Tumindog na Lubos Asin May Marigon na Kombiksion

‘Uya! An Dakulang Kaburunyogan!’

IYAN sarong hapot na nagin dakulang iisipon para sa mga lingkod ni Jehova sa dakol na dekada. May paghihingoang ginibo kaidto pa tanganing resolberan iyan paagi sa Kasuratan. An tema nagresulta sa dakol na orolay. Alagad sa katapustapusi nanompongan an simbag kan Biblia, asin haros nagpalaad iyan sa boot kan mga nagdadangog sa sarong kombension sa Washington, D.C., kan taon nin 1935.

Nagin basehan kan gabos na orolay an sarong komun na isyu: Ano an midbidan kan “dakulang kaburunyogan” (King James Version), o “dakulang kadaklan” (New World Translation), na nasambitan sa Kapahayagan 7:9? An grupo daw na ini nin mga nagtutubod maerok sa langit?

Sarong Haloy Nang Hapot

Poon kan panahon ni apostol Juan sagkod sa satong kaaldawan, nagin dakulang iisipon para sa mga Kristiano an manongod sa midbidan kan “dakulang kaburunyogan.” Ibinilang kan Mga Estudyante sa Biblia an dakulang kadaklan na sarong sekondaryong langitnon na grupo, sarong grupo na may kaaraman sa katotoohan sa Biblia alagad dai nagmaigot sa pagpalakop kaiyan.

Minsan siring, may nagkapirang asosyado sa linahidan na mga Kristiano an nagin maigot na marhay sa paghuhulit. Mayo sinda nin pagmawot na magduman sa langit. Sa katunayan, an saindang paglaom kaoyon kan pampublikong pahayag na “An Minilyon na Nabubuhay Ngonyan Dai Na Noarin Man Magagadan,” na itinampok kan banwaan ni Jehova poon kan 1918 sagkod 1922. An siring na mga indibiduwal bebendisyonan nin buhay na daing katapusan digdi sa daga.

Tinokar kan The Watch Tower kan Oktubre 15, 1923, an parabola ni Jesus kan mga karnero saka kanding asin nagsabi: “An mga karnero nagrerepresentar sa gabos na tawo kan mga nasyon, bakong pinaniaki nin espiritu alagad may inklinasyon sa katanosan, na rinerekonoser sa isip si Jesu-Cristo bilang an Kagurangnan asin nag-aantisipar asin naglalaom sa mas marahay na panahon sa irarom kan saiyang paghade.”​​—Mateo 25:31-​46.

Orog Pang Sinag nin Liwanag

Kan taon nin 1931, an Vindication, Enot na Libro, tinokar an Ezequiel kapitulo 9 asin ipinamidbid an mga tinandaan sa angog para sa proteksion sa katapusan kan kinaban bilang an mga karnero sa parabola ni Jesus. Ilinadawan kan Vindication, Ikatolong Libro (ipinublikar kan 1932), an tanos na aktitud nin puso kan bakong Israelitang lalaki na si Jonadab, na suminakay sa karuwahe kan linahidan na si Hadeng Jehu kan Israel asin uminiba tanganing maheling an kaigotan ni Jehu sa paggadan kan falsong mga parasamba. (2 Hade 10:15-28) An libro nagsabi: “Si Jonadab nagrepresentar o nagserbing anino kan grupong iyan nin mga tawo ngonyan digdi sa daga [na] bakong kaoyon kan organisasyon ni Satanas, na naninindogan sa kampi nin katanosan, asin an mga iingatan kan Kagurangnan durante kan panahon nin Armagedon, ililigtas sinda sa kahorasaan na iyan, asin tatawan sinda nin buhay na daing katapusan digdi sa daga. An mga ini an minakompuesto kan grupong ‘karnero.’ ”

Kan 1934, lininaw kan The Watchtower na an mga Kristiano na may daganon na paglaom maninigong magdusay ki Jehova asin magpabautismo. An liwanag mapadapit sa daganon na grupong ini tunay nanggad na nagkikinang nin mas maliwanag kisa kasuarin man!​—Talinhaga 4:18.

Sarong Maliwanagon na Silyab nin Pakasabot

An pakasabot sa Kapahayagan 7:​9-​17 madali na kaidtong sumilyab nin maliwanagon. (Salmo 97:11) An The Watchtower nagpahayag kan paglaom na an sarong kombension na nakaiskedyul sa Mayo 30 sagkod Hunyo 3, 1935, sa Washington, D.C., E.U.A., magigin “sarong tunay na karangahan asin kapakinabangan” para sa mga ilinaladawan ni Jonadab. Asin iyo man nanggad!

Sa sarong nakapupukaw sa boot na pahayag  manongod sa “Dakulang Kaburunyogan,” na nadangog nin mga 20,000 na kombensionista, iinatubang ni J. F. Rutherford an katunayan sono sa Kasuratan na an “ibang karnero” sa presenteng aldaw kapareho man sana kan “dakulang kadaklan” kan Kapahayagan 7:9. (Juan 10:16) Sa kulminasyon kan pahayag na ini, an nagpapahayag naghapot: “Puede daw tumindog tabi an gabos na may paglaom na mabuhay sagkod lamang digdi sa daga?” Mantang nakatindog an dakulang kabtang kan mga nagdadangog, ipinahayag ni Rutherford: “Uya! An dakulang kaburunyogan!” Nagkaigwa nin halipot na pagsilensio, na sinundan nin makosog na magayagayang mga kurahaw. Kan suminunod na aldaw, 840 bagong Saksi ni Jehova an binautismohan, na an kadaklan sa mga ini naghihingako na kabilang sa dakulang kadaklan.

Sarong Pambihirang Presensia

Antes kan 1935, an nagdadakol na kabilang sa mga naghimate sa mensahe kan Biblia asin nagpaheling nin kaigotan sa paghuhulit kan maogmang bareta nagpaheling nin interes na mabuhay sagkod lamang sa Paraisong daga. Dai sinda nagmamawot na dumuman sa langit, huli ta dai sinda tinawan nin Dios kan paglaom na langitnon na buhay. An pagpamidbid ninda na sinda kabilang sa dakulang kadaklan nin ibang karnero nagpaparisa na kan 1935 haros tapos na an pag-apod sa 144,000 na linahidan na Kristiano.​—Kapahayagan 7:4.

Kan pumutok an Guerra Mundial II, si Satanas na Diablo makuring naghingoa na papondohon an pagtipon kan mga makompuesto kan dakulang kadaklan. An paghuhulit kan Kahadean ipinangalad sa dakol na nasyon. Durante kan mamondong mga aldaw na idto, asin dai nahaloy bago sia magadan kan Enero 1942, si J. F. Rutherford nagsabi: “Garo baga an ‘dakulang kaburunyogan’ dai talaga magigin dakula.”

Alagad huli sa bendisyon nin Dios, an mga bagay-bagay nagin kabaliktaran kaiyan. ‘Nagtitindog na lubos asin may marigon na kombiksion,’ an linahidan asin an saindang mga kaibaiba, an ibang karnero, inootob an sugo na paggibo nin disipulo. (Colosas 4:​12; Mateo 24:14; 28:​19, 20) Kan 1946 an kabilangan kan mga Saksi ni Jehova na naghuhulit sa bilog na kinaban 176,456​—na an kadaklan sa sainda kabilang sa dakulang kadaklan. Kan 2000, labing 6,000,000 na Saksi an fiel na naglilingkod ki Jehova sa 235 kadagaan​—tunay nanggad na sarong dakulang kadaklan! Asin padagos na nagdadakol an kabilangan.