin tawo, huling an tawo nagheheling sa kun ano an naheheling kan mga mata; alagad kun manongod ki Jehova, hineheling nia kun ano an puso.” (Salmo 62:​8; 1 Samuel 16:7) Kun kamo magdanay na naggigibo kan marahay, an mga nag-isip nin maraot na impresyon sa saindo tibaad, pag-abot nin panahon, marealisar an saindang sala asin magbago kan saindang opinyon.​—Galacia 6:​9; 2 Timoteo 2:15.

Nagigirumdoman nindo si Antonio, na nasambitan sa kapinonan kan artikulo? Kinosogan nia an saiyang boot na sunodon an sadol na sono sa Kasuratan, asin kinaolay nia an saiyang katood na si Leonardo, na ihinahapot kun ano an nagibo nia na ikinakolog kan boot kaini. An resulta? Nasorpresa si Leonardo. Sia nagsimbag na si Antonio mayo nin anoman na ginibo na ikinakolog kan boot nia asin inasegurar nia sia na mayo siang intension na gumawe nin kontra ki Antonio. Kun garo sia nanlipot, tibaad preokupado sana sia. Naghagad nin dispensasyon si Leonardo ta dai nia tinutuyong makologan an boot kan saiyang katood asin pinasalamatan sia ta ipinaabot an bagay na ini sa saiyang atension. Idinugang nia na sa ngapit, magigin na siang mas maingat tanganing dai makatao nin kaparehong impresyon sa iba pa. An gabos na tension sa tahaw ninda nawara sana, asin an mag-amigo nagin mas dayupot nanggad siring sa dati.

Nungka nanggad na nakaoogma na makamateng namimisinterpretar kita. Minsan siring, kun ginigibo nindo an gabos na posibleng lakdang tanganing klaripikaron an mga isyu asin iaplikar an sono sa Kasuratan na mga prinsipyo nin pagkamoot asin pagpapatawad, posibleng marhay, kakamtan man nindo an kaparehong marahay na mga resulta.

[Nota sa Ibaba]

[Mga Ritrato sa pahina 23]

An pagklaripikar sa mga isyu sa espiritu nin pagkamoot asin pagpapatawad puedeng magbunga nin maogmang mga resulta