“Kun an Dios Nasa Kampi Niato, Siisay an Matumang sa Sato?”
“Kun an Dios Nasa Kampi Niato, Siisay an Matumang sa Sato?”
“Kun siring, ano an sasabihon niato sa mga bagay na ini? Kun an Dios nasa kampi niato, siisay an matumang sa sato?”—ROMA 8:31.
1. Sairisay an huminale sa Egipto kairiba kan mga Israelita, asin ano an naggiya sa sainda na gibohon iyan?
KAN an mga Israelita pasiring na sa katalingkasan pakalihis nin 215 taon sa Egipto, na an kadaklan kan panahon na iyan sa kaoripnan, “tuminukad man na kaiba ninda an sarong dakulang kadaklan na manlaenlaen.” (Exodo 12:38) Naeksperyensiahan kan mga bakong Israelitang ini an sampulong makangingirhat na damat na nanraot sa Egipto asin ginibong makangingisi an falsong mga dios kaiyan. Kadungan kaiyan, naheling ninda—nangorogna poon sa ikaapat na damat—an kakayahan ni Jehova na protehiran an saiyang banwaan. (Exodo 8:23, 24) Minsan ngani limitado an saindang kaaraman dapit sa mga katuyohan ni Jehova, sarong bagay an segurado ninda: An mga dios kan Egipto dai naprotehiran an mga Egipcio, mantang pinatunayan ni Jehova na sia makosog para sa mga Israelita.
2. Taano ta sinuportaran ni Rahab an mga espiyang Israelita, asin taano ta dai napasala an saiyang kompiansa sa Dios ninda?
2 Pakalihis nin 40 taon, kan madali nang lumaog sa dagang Panuga an mga Israelita, an kasalihid ni Moises, si Josue, nagsugo nin duwang lalaki tanganing espiyahan an daga. Nanuparan ninda duman si Rahab, na taga Jerico. Sa nabaretaan nia manongod sa makapangyarihan na mga gibo ni Jehova na pagprotehir sa mga Israelita durante kan 40 taon poon kan sinda humale sa Egipto, aram nia na kun boot niang kamtan an bendisyon nin Dios, dapat niang suportaran an saiyang banwaan. Huli sa madonong na desisyon nia, sia asin an saiyang kasararo sa harong dai nakaiba sa pagkalaglag kan sa huri bihagon kan mga Israelita an siudad. An milagrosong paagi nin pagkaligtas ninda saro mismong dai mamamaluan na ebidensia na an Dios nasa kampi ninda. Sa siring, dai napasala an kompiansa ni Rahab sa Dios kan mga Israelita.—Josue 2:1, 9-13; 6:15-17, 25.
3. (a) Anong milagro an ginibo ni Jesus harani sa itinogdok liwat na siudad nin Jerico, asin ano an nagin reaksion kan klerong Judio? (b) Ano an narealisar kan nagkapirang Judio, asin kan huri kan dakol na bakong Judio?
3 Pakalihis nin 15 siglo, pinaomayan ni Jesu-Cristo an sarong butang parapakilimos harani sa itinogdok liwat na siudad nin Jerico. (Marcos 10:46-52; Lucas 18:35-43) An lalaking ini nakimaherak ki Jesus na kaherakan sia, na nagpaparisang rinerekonoser nia na si Jesus igwa kan pagsuportar nin Dios. Sa ibong na kampi, an Judiong mga namomoon sa relihion asin an mga parasunod ninda sa pankagabsan habong akoon na an mga milagrong ginibo ni Jesus prueba na an ginigibo nia mga gibo nin Dios. Imbes, tinatsaran ninda sia. (Marcos 2:15, 16; 3:1-6; Lucas 7:31-35) Dawa kan mapaatubang sa katunayan na si Jesus binuhay liwat pakatapos na gadanon sia ninda, habo nindang admitiron na an Dios an naggibo kaini. Imbes, sinda an nangenot sa paglamag sa mga parasunod ni Jesus, na hinihingoang olangon an saindang gibohon na ‘pagpahayag kan maogmang bareta dapit sa Kagurangnan na si Jesus.’ Alagad an nagkapirang Judio, asin kan huri an dakol na bakong Judio, tinawan nin atension an mga pangyayaring ini asin inebalwar iyan nin tama. Para sa sainda risang-risa na isinikwal na nin Dios an Judiong mga namomoon na nagpapakangmatanos sa sadiri asin an sinusuportaran na iyo an mapakumbabang mga parasunod ni Jesu-Cristo.—Gibo 11:19-21.
Siisay Ngonyan an Igwa kan Pagsuportar nin Dios?
4, 5. (a) Ano an saboot nin nagkapirang tawo manongod sa pagpili nin relihion? (b) Sa pagmidbid kan tunay na relihion, ano an importanteng marhay na hapot?
