Saindo daw na “Tinutubos an Angay na Panahon”?

HINATOLAN ni apostol Pablo an mga Kristiano sa Efeso kan enot na siglo: “Magmaan kamong marhay na an saindong paglakaw bakong siring sa mangmang kundi siring sa mga madonong, na tinutubos an angay na panahon para sa saindo man sana, huli ta an mga aldaw maraot.” (Efeso 5:​15, 16) Taano ta kaipuhan an hatol na ini? An simbag sa hapot na iyan nangangaipo nin pakaaram sa mga kamugtakan na inaatubang kan mga Kristiano sa suanoy na siudad na iyan.

Bantog an Efeso sa pambihirang kayamanan kaiyan, grabeng inmoralidad, lakop na krimen, asin sarisaring aktibidad na sa demonyo. Dugang pa, kaipuhan na labanan kan mga Kristiano duman an pilosopikong mga paniniwala mapadapit sa panahon. Dai nagtutubod an bakong Kristianong mga Griego sa Efeso na an panahon naghihiro sa sarong direksion. Itinokdo sa sainda kan Griegong pilosopiya na an buhay paorootro sa daing katapusan na siklo. An sarong tawo na sinayang an saiyang panahon sa sarong siklo nin buhay ikababalik gabos iyan sa saro pang siklo. An klaseng ini nin kaisipan an puedeng nag-agyat sa mga Kristianong taga Efeso na magin daing labot sa iskedyul ni Jehova sa mga pangyayari, kaiba an saiyang iskedyul para sa banal na paghokom. Huli kaini, angay an hatol ni Pablo na ‘tuboson an angay na panahon.’

Si Pablo dai nagtataram manongod sa pankagabsan sanang panahon. An Griegong termino na ginamit nia nangangahulogan nin itinalaan na panahon, sarong tamang panahon para sa espesipikong katuyohan. Hinahatolan ni Pablo an enot na siglong mga Kristiano na may kadonongan na gamiton an angay na panahon, o kapanahonan nin kabootan, na nakakamtan ninda sa presente, bago umabot an pagtatapos kaiyan saka haleon na an pagkaherak nin Dios asin an iinaalok na kaligtasan.​—Roma 13:11-13; 1 Tesalonica 5:6-11.

Kita nabubuhay na sa kaagid na angay na peryodo nin panahon. Imbes na sayangon an nungka nang maootrong kapanahonan na ini nin kabootan paagi sa paghanap nin temporaryong mga kasingawan na iinaalok kan kinaban, an mga Kristiano madonong kun ginagamit ninda an panahon na makukua ninda sa paggibo nin mga “gibo nin diosnon na debosyon” asin sa siring pinakokosog an saindang relasyon sa Kaglalang, si Jehova Dios.​—2 Pedro 3:11; Salmo 73:28; Filipos 1:10.