Pagtogdok nin Pamilya na Makosog sa Espirituwal
Pagtogdok nin Pamilya na Makosog sa Espirituwal
“Padagos na padakulaon sinda sa disiplina asin pagtatanos nin isip ni Jehova.”—EFESO 6:4.
1. Ano an katuyohan nin Dios para sa pamilya, alagad ano imbes an nangyari?
“PANGAGBUNGA asin pangagdakol kamo asin panoa nindo an daga.” (Genesis 1:28) Paagi sa mga tataramon na iyan ki Adan asin Eva, inestablisar ni Jehova Dios an areglo nin pamilya. (Efeso 3:14, 15) Sa pagtanaw sa ngapit, maiimahinar kan enot na mag-agom na iyan an sarong daga na pano nin mga aki ninda—sarong ekstendidong pamilya nin sangkap na mga indibiduwal na magayagayang namumuhay sa sarong paraisong daga asin nagkakasararong nagsasamba sa saindang Kaharohalangkaweng Kaglalang. Alagad si Adan asin Eva nagkasala, asin an daga dai napano nin matanos, may takot sa Dios na mga tawo. (Roma 5:12) Imbes, an buhay pampamilya marikas na nagraot, asin luminakop an pagkaongis, kadahasan, asin kadaihan nin “natural na kapadangatan,” nangorogna sa “huring mga aldaw” na ini.—2 Timoteo 3:1-5; Genesis 4:8, 23; 6:5, 11, 12.
2. An mga aki ni Adan igwa nin anong mga kakayahan, alagad ano an kaipuhan tanganing makatogdok nin sarong pamilya na makosog sa espirituwal?
2 Si Adan asin Eva linalang sa ladawan nin Dios. Minsan ngani parakasala na ngonyan, tinogotan ni Jehova si Adan na magkaigwa nin mga aki. (Genesis 1:27; 5:1-4) Arog kan saindang ama, an mga aki ni Adan igwa nin moral na kapasidad asin puedeng makanood na mamidbid an kalaenan kan tama asin sala. Puede sindang tokdoan kun paano sasambahon an saindang Kaglalang asin kan kahalagahan kan pagkamoot sa saiya sa bilog nindang puso, kalag, isip, asin kosog. (Marcos 12:30; Juan 4:24; Santiago 1:27) Dugang pa, puede sindang patoodon ‘na gumibo nin hustisya asin mamoot sa kabootan asin na magin hababa an boot sa paglakaw sa kaibahan nin Dios.’ (Miqueas 6:8) Minsan siring, bilang mga parakasala, kaipuhan nindang magtao nin darudakulang atension tanganing makatogdok nin sarong pamilya na makosog sa espirituwal.
Tuboson an Panahon
3. Paano mahihimo nin mga magurang na ‘tuboson an panahon’ sa pagpadakula nin Kristianong mga aki?
3 Sa komplikado, kritikal na mga panahon na ini, dapat na gumibo nin dakulang paghihingoa tanganing an mga aki magin “mga namomoot ki Jehova” na talagang ‘naoongis sa maraot.’ (Salmo 97:10) An madonong na mga magurang ‘tutuboson an panahon’ tanganing maatubang an angat an ini. (Efeso 5:15-17) Kun kamo magurang, paano nindo ini magigibo? Enot, magbugtak nin mga prioridad, na tinatawan nin atension an “orog na mahalagang mga bagay,” kabale an pagtotokdo asin pagpatood sa mga aki nindo. (Filipos 1:10, 11) Ikaduwa, gibohon na simple an saindong estilo nin buhay. Tibaad kaipuhan nindong ipagilid an mga aktibidad na dai man talaga kaipuhan. O tibaad kaipuhan nindong butasan an dai kaipuhan na mga rogaring na nagkukua nin panahon sa pagmantener. Bilang Kristianong magurang, dai kamo noarin man magbabasol na ginibo nindo an paghihingoa na kaipuhan sa pagpadakula nin may takot sa Dios na mga aki.—Talinhaga 29:15, 17.
