Madali Nang Matapos an Pagtogot nin Dios sa Pagdusa

SAEN man kamo humeling, igwa nin pagdusa. An nagkapira sinda man sana an may gibo kaiyan sa sadiri ninda. Naoolakitan sinda nin mga helang na ikinaoolakit paagi sa pagdodorog o naeeksperyensiahan an mga epekto nin pagdodroga o pag-abuso sa inomon na de alkohol o paninigarilyo. O tibaad magkaigwa sinda nin problema sa salud huli sa bakong marahay na mga ugale sa pagkakan. Minsan siring, an grabeng pagdusa resulta kan mga bagay o mga pangyayari na dai kontrolado nin ordinaryong tawo: guerra, etnikong kadahasan, krimen, kadukhaan, gutom, helang. An saro pang bagay na sa pundamental dai kontrolado nin mga tawo iyo an pagdusa na konektado sa paggurang asin kagadanan.

Inaasegurar kita kan Biblia na “an Dios pagkamoot.” (1 Juan 4:8) Kun siring, taano ta tinotogotan nin sarong mamomoton na Dios an gabos na pagdusang ini na magpadagos sa laog nin dakolon na siglo? Noarin nia reremedyohan an situwasyon na ini? Tanganing masimbag an siring na mga hapot, kaipuhan niatong siyasaton an katuyohan nin Dios may koneksion sa mga tawo. Tatabangan kita kaini na masabotan kun taano ta tinotogotan nin Dios an pagdusa asin kun ano an gigibohon nia mapadapit digdi.

An Balaog na Libreng Kabotan

Kan lalangon nin Dios an enot na tawo, bako sanang hawak na may isip an nilalang nia. Dugang pa, dai linalang nin Dios si Adan asin Eva na magin mga robot na mayong isip. Itinao nia sa sainda an abilidad na libreng kabotan. Asin iyan marahayon  na balaog, huli ta “naheling nin Dios an gabos niang ginibo asin, uya! idto marahayon.” (Genesis 1:31) Iyo, “sangkap an saiyang gibo.” (Deuteronomio 32:4) Inaapresyar niato gabos an balaog na ini na libreng kabotan huling habo niato na dinidiktahan kita kan gabos na iisipon asin gigibohon niato na dai na lamang makakapili sa ano man na bagay.

Minsan siring, puede daw na gamiton nin daing limitasyon an marahayon na balaog na libreng kabotan? Sa instruksion na itinao sa enot na mga Kristiano, an Tataramon nin Dios minasimbag: “Magin kamong siring sa mga tawong talingkas, alagad pinangangaptan an saindong katalingkasan, bakong bilang pantahob sa karatan, kundi bilang mga oripon nin Dios.” (1 Pedro 2:16) Para sa ikararahay nin gabos, kaipuhan na igwa nin limitasyon. Huli kaini, an libreng kabotan kaipuhan na kontrolado kan reglamento nin ley. Ta kun dai, anarkiya an magigin resulta.

Kiisay na Ley?

Kiisay na ley an madeterminar sa tamang limitasyon nin katalingkasan? An simbag sa hapot na ini igwa nin koneksion sa pundamental na dahelan kun taano ta tinotogotan nin Dios an pagdusa. Mantang an Dios an naglalang sa mga tawo, sia an lubos na nakaaaram kun anong ley an kaipuhan nindang sunodon para sa sainda mismong ikararahay asin sa ikararahay kan iba. Siring kaini an pagkasabi kaiyan sa Biblia: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.”​—Isaias 48:17.

Malinaw nanggad, ini an mahalagang marhay na punto: An mga tawo dai linalang tanganing magin independiente sa Dios. Linalang nia sinda sa paagi na an saindang kapangganahan asin kaogmahan nakadepende sa pagkuyog sa saiyang matanos na mga ley. An propeta nin Dios na si Jeremias nagsabi: “Aram kong marhay, O Jehova, na bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.”​—Jeremias 10:23.

