Omawon si Jehova Huli sa Saiyang Dakulang mga Gibo!
Omawon si Jehova Huli sa Saiyang Dakulang mga Gibo!
“Ibinabantog kan sakong kalag an kadakulaan ni Jehova . . . huli ta an makapangyarihan na Saro naggibo nin dakulang mga gibo para sa sako.”—LUCAS 1:46-49.
1. Huli sa anong dakulang mga gibo tama sanang omawon niato si Jehova?
SI Jehova maninigo na omawon huli sa saiyang dakulang mga gibo. Kan isaysay ni propeta Moises an pagkaligtas kan Israel sa Egipto, ipinahayag nia: “An saindong mga mata an nakaheling kan gabos na dakulang gibo ni Jehova.” (Deuteronomio 11:1-7) Kaagid kaiyan, kan ipaisi ni anghel Gabriel sa daragang si Maria an madatong na pagkamundag ni Jesus, ini nagsabi: “Ibinabantog kan sakong kalag an kadakulaan ni Jehova . . . huli ta an makapangyarihan na Saro naggibo nin dakulang mga gibo para sa sako.” (Lucas 1:46-49) Bilang mga Saksi ni Jehova, inoomaw ta sia huli sa dakulang mga gibo na arog kan pagpatalingkas sa Israel sa pagkaoripon sa Egipto asin kan milagrosong paagi na ipinangidam an saiyang mahal na Aki.
2. (a) Ano an kahulogan para sa makinuyog na katawohan kan “daing sagkod na katuyohan” nin Dios? (b) Ano an naeksperyensiahan ni Juan sa isla nin Patmos?
2 An dakol sa dakulang mga gibo ni Jehova konektado sa saiyang “daing sagkod na katuyohan” na bendisyonan an makinuyog na katawohan paagi sa Mesiyas asin kan pamamahala kan saiyang Kahadean. (Efeso 3:8-13) An katuyohan na iyan gradwal na nahahayag kaidto kan an gurang nang si apostol Juan tinogotan na sumirip sa sarong bisyonaryong bukas na tata sa langit. May nadangog siang tingog na siring sa trumpeta na nagsasabi: “Sakat digdi, asin ipaheheling ko sa saimo an mga bagay na kaipuhan na mangyari.” (Kapahayagan 4:1) Minsan ngani idinistiero kan gobyerno nin Roma sa isla nin Patmos “huli sa pagtaram dapit sa Dios asin pagpatotoo ki Jesus,” si Juan nag-ako nin “sarong kapahayagan ni Jesu-Cristo.” An naheling asin nadangog kan apostol igwa nin dakol na ihinahayag manongod sa daing sagkod na katuyohan nin Dios, sa siring nagtatao nin espirituwal na kaliwanagan asin napapanahon na pamparigon sa boot para sa gabos na tunay na Kristiano.—Kapahayagan 1:1, 9, 10.
3. Sairisay an irinerepresentar kan 24 kamagurangan na naheling ni Juan sa bisyon?
3 Paagi sa bukas na tata na iyan sa langit, naheling ni Juan an 24 kamagurangan, na pinatukaw sa trono asin kinoronahan na siring sa mga hade. Naghuruhod sinda sa atubangan nin Dios asin nagsarabi: “Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.” (Kapahayagan 4:11) An kamagurangan na iyan nagrerepresentar sa gabos na binuhay liwat na linahidan na Kristiano na nasa mamuraway na katongdan na ipinanuga sa sainda nin Dios. Sinda napahihiro na omawon si Jehova huli sa saiyang dakulang mga gibo may koneksion sa paglalang. Kita nagngangalas man sa ebidensia kan “daing sagkod na kapangyarihan asin pagka-Dios” ni Jehova. (Roma 1:20) Asin mientras na nagdadakol an satong nanonodan manongod ki Jehova, mas dakol man an satong dahelan na omawon sia huli sa saiyang dakulang mga gibo.
Ipahayag an Kaomaw-omaw na mga Gibo ni Jehova!