4. Paano mapagdadanay na sararo an pamilya?
4 Bawi na marhay an paghihingoa sa panahon na itinatao nindo sa saindong mga aki, nangorogna kun nakasentro sa espirituwal na mga bagay, asin saro iyan sa pinakamarahay na mga paagi nin pagpapadanay na sararo an pamilya. Alagad dai ini ipagpabahala na sana. Mag-iskedyul nin mga panahon na mag-iiribanan kamo. Dai ini nangangahulogan nin pagigin nasa sarong harong, na an balang saro may kanya-kanyang sadiring ginigibo. An mga aki pinakamarahay na natalubo kun igwa nin aroaldaw na personal na atension. An pagkamoot asin pagmakolog kaipuhan na ipaheling nin bulaos. Dawa bago pa sinda magdesisyon na mag-aki, dapat na seryosong konsideraron kan mga mag-agom an importanteng responsibilidad na ini. (Lucas 14:28) Kun siring dai ninda ibibilang na trabaho an pagpadakula sa mga aki. Imbes, ibibilang ninda iyan na sarong binendisyonan na pribilehio.—Genesis 33:5; Salmo 127:3.
Magtokdo Paagi sa Tataramon Asin Halimbawa
5. (a) Saen minapoon an pagtotokdo sa mga aki na kamotan si Jehova? (b) Anong hatol an itinatao sa mga magurang sa Deuteronomio 6:5-7?
5 An pagtotokdo sa saindong mga aki na kamotan si Jehova minapoon sa saindo mismong pagkamoot sa saiya. An makosog na pagkamoot sa Dios an mapahiro sa saindo na sunodon nin fiel an gabos niang instruksion. Kabale digdi an pagpadakula sa mga aki “sa disiplina asin pagtatanos nin isip ni Jehova.” (Efeso 6:4) Sinasadol nin Dios an mga magurang na magtao nin halimbawa sa saindang mga aki, magkomunikar sa sainda, asin tokdoan sinda. An Deuteronomio 6:5-7 nagsasabi: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong kosog. Asin an mga tataramon na ini na ipinagboboot ko sa saimo ngonyan dapat na mamugtak sa saimong puso; asin dapat na itadom mo an mga iyan sa saimong aki asin magtaram ka manongod dian kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon.” Paagi sa dayaday na pagkonseho asin pag-otro, ikatatadom nindo sa mga aki nindo an mga togon nin Dios. Sa siring, mamamatean kan aki nindo an pagkamoot nindo ki Jehova asin sinda man maiimpluwensiahan na pataluboon an kadayupotan sa saiya.—Talinhaga 20:7.
6. Paano puedeng aprobetsaran nin mga magurang an bagay na an mga aki nakakanood paagi sa halimbawa?
6 An mga aki gustong-gustong makanood. Sinda alisto sa paghinanyog asin pag-obserbar patin madaling umarog sa saindong halimbawa. Kun naheheling ninda na kamo bakong materyalistiko, tinatabangan sinda kaini na manodan kun paano susunodon an hatol ni Jesus. Tinotokdoan nindo sinda na dai maghadit manongod sa materyal na mga bagay kundi ‘hanapon nguna an kahadean nin Dios.’ (Mateo 6:25-33) Paagi sa nakararahay, nakapakokosog na pag-orolay manongod sa katotoohan sa Biblia, kongregasyon nin Dios, asin sa nombradong kamagurangan, tinotokdoan nindo an saindong mga aki na igalang si Jehova asin pahalagahan an saiyang espirituwal na mga probisyon. Huling madaling marisa kan mga aki an pagigin pabarobago, an berbal na pagtotokdo dapat na suportado nin gawe-gawe asin aktitud na nagpapatunay kan saindo mismong hararom na pagpahalaga sa espirituwal na mga bagay. Kanigoan na bendisyon kun naheheling kan mga magurang na an saindang marahay na halimbawa nagbubunga sa saindang mga aki nin bilog na pusong pagkamoot ki Jehova!—Talinhaga 23:24, 25.
7, 8. Anong halimbawa an nagpapaheling kan halaga nin pagpatood sa mga aki poon sa amay na edad, asin kiisay maninigo na itao an kredito para sa kapangganahan?
7 An halaga nin pagpatood sa mga aki poon sa amay pang edad maheheling sa sarong halimbawa hale sa Venezuela. (2 Timoteo 3:15) Manongod iyan sa hoben pang mag-agom, si Felix asin Mayerlin. Sinda mga ministrong payunir. Kan mamundag an saindang aki na si Felito, gustong-gusto nindang gibohon an pinakamakakaya ninda sa pagpadakula sa saiya bilang tunay na parasamba ki Jehova. Pinonan ni Mayerlin na basahan nin makosog si Felito sa My Book of Bible Stories, na ipinublikar kan Mga Saksi ni Jehova. Sa amay na edad, garo baga midbid na ni Felito si Moises asin an iba pang tawo na ilinadawan sa librong ini.