4 Dapit sa kun ano an tunay na relihion, an sarong klerigo nagsabi sa sarong interbio sa TV dai pa sana nahahaloy: “Iiinsistir ko na an sarong relihion tunay kun ginigibo kaiyan na magin mas marahay an sarong tawo kun sia namumuhay kaoyon kaiyan.” Totoo, an tunay na relihion talagang ginigibong magin mas marahay an mga tawo. Alagad an bagay daw mismo na an sarong relihion nakagigibo nin mas marahay na mga tawo nagpapatunay na an relihion na iyan igwa kan pagsuportar nin Dios? Iyan daw an solamenteng basehan sa pagdeterminar kun an sarong relihion tunay?
5 An gabos nagpapahalaga sa pagigin puedeng gumibo nin personal na mga pagpili, kabale an pagpili nin aayonan na relihion. Alagad an pagkaigwa nin katalingkasan na pumili dai naggagarantiya na tama an pipilion nin saro. Halimbawa, may mga tawong nagpipili nin relihion basado sa kadakulaan, kayamanan, kagayonan kan mga seremonya kaiyan, o sa mga koneksion kan saindang pamilya. Mayo sa mga bagay na ini an dai nanggad mapagdududahan sa pagdeterminar kun baga an sarong relihion iyo an tunay o bako. An importanteng marhay na hapot sa bagay na ini iyo an: Arin na relihion an nagsasadol sa mga parasunod kaiyan na gibohon an kabotan nin Dios asin nagtatao nin masarig na ebidensia kan pagsuportar nin Dios, tanganing an mga parasunod kaiyan may kompiansang makapagsabi, “an Dios nasa kampi niato”?
6. Anong mga tataramon ni Jesus an nagtao nin liwanag kun dapit sa tunay asin falsong relihion?
6 Itinao ni Jesus an susundon sa pagmidbid sa kalaenan kan tunay na pagsamba sa falso kan sabihon nia: “Magmaan kamo sa falsong mga propeta na minadolok sa saindo sa gubing nin karnero, alagad sa laog sinda naninibang mga lobo. Paagi sa saindang mga bunga mamimidbid nindo sinda.” (Mateo 7:15, 16; Malaquias 3:18) Repasohon niato an nagkapira sa “mga bunga,” o nagpapamidbid na tanda, nin tunay na relihion tangani na sa totoo sana madeterminaran niato kun siisay ngonyan an igwa kan pagsuportar nin Dios.
Nagpapamidbid na mga Tanda kan mga Igwa kan Pagsuportar nin Dios
7. Ano an boot sabihon kan pagtokdo sana kan basado sa Biblia?
7 Ibinabasar ninda sa Biblia an saindang mga katokdoan. Si Jesus nagsabi: “An sakong itinotokdo bako ko, kundi kaidtong nagsugo sa sako. Kun an siisay man nagmamawot na gumibo kan Saiyang kabotan, makakaaram sia may labot sa katokdoan kun baga iyan gikan sa Dios o ako nagtataram nin hale sa sako man sana.” Asin siring man: “An gikan sa Dios naghihinanyog sa mga kasabihan nin Dios.” (Juan 7:16, 17; 8:47) Makatanosan sana, tanganing kamtan an pagsuportar nin Dios, dapat na itokdo nin saro kun ano sana an ihinahayag nin Dios sa saiyang Tataramon asin sayumahan an mga katokdoan na basado sa kadonongan o tradisyon nin tawo.—Isaias 29:13; Mateo 15:3-9; Colosas 2:8.
8. Taano ta importante na gamiton an ngaran nin Dios sa pagsamba?
8 Ginagamit asin ipinapahayag ninda an ngaran nin Dios, an Jehova. Si Isaias naghula: “Sa aldaw na iyan siertong masarabi kamo: ‘Magpasalamat kamo ki Jehova, banwaan! Mag-apod kamo sa saiyang ngaran. Ipaaram nindo sa mga banwaan an saiyang mga ginibo. Sambiton nindo na an saiyang ngaran halangkaw. Umawit kamo nin melodiya ki Jehova, huli ta sia naggibo nin mga bagay na daing kaagid. Ini ipinamareta sa bilog na daga.’” (Isaias 12:4, 5) Tinokdoan ni Jesus an saiyang mga parasunod na mamibi: “Ama niamo na nasa langit, santipikaron logod an saimong ngaran.” (Mateo 6:9) Kun siring, baga man Judio o bakong Judio, an mga Kristiano kaidto dapat na magin “sarong banwaan para sa . . . ngaran” nin Dios. (Gibo 15:14) Malinaw na naoogma an Dios na suportaran an mga ipinag-oorgolyo an pagigin “sarong banwaan para sa saiyang ngaran.”