4, 5. Tumao nin mga halimbawa kun paano inomaw ni David si Jehova?
4 Inomaw ni salmista David an Dios huli sa Saiyang dakulang mga gibo. Halimbawa, si David nag-awit: “Umawit kamo nin melodiya ki Jehova, na nag-eerok sa Sion; sabihon nindo sa mga banwaan an saiyang mga gibo. Pahelingi ako nin pabor, O Jehova; helinga an sakong makuring sakit dahelan sa mga naoongis sa sako, O ika na nagbubuhat sa sako hale sa mga tata nin kagadanan, tanganing ikapahayag ko an gabos mong kaomaw-omaw na gibo sa mga tata kan aking babae nin Sion.” (Salmo 9:11, 13, 14) Pakatapos na itao sa saiyang aking si Salomon an arkitektural na plano para sa templo, inomaw ni David an Dios, na sinasabi: “Saimo, O Jehova, an kadakulaan asin an kakosogan asin an kagayonan asin an kamahalan patin an dignidad . . . Saimo an kahadean, O Jehova, an Saro na naglalangkaw man kan saimong sadiri bilang payo sa gabos. . . . Asin ngonyan, O samuyang Dios, nagpapasalamat kami sa saimo asin inoomaw niamo an saimong magayon na ngaran.”—1 Cronica 29:10-13.
5 An Kasuratan paorootrong nag-aagda—iyo, nagsasadol—sa sato na omawon an Dios, arog kan ginibo ni David. An libro nin Salmo igwa nin dakol na kapahayagan nin pag-omaw sa Dios, asin an mga kabanga kan mga awit na ini iinaatribwir ki David. Dayaday niang inomaw asin pinasalamatan si Jehova. (Salmo 69:30) Dugang pa, poon kan enot na mga panahon, an ipinasabong nin Dios na mga komposisyon ni David asin kan iba pa ginamit sa pag-omaw ki Jehova.
6. Paano kapakipakinabang para sa sato an ipinasabong na Salmo?
6 Kapakipakinabang nanggad an Salmo para sa mga parasamba ki Jehova! Kun boot niatong pasalamatan an Dios sa gabos niang dakulang gibo para sa sato, puedeng sumabong sa satong isip an magagayon na tataramon na yaon sa Salmo. Halimbawa, pagmata sa aga, puede kitang mapahiro na magpahayag nin kaagid kaini: “Marahay na magpasalamat ki Jehova asin mag-awit sa saimong ngaran, O Kaharohalangkawe; na ipamareta sa aga an saimong mamomoton na kabootan asin an saimong pagigin fiel sa banggi, . . . huli ta pinagayagaya mo ako, O Jehova, huli sa saimong mga aktibidad; huli sa mga gibo kan saimong mga kamot ako nagkukurahaw na may kagayagayahan.” (Salmo 92:1-4) Kun mapangganahan ta an sarong kaolangan sa satong espirituwal na pag-oswag, puedeng gusto niato na ipahayag sa pamibi an kagayagayahan asin pagpasalamat, arog kan ginibo kan salmista kan sia umawit: “O madia magkurahaw kitang may kagayagayahan ki Jehova! Kumurahaw kita sa kapangganahan sa satong Gapo nin kaligtasan. Rumani kita sa atubangan nia na may pagpasalamat; paagi sa mga melodiya kumurahaw kita sa saiya sa kapangganahan.”—Salmo 95:1, 2.
7. (a) Ano an mahalagang mangnohon manongod sa dakol na awit na kinakanta kan mga Kristiano? (b) Ano an sarong dahelan na kita dumatong nin amay sa mga pagtiripon asin magdanay sagkod matapos?
