Maggayagaya sa Kaibahan kan Maogmang Dios

“Ultimo, mga tugang, padagos kamong maggayagaya, . . . asin an Dios nin pagkamoot asin nin katoninongan mapapasaindo.”—2 CORINTO 13:11.

1, 2. (a) Taano ta dakol an mayo nin kagayagayahan sa buhay? (b) Ano an kagayagayahan, asin paano ta iyan makukultibar?

SA MAKAMOMONDONG mga aldaw na ini, an dakol na tawo daing gayong naheheling na dahelan na maggayagaya. Kun may trahedyang mangyari sa sainda o sa namomotan ninda, tibaad makamate sinda nin arog ki Job kan suanoy, na nagsabi: “An tawo, na namundag sa babae, halipot an buhay asin pano nin kasakitan.” (Job 14:1) An mga Kristiano bakong libre sa mga tension asin kapurisawan sa “delikadong mga panahon [na ini] na masakit pakibagayan,” asin bakong makangangalas na an fiel na mga lingkod ni Jehova kun beses pinanluluyahan nin boot.​—2 Timoteo 3:1.

² Sa ibong kaiyan, an mga Kristiano puedeng maggayagaya, dawa kun nag-aagi nin pagbalo. (Gibo 5:​40, 41) Tanganing masabotan kun paano ini posible, estudyare nguna kun ano an kagayagayahan. An kagayagayahan tinawan nin kahulogan na “an emosyon na pinukaw kan pagkaigwa nin o pag-antisipar sa bagay na marahay.” * Bilang resulta, kun tatawan ta nin panahon na isip-isipon an presenteng mga bendisyon niato mantang hinohorophorop an mga kagayagayahan na naghahalat sa sato sa bagong kinaban nin Dios, puede kitang maggayagaya.

3. Sa anong sentido masasabi na an gabos igwa minsan paano nin mga dahelan na maggayagaya?

³ An gabos igwa minsan paano nin mga bendisyon na dapat ipagpasalamat. An sarong payo nin pamilya tibaad nawaran nin trabaho. Natural sana, nahahadit sia. Boot niang sustentohan an saiyang mga namomotan. Pero, kun makosog pa an saiyang hawak asin marahay an salud, puede niang ipagpasalamat iyan. Kun makakua na sia nin trabaho, makakapagtrabaho sia nin husto. Sa ibong na kampi, an sarong Kristiana tibaad nagkaigwa nin nagpapaluyang helang. Pero, puede niang ipagpasalamat an suporta nin mamomoton na mga katood asin kapamilya na nagtatabang sa saiya na atubangon nin may dignidad asin kosog nin boot an saiyang helang. Asin an gabos na tunay na Kristiano, ano man an saindang kamugtakan, puedeng ipaggayagaya an pribilehio na namidbid ninda si Jehova, an “maogmang Dios,” asin si Jesu-Cristo, an “maogma asin iyo sanang Paraboot.” (1 Timoteo 1:11; 6:15) Iyo, pinakamaogma si Jehova Dios asin si Jesu-Cristo. Napagdanay ninda an saindang kagayagayahan apisar kan bagay na an mga kamugtakan sa daga laen nang marhay sa katuyohan ni Jehova sa kapinonan. Dakula an ikatotokdo sa sato  kan saindang halimbawa sa kun paano papagdadanayon an satong kagayagayahan.

Nungkang Nawaraan Saindang Kagayagayahan

4, 5. (a) Ano an nagin reaksion ni Jehova kan magrebelde an enot na mga tawo? (b) Sa anong paagi si Jehova nagdanay na igwa nin positibong aktitud dapit sa katawohan?