9. (a) Taano ta nahehelingan nin kagayagayahan an mga miembro kan tunay na relihion? (b) Paano ipinaheling ni Isaias an kalaenan kan tunay na relihion sa falso?
9 Ipinababanaag ninda an magayagayang personalidad nin Dios. Bilang autor kan “maogmang bareta,” si Jehova an “maogmang Dios.” (1 Timoteo 1:11) Kaya paano magigin bakong maogma o pirepirmeng pesimista an saiyang mga parasamba? Sa ibong kan kapurisawan sa kinaban asin personal na mga problema, an tunay na mga Kristiano danay na igwa nin magayagayang espiritu huli ta sinda regular na nagkakarakan nin nagsosopay na espirituwal na kakanon. Ipinaheling ni Isaias an kalaenan ninda sa mga naggigibo nin falsong relihion: “Iyo ini an isinabi kan Soberanong Kagurangnan na Jehova: ‘Uya! An sakong mga lingkod makarakan, alagad kamo magkakagurutom. Uya! An sakong mga lingkod mairinom, alagad kamo magkakaparaha. Uya! An sakong mga lingkod maggagayagaya, alagad kamo magkakasurupog. Uya! An sakong mga lingkod magkukururahaw sa kagayagayahan huli sa marahay na kamugtakan kan puso, alagad kamo mag-aaragrangay huli sa kakologan sa puso asin kamo mag-uurungal huli sa pagkalaglag kan espiritu.’”—Isaias 65:13, 14.
10. Paano nalilikayan kan mga igwa kan tunay na relihion an pakanood paagi sa pagpatibasang?
10 Ibinabasar ninda sa mga prinsipyo sa Biblia an saindang paggawe asin an saindang mga desisyon. “Magtiwala ka ki Jehova sa bilog mong puso asin dai ka manarig sa saimong sadiring pakasabot,” an sadol sa sato kan kagsurat kan Talinhaga, “sa gabos mong dalan girumdomon mo sia, asin itatanos nia mismo an saimong mga dana.” (Talinhaga 3:5, 6) Sinusuportaran nin Dios an mga nag-aasa sa saiya para sa paggiya imbes na sa nagkakasarongatan na mga teoriya nin mga tawo na nag-iignoro sa diosnon na kadonongan. Sagkod na andam an saro na ioyon an saiyang buhay sa Tataramon nin Dios, malilikayan nia an pakanood paagi sa pagpatibasang.—Salmo 119:33; 1 Corinto 1:19-21.
11. (a) Taano an mga miembro kan tunay na relihion ta dai puedeng mabanga sa grupong klero asin lego? (b) Anong halimbawa para sa aripompon an dapat na itao kan mga nangengenot sa banwaan nin Dios?
11 An paagi nin pagkaorganisar sa sainda kapareho kan sa Kristianong kongregasyon kan enot na siglo. Itinao ni Jesus an prinsipyo: “Dai kamo magpaapod nin Rabi, huling saro an saindong paratokdo, mantang kamo gabos magturugang. Siring man, dai kamo mag-apod nin ama sa kiisay man sa daga, nin huli ta saro an saindong Ama, an langitnon na Saro. Dai man kamo magpaapod na ‘mga poon,’ huli ta an saindong Poon saro, an Cristo. Kundi an pinakadakula saindo kaipuhan na iyo an saindong paralingkod.” (Mateo 23:8-11) An kongregasyon nin magturugang dai puedeng igwa nin mapalangkaw na grupong klero na nagtataong onra sa sadiri paagi sa haralangkaw na titulo asin ibinubugtak an sadiri na mas halangkaw sa lego. (Job 32:21, 22) An mga nagpapastor sa aripompon nin Dios sinasabihan na gibohon iyan “bakong sa kapiritan, kundi gikan sa boot; bakong huli sa pagkamoot sa madayang pakinabang, kundi may kaigotan; ni nagpapakangkagurangnan sa mga mana nin Dios, kundi nagigin mga halimbawa sa aripompon.” (1 Pedro 5:2, 3) Linilikayan kan tunay na Kristianong mga pastor an paghingoang magpakangkagurangnan sa pagtubod kan iba. Bilang mga kapwa trabahador sa paglilingkod sa Dios, hinihingoa sana nindang tumao nin marahay na halimbawa.—2 Corinto 1:24.
12. Anong timbang na paninindogan mapadapit sa mga gobyerno nin tawo an hinahagad nin Dios sa mga nagmamawot na mapasainda an saiyang pagsuportar?