7 Sa parate kinokosogan ta an satong tingog sa pag-awit nin pag-omaw ki Jehova sa mga pagtiripon kan kongregasyon, asamblea, asin kombension. Mahalagang mangnohon na an dakol sa mga awit na ini basado sa ipinasabong na mga kaisipan hale sa libro nin Salmo. Kanigoan an kaogmahan niato na magkaigwa nin napapanahon na koleksion nin nakaoogmang mga awit nin pag-omaw ki Jehova! An pag-awit nin mga pag-omaw sa Dios sarong
marahayon na dahelan na dumatong nin amay sa satong mga pagtiripon asin magin presente sagkod na matapos, sa siring nakikikabtang sa mga kapwa parasamba sa pag-omaw ki Jehova paagi sa awit asin pamibi.“Omawa Nindo si Jah, Banwaan!”
8. Ano an ipinapakahulogan sa tataramon na “Aleluya,” asin paano iyan parateng tinatradusir?
8 An pag-omaw ki Jehova ipinapakahulogan sa tataramon na “Aleluya,” sarong transliterasyon nin pananaram sa Hebreo na haros pirmeng tinatradusir na “Omawa nindo si Jah, banwaan.” Halimbawa, sa Salmo 135:1-3, maheheling niato an may init, may pagdodoon na pag-agdang ini: “Omawa nindo si Jah, banwaan! Omawa nindo an ngaran ni Jehova, mag-omaw kamo, O mga lingkod ni Jehova, kamo na nagtitirindog sa harong ni Jehova, sa mga patyo kan harong kan satong Dios. Omawa nindo si Jah, huli ta si Jehova marahay. Umawit kamo nin melodiya sa saiyang ngaran, huli ta iyan nakaoogma.”
9. Ano an nagmomotibar sa sato na omawon si Jehova?
9 Mantang hinohorophorop niato an makangangalas na mga gibo nin paglalang nin Dios asin an gabos na ginibo nia para sa sato, pinahihiro kita nin odok sa pusong pag-apresyar na omawon sia. Kun pinepensar niato an milagrosong mga bagay na ginibo ni Jehova para sa saiyang banwaan kaidtong nakaaging mga panahon, minomotibar kita kan satong puso na omawon sia. Asin mantang hinohorophorop niato an ipinanugang dakulang mga bagay na gigibohon pa ni Jehova, naghahanap kita nin mga paagi na ipahayag an pag-omaw asin pagpasalamat.
10, 11. Paanong an pag-eksister niato mismo nagtatao sa sato nin dahelan na omawon an Dios?
10 An mismong pag-eksister niato nagtatao sa sato nin makatanosan na dahelan na omawon si Jah. Nag-awit si David: “Ika [si Jehova] oomawon ko huli ta sa makangingirhat na paagi makangangalas an pagkagibo sa sako. Makangangalas an saimong mga gibo, na aram na gayo kan sakuyang kalag.” (Salmo 139:14) Iyo, “makangangalas an pagkagibo” sa sato asin igwa kita nin mahalagang marhay na mga balaog na arog kan pagheling, pagdangog, asin kakayahan sa pag-iisip. Kun siring, bako daw na maninigo kitang mamuhay sa paagi na nag-oomaw sa Kaggibo sa sato? Siring kaiyan an sinabi ni Pablo kan sia sumurat: “Kamo man nagkakakan o nag-iinom o ano pa man an ginigibo, gibohon an gabos na bagay sa ikamumuraway nin Dios.”—1 Corinto 10:31.
11 Gigibohon niato an gabos para sa ikamumuraway ni Jehova kun talagang namomotan ta sia. Sinabi ni Jesus na an enot na togon iyo ini: “Kamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Marcos 12:30; Deuteronomio 6:5) Maninigo nanggad niatong kamotan si Jehova asin omawon sia bilang Kaggibo sa sato asin an Paratao nin “lambang marahay na balaog asin lambang sangkap na regalo.” (Santiago 1:17; Isaias 51:13; Gibo 17:28) Total, an satong abilidad sa pangangatanosan, an satong espirituwal na kapasidad, asin an satong kosog sa pisikal—an gabos niatong kualidad asin abilidad—gikan ki Jehova. Bilang satong Kaglalang, sia maninigo sa satong pagkamoot asin pag-omaw.
