Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Sa Roma 5:​3-5, taano ta ilinista ni apostol Pablo an paglaom sa poro kan pagkasunodsunod?

Iinatubang ni Pablo an pagkasunodsunod nin mga bagay na naeeksperyensiahan nin mga Kristiano​—kahorasaan, pakatagal, pagkainooyonan, asin paglaom. An “paglaom” na ini bakong an enot na paglaom na nakakamtan nin saro hale sa Biblia, kundi iyan an napakosog, ruminarom, lakop na paglaom na puedeng makamtan nin sarong Kristiano sa pag-agi nin panahon.​​—12/15, pahina 22-3.

• Taano an sarong Kristiano ngonyan ta puedeng magin interesado sa mga kawat na ginibo sa suanoy na Grecia?

An pakasabot sa klase asin mga kostumbre kan mga kawat na idto makatatao nin liwanag sa dakol na bersikulo sa Biblia. An nagkapira kaiyan nasasambitan an ‘pakikipagdaogan sono sa mga susundon,’ ‘pagbaya kan gabos na kagabatan asin pagheling sa halimbawa ni Jesus,’ ‘pagdalagan na may pakatagal,’ asin pagkamit kan korona, o premyo. (2 Timoteo 2:5; 4:​7, 8; Hebreo 12:​1, 2; 1 Corinto 9:​24, 25; 1 Pedro 5:4)​​—1/1, pahina 28-​30.

• Anong bagong paagi sa pagpahayag kan maogmang bareta an pinonan kan Enero 1914?

Ilinuwas kaidto an “Photo-Drama of Creation.” Iyan kompuesto nin apat na kabtang na pasale na pinagkombinar an mga kabtang nin pelikula asin ginatos na de-kolor na glass slide, na an kadaklan kaini may kadungan na o kaibang mga rekording sa ponograpo nin mga pahayag na nagpapaliwanag. Beinte kan Dramang ini an iinandam asin lakop na ginamit sa pagtokdo sa mga tawo kan mensahe kan Biblia.​​—1/15, pahina 8-9.

• Paano napapalaen sa sarong legal na korporasyon an Namamahalang Grupo?

Minsan ngani an mga direktor nin sarong legal na korporasyon iineelehir sa katongdan kan mga miembro kaiyan, an Namamahalang Grupo bakong nombrado nin siisay man na tawo kundi nombrado ni Jesu-Cristo. Dai kaipuhan na an mga direktor nin manlaenlaen na korporasyon na ginagamit kan Mga Saksi ni Jehova magin miembro kan Namamahalang Grupo. Sa nakaagi pa sanang taonan na miting kan Watch Tower Bible and Tract Society of Pennsylvania, an mga miembro kan Namamahalang Grupo na naglilingkod bilang mga direktor asin opisyal kaiyan boluntaryong nagdemitir sa saindang mga katongdan. An mga puestong nabakante pinanoan nin maygurang na mga tugang na lalaki na kabilang sa “ibang karnero.” (Juan 10:16) Sa siring an Namamahalang Grupo mas dakol na panahon na magagamit sa pag-andam nin espirituwal na kakanon asin sa pag-asikaso pa ngani kan espirituwal na mga pangangaipo kan mga tugang sa bilog na kinaban.​—1/15, pahina 29, 31.

• Anong duwang halimbawa sa Biblia an puede niatong siyasaton sa pag-aram kun paano makapanggagana sa panluluya nin boot?

An saro iyo si Ana, an ina ni Samuel. Puede kutana niang tinogotan an saiyang sadiri na manluya an boot kan sia napasalang husgaran ni Eli, an halangkaw na saserdote nin Israel. Imbes, prangka alagad may paggalang na iinatubang nia sa saiya an mga katunayan. Dugang pa, si Ana dai nagtanom nin raot nin boot ki Eli. An ikaduwa iyo si Marcos, na siertong nanluya an boot kan habo ni apostol Pablo na iiba sia sa pagmimisyonero. Imbes na biyong papanluyahon sia kan pagkawara kan pribilehiong ini, ipinadagos nia an aktibo niang paglilingkod, na nagbiahe kaiba ni Bernabe.​​—2/1, pahina 20-2.

• Taano ta maninigong mag-ingat an mga Kristiano manongod sa pagtao sa iba, o pag-ako hale sa sainda, nin mga kopya nin mga programa sa komputer?

An kadaklan sa mga programa sa komputer (kaiba an mga kawat) sakop nin lisensia na linilimitaran an kagsadiri/naggagamit sa pag-instalar kan programa sa saro sanang komputer. Sa parate paglapas sa ley kan deretsong pagpublikar an pagkopya para sa iba, dawa kun itinatao niato iyan nin libre. An mga Kristiano boot na kumuyog sa ley, na ‘itinatao ki Cesar an mga bagay na ki Cesar.’ (Marcos 12:17)​​—2/15, pahina 28-9.

• Siisay si Cirilo asin Metodio, asin anong kontribusyon sa pag-adal sa Biblia an ginibo ninda?

Sinda magtugang na namundag sa Tesalonica, Grecia, kaidtong ikasiyam na siglo. Naggibo sinda nin nasusurat na abece para sa lenguahe nin mga Eslavo asin trinadusir an kadaklan na kabtang kan Biblia sa Esclavonio.​​—3/1, pahina 28-9.

• Ano an kahulogan kan fraseng “pag-asikaso sa espiritu”?​​—Roma 8:6.

Iyan nangangahulogan nin pagigin kontrolado, dominado, asin pinahihiro kan aktibong puersa ni Jehova. Puede niatong togotan an espiritu nin Dios na humiro sa sato paagi sa pagbasa asin pag-adal kan Biblia, paagi sa pagkuyog sa ley nin Dios nin bilog na puso, asin paagi sa pamimibi para sa espiritu nin Dios.​​—3/15, pahina 15.

• Ano an puede niatong gibohon kun sa pagmate niato namimisinterpretar kita?

Mahalaga na hingoahon na klaripikaron an isyu sa espiritu nin pagkamoot. Kun iyan garo baga bakong mapanggana, dai madesesperar. Humagad nin pakasabot asin tabang ki Jehova, na “nagsisiyasat sa mga puso.” (Talinhaga 21:2; 1 Samuel 16:7)​​—4/1, pahina 21-3.