“Sarong Dai Risang Peligro sa Salud kan Publiko”

MAKANGANGALAS na un-tersio kan nasa edad nang mga naggagamit kan Internet sa Estados Unidos an nagheling na nin sarong klase nin seksuwal na site, an ihinayag nin sarong dai pa sana nahahaloy na surbey manongod sa on-line na sekso. Kadakol na tawo an nagpapadara ngonyan sa saindang seksuwal na mga kamawotan paagi sa Internet. “Ini sarong dai risang peligro sa salud kan publiko na marikas na naglalakop, sa sarong kabtang, huli ta kakadikit an rinerekonoser iyan bilang siring o sineseryoso iyan,” an sabi ni Dr. Al Cooper, an sikologo na naggibo kan surbey.

Sairisay an nangorognang madaling mabiktima nin siring na cybersex? “An mga naggagamit na an seksuwalidad tibaad napogolan asin nalimitaran sa bilog nindang buhay” alagad “bigla na sanang nakanompong nin labi-labing suplay nin seksuwal na oportunidad” sa Internet, an sabi ni Dr. Cooper.

Minsan siring, an kadaklan sa mga parateng nagheheling nin seksuwal na mga site, ibinibilang na daing peligro an ginigibong iyan. Talaga daw? Kun paanong an sarong adikto sa droga luway-luway na nakakaya an droga na kinaaadiktohan nia, an dakol na adikto sa cybersex naghahanap nin orog pang seksuwalidad sa Internet tanganing panigoan an saindang mga paghimuyawot. Tara, tibaad isapeligro pa ngani ninda an saindang trabaho asin an saindang relasyon sa saindang agom!

Minsan siring, an mga nagmamawot na paogmahon an Dios may dugang pang dahelan na likayan an pagheling nin seksuwal na mga site sa Internet. An Tataramon nin Dios nagsasadol: “Gadanon nindo, kun siring, an mga kabtang kan saindong hawak na yaon sa ibabaw kan daga kun dapit sa pakikisaro, karigsokan, seksuwal na horot, nakakokolog na mawot, asin kaaraan, na idolatriya. Huli sa mga bagay na iyan madatong an kaanggotan nin Dios.” (Colosas 3:​5, 6) Tanganing ‘magadan an mga kabtang kan saiyang hawak’ may koneksion sa maating seksuwal na horot, an sarong tawo nangangaipong kultibaron an makosog na pagkamoot ki Jehova Dios. (Salmo 97:10) Kun naririsa nia na sia naaakit kan peligro sa salud kan publiko na cybersex, kaipuhan niang parigonon an saiyang pagkamoot ki Jehova paagi sa pag-adal kan Tataramon nin Dios, an Biblia. An nakararahay na pakikiasosyar sa mga Saksi ni Jehova sa lokal na Kingdom Hall makatatabang na marhay sa sarong tawo na maparigon an saiyang determinasyon na paogmahon an Dios.