⁴ Sa tatamnan nin Eden, si Adan asin Eva igwa nin marahayon na salud asin sangkap na isip. Igwa sinda nin mabungang trabaho na gigibohon asin marahayon na mga kamugtakan sa palibot na dian iyan gigibohon. An pinakamarahay sa gabos, igwa sinda nin pribilehio na magkomunikar nin regular ki Jehova. Katuyohan nin Dios na sinda magkaigwa nin maogmang ngapit. Alagad an enot niatong mga magurang dai nanigoan sa gabos na marahay na balaog na ini; hinabon ninda an ipinangangalad na bunga sa “kahoy kan pakamidbid sa marahay asin maraot.” An sumbikalan na aktong ini an pinonan kan gabos na kamondoan na sa ngonyan namamatean niato na mga gikan ninda.​—Genesis 2:15-17; 3:6; Roma 5:12.

⁵ Minsan siring, dai tinogotan ni Jehova na dahel sa ingratong aktitud ni Adan asin Eva mawara an saiyang kagayagayahan. Kompiado sia na an puso kan kisuerra nagkapira sa saindang mga aki mapahihiro na maglingkod sa saiya. Sa katunayan, kompiado siang marhay kaya dawa bago pa mamundag an enot na aki ni Adan asin Eva, ipinaisi nia an saiyang katuyohan na balukaton an makinuyog na mga gikan ninda! (Genesis 1:​31; 3:15) Sa suminunod na mga siglo, an mayoriya kan katawohan naglakaw sa mga gira ni Adan asin Eva, alagad dai tinalikdan ni Jehova an pamilya nin tawo dahel sa lakop na pagmasumbikal na iyan. Imbes, itinorohok nia an saiyang atension sa mga lalaki asin babae na ‘nagpagayagaya sa saiyang puso,’ idtong mga tunay na naghingoa na paogmahon sia huli ta namomotan ninda sia.​—Talinhaga 27:11; Hebreo 6:10.

6, 7. Anong mga bagay an nakatabang ki Jesus na magdanay na magayagaya?

⁶ WKumusta man si Jesus​—paano nia pinapagdanay an saiyang kagayagayahan? Bilang makakamhan na espiritung linalang sa langit, yaon ki Jesus an gabos na oportunidad na masdan an mga aktibidad kan mga lalaki asin babae digdi sa daga. Risang-risa an saindang mga pagkabakong sangkap, pero namotan sinda ni Jesus. (Talinhaga 8:31) Kan huri, kan magdigdi sia sa daga asin aktuwal na “nag-erok sa tahaw” nin mga tawo, dai nagbago an saiyang pagheling sa katawohan. (Juan 1:14) Ano an nagpangyari sa sangkap na Aki nin Dios na mapagdanay an siring na positibong pagheling sa makasalan na pamilya nin tawo?

⁷ Enot sa gabos, si Jesus rasonable sa saiyang mga inaasahan sa saiyang sadiri sagkod sa iba. Aram niang dai nia makokombertir an kinaban. (Mateo 10:32-39) Kaya naggayagaya sia kun may dawa saro na sinserong tawo na naghimate sa mensahe kan Kahadean. Minsan ngani an gawe-gawe asin aktitud kan saiyang mga disipulo kun beses dakula an pagkukulang, aram ni Jesus na sa puso talagang boot nindang gibohon an kabotan nin Dios, asin namotan nia sinda dahel kaiyan. (Lucas 9:46; 22:​24, 28-32, 60-62) Makahulogan nanggad, sa pamibi sa saiyang langitnon na Ama, sinumaryo ni Jesus an positibong ginibo kan mga disipulo nia sagkod kaidto: “Kinuyog ninda an saimong tataramon.”​—Juan 17:6.

8. Sabihon an nagkapirang paagi na puede niatong arogon si Jehova asin si Jesus pag-abot sa pagpapadanay kan satong kagayagayahan.

