Mga Hapot Hale sa mga Parabasa

Kasuarin linahidan “an Banal kan mga Banal,” siring kan ihinula sa Daniel 9:24?

An Daniel 9:24-27 sarong hula may labot sa paglataw kan “Mesiyas na Namomoon”​—an Cristo. Kun siring, an ihinulang paglahid kan “Banal kan mga Banal” dai nanonongod sa paglahid kan Kabanalbanaleng kuarto kan templo sa Jerusalem. Imbes, an pananaram na “Banal kan mga Banal” nanonongod sa langitnon na santuaryo nin Dios​—an langitnon na Kabanalbanale​—sa dakulang espirituwal na templo ni Jehova. *​​—Hebreo 8:​1-5; 9:​2-​10, 23.

Kasuarin nagpoon na magpunsionar an espirituwal na templo nin Dios? Bueno, estudyare an nangyari kan ipresentar ni Jesus an saiyang sadiri para sa bautismo kan 29 C.E. Poon sa panahon na iyan kan saiyang buhay, inotob ni Jesus an mga tataramon kan Salmo 40:​6-8. Kan huri sinabi ni apostol Pablo na si Jesus namibi sa Dios: “Habo ka nin atang asin dolot, kundi inandaman mo ako nin hawak.” (Hebreo 10:5) Aram ni Jesus na “habo” nin Dios na magpadagos an pagdolot nin mga atang na hayop sa templo sa Jerusalem. Imbes, si Jehova nag-andam nin sangkap na hawak nin tawo na idodolot ni Jesus bilang sarong atang. Ipinapahayag an saiyang odok sa pusong pagmawot, si Jesus nagpadagos: “Uya! nagdatong ako (sa balumbon kan libro na isinurat dapit sa sako) sa paggibo kan boot mo, O Dios.” (Hebreo 10:7) Asin ano an reaksion ni Jehova? An Ebanghelyo ni Mateo nagsasabi: “Kan mabautismohan na si Jesus tolos na naghawas sa tubig; asin, uya! an kalangitan nagkaburukasan, asin naheling nia an espiritu nin Dios na nag-iibaba siring sa salampati na nagtotogdon sa saiya. Uya! May nadangog man na tingog sa langit na nagsasabi: ‘Ini an sakong Aki, an namomotan, na sakong inooyonan.’”​—Mateo 3:​16, 17.

An pag-ako ni Jehova Dios sa pagpresentar kan hawak ni Jesus bilang atang nangahulogan na nagpoon nang mag-eksister an sarong altar na mas dakula kisa literal na altar sa templo sa Jerusalem. Ini altar kan “boot” nin Dios, o areglo sa pag-ako kan buhay ni Jesus bilang tawo na sarong atang. (Hebreo 10:10) An paglahid nin banal na espiritu ki Jesus nangahulogan na pinangyari na nin Dios na mag-eksister an areglo kan saiyang bilog na espirituwal na templo. * Huli kaini, kan panahon na bautismohan si Jesus, an langitnon na erokan nin Dios linahidan, o itinagama, bilang “an Banal kan mga Banal” sa areglo kan dakulang espirituwal na templo.

[Mga Nota sa Ibaba]

[Ritrato sa pahina 27]

“An Banal kan mga Banal” linahidan kan si Jesus mabautismohan