Linalang nin Dios an katawohan na sakop kan saiyang pisikal na mga ley, siring baga kan ley nin grabidad. Siring man, linalang nia an mga tawo na magin sakop kan saiyang moral na mga ley, na dinisenyo tanganing magresulta sa nagkakaoroyon na sosyedad. May marahay na dahelan, kun siring, an Tataramon nin Dios nagsasadol: “Magtiwala ka ki Jehova sa bilog mong puso asin dai ka manarig sa saimong sadiring pakasabot.”​—Talinhaga 3:5.

Huli kaini, nungkang magigin mapanggana an pamilya nin tawo sa pagpalakaw sa sadiri kaini na mayo an pamamahala nin Dios. Sa pagmamaigot na magin independiente sa saiya, maimbento an mga tawo nin mga sistema sosyal, ekonomiko, politikal, asin relihioso na magkokorontrahan, asin ‘an tawo masakop sa tawo sa saiyang ikararaot.’​—Eclesiastes 8:9.

Ano an Nagin Diperensia?

Tinawan nin Dios an satong enot na mga magurang, si Adan asin Eva, nin sangkap na pagpoon. May sangkap sindang mga hawak asin isip patin istaran na paraisong hardin. Kun nagpasakop sinda sa pamamahala nin Dios, nagpadagos kutana sindang sangkap asin maogma. Pag-abot nin panahon, magigin kutana sindang magurang kan enterong  sangkap, maogmang pamilya nin tawo na nag-iistar sa sarong paraisong daga. Iyan an katuyohan nin Dios para sa rasa nin tawo.​—Genesis 1:27-29; 2:15.

Minsan siring, ginamit sa salang paagi kan enot niatong ginikanan an saindang libreng kabotan. Nasala sinda sa paghona na puede sindang magin mapanggana na independiente sa Dios. Sa sainda mismong libreng kabotan, luminihis sinda sa limitasyon kan saiyang mga ley. (Genesis, kapitulo 3) Huling hinaboan ninda an saiyang pamamahala, bako na siang obligado na susteniran sinda sa pagkasangkap. ‘Sinda guminawe nin kapahapahamak sa sadiri ninda, dai sinda nagpadagos na magin saiyang mga aki, asin an kakundian sadiri ninda.’​—Deuteronomio 32:5.

Poon kaidtong nakisuway sinda sa Dios, nagpoon nang lumuya an hawak asin isip ni Adan asin Eva. Yaon ki Jehova an gikanan nin buhay. (Salmo 36:9) Kaya huling isinuway an saindang sadiri ki Jehova, an enot na tawong mag-agom nagin bakong sangkap asin sa kahurihurihi nagadan. (Genesis 3:19) Kaoyon sa ley nin henetikong pagmamana, an puede sanang manahon kan saindang mga aki iyo an yaon sa saindang mga magurang. Asin ano iyan? Iyan iyo an pagkabakong sangkap asin kagadanan. Kun siring si apostol Pablo nagsurat: “Paagi sa sarong tawo [si Adan] an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”​—Roma 5:12.

An Pangenot na Isyu—An Soberaniya

Kan nagrebelde si Adan asin Eva tumang sa Dios, inangat ninda an saiyang soberaniya, an boot sabihon, an saiyang deretsong mamahala. Puede kutanang linaglag na sinda ni Jehova asin nagpoon giraray sa paglalang nin saro pang mag-agom, alagad dai kaiyan mareresolberan an isyu sa kun kiisay na pamamahala an tama asin pinakamarahay para sa mga tawo. Tinawan nin panahon tanganing magmukna kan saindang sosyedad segun sa sadiri nindang mga ideya, patutunayan nin mga tawo na daing kadudaduda kun baga an pamamahala na independiente sa Dios puede nanggad na magin mapanggana.

Ano an ihinahayag sa sato kan rinibong taon nin kasaysayan nin tawo? Sa gabos na siglong idto, prinobaran na nin mga tawo an kadakol na klase nin sistema sosyal, ekonomiko, politikal, asin relihioso. Minsan siring, an karatan asin pagdusa nagpapadagos. Sa katunayan, ‘an mga maraot orog na ruminaot,’ nangorogna sa satong panahon.​—2 Timoteo 3:13.