⁸ Daing duda, kita gabos makikinabang sa paghorophorop sa halimbawa ni Jehova Dios asin ni Cristo Jesus sa bagay na ini. Puede daw niatong mas lubos na arogon si Jehova tibaad paagi sa dai paghadit nin labi-labi kun an situwasyon dai nangyayari sono sa inaasahan niato? Puede daw kitang sumunod nin orog pa sa mga gira ni Jesus paagi sa pagpapadanay nin positibong punto de vista sa presenteng mga kamugtakan niato, siring man paagi sa pagigin rasonable sa inaasahan ta sa satong sadiri asin sa iba? Helingon ta kun paano an nagkapira sa mga prinsipyong ini praktikal na ikaaaplikar sa sarong kabtang na mahal sa puso nin maigot na mga Kristiano sa gabos na lugar​—an ministeryo sa langtad.

Papagdanayon an Positibong Pagmansay sa Ministeryo

9. Paano nakabalik an kagayagayahan ni Jeremias, asin paano makatatabang sa sato an saiyang halimbawa?

⁹ Boot ni Jehova na kita magin magayagaya sa paglilingkod sa saiya. An satong kagayagayahan maninigo na dai nakadepende sa nakakamtan niatong mga resulta. (Lucas 10:​17, 20) Si propeta Jeremias dakol na taon na naghulit sa bakong mabungang teritoryo. Kan pigparaisip nia an negatibong reaksion kan mga tawo, nawara an saiyang kagayagayahan.  (Jeremias 20:8) Alagad kan horophoropon nia an kagayonan kan mensahe mismo, nakabalik an saiyang kagayagayahan. Si Jeremias nagsabi ki Jehova: “An saimong mga tataramon nakua, asin iyan sakuyang kinakan; asin an saimong tataramon nagin para sa sako kaogmahan asin kagayagayahan kan sakong puso; huli ta ako inapod sa saimong ngaran, O Jehova.” (Jeremias 15:16) Iyo, ipinaggayagaya ni Jeremias an saiyang pribilehio na paghuhulit kan tataramon nin Dios. Iyo man kita.

10. Paano ta mapagdadanay an satong kagayagayahan sa ministeryo dawa kun an satong teritoryo bakong mabunga sa presente?

¹⁰ Dawa kun habong maghimate sa maogmang bareta an mayoriya, yaon sa sato an gabos na dahelan na maggayagaya mantang ginigibo ta an ministeryo sa langtad. Girumdomon na si Jehova malinaw na kompiado na an nagkapirang tawo mapahihiro na maglingkod sa saiya. Arog ki Jehova, maninigo na dai kita noarin man mawaran nin paglaom na minsan paano may nagkapira na sa kahurihurihi makakasabot sa isyu asin aakoon an mensahe kan Kahadean. Dai ta dapat paglingawan na an mga kamugtakan nin mga tawo nagbabago. Kun napapaatubang sa sarong dai linalaoman na kapierdihan o krisis, maski an tawong pinakakontento na sa sadiri puedeng magpoon na mag-isip nin seryoso manongod sa kahulogan nin buhay. Yaon daw kamo tanganing tumabang kun an siring na tawo ‘makamate na kan saiyang espirituwal na pangangaipo’? (Mateo 5:3) Tara, tibaad may sarong tawo sa saindong teritoryo na andam nang maghinanyog sa maogmang bareta sa sunod mismong pagsongko nindo!

11, 12. Ano an nangyari sa sarong banwaan, asin ano an manonodan ta dian?

¹¹ An mga tawong minakompuesto sa satong teritoryo puede man na magbago. Helinga an sarong halimbawa. Sa sarong sadit na banwaan, may nag-eerok na sarong urugos na grupo nin hoben pang mga mag-agom na may mga aki. Kun minasongko an mga Saksi ni Jehova, parareho an simbag sa sainda sa lambang pinto, “Dai kami interesado!” Kun may saro na talagang interesado sa mensahe kan Kahadean, tolos-tolos na dinedesganar kan kataraed an dugang pang pakikipag-olay sa mga Saksi. Siempre pa, sarong angat an maghulit duman. Minsan siring, an mga Saksi dai uminontok; padagos nanggad sindang naghulit. Na may anong resulta?

