Kun Paano Makakaya an Negatibong mga Saboot

● Si Asaf nagreklamo: “Tunay na basang sana an paglinig ko sa sakuyang puso asin an paghanaw ko kan sakuyang mga kamot sa inosensia. Asin ako dinadamat sa bilog na aldaw, asin an pagtatanos sa sako kada aga.”​—Salmo 73:​13, 14.

● Si Baruc nag-agrangay: “Herak man sa sakuya ngonyan ta dinugangan ni Jehova nin kamondoan an sakuyang kakologan! Napagal ako huli sa sakuyang pag-agagha, asin dai ako nakanompong nin pahingaloan.”​—Jeremias 45:3.

● Si Noemi nanangis: “Tinawan nanggad ako nin dakulang kapaitan kan Makakamhan sa gabos. Ako pano kan ako humale, asin pinapuli ako ni Jehova na daing laog. Taano ta aapodon nindo akong Noemi, mantang si Jehova an nagpasupog sa sakuya asin an Makakamhan sa gabos an nagtao sa sakuya nin kasakitan?”​—Rut 1:20, 21.

AN Biblia igwa nin balakid na halimbawa nin fiel na mga parasamba ki Jehova na kun beses nadadaog kan mga pakamate nin panluluya nin boot. An totoo bilang bakong sangkap na mga tawo gabos kita nakakaeksperyensia nin siring na mga pakamate sa panapanahon. An nagkapira sa sato tibaad mas madaling panluyahan nin boot​—tibaad may pagkaherak sa sadiri pa ngani​—kisa iba huli sa inagihan na makaturotristeng mga eksperyensia.

Minsan siring, kun dai kokontrolon, an mga emosyon na ini puedeng rumaot kan saindong relasyon sa iba asin ki Jehova Dios. An sarong Kristiana na may tendensiang maherak sa sadiri nag-aadmitir: “Sinayumahan ko an dakol na imbitasyon sa sosyal na mga aktibidad huli ta naghohona ako na bako akong maninigo na makaibaiba kan mga yaon sa kongregasyon.” Kanigoan kanakapanluluya nin biyo kan puedeng magin epekto kan siring na mga saboot sa buhay nin sarong tawo! Ano an puede nindong gibohon tanganing labanan iyan?

Dumayupot ki Jehova

Sa Salmo 73, prangkang isinurat ni Asaf an manongod sa saiyang pagkaribaraw. Kan ikinokomparar an sadiri niang situwasyon sa asensadong pamumuhay kan mga maraot, naara sia. Naobserbaran nia na an mga maraot maabhaw asin madahas, asin garo baga nakadudulag sa padusa. Dangan nagpahayag si Asaf nin mga pagduda manongod sa kahalagahan kan saiyang pagmamaigot na magibo an matanos na dalan nin buhay.​—Salmo 73:3-9, 13, 14.

Naobserbaran daw nindo, arog ni Asaf, an garo baga pag-asenso kan maraot na nagpapasikat kan saindang paggibo nin sala? Paano daw pinaglabanan ni Asaf an saiyang negatibong mga saboot? Sia nagpapadagos: “Pinagparahorophorop ko tanganing matalastas ko ini; iyan masakit nanggad sa sakong mga mata, sagkod na naglaog ako sa santuaryong grande nin Dios. Boot kong matalastasan an saindang kasasagkodan.” (Salmo 73:​16, 17) Si Asaf naggibo nin positibong mga lakdang paagi sa pagdolok ki Jehova sa pamibi. Sa paggamit kan mga tataramon na ginamit sa huri ni apostol Pablo, pinogolan ni Asaf an “pisikal na tawo” paagi sa pagpukaw kan “espirituwal na tawo” na yaon sa laog nia mismo. Huli sa nakabalik na espirituwal na bisyon, nasabotan nia na ikinaoongis ni Jehova an karatan asin na sa itinalaan na panahon an mga maraot papadusahan.​—1 Corinto 2:​14, 15.

Kanigoan kahalaga na togotan nindo an Biblia  na tabangan kamong tumorohok sa katunayan nin buhay! Ipinagigirumdom sa sato ni Jehova na sia bakong buta sa mga ginigibo kan mga maraot. Itinotokdo kan Biblia: “Dai kamo palagalag: An Dios dai maoolog-olog. Huli ta ano man an itinatanom nin tawo, ini man an saiyang aanihon . . . Kaya dai kita mag-ontok sa paggibo nin karahayan.” (Galacia 6:7-9) Ibubugtak ni Jehova an maraot sa “dagang mahalnas”; pangyayarihon nia na sinda “maholog sa kalaglagan.” (Salmo 73:18) An hustisya nin Dios an pirmeng mangingibabaw sa katapustapusi.

An dayaday na programa nin espirituwal na pagpapakakan sa lamesa ni Jehova asin an kapakipakinabang na pakikiasosyar sa banwaan nin Dios an matabang sa saindo na pakosogon an saindong pagtubod asin mapangganahan an panluluya nin boot o iba pang negatibong mga saboot. (Hebreo 10:25) Arog ni Asaf, paagi sa pagdadanay na dayupot sa Dios, maeeksperyensiahan nindo an saiyang mamomoton na pagsuportar. Si Asaf nagpapadagos: “Ako danay na nasa kaibanan mo; kinapotan mo an too kong kamot. Paagi kan saimong hatol gigiyahan mo ako, asin sa ngapit dadarahon mo pa ngani ako sa kamurawayan.” (Salmo 73:​23, 24) Nanodan kan sarong Kristiano na inabuso kan sia aki pa an kadonongan kan mga tataramon na ini. “An pagdadanay na dayupot sa pakikiasosyar sa kongregasyon,” an sabi nia, “an nagpaheling sa sako kan ibang anggulo kan buhay. Malinaw na marhay na naheling ko na an Kristianong kamagurangan mamomoton, na bako sindang mga pulis kundi mga pastor.” Iyo, may mahalagang marhay na kabtang an madinamayon na Kristianong kamagurangan sa paghale kan nakakaraot na mga emosyon.​—Isaias 32:​1, 2; 1 Tesalonica 2:​7, 8.

