Kun Paano Nakaapektar sa Duwang Babae an Pagigin Balo
Kun Paano Nakaapektar sa Duwang Babae an Pagigin Balo
SI Sandra sarong balo na taga Australia. Kan an saiyang agom magadan pirang taon na an nakaagi, grabeng pagkabigla an tolos-tolos na nagin reaksion ni Sandra. “An pakaaram na biglang nawara an sakong agom asin pinakadayupot na katood nakalunos sa sako. Dai ko talaga magirumdoman kun paano ako nakapuli haleng ospital o kun ano an ginibo ko sa bilog na aldaw na idto. Durante kan suminunod na nagkapirang semana, an sakong takot nagin dai nahahaleng pisikal na kolog.”
Si Sandra igwa nin mas matuang katood, si Elaine, na nabalo sa laog na nin mga anom na taon. Inataman ni Elaine an saiyang agom, si David, sa laog nin anom na bulan bago sia nagadan sa kanser. Grabe an saiyang kamondoan kaya dai nahaloy pagkagadan kan saiyang agom, sia temporaryong nabuta. Pakalihis nin duwang taon sia nadismayo sa publiko. An saiyang doktor mayong nadiskobreng senyal nin pisikal na helang. Minsan siring, nadiskobre nia na si Elaine haloy nang pinopogolan an saiyang kamondoan, kaya irinekomendar nia na sia pumuli asin hingoahon na marhay na maghibi. “Haloy-haloy bago ko nakaya an sakong kamondoan,” an inadmitir ni Elaine, na nagsabi pa na kun namomondo, “minalaog pa ngani ako sa kuartong torogan asin tinatakopan ko an sakong payo kan mga gubing ni David.”
Iyo, an kagadanan nin sarong namomotan na agom puedeng magin dahelan nin laen-laen na reaksion, huli ta an talagang kalabot sa pagigin balo bako sanang pamumuhay na daing agom. Halimbawa, may paniwala si Sandra na sa laog nin kadikit na panahon nawara sia kaidto sa saiyang sadiri. Arog kan dakol na iba pa na nabalo kasuarin pa sana, an pagmate nia madali siang mabiktima, bakong ligtas. Nagigirumdoman ni Sandra: “Mantang ako natood na an sakong agom an naggigibo nin ultimong mga desisyon, bigla akong nabayaan na nagsosolo sa paggibo nin siring na mga desisyon. Naraot an sakong torog. Grabe an kapagalan ko. Nasasakitan ako maski sa kun ano an dapat gibohon.”
An mga estorya na kaagid kan ki Sandra asin Elaine naootro aroaldaw sa bilog na kinaban. An mga helang, aksidente, guerra, paglinig etniko, asin kadahasan sa pankagabsan nagkokontribwir sa nagdadakol na babaeng balo. * An dakol sa mga babaeng ini sinasadiri sana an pagdusa, na dai aram kun ano an gigibohon. Ano an puedeng gibohon nin mga katood asin paryente tanganing tabangan an mga nag-aadaptar sa pagigin balo? An minasunod na artikulo may mga suhestion na puedeng makatabang.
[Nota sa Ibaba]
^ par. 5 An ibang mga babae nasa kaagid na situwasyon kan sa mga babaeng balo huli ta binayaan sinda kan saindang agom. Minsan ngani an separasyon asin diborsio nagbubunga nin napapalaen na mga problema, an dakol na prinsipyo na tinokar sa minasunod na artikulo puede man na makatabang sa mga babae na nasa kamugtakan na ini.