Puedeng Mapasaindo an mga Bendisyon kan Kahadean

AN Kristianong apostol na si Pablo sueltong magtaram nin nagkapirang mayor na lenguahe kan saiyang kaaldawan. Sia nag-ako nin katimbang kan edukasyon sa unibersidad ngonyan. Nasa saiya an gabos na bentaha asin diretso nin sarong siudadano nin Roma. (Gibo 21:​37-40; 22:​3, 28) An mga kredensial na ini puede kutanang magpangyari na sia magin mayaman asin bantog. Pero, sinabi nia: “An mga bagay na pakinabang manongod sa sako, ibinilang ko an mga iyan na nawara dahel ki Cristo . . . asin ibinibilang ko an mga ini na tapok, tanganing makamtan ko si Cristo.” (Filipos 3:​7, 8) Taano ta sinabi ni Pablo an siring kaiyan?

Dating midbid bilang Saulo na taga Tarso asin bilang sarong paralamag kan mga “nasa Dalan,” si Pablo nagin may pagtubod pakatapos na tawan nin bisyon kan binuhay liwat asin pinamuraway na si Jesus. (Gibo 9:​1-19) Para ki Pablo, an eksperyensiang ini sa dalan pasiring sa Damasco pinatunayan na daing kadudaduda na si Jesus an ipinanugang Mesiyas, o Cristo, an magigin namamahala sa ipinanugang Kahadean. Iyan nagpangyari man nin pambihirang pagkaliwat sa pamumuhay ni Pablo, siring kan ipinaririsa kan saiyang mapuersang pahayag na sinabi sa enotan. Sa ibang pagtaram, huling sinsero asin may onestong puso, si Pablo nagsolsol.​—Galacia 1:​13-​16.

Sa Biblia, an berbong “magsolsol” sa parate tinatradusir hale  sa Griegong termino na sa literal nangangahulogan “pakatapos maaraman,” bilang kabaliktaran nin “maaraman antes pa.” Sa siring, kalabot sa pagsolsol an pagbago nin isip, aktitud, o katuyohan, paghabo sa dating mga ugale bilang dai nakapaninigo. (Gibo 3:​19; Kapahayagan 2:5) Para ki Pablo, dai nia tinogotan na an importanteng pangyayaring iyan sa dalan pasiring sa Damasco magdanay na sanang sarong emosyonal o inaapod pa ngani na relihiosong eksperyensia. Para sa saiya idto sarong pakarealisar sa bagay na an saiyang dating pamumuhay, na ignorante ki Cristo, daing kamanungdanan. Narealisar nia man na tanganing makinabang sa saiyang bagong manompongan na kaaraman manongod sa Cristo, may kaipuhan siang gibohon tanganing itanos an saiyang pamumuhay.​—Roma 2:​4; Efeso 4:24.

Sarong Pagbabago na Nagbunga nin mga Bendisyon

Dati, an kaaraman ni Pablo dapit sa Dios sa kadaklan hale sa sekta kan mga Fariseo, na sia miembro kaiyan. Kaiba sa saindang mga paniniwala an dakol na pilosopiya asin tradisyon nin tawo. Huli sa relihiosong mga prehuwisyo, an kaigotan asin mga paghihingoa ni Pablo napasala. Minsan ngani sia naghohona na sia naglilingkod sa Dios, sa katunayan sia nakikilaban tumang sa saiya.​—Filipos 3:​5, 6.

Pakatapos na akoon an tamang kaaraman manongod ki Cristo asin sa saiyang kabtang sa katuyohan nin Dios, nasabotan ni Pablo na sia napapaatubang sa pagpili: Sia daw maninigong magdanay na Fariseo asin padagos na magkamit nin posisyon asin halangkaw na pagheling, o maninigo daw na bagohon nia an saiyang pamumuhay asin ponan na gibohon an ano man na kaipuhan tanganing kamtan an pag-aprobar nin Dios? Marahay sana ta ginibo ni Pablo an tamang pagpili, huli ta sinabi nia: “Dai ko ikinasusupog an maogmang bareta; iyan, sa katotoohan, iyo an kapangyarihan nin Dios para sa kaligtasan kan lambang saro na nagtutubod, sa Judio nguna asin siring man sa Griego.” (Roma 1:16) Si Pablo nagin maigot na parahulit kan maogmang bareta manongod sa Cristo asin sa Kahadean.

Pakalihis nin dakol na taon, sinabihan ni Pablo an saiyang mga kapwa Kristiano: “Dai ko pa ibinibilang an sakong sadiri na nakapangapot na kaiyan; alagad igwa nin sarong bagay manongod kaiyan: Linilingawan ko an mga bagay na nasa hudian asin pinipirit kong aboton an mga bagay na nasa enotan, pinupunta ko an pasohan para sa premyo na pag-apod sa itaas nin Dios paagi ki Cristo Jesus.” (Filipos 3:​13, 14) Si Pablo nakinabang sa maogmang bareta huli ta gikan sa boot niang binayaan an nagpaparayo sa saiya sa Dios asin bilog na puso niang pinag-aabot an mga pasohan na kaoyon kan katuyohan nin Dios.

Ano an Gigibohon Nindo?