Naheling kan ika-20 siglo an pinakadakol na nagibo sa siensia asin industriya. Alagad naheling man kaiyan an pinakamaraot na pagdusa sa bilog na kasaysayan kan rasa nin tawo. Asin ano man na pag-oswag an nagibo sa medisina, an ley nin Dios totoo pa man giraray: An mga tawo na suway sa Dios​—an gikanan nin buhay​—nagkakahelang, naggugurang, asin nagagadan. Malinawon nanggad na napatunayan na an mga tawo dai puedeng ‘giyahan an sadiri nindang mga lakad’!

Napatunayan an Soberaniya nin Dios

An makaturotristeng pag-eksperimentong ini nin pagigin independiente sa Dios sararoan sanang nagpapaheling na an pamamahala nin mga tawo na suway sa saiya nungkang mapapakarhay. An pamamahala sana nin Dios an puedeng magtao nin kaogmahan, pagkasararo, marahay na salud, asin buhay. Dugang pa, ipinaheheling kan dai nasasalang Tataramon ni Jehova Dios, an Banal na Biblia, na kita nabubuhay na sa “huring mga aldaw” kan pamamahala nin tawo na independiente sa Dios. (2 Timoteo 3:​1-5) Madali nang matapos an pagtogot ni Jehova kaini asin sa karatan patin pagdusa.

Dai na mahahaloy an Dios mainterbenir sa gibo-gibo nin mga tawo. An Kasuratan nagsasabi sa sato: “Sa mga aldaw kan mga hadeng [an nag-eeksister na pamamahala nin tawo ngonyan] idto an Dios nin kalangitan mapatindog nin sarong kahadean [sa langit] na dai noarin man malalaglag. Asin an kahadean mismo dai itatao sa arin man na ibang banwaan [dai na noarin man giraray mamamahala an tawo sa daga]. Iyan an maronot asin matapos kan gabos na ining kahadean [presenteng mga pamamahala], asin iyan mismo magdadanay sagkod sa mga panahon na daing talaan.”​—Daniel 2:44.

An pagbindikar sa soberaniya ni Jehova Dios paagi sa langitnon na Kahadean iyo an pinakatema kan Biblia. Ini an pangenot na katokdoan ni Jesus. Sia nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan  madatong an katapusan.”​—Mateo 24:14.

Kun salidahan na kan pamamahala nin Dios an pamamahala nin tawo, siisay an maliligtas asin siisay an dai? Inaasegurar kita sa Talinhaga 2:​21, 22: “An mga tanos [na mga nagsusuportar sa pamamahala nin Dios] iyo an mag-eerok sa daga, asin an mga daing katuyawan iyo an matatada dian. Kun dapit sa mga maraot [na mga dai nagsusuportar sa pamamahala nin Dios], sinda popohoon sa mismong daga.” An salmistang pinasabngan nin Dios nag-awit: “Dai na mahahaloy, asin ta an maraot mawawara na . . . Alagad an mga mahoyo mismo makasasadiri kan daga, asin manonompongan nanggad ninda an saindang nangongorog na dakulang kaogmahan sa nagsosopay na katoninongan. An mga matanos mismo magmamana kan daga, asin sinda mag-eerok dian sagkod lamang.”​—Salmo 37:​10, 11, 29.

Sarong Makangangalas na Bagong Kinaban

Sa pagsakop kan pamamahala kan Kahadean nin Dios, an mga makaliligtas sa katapusan kan presenteng sistema nin mga bagay palalaogon sa dagang nalinigan na nin karatan asin pagdusa. An katawohan tatawan nin instruksion na hale sa Dios, asin pag-abot nin panahon “an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.” (Isaias 11:9) An nakaparirigon, positibong pagtotokdong ini maresulta sa sarong totoong matoninong, nagkakaoroyon na sosyedad nin tawo. Sa siring, mawawara na an guerra, paggadan, kadahasan, paglugos, paghabon, o ano man na iba pang krimen.

Makangangalas na pisikal na mga pakinabang an makukua kan makinuyog na mga tawong mag-iistar sa bagong kinaban nin Dios. Kakanselaron na an gabos na maraot na epekto kan pagrebelde tumang sa pamamahala nin Dios. An pagkabakong sangkap, helang, paggurang, asin kagadanan magigin mga bagay na nakalihis na. Inaasegurar kita kan Biblia: “Mayo nin nag-eerok na masabi: ‘Naghehelang ako.’ ” Dugang pa, an Kasuratan nanunuga: “Sa panahon na iyan an mga mata kan mga buta magkakaburuklat, asin an mismong mga talinga kan mga bungog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.” (Isaias 33:24; 35:​5, 6) Abaang kaogmahan na magkaigwa nin mabagsik na salud kada aldaw​—sagkod lamang!