Akoon an Konseho ni Jehova

Si Baruc, an sekretaryo ni Jeremias na propeta, nag-agagha huli sa emosyonal na tension sa saiyang asignasyon. Minsan siring, maboot na ipinokus ni Jehova an atension ni Baruc sa katotoohan. “‘Kun para sa saimo, nagpaparahanap ka nin darakulang bagay para sa saimo man sana. Dai ka magparahanap. Huli ta uya may dara akong kapahamakan sa gabos na laman,’ an sabi ni Jehova, ‘asin itatao ko sa saimo an saimong kalag bilang sinamsaman sa gabos na lugar na saimong padumanan.’”​—Jeremias 45:2-5.

Sa prangkang tataramon ipinaliwanag ni Jehova na an mismong maimot na pinag-aaabot ni Baruc an ginikanan kan saiyang pagkadesganar. Si Baruc dai makanompong nin kagayagayahan sa tao nin Dios na asignasyon sa saiya mantang kadungan kaiyan nagpaparahanap nin darakulang bagay para sa saiya man sana. Tibaad manompongan man nindo na an talagang positibong paagi nin pagdaog sa panluluya nin boot iyo an paglikay sa mga disturbo asin maogmang pag-ako sa katoninongan nin isip na makukua sa diosnon na pagkakontento.​—Filipos 4:6,7.

Dai tinogotan kan nabalong si Noemi na pasukoon sia kan kasakitan sa Moab kan an saiyang agom asin duwang aki nagadan. Minsan siring, may nagpaparisa na sa laog nin kadikit na panahon nagkaigwa sia nin kapaitan nin boot sa sadiri nia mismo asin sa duwa niang manugang na babae. Sa pagsubol nia sa sainda, sinabi ni Noemi: “Dahel sa saindo  ini mapaiton nanggad sa sako, na an kamot ni Jehova inunat tumang sa sako.” Sa giraray, kan uminabot sia sa Betlehem, iininsistir nia: “Dai nindo ako pag-apodon na Noemi [“An Sakong Pagigin Nakagagayagaya”]. Apodon nindo akong Mara [“Kapaitan”], huli ta tinawan nanggad ako nin dakulang kapaitan kan Makakamhan sa gabos.”​—Rut 1:​13, 20.

Minsan siring, dai isinuway ni Noemi an saiyang sadiri sa danay na pagparamondo​—na harayo ki Jehova asin sa saiyang banwaan. Nadangog nia sa Moab na “si Jehova nagtao kan saiyang atension sa saiyang banwaan paagi sa pagtao sa sainda nin tinapay.” (Rut 1:6) Nasabotan nia na an pinakamarahay na lugar para sa saiya iyo an sa kaibahan kan banwaan ni Jehova. Pakatapos kaiyan, kaiba kan saiyang manugang na babaeng si Rut, nagbuelta si Noemi sa Juda asin ekspertong giniyahan si Rut kun ano an maninigo kaining igawe sa saindang paryenteng si Booz, an paratubos kaini.

Siring man ngonyan, an mga maimbod na nagadanan nin agom mapangganang nakakaya an emosyonal na tension paagi sa pagdadanay na sibot sa laog kan Kristianong kongregasyon. Arog ni Noemi, padagos sindang nagmamaigot sa espirituwal na mga bagay, na aroaldaw na nagbabasa kan Tataramon nin Dios.

Mga Pakinabang sa Pag-aplikar kan Diosnon na Kadonongan

An mga pagkasaysay na ini sa Biblia nagtatao nin pakarorop sa kun paano maaatubang nin saro an mga epekto nin negatibong mga saboot. Si Asaf naghagad nin tabang sa santuaryo ni Jehova asin pasensiosong naghalat ki Jehova. Naghimate si Baruc sa hatol asin linikayan an materyalistikong mga disturbo. Padagos na nagin sibot si Noemi sa kaibanan kan banwaan ni Jehova, na iinaandam an hoben na si Rut para sa mga pribilehio nia sa pagsamba sa tunay na Dios.​—1 Corinto 4:7; Galacia 5:26; 6:4.

Puede nindong paglabanan an panluluya nin boot asin iba pang negatibong mga saboot paagi sa paghorophorop sa banal na mga kapangganahan na itinao ni Jehova sa saiyang banwaan, sa indibiduwal asin grupo. Sa katuyohan na iyan, horophoropon an kadarudakulaing akto nin pagkamoot ni Jehova sa pagtao kan pantubos para sa saindo. Apresyaron an tunay na pagkamoot sa Kristianong kasararoan nin magturugang. Isentro an saindong buhay sa bagong kinaban nin Dios na haranihon na. Asin maghimate logod kamo na arog ni Asaf: “Kun para sa sako, an pagrani sa Dios marahay para sa sako. Ibinugtak ko sa Soberanong Kagurangnan na Jehova an sakuyang pailihan, tanganing ipahayag an gabos mong gibo.”—Salmo 73:28.