¹² Pag-abot nin panahon, an dakol sa mga aki sa banwaan na iyan nagdarakula na, nag-agom, asin namirmehan na duman. Narerealisar na an saindang pamumuhay dai nagbunga nin tunay na kaogmahan, an nagkapira sa hoben pang mga adultong ini nagpoon na maghanap kan katotoohan. Nanompongan ninda iyan kan sinda maghimate sa maogmang bareta na ibinalangibog kan mga Saksi. Kaya pakalihis nin dakol na taon, an sadit na kongregasyon nagpoon na umoswag. Imahinara an kagayagayahan kan dai uminontok na mga parahayag kan Kahadean! Logod na magtao man sa sato nin kagayagayahan an pagprosegir niato sa paghiras kan mamuraway na mensahe kan Kahadean!

Susuportaran Kamo kan mga Kapagtubod

13. Kiisay kita puedeng dumolok kun pinanluluyahan kita nin boot?

¹³ Kun grumabe an mga kagipitan o kun may mangyaring kalamidad, saen kamo makadodolok para sa ranga? An minilyon na dusay na lingkod ni Jehova ki Jehova nguna minadolok paagi sa pamibi, dangan sa saindang Kristianong mga tugang na lalaki asin babae. Kan nasa daga pa, pinahalagahan  mismo ni Jesus an suporta kan saiyang mga disipulo. Kan banggi bago sia magadan, nasambitan nia sinda bilang “an mga nakidamay sa sako sa mga pagbalo sa sako.” (Lucas 22:28) Siempre, an mga disipulong idto bakong sangkap, alagad an saindang kaimbodan ikinaranga kan Aki nin Dios. Kita makakukua man nin kosog sa mga kapwa parasamba.

14, 15. Ano an nakatabang sa sarong mag-agom na makayang atubangon an pagkagadan kan saindang aki, asin ano an manonodan nindo sa saindang eksperyensia?

¹⁴ Nanodan kan Kristianong mag-agom na an ngaran Michel asin Diane kun gurano kahalaga kan suporta kan saindang mga tugang na lalaki asin babae. An saindang 20 anyos na aki, si Jonathan, sarong Kristiano na mabagsik asin may marahayon na esperansa sa buhay, nadiskobre na igwa nin tumor sa hotok. An mga doktor pusoan na naghingoang iligtas sia, alagad naggrabe an pisikal na kamugtakan ni Jonathan sagkod na kan sarong aldaw na pabanggi na, sia natorog sa kagadanan. Nanluya nin biyo si Michel asin Diane. Aram ninda na an Pagtiripon sa Paglilingkod, na nakaiskedyul kan bangging idto, haros patapos na. Pero, huling nangangaipong marhay nin ranga, pinakiolayan ninda an magurang sa kongregasyon na kaibanan ninda na ihatod sinda sa Kingdom Hall. Nag-abot sinda kan mismong oras na ipinapaisi sa kongregasyon an pagkagadan ni Jonathan. Pakatapos kan pagtiripon, an naghihibing mga magurang pinalibotan kan saindang mga tugang na lalaki asin babae, na kinugos sinda asin rinanga. Nagigirumdoman ni Diane: “Biyo kaming nanluluya pag-abot mi sa hall, alagad kanigoan an pagranga sa samo kan mga tugang​—pinakosog nanggad ninda kami! Minsan ngani dai ninda kayang haleon an kakologan niamo, tinabangan ninda kami na tioson an pasan na sakit!”​—Roma 1:​11, 12; 1 Corinto 12:21-26.

