Bareta kan mga Parabalangibog kan Kahadean

India—Sarong “Pagkasararo sa Tahaw nin Pagkalaenlaen”

AN “PAGKASARARO sa Tahaw nin Pagkalaenlaen” sarong popular na sarabihon na ginagamit tanganing iladawan an nasyonal na pagsararo sa India. Bakong pasil na makamit an pagkasararo sa mahiwason na nasyon na ini na dakulaon an pagkaralaenlaen sa kultura, lenguahe, relihion, etnikong ginikanan, paggubing, asin pagkakan. Minsan siring, maheheling an siring na pagkasararo sa opisinang pan-administrasyon kan Mga Saksi ni Jehova sa India, dawa ngani an mga boluntaryo na nag-iistar asin nagtatrabaho dian hale sa dakol na estado asin teritoryong unyon saka nagtataram nin dakol na manlaenlaen na lenguahe.

• Midbidon ta si Rajrani​—sarong hoben na babae hale sa Punjab, sa pinakaporong amihanan-solnopan kan India. Kan si Rajrani nag-eeskuela pa, an saro sa saiyang mga kaklase nagpoon na makipag-adal sa Biblia sa mga Saksi ni Jehova. Prinobaran kan daragitang ini na magkainteres si Rajrani sa Biblia. Mantang daing gayo tatao sa Ingles an kaklase asin kan panahon na iyan dai makukua sa Punjabi An Torrengbantayan, hinagad man nia an tabang ni Rajrani na itradusir para saiya an laog kan magasin. Hararom na marhay an nagin impluwensia ki Rajrani kan nabasa nia sa An Torrengbantayan kaya sa ibong kan pagtumang kan saiyang mga magurang, sia uminoswag sagkod sa pagdusay kan buhay nia ki Jehova Dios. Naglilingkod sa Bethel sa India ngonyan, an trabaho nia iyo man sana mismo an nakabukas kan saiyang mga mata sa katotoohan. Tinatradusir nia an Kristianong mga publikasyon sa Punjabi!

• Estudyare man si Bijoe, na hale sa saro pang parte kan India​—an timog-solnopan na estado nin Kerala. Pinahale si Bijoe sa haiskul huli sa neutral na paninindogan durante nin nasyonalistikong mga seremonya. Kasunod kan halawig na kaso sa korte na natapos sa dai malilingawan na kapangganahan para sa dalisay na pagsamba, si Bijoe nagbalik sa eskuelahan. * Sia nag-eskuela man sa kolehio. Minsan siring, naribok an saiyang konsensia kan inmoral na mga kamugtakan duman, kaya sia puminondo sa enot niang taon. Ngonyan pakalihis nin sampulong taon sa Bethel, an pagmate nia mas nakinabang sia sa pagigin miembro kan laen-laen alagad nagkakasararong pamilyang Bethel kisa kan kun pinag-aabot nia an mas halangkaw na edukasyon.

• Si Norma asin Lily parehong labi nang 70 anyos asin dakol nang taon na balo. An kada saro nakalabing 40 taon na sa bilog na panahon na paglilingkod. Si Lily nagtatrabaho sa sangang opisina sa laog na nin mga 20 taon bilang paratradusir kan lenguaheng Tamil. Si Norma nag-abot sa Bethel 13 taon na an nakaagi pakalihis na magadan an saiyang agom. Apuera pa sa pagigin marahay na mga halimbawa nin pagigin mahigos asin sadiosan na mga trabahador, sinda nakapasasarong impluwensia sa bilog na pamilyang Bethel. Gustong-gusto nindang mag-estimar nin mga bisita, asin ikinaoogma nindang makaibanan an mga mas hoben na miembro kan pamilya, na ihinihiras an mga kagayagayahan kan halawig na mga taon nin Kristianong pamumuhay. Asin an mga hoben minabalos paagi sa pag-imbitar sa sainda sa mga kuarto kaini para sa pakikiasosyar asin sa pagtao nin tabang kun kinakaipuhan. Abaa karahay na mga halimbawa nanggad!

Huling napangganahan an pagkakalaen na nagigin dahelan nin iriwal asin dai pagkaoroyon sa dakol na lugar, an mga boluntaryong ini maogmang nagtatrabahong magkairiba tanganing paglingkodan an iba bilang mga miembro kan nagkakasararong pamilyang Bethel sa India.​—Salmo 133:1.

[Nota sa Ibaba]

[Picture Credit Line sa pahina 8]

Retrato sa likod: Mountain High Maps® Copyright © 1997 Digital Wisdom, Inc.