8 Minsan ngani medyo aki pa, si Felito nagpoon na magpatotoo nin solo. Inotob nia an saiyang kamawotan na magin sarong parahayag kan Kahadean, asin kan huri sia nabautismohan. Pag-abot nin panahon, si Felito nagin regular payunir. Nagkomento an saiyang mga magurang: “Mantang minamasdan mi an pag-oswag kan samong aki, aram mi na utang mi iyan ki Jehova asin sa saiyang pagtotokdo.”
Tabangan an mga Aki na Umoswag sa Espirituwal
9. Taano ta maninigo tang pasalamatan an espirituwal na pagtotokdo na inaako niato paagi sa grupong fiel asin may diskresion na oripon?
9 Dinosenang magasin, ginatos na libro, asin rinibong Web site sa Internet an nagtatao nin sadol sa kun paano magpadakula nin mga aki. Parateng marhay na “an impormasyon nagkakasarongatan,” an sabi sa sarong espesyal na isyu kan Newsweek dapit sa mga aki. “An orog pa nganing nakariribaraw iyo an kun an impormasyon na sa paghona nindo mapananarigan nindo biyong sala man sana palan.” Kanigoan an pagpasalamat niato na abunda an itinatao ni Jehova para sa pagtotokdo asin espirituwal na pagtalubo nin mga pamilya! Lubos daw nindong inaaprobetsaran an gabos na probisyon na itinatao paagi sa grupong fiel asin may diskresion na oripon?—Mateo 24:45-47.
10. Paano kapakipakinabang para sa mga magurang sagkod sa mga aki an sarong epektibong pampamilyang pag-adal sa Biblia?
10 An sarong importanteng marhay na kinakaipuhan iyo an regular, daing liwat-liwat na pampamilyang pag-adal sa Biblia na ginigibo sa pamugtak na kamugtakan. Tanganing iyan magin nakapagtotokdo, nakagagayagaya, asin nakaparirigon sa boot, kaipuhan an marahay na preparasyon. Paagi sa pag-enganyar sa saindang mga aki na magtaram, maaaraman kan mga magurang kun ano an nasa saindang puso asin isip. An sarong paagi tanganing maaraman kun epektibo an pampamilyang pag-adal iyo an pagrisa kun baga inaantisipar iyan kan gabos na miembro kan pamilya.
11. (a) Matatabangan kan mga magurang an saindang mga aki na gumibo nin anong mga pasohan? (b) Ano an nagin resulta kan pagmaigotan nin sarong aking Haponesa na aboton an saiyang pasohan?
11 An mga pasohan na sono sa Kasuratan nagkokontribwir man sa pamilya na makosog sa espirituwal, asin maninigo na tabangan kan mga magurang an saindang mga aki na gibohon ini. Kabale sa tamang mga pasohan an aroaldaw na pagbasa sa Biblia, pagigin regular na parahayag kan maogmang bareta, asin pag-oswag pasiring sa pagdusay asin bautismo. Puedeng kabale sa iba pang pasohan an bilog na panahon na paglilingkod bilang payunir, sa Bethel, o bilang misyonero. Kan nasa elementarya pa, ginibong pasohan nin sarong aking Haponesa na an ngaran Ayumi na magpatotoo sa gabos niang kaklase. Tanganing pukawon an interes kan saiyang maestra asin mga kaklase, naghagad sia nin permiso na magbugtak sa libreriya nin nagkapirang publikasyon sa Biblia. Bilang resulta, nagkaigwa sia nin 13 pag-adal sa Biblia durante kan anom na taon nia sa elementarya. An saro sa mga inaadalan na idto sa Biblia asin an iba pa sa pamilya kan inaadalan na ini nagin bautisadong Kristiano.