12. Ano an saboot nindo manongod sa dakulang mga gibo ni Jehova asin sa mga tataramon sa Salmo 40:5?
12 An dakulang mga gibo ni Jehova nagtatao sa sato nin dai mabilang na dahelan na kamotan asin omawon sia! “Dakol na bagay an saimo mismong ginibo, O Jehova na sakong Dios, an saimo nganing makangangalas na mga gibo asin an saimong mga paghorophorop sa samo,” an inawit ni David. “Mayo nin ikakabaing sa saimo. Kun ako magmawot na isaysay asin itaram an mga iyan, an mga iyan dai ko na kayang isaysay huli sa kadakolan.” (Salmo 40:5) Dai ikasaysay ni David an gabos na makangangalas na gibo ni Jehova, asin kita dai man. Alagad pirme niatong omawon an Dios kun an arin man sa saiyang dakulang mga gibo iinaapod sa satong atension.
Mga Gibo na Konektado sa Daing Sagkod na Katuyohan nin Dios
13. Paano konektado sa dakulang mga gibo nin Dios an satong paglaom?
13 An satong paglaom sa ngapit konektadong marhay sa dakula asin kaomaw-omaw na mga gibo na may labot sa daing sagkod na katuyohan nin Dios. Pagkatapos kan pagrebelde sa Eden, itinao ni Jehova an enot na hula na pano nin paglaom. Kan sinesentensiahan an halas, an Dios nagsabi: “Bubugtakan ko nin pakikienemigo sa pag-oltanan mo asin kan babae saka sa pag-oltanan kan saimong banhi asin kan saiyang banhi. Lulugadon ka nia sa payo asin lulugadon mo sia sa bool.” (Genesis 3:15) An paglaom sa ipinanugang Banhi kan babae nagdanay na buhay sa puso nin fiel na mga tawo pagkatapos na gibohon ni Jehova an sarong dakulang gibo paagi sa pagligtas ki Noe asin sa saiyang pamilya sa lakop sa globong Delubyo na puminara sa sarong maraot na kinaban. (2 Pedro 2:5) An makahulang mga panuga sa mga tawong may pagtubod na arog ki Abraham asin David nagtao nin dugang pang pakarorop sa kun ano an gigibohon ni Jehova paagi sa Banhi na iyan.—Genesis 22:15-18; 2 Samuel 7:12.
14. Ano an nakalalabi sa gabos na halimbawa kan dakulang mga gibo ni Jehova para sa katawohan?
14 An nakalalabi sa gabos na pagpatunay ki Jehova bilang an saro na naggigibo nin dakulang mga gibo para sa katawohan nangyari kan itao nia an saiyang bugtong na Aki—an ipinanugang Banhi, si Jesu-Cristo—bilang atang na pantubos. (Juan 3:16; Gibo 2:29-36) An pantubos an nagtao kan basehan para sa pakipag-ulian sa Dios. (Mateo 20:28; Roma 5:11) An enot na mga nakapakipag-ulian tinipon ni Jehova sa Kristianong kongregasyon, na tinindog kan Pentecostes 33 C.E. Sa tabang kan banal na espiritu, ihinulit ninda an maogmang bareta sa gabos na lugar, na ipinaheheling kun paano pinangyari kan kagadanan asin pagkabuhay liwat ni Jesus na maeksperyensiahan kan makinuyog na katawohan an daing sagkod na mga bendisyon sa pamamahala kan langitnon na Kahadean nin Dios.
15. Paano si Jehova huminiro sa makangangalas na paagi sa satong kaaldawan?
15 Sa satong kaaldawan, si Jehova huminiro sa makangangalas na paagi tanganing tiponon an ultimong linahidan na mga Kristiano. An mga doros nin kalaglagan pinogolan tanganing tawan nin lugar an pagtatak sa mga natatada kan 144,000, na mamamahala kaiba ni Cristo sa langit. (Kapahayagan 7:1-4; 20:6) Sinierto nin Dios na an linahidan na mga Kristiano nakalda sa espirituwal na pagkaoripon sa “Dakulang Babilonya,” an pankinaban na imperyo nin falsong relihion. (Kapahayagan 17:1-5) An pagkakalda na iyan kan 1919 asin an proteksion nin Dios na naeksperyensiahan ninda poon kaidto nagpangyari sa linahidan na natatada na gibohon an ano? Na sumirang sa pagtao nin pangultimong patotoo bago taposon ni Jehova an maraot na sistema nin mga bagay ni Satanas sa marikas nang nagdadangadang na “dakulang kahorasaan.”—Mateo 24:21; Daniel 12:3; Kapahayagan 7:14.