¹⁵ An kasakitan nagpahiro ki Michel asin Diane na lalong dumayupot sa saindang mga tugang. Iyan man an nagpahiro sa sainda na lalong dumayupot sa balang saro. Sabi ni Michel: “Nanodan kong mahalon lalo an sakong namomotan na agom. Sa mga oras nin panluluya nin boot, nag-oolay kami manongod sa katotoohan sa Biblia asin kun paano kami inaataman ni Jehova.” Idinagdag ni Diane: “Orog pa an nagin kahulogan para sa samo ngonyan kan paglaom sa Kahadean.”

16. Taano ta importante na kita na an umenot na ipaaram sa satong mga tugang an satong mga pangangaipo?

¹⁶ Iyo, an satong Kristianong mga tugang na lalaki asin babae puedeng magin “tabang na nagpapakosog” sa sato durante kan masakit na mga panahon sa buhay asin sa siring tinatabangan kita na mapagdanay an satong kagayagayahan. (Colosas 4:11) Siempre, dai ninda nababasa an satong isip. Kun siring, kun kaipuhan ta an suporta, marahay na ipaaram iyan sa sainda. Dangan puede niatong ipahayag an tunay na pag-apresyar sa ano man na ranga na ikinatatao kan satong mga tugang, na minamansay iyan bilang hale ki Jehova.​—Talinhaga 12:25; 17:17.

Helingon an Saindong Kongregasyon

17. Anong mga kadepisilan an inaatubang nin sarong nagsosolong ina, asin paano niato minamansay an mga tawong arog nia?

¹⁷ Mientras na hineheling nindo nin mas harani an mga kapagtubod, orog man nindong manonodan na apresyaron sinda asin maeksperyensiahan an kagayagayahan sa pakikiasosyar sa sainda. Helingon nindo an saindong kongregasyon. Ano an naheheling nindo? Igwa daw nin nagsosolong magurang na nagmamaigot na padakulaon an saiyang mga aki sa dalan nin katotoohan? Pinag-isipan na daw nindong marhay an marahayon na halimbawa nia? Probaring imahinaron an nagkapira sa mga problemang inaatubang nia. Sinasabi nin sarong nagsosolong ina na an ngaran Jeanine an nagkapira kaini: kapungawan, dai nagugustohan na mga pagdolok nin mga lalaki sa trabaho, grabe kalimitadong badyet. Alagad an pinakadakulang problema sa gabos, sabi nia, iyo an pag-asikaso sa emosyonal na mga pangangaipo kan mga aki, huling magkakalaen an lambang aki. May saro pang problema na sinabi si Jeanine: “Puedeng magin totoong depisil na haleon an tendensia na gibohon an saimong aking lalaki na mani payo kan pamilya tanganing makahipno sa pagigin mayo kan agom na lalaki. Igwa akong aking babae, asin depisil na girumdomon na dai sia dapat pagpagabatan na marhay paagi sa paggibo sa saiya na mani tugaan ko nin mga sekreto.” Arog nin rinibong may takot sa Dios na nagsosolong magurang, si Jeanine nagtatrabaho nin bilog na panahon asin inaasikaso an saiyang pamilya. Inaadalan man nia sa Biblia an saiyang mga aki, sinasanay sinda sa ministeryo, asin ipinag-iiba sinda sa mga pagtiripon kan kongregasyon. (Efeso 6:4) Siertong naoogma nanggad si Jehova mantang minamasdan nia aroaldaw an mga paghihingoa kan pamilyang ini na papagdanayon an  integridad! Bako daw na nagtatao nin kagayagayahan sa satong puso an makaibanan niato an mga siring? Iyo nanggad.

18, 19. Iilustrar kun paano niato maparararom an satong pag-apresyar sa mga miembro kan kongregasyon.