Tibaad kasuarin pa sana nindo nadangog an maogmang bareta kan Kahadean. Nakaakit daw sa saindo an paglaom na mabuhay sagkod lamang sa sarong sangkap na paraiso? Natural sana, ta gabos kita igwa nin natural na pagmawot na mabuhay asin magkaigwa nin buhay na may katoninongan asin katiwasayan. Sinasabi kan Biblia na ibinugtak nin Dios “an daing talaan na panahon” sa satong puso. (Eclesiastes 3:11) Kaya natural sana para sa sato na maglaom para sa panahon na an mga tawo puedeng mabuhay sagkod lamang sa katoninongan asin kaogmahan. Asin iyan an iinaalok kan maogmang bareta kan Kahadean.

Minsan siring, tanganing magin totoo an paglaom na iyan, kaipuhan nindong magsiyasat asin aramon kun ano an maogmang bareta. Si apostol Pablo nagsadol: ‘Patunayan mo sa saimong sadiri kun ano an marahay asin inaako patin sangkap na kabotan nin Dios.’ (Roma 12:2) Kaya, arog ki Pablo, pakatapos na magkaigwa nin kaaraman asin pakasabot, kaipuhan nindong pumili.

Sa ibong na lado, tibaad igwa na kamo nin mga paniniwala may labot sa saindong ngapit. Girumdomon na si Saulo igwa na kan sadiri niang mga ideya manongod sa kabotan nin Dios bago sia nagin si apostol Pablo. Alagad imbes na maglaom nin milagrosong kapahayagan hale sa Dios, taano ta dai iyan siyasaton basado sa katunayan? Hapoton an saindong sadiri: ‘Aram ko daw talaga kun ano an kabotan nin Dios mapadapit sa katawohan asin sa daga? Anong prueba an ikatatao ko tanganing patunayan an sakong mga paniniwala? Makakapasar daw an sakong prueba kun siyasaton sa liwanag kan Tataramon nin Dios, an Biblia?’ Mayong mawawara sa saindo kun sisiyasaton nindo an saindong relihiosong mga paniniwala sa paaging ini. Sa katunayan, maninigo na mawoton nindong gibohon iyan huli ta sinasadol kita kan Biblia: “Siertohon an gabos na bagay; pangaptan  nin higot an marahay.” (1 Tesalonica 5:21) Total, bako daw na an talagang mahalaga iyo an pag-aprobar nin Dios?​—Juan 17:​3; 1 Timoteo 2:​3, 4.

Tibaad an mga namomoon sa relihion manuga sa sato nin daing sagkod na ngapit. Alagad apuera sana kun an panugang iyan basado sa mga katokdoan kan Biblia, iyan dai makatatabang sa sato na kamtan an mga bendisyon kan Kahadean nin Dios. Sa saiyang bantog na Sermon sa Bukid, si Jesus mapuersang nagpatanid: “Bakong gabos na nagsasabi sa sako, ‘Kagurangnan, Kagurangnan,’ makalalaog sa kahadean kan kalangitan, kundi idtong naggigibo kan kabotan kan sakong Ama na nasa kalangitan.”​—Mateo 7:21.

Mangnoha an pagdodoon ni Jesus sa paggibo kan kabotan kan saiyang Ama bilang basehan sa pag-ako kan mga bendisyon kan Kahadean nin Dios. Sa ibang pagtaram, an garo baga pagkaigwa nin itsura nin pagigin diosnon bako pirmeng aprobado nin Dios. Sa katunayan, si Jesus nagsabi pa: “Balakid an masarabi sa sako sa aldaw na iyan, ‘Kagurangnan, Kagurangnan, bakong kami naghula sa ngaran mo, asin nagpaluwas nin mga demonyo sa ngaran mo, patin naggibo nin dakol na ngangalasan sa ngaran mo?’ Alagad ta sasabihan ko sinda: Dai ko kamo noarin man namidbid! Humarayo kamo sa sako, kamong mga paragibo nin katampalasanan.” (Mateo 7:​22, 23) Malinaw nanggad, an mahalaga iyo na siertohon ta na tama an pagkasabot niato sa kun ano talaga an maogmang bareta kan Kahadean dangan humiro sono dian.​—Mateo 7:24,25.

May Makukuang Tabang

Sa laog na nin labing 100 na taon, an Mga Saksi ni Jehova naghuhulit kan maogmang bareta kan Kahadean nin Dios. Paagi sa babasahon asin sa berbal na paagi, tinatabangan ninda an mga tawo sa bilog na kinaban tanganing makua an tamang kaaraman dapit sa kun ano an Kahadean, anong mga bendisyon an itatao kaiyan, asin ano an dapat gibohon nin saro tanganing kamtan an siring na mga bendisyon.

Ineenkaminar niamo kamo na himateon an mensahe na ihinuhulit kan Mga Saksi ni Jehova. Paagi sa pag-ako asin paghiro oyon sa maogmang bareta, puede nindong akoon an dakulang mga bendisyon bako sana ngonyan kundi siring man sa ngapit kun an Kahadean nin Dios mamahala na sa bilog na daga.—1 Timoteo 4:8.

Humiro na ngonyan, huli ta an mga bendisyon kan Kahadean nin Dios harani na!

[Mga Ritrato sa pahina 7]

Paagi sa babasahon asin berbal na paagi, ihinuhulit kan Mga Saksi ni Jehova an maogmang bareta kan Kahadean nin Dios