16. Ano an nangyayari bilang resulta kan presenteng aldaw na pambilog na kinaban na paghuhulit kan Kahadean?
16 Pinangenotan nin maigot kan linahidan na mga Saksi ni Jehova an pambilog na kinaban na paghuhulit kan Kahadean. Bilang resulta, an nagdadakol na “ibang karnero” nagigin ngonyan mga parasamba ni Jehova. (Juan 10:16) Naggagayagaya kita na bukas pa sagkod ngonyan an oportunidad para sa mga mahoyo sa daga na umayon sa sato sa pag-omaw ki Jehova. An mga naghihimate sa pag-agda na “madia” nakatalagang maligtas sa dakulang kahorasaan, na may paglaom na mag-omaw ki Jehova sa bilog na panahon na daing sagkod.—Kapahayagan 22:17.
Rinibong Nagbuburunyog sa Tunay na Pagsamba
17. (a) Paano si Jehova naggigibo nin dakulang mga gibo may koneksion sa satong paghuhulit? (b) Paano naootob an Zacarias 8:23?
17 Si Jehova naggigibo ngonyan nin dakula asin kaomaw-omaw na mga gibo may koneksion sa satong paghuhulit. (Marcos 13:10) Sa nakaagi pa sanang mga taon, ‘binuksan nia an darakulang tata na pasiring sa gibohon.’ (1 Corinto 16:9) Pinagin posible kaini na ikabalangibog an maogmang bareta sa mahiwas na mga teritoryo na dati nagkokontra an mga kaiwal kan katotoohan. An dakol na dati yaon sa espirituwal na kadikloman naghihimate na ngonyan sa pag-agda na sambahon si Jehova. Inootob ninda an makahulang mga tataramon na ini: “Ini an sabi ni Jehova nin mga hukbo, ‘Mangyayari sa mga aldaw na iyan na an sampulong tawo hale sa gabos na tataramon kan mga nasyon makarapot, iyo, sinda nanggad makarapot sa gayad kan gubing nin sarong tawo na Judio, na nagsasarabi: “Maiba kami sa saindo, huli ta nabaretaan niamo na an Dios yaon dian sa saindo.”’” (Zacarias 8:23) An sinasabihan digdi kan sampulong tawo iyo an espirituwal na mga Judio, an presenteng aldaw na natatada kan linahidan na mga Kristiano. Huling an sampulo puedeng magrepresentar sa pagigin kompleto nin sarong bagay na daganon, an “sampulong tawo” naglaladawan sa “dakulang kadaklan,” na iinasosyar sa “Israel nin Dios,” na magkairibanan na minakompuesto nin “sarong aripompon.” (Kapahayagan 7:9, 10; Galacia 6:16) Abaang kagayagayahan na maheling an kadakol ngonyan na iribang naggigibo nin sagradong paglilingkod bilang mga parasamba ki Jehova Dios!
18, 19. Ano an ebidensia na binebendisyonan ni Jehova an paghuhulit?
18 Naoogma kitang marhay na manampulong ribo—sa katunayan, ginatos na ribo—an nag-aako kan tunay na pagsamba sa kadagaan na dati dominadong gayo kan falsong relihion kaya garo baga nungkang aakseptaron kan mga tawo an maogmang bareta. Helingon nindo an bagong Yearbook of Jehovah’s Witnesses, asin mangnohon nindo an kadagaan na ngonyan nagrereport nin poon sa 100,000 sagkod haros 1,000,000 na parahayag kan Kahadean. Makosog na prueba ini na an paghuhulit kan Kahadean binebendisyonan ni Jehova.—Talinhaga 10:22.
