“Nagin Marahayon sa Sako si Jehova!”

SA SARONG maogmang marhay na banggi kan Marso 1985, sarong makahulogan na pangyayari an naobserbaran kan mga lalaki asin babae sa Departamento nin Pagsurat sa opisina prinsipal kan Mga Saksi ni Jehova sa Nueva York, E.U.A. Kan panahon na idto si Karl F. Klein nakapaglingkod na nin 60 taon sa bilog na panahon na ministeryo. Sa entusiastikong paagi, si Tugang na Klein nagsabi: “Nagin marahayon sa sako si Jehova!” Sinabi nia na paborito niang teksto sa Biblia an Salmo 37:4. Kan huri, pinaogma niang marhay an gabos paagi sa pagtugtog kan saiyang selo.

Sa laog kan sumunod na 15 taon, si Tugang na Klein nagpadagos sa pagtrabaho bilang miembro kan mga tawohan sa pagsurat asin sa paglilingkod sa Namamahalang Grupo kan Mga Saksi ni Jehova. Dangan, kan Enero 3, 2001, sa edad na 95, fiel na natapos ni Karl Klein an saiyang daganon na buhay.

Namundag si Karl sa Alemania. An saiyang pamilya buminalyo sa Estados Unidos, asin nagdakula si Karl sa sarong lugar harani sa Chicago, Illinois. Kan hoben pa, si Karl sagkod an saiyang nguhod na tugang na si Ted nagin interesadong gayo sa Biblia. Nabautismohan si Karl kan 1918, asin an nakapupukaw sa boot na mga nadangog nia sa sarong kombension kan Mga Estudyante sa Biblia kan 1922 pinukaw sa saiya an parasiempreng pagkamoot sa ministeryo sa langtad. Habo niang lumihis an semana na dai sia nakapakikabtang sa paghuhulit, na ginigibo iyan dawa sa ultimong mga semana kan saiyang buhay.

Si Karl nagin miembro kan mga tawohan sa opisina prinsipal kan 1925, na enot nagtrabaho sa imprentahan. Igwa sia nin tunay na hilig sa musika, asin sa laog nin pirang taon nagtugtog sia nin selo sa sarong orkestra na itinampok sa Kristianong mga brodkast sa radyo. Pakatapos kaiyan, naglingkod sia sa Departamento sa Paglilingkod, na partikularmenteng ikinaogmang makaibaiba an paraataman kaiyan, si T. J. Sullivan. Mientras tanto, si Ted nag-agom asin kaiba an saiyang agom, si Doris, naglingkod bilang misyonero sa Puerto Rico.

Sa laog nin kabangang siglo, si Karl Klein nagtrabaho sa Departamento nin Pagsurat, kun saen dakula an ikinakontribwir nia ta hilig nia an magsiyasat asin hararom an kaaraman nia sa Biblia. Kan 1963, naagom ni Karl si Margareta, sarong misyonerang Aleman na naglilingkod sa Bolivia. Dahel sa mamomoton na pagsuportar kaini, lalo na kan nakakamate sia nin mga problema sa salud, dakol pa an nahaman nia sa halawig na panahon pakalihis kan edad na an kadaklan minapondo nang magtrabaho. Huli sa kanaturalan nang sinseridad ni Karl, saka sa entusiasmo bilang musikero, dai malilingawan an saiyang mga pahayag sa mga kongregasyon asin sa mga kombension. Dai nahaloy bago sia nagadan, nangenot sia sa pan-agang pagtokar sa teksto para sa dakulang pamilyang Bethel sa Nueva York, sa pagkaogma asin kapakinabangan kan gabos.

Matatandaan kan dakol na regular na parabasa kan The Watchtower an estorya kan buhay ni Tugang na Klein, sarong interesanteng pagkasaysay kan saiyang mga eksperyensia na ipinublikar sa luwas kan Oktubre 1, 1984. Maoogma kamong basahon o basahon liwat an estoryang iyan, na ginigirumdom na an kagsurat kaiyan nakapaglingkod pa nin saro may kabangang dekada bilang sarong fiel asin debotong Kristiano.

Bilang saro sa mga linahidan kan Kagurangnan, kamawotan ni Tugang na Klein sa bilog niang puso an maghade kaiba ni Cristo sa langit. Yaon sa sato an lambang dahelan na tumubod na pinanigoan na ngonyan ni Jehova an kamawotan na iyan.​—Lucas 22:28-30.

[Ritrato sa pahina 31]

Si Karl kan 1943 kaiba si T. J. Sullivan saka si Ted asin Doris

[Ritrato sa pahina 31]

Si Karl asin Margareta, Oktubre 2000