¹⁸ Helinga giraray an saindong kongregasyon. Tibaad may naheheling kamong fiel na mga babaeng balo o lalaking balo na “dai noarin man nagpapalta” sa mga pagtiripon. (Lucas 2:37) Napupungaw daw sinda kun minsan? Siempre. Napupungaw sindang marhay sa saindang agom! Alagad nagdadanay sindang sibot sa paglilingkod ki Jehova asin nagpapaheling nin personal na pagmakolog sa iba. An saindang marigon, positibong aktitud nakadadagdag sa kagayagayahan kan kongregasyon! An sarong Kristiana na labing 30 taon na sa bilog na panahon na ministeryo nagsabi: “An saro sa pinakadakulang mga kagayagayahan ko iyo an maheling an mas maedad nang mga tugang na lalaki asin babae na nag-agi nin dakol na pagbalo na sagkod ngonyan fiel na naglilingkod ki Jehova!” Iyo, an mas maedad nang mga Kristiano sa tahaw niato sarong dakulang pamparigon sa boot nin mga hoben.

¹⁹ Kumusta man an mga bagohan na kasuarin pa sana nagpoon na makiasosyar sa kongregasyon? Dai daw kita napahihiro kun nagpapahayag sinda kan saindang pagtubod sa mga pagtiripon? Isip-isipa an ginibo nindang pag-owag poon kan ponan nindang mag-adal sa Biblia. Sierto na naoogmang marhay sa sainda si Jehova. Iyo man daw kita? Ipinapahayag ta daw an satong pag-aprobar, na tinatawan sinda nin komendasyon sa saindang mga paghihingoa?

20. Taano ta masasabi na an lambang miembro nin kongregasyon igwa nin importanteng kabtang sa kongregasyon?

 ²⁰ Ika daw may agom, daing agom, o nagsosolong magurang? Ika daw sarong aking lalaki o aking babae na daing ama (o daing ina), sarong babaeng balo o lalaking balo? Ika daw dakol nang taon na nakikiasosyar sa kongregasyon o kasuarin pa sana nagpoon na makiasosyar? Makasisierto kamo na an saindong halimbawa nin pagigin fiel nakaparirigon sa boot niamo gabos. Asin kun minaayon kamo sa pagkanta nin sarong awit na pan-Kahadean, kun kamo nagkokomento o kun ginigibo nindo an saindong asignasyon sa Teokratikong Paadalan sa Pagmiministro, an saindong kabtang nakadadagdag sa samong kagayagayahan. Orog pa ngani dian, nagtatao iyan nin kagayagayahan sa puso ni Jehova.

21. Igwa kita nin dakol na dahelan na gibohon an ano, alagad anong mga hapot an minalataw?

²¹ Iyo, dawa sa masakit na mga panahon na ini, puede kitang magin magayagaya sa pagsamba sa satong maogmang Dios. Dakol kitang dahelan na himateon an pag-enkaminar ni Pablo: “Padagos kamong maggayagaya, . . . an Dios nin pagkamoot asin nin katoninongan mapapasaindo.” (2 Corinto 13:11) Pero paano kun napapaatubang kita sa sarong natural na kalamidad, paglamag, o grabeng pagtios sa pinansial? Mahihimo daw na papagdanayon an satong kagayagayahan dawa sa siring na mga situwasyon? Kamo mismo an magkonklusyon mantang ineestudyaran nindo an minasunod na artikulo.

[Nota sa Ibaba]

Masisimbag daw Nindo?

• Paano ilinaladawan an kagayagayahan?

• Paano makatatabang sa sato na magdanay na magayagaya an pagpapadanay nin positibong aktitud?

• Ano an makatatabang sa sato na magkaigwa nin positibong pagmansay sa teritoryo kan satong kongregasyon?

• Sa anong mga paagi nindo pinahahalagahan an mga tugang na lalaki asin babae sa saindong kongregasyon?

[Mga Hapot Para sa Pag-adal]

[Mga Ritrato sa pahina 10]

An mga tawo sa satong teritoryo puedeng magbago

[Ritrato sa pahina 12]

Anong mga kadepisilan an inaatubang kan mga nasa kongregasyon nindo?