12. Paano makukua kan mga aki an pinakadakulang pakinabang sa Kristianong mga pagtiripon?
12 Kaipuhan man para sa makosog na espirituwal na salud an regular na pag-atender sa mga pagtiripon. Sinadol ni apostol Pablo an mga kapagtubod na ‘dai pagpabayaan an saindang pagtorotiripon, siring kan kaugalean nin nagkapira.’ Bako logod iyan an magin ugale niato, ta an mga aki asin gurang man nakikinabang nin dakula sa regular na pag-atender sa Kristianong mga pagtiripon. (Hebreo 10:24, 25; Deuteronomio 31:12) An mga aki maninigong tokdoan na maghinanyog nin atento. Mahalaga man na marhay an pag-andam para sa mga pagtiripon ta an pinakadakulang pakinabang minagikan sa pagkaigwa nin aktibong partisipasyon paagi sa pagkomento. Baga man an sarong sadang na aki puedeng pumoon paagi sa pagkomento nin duwang tataramon o pagbasa nin halipot na kabtang sa sarong parapo, magigin pinakakapakipakinabang kun an mga aki sinasanay na hanapon an mga simbag asin sabihon iyan sa sadiri nindang mga tataramon. Nagtatao daw kamo mga magurang nin halimbawa paagi sa regular, makahulogan na pagkomento nindo mismo? Marahay man na an lambang miembro kan pamilya magkaigwa nin Biblia, songbook, asin kopya kan publikasyon na ginagamit sa pagtokar sa Kasuratan.
13, 14. (a) Taano ta maninigong ibanan kan mga magurang an saindang mga aki sa ministeryo? (b) Ano an makatatabang na magin kapakipakinabang asin nakagagayagaya para sa mga aki an paglilingkod sa langtad?
13 An madonong na mga magurang ididirehir an kosog nin pagkabarobata kan saindang mga aki sa paglilingkod ki Jehova, na tinatabangan sinda na gibohon na importanteng kabtang kan saindang buhay an paghuhulit. (Hebreo 13:15) Paagi sana sa pag-iba sa saindang mga aki sa ministeryo na masesegurado kan mga magurang na makukua kan saindang mga aki an pagsasanay na kaipuhan tanganing magin mga ministro “na mayo nin maninigong ikasopog, na ginagamit an tataramon kan katotoohan sa tamang paagi.” (2 Timoteo 2:15) Kaya, kun siring, kumusta man kamo? Kun kamo magurang, tinatabangan daw nindo an saindong mga aki na mag-andam para sa paglilingkod sa langtad? An paggibo kaini makatatabang na magin nakagagayagaya, makahulogan, asin mabunga para sa sainda an ministeryo.
14 Taano ta kapakipakinabang na mag-iribanan an mga magurang asin an saindang mga aki sa ministeryo? Sa paaging ini, maririsa asin makokopya kan mga aki an marahay na halimbawa kan saindang mga magurang. Kadungan kaiyan, maoobserbaran kan mga magurang an aktitud, gawe-gawe, asin abilidad kan saindang mga aki. Seguradohon na iiba an saindong mga aki sa laen-laen na kabtang kan ministeryo. Kun posible, tawan an lambang aki nin sadiring bag para sa paghuhulit, asin tokdoan sia na papagdanayon iyan na malinig asin areglado patin presentable. Paagi sa daing liwat-liwat na pagsasanay asin pagparigon sa boot, mapatatalubo an tunay na pagpahalaga sa ministeryo, asin mamansayon kan mga aki an paghuhulit bilang paagi nin pagpaheling nin pagkamoot sa Dios asin sa kataed.—Mateo 22:37-39; 28:19, 20.
Papagdanayon an Espirituwalidad
15. Huling importanteng marhay an pagpapadanay kan espirituwalidad kan pamilya, ano an nagkapirang paagi nin paggibo kaini?
15 Mahalagang marhay an pagpapadanay kan espirituwalidad kan pamilya. (Salmo 119:93) An sarong paagi nin paggibo kaini iyo na ipakipag-olay an espirituwal na mga bagay sa saindong pamilya sa lambang oportunidad. Ipinakikipag-olay daw nindo sa sainda an teksto sa Biblia para sa aldaw? Ugale daw nindo an mag-estorya nin mga eksperyensia sa paglilingkod sa langtad o mga punto hale sa pinakabagong mga magasin na Torrengbantayan asin Awake! ‘kun kamo naglalakaw sa dalan’? Ginigirumdom daw nindo na pasalamatan si Jehova sa pamibi para sa kada aldaw nin buhay asin sa saiyang nagsosopay na probisyon ‘kun kamo naghihigda asin kun kamo minabangon’? (Deuteronomio 6:6-9) Kun naheheling kan saindong mga aki na an pagkamoot sa Dios nababanaag sa gabos na ginigibo nindo, makatatabang ini sa sainda na isapuso an katotoohan.