Sa irarom kan mamomoton na paggiya nin Dios, an mga nag-eerok sa bagong kinaban na iyan gagamiton an saindang mga kosog asin abilidad sa pagtogdok nin lakop sa dagang paraiso. Mawawara na sagkod lamang an kadukhaan, gutom, asin kawaran nin harong, huli ta an hula ni Isaias nagsasabi: “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan.” (Isaias 65:​21, 22) Tunay nanggad, “sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.”​—Miqueas 4:4.

An daga maresponder sa mamomoton na pag-ataman nin Dios asin kan makinuyog na mga tawo. Igwa  kita kan sono sa Kasuratan na mga pag-asegurar na ini: “An kaawagan asin an alang na lugar magpapakagayagaya, saka an desierto maggagayagaya asin mamumurak arog kan azafran. . . . An katubigan maburakbusak sa kaawagan, asin an kasalogan sa desierto.” (Isaias 35:​1, 6) “Magkakaigwa nin abundang tipasi sa ibabaw kan daga; maglilipwas sa alitoktok kan kabukidan.”​—Salmo 72:16.

Kumusta an bilyones na tawong nagkagaradan? An mga yaon sa memorya nin Dios bubuhayon liwat, huli ta “magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Iyo, an mga gadan bubuhayon liwat. Totokdoan sinda kan makangangalas na mga katotoohan mapadapit sa pamamahala nin Dios asin tatawan nin oportunidad na mabuhay sagkod lamang sa Paraiso.​—Juan 5:​28, 29.

Paagi kaini, biyong babaliktadon ni Jehova Dios an mamondong kamugtakan nin pagdusa, helang, asin kagadanan na namogol sa katawohan sa laog nin rinibong taon. Mayo na nin helang! Mayo na nin kabiadian! Mayo na nin kagadanan! “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​​—Kapahayagan 21:​3, 4.

Siring kaiyan tataposon nin Dios an pagdusa. Lalaglagon nia an maraot na kinaban na ini asin isasalida an biyong bagong sistema nin mga bagay kun saen “magdadanay an katanosan.” (2 Pedro 3:13) Abaa kaogmang bareta ini! Kaipuhan ta nang marhay an bagong kinaban na iyan. Asin dai na kita kaipuhan na maghalat nin haloy tanganing maheling iyan. Basado sa kaotoban kan mga hula sa Biblia, aram ta na an bagong kinaban haranihon na, asin madali nang matapos an pagtogot nin Dios sa pagdusa.​—Mateo 24:​3-​14.

[Kahon sa pahina 8]

An Pagkasudya kan Pamamahala nin Tawo

Mapadapit sa pamamahala nin tawo, si dating Kansilyer Helmut Schmidt nin Alemania nagsabi: “Kitang mga tawo . . . pirme sanang parsial na pinamahalaan an kinaban, asin sa kadaklan na panahon sa maraoton na paagi. . . . Nungka tang pinamahalaan iyan sa lubos na katoninongan.” An Human Development Report 1999 nagsabi: “An gabos na nasyon nagbabareta nin pagruro kan pinakapundasyon kan saindang sosyedad, huli sa kariribokan sa sosyedad, mas dakol na krimen, mas dakol na kadahasan sa harong. . . . An lakop sa globong peligro nagdadakol, nalalabihan an abilidad kan mga nasyon na atubangon iyan, asin naeenotan an internasyonal na paghiro tanganing asikasohon iyan.”

[Mga Ritrato sa pahina 8]

“Manonompongan nanggad ninda an saindang nangongorog na dakulang kaogmahan sa nagsosopay na katoninongan.”​​—Salmo 37:11

[Picture Credit Lines sa pahina 5]

Ikatolo hale sa itaas, mag-ina: Retrato kan FAO/B. Imevbore; sa ibaba, pagputok: Retrato kan U.S. National Archives