19 Bilang banwaan ni Jehova, inoomaw asin pinasasalamatan ta an satong langitnon na Ama sa pagtao sa sato nin tunay na katuyohan sa buhay, nakakokontentong gibohon sa paglilingkod sa saiya, asin maliwanag na pananaw sa ngapit. Kita nabubuhay na galagang inaantisipar an kaotoban kan gabos na panuga nin Dios asin desididong ‘magdanay sa pagkamoot nin Dios, na nasa isip an buhay na daing katapusan.’ (Judas 20, 21) Naoogma nanggad kitang marhay na maheling na an dakulang kadaklan na nag-oomaw sa Dios may kabilangan na ngonyan na mga 6,000,000! Igwa nin risang-risang bendisyon ni Jehova, an linahidan na natatada asin an kairiba nindang ibang karnero inorganisar sa mga 91,000 na kongregasyon sa 235 kadagaan. Kita gabos basog sa espirituwal paagi sa daing kapagalan na mga paghihingoa kan “fiel asin may diskresion na oripon.” (Mateo 24:45) Sarong progresibong teokratikong organisasyon na may mamomoton na pangangataman an nag-aasikaso sa aktibidad na pan-Kahadean paagi sa 110 na sangang opisina kan Mga Saksi ni Jehova. Nagpapasalamat kita na pinahiro ni Jehova an puso kan saiyang banwaan na ‘tawan sia nin onra paagi sa saindang mahahalagang bagay.’ (Talinhaga 3:9, 10) Bilang resulta, nagpapadagos an satong pambilog na kinaban na paghuhulit, na may mga pasilidad sa pag-imprenta, erokan na Bethel asin nin mga misyonero, Kingdom Hall, asin Assembly Hall na itinotogdok kun kinakaipuhan.
20. Ano an maninigong magin epekto sa sato kan paghorophorop sa dakula asin kaomaw-omaw na mga gibo ni Jehova?
20 Imposibleng masabi niato an gabos na dakula asin kaomaw-omaw na gibo kan satong langitnon na Ama. Alagad mapopogolan daw nin siisay man na tanos an puso na dai sia umayon sa kaburunyogan nin mga parasamba ki Jehova? Siempre dai! Kun siring, logod na an gabos na namomoot sa Dios magayagayang kumurahaw: “Omawa nindo si Jah, banwaan! Omawa nindo si Jehova hale sa kalangitan, omawa sia nindo sa mga kaitaasan. Omawa nindo sia, kamo gabos na anghel nia . . . , kamong hoben na mga lalaki asin kamo man na mga daraga, kamong gurang na mga lalaki kaibanan nin mga aking lalaki. Pag-omawon logod ninda an ngaran ni Jehova, huli ta an saiyang ngaran sana an halangkaw na dai maaabot. An saiyang dignidad halangkaw kisa daga asin langit.” (Salmo 148:1, 2, 12, 13) Iyo, ngonyan asin sagkod lamang, omawon niato si Jehova huli sa gabos niang dakulang gibo!
Ano an Isisimbag Nindo?
• Ano an nagkapira sa kaomaw-omaw na mga gibo ni Jehova?
• Taano ta napahihiro kamo na omawon si Jehova?
• Paano konektado sa dakulang mga gibo nin Dios an satong paglaom?
• Paano si Jehova naggigibo nin kaomaw-omaw na mga gibo may koneksion sa paghuhulit kan Kahadean?
[Mga Hapot Para sa Pag-adal]
[Ritrato sa pahina 10]
Kamo daw bilog na pusong minaayon sa mga awit nin pag-omaw ki Jehova?
[Mga Ritrato sa pahina 13]
Naggagayagaya kita na bukas pa sagkod ngonyan an oportunidad para sa mga mahoyo na umayon sa sato sa pag-omaw ki Jehova