16. Ano an kahalagahan kan pagdagka sa mga aki na gumibo kan sadiri nindang pagsiyasat?
16 Kun beses, kakaipuhanon kan mga aki an giya tanganing maatubang nin mapanggana an minabangon na mga problema o situwasyon. Imbes na pirmeng sinasabihan sinda kan dapat na gibohon, taano ta dai ipaheling sa sainda kun paano aaramon an punto de vista nin Dios dapit sa mga bagay-bagay paagi sa pagdagka sa sainda na gumibo kan sadiri nindang pagsiyasat? An pagtokdo sa mga aki na gamiton nin marahay an gabos na kasangkapan asin publikasyon na itinatao paagi sa ‘fiel na oripon’ makatatabang sa sainda na mapatalubo an dayupot na relasyon ki Jehova. (1 Samuel 2:21b) Asin kun ihinihiras ninda sa ibang miembro kan pamilya an mga pakinabang kan saindang siniyasat sa Biblia, orog pang napaooswag an espirituwalidad kan pamilya.
Lubos na Manarig ki Jehova
17. Taano ta dai maninigong madesesperar an nagsosolong mga magurang pag-abot sa pagpadakula sa saindang mga aki bilang mga Kristiano?
17 Kumusta man an mga pamilyang nagsosolo an magurang? An mga ini napapaatubang sa dugang pang mga angat pag-abot sa pagpadakula sa mga aki. Alagad nagsosolong mga magurang, dai manluya an saindong boot! Posible an kapangganahan, siring sa ipinaheheling kan dakol na nagsosolong magurang na nagtiwala sa Dios, makinuyog na iinaplikar an saiyang hatol, asin nagpadakula nin marahay, makosog sa espirituwal na mga aki. (Talinhaga 22:6) Siempre, an mga Kristiano na nagsosolong magurang kaipuhan na manarig nin lubos ki Jehova. Sinda dapat na tumubod na sia matabang.—Salmo 121:1-3.
18. Anong mga pangangaipo sa isip asin hawak kan saindang mga aki an maninigong tawan nin atension kan mga magurang, alagad ano an maninigo na ipaorog?
18 An madonong na mga magurang nakakaaram na ‘igwa nin panahon nin pagngisi asin panahon nin pagtaroktarok.’ (Eclesiastes 3:1, 4) Kaipuhan sa pagpatalubo kan isip asin hawak nin aki an panahon nin paglibang asin timbang, nakararahay na pag-aling-aling. An nakapakokosog na musika asin nangorogna an pagkanta nin mga awit nin pag-omaw sa Dios matabang sa sarong aki na mapatalubo an tamang aktitud na puedeng magkaigwa nin mahalagang kabtang sa pagpakosog kan saiyang relasyon ki Jehova. (Colosas 3:16) An pagkaaki iyo man an panahon nin pag-andam na magin may takot sa Dios na adulto, tanganing an pagkamit nin buhay magpadagos sagkod lamang sa sarong paraisong daga.—Galacia 6:8.
19. Taano ta makakokompiar an mga magurang na bebendisyonan ni Jehova an mga paghihingoa ninda sa pagpadakula sa mga aki?
19 Boot ni Jehova na an gabos na Kristianong pamilya magdanay na makosog sa espirituwal asin sararo. Kun talagang namomotan ta an Dios asin ginigibo ta an satong pinakamakakaya na kuyogon an saiyang Tataramon, bebendisyonan nia an satong mga paghihingoa asin tatawan kita kan kosog na kaipuhan tanganing masunod an saiyang ipinasabong na instruksion. (Isaias 48:17; Filipos 4:13) Girumdomon na an oportunidad na yaon sa saindo ngonyan na tokdoan asin sanayon an saindong mga aki limitado asin dai na maootro. Gibohon an saindong pinakamakakaya na iaplikar an hatol kan Tataramon nin Dios, asin bebendisyonan ni Jehova an saindong mga paghihingoa na magtogdok nin pamilya na makosog sa espirituwal.
Ano an Nanodan Niato?
• Taano ta importanteng marhay an pagtubos nin panahon kun sinasanay an mga aki?
• Taano ta kaipuhan an marahay na halimbawa kan mga magurang?
• Ano an nagkapirang importanteng paagi nin pagtabang sa mga aki na umoswag sa espirituwal?
• Paano mapagdadanay an espirituwalidad nin pamilya?
[Mga Hapot Para sa Pag-adal]
[Mga Ritrato sa pahina 24, 25]
An mga pamilyang makosog sa espirituwal regular na nag-aadal sa Tataramon nin Dios, nag-aatender sa Kristianong mga pagtiripon, asin magkairibanan sa ministeryo