12 Nagpapasakop sinda sa mga gobyerno nin tawo alagad ta nagdadanay na neutral. An dai ‘nagpapasakop sa superyor na mga autoridad’ dai makakaasang magkaigwa kan pagsuportar nin Dios. Taano? Huli ta “an nagdadanay na mga autoridad nagtitirindog sa saindang relatibong mga kamugtakan na itinogot nin Dios. Kun siring an minatumang sa autoridad minatumang sa areglo nin Dios.” (Roma 13:1, 2) Minsan siring, rinekonoser ni Jesus an posibilidad na magkaigwa nin pagkakasarongatan nin interes kan sabihon nia: “Itao nindo ki Cesar an mga bagay na ki Cesar, alagad sa Dios an mga bagay na sa Dios.” (Marcos 12:17) An mga nagmamawot na magkaigwa kan pagsuportar nin Dios dapat na “padagos na hanapon nguna an kahadean [nin Dios] asin an saiyang katanosan,” mantang kadungan kaiyan kinukuyog an mga ley kan nasyon na kaoyon kan saindang mas halangkaw na mga paninimbagan sa Dios. (Mateo 6:33; Gibo 5:29) Idinoon ni Jesus an neutralidad kan sabihon nia dapit sa saiyang mga disipulo: “Sinda bakong kabtang kan kinaban, kun paanong ako bakong kabtang kan kinaban.” Kan huri idinagdag nia: “An sakong kahadean bakong kabtang kan kinaban na ini.”—Juan 17:16; 18:36.
13. Ano an papel nin pagkamoot sa pagmidbid sa banwaan nin Dios?
13 Mayo sindang ipinaoorog sa paggibo nin “marahay sa gabos.” (Galacia 6:10) An Kristianong pagkamoot mayong ipinaoorog, na inaako an gabos na tawo ano man an kolor nin kublit, kamugtakan sa pinansial o inadalan, nasyonalidad, o lenguahe ninda. An paggibo nin marahay sa gabos asin nangorogna sa mga may relasyon sa sainda sa pagtubod nakatatabang na mamidbid an mga igwa kan pagsuportar nin Dios. Sinabi ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”—Juan 13:35; Gibo 10:34, 35.
14. Pirme daw na inaako kan kadaklan an mga tawong igwa kan pag-aprobar nin Dios? Ipaliwanag.
14 Andam sindang umagi nin paglamag huli sa paggibo kan kabotan nin Dios. Patienot na pinatanidan ni Jesus an saiyang mga parasunod: “Kun ako pinaglamag ninda, kamo man paglalamagon ninda; kun inotob ninda an sakong tataramon, ootobon man ninda an saindo.” (Juan 15:20; Mateo 5:11, 12; 2 Timoteo 3:12) An mga igwa kan pagsuportar nin Dios kaidto pa ikinauuyam, arog ki Noe, na kinondenar an kinaban paagi kan saiyang pagtubod. (Hebreo 11:7) Ngonyan, an mga nagmamawot na mapasainda an pagsuportar nin Dios dai dapat na mangahas na paluyahon an puersa kan tataramon nin Dios o ikompromiso an diosnon na mga prinsipyo tangani na malikayan an paglamag. Sagkod na sinda fiel na naglilingkod sa Dios, aram ninda na an mga tawo ‘magngangaralas asin padagos na magtataram na may panlilibak’ sa sainda.—1 Pedro 2:12; 3:16; 4:4.
Panahon Nang Ebalwaron an mga Katunayan
15, 16. (a) Anong mga hapot an matabang sa sato na mamidbid an grupong relihioso na igwa kan pagsuportar nin Dios? (b) Ano an nagin konklusyon nin minilyon na tawo, asin taano?
15 Hapota an saindong sadiri, ‘Anong grupong relihioso an midbid sa maingat na pagsusog sa Tataramon nin Dios, dawa kun an katokdoan kaiyan laen sa mga paniniwala kan kadaklan na tawo? Sairisay an nagdodoon kan kahalagahan kan personal na ngaran nin Dios, na ginagamit pa ngani iyan tangani na ipamidbid an saindang sadiri? Sairisay an optimistikong itinotokdo an Kahadean nin Dios bilang an solamenteng solusyon sa gabos na problema nin tawo? Sairisay an nagsusuportar sa mga pamantayan kan Biblia sa paggawe, dawa may posibilidad na sinda ibilang na lihis na sa uso? Anong grupo an midbid sa pagigin mayo nin binabayadan na klero, na an gabos na miembro kaiyan parahulit? Sairisay an inoomaw sa pagigin mga siudadanong makinuyog sa ley, dawa ngani linilikayan nindang makikabtang sa politika? Sairisay an mamomoton na naggagamit nin panahon asin kuarta sa pagtabang sa iba na makanood manongod sa Dios asin sa saiyang mga katuyohan? Asin sa ibong kan positibong mga bagay na ini, sairisay an minemenos, pinag-oolog-olog, asin linalamag pa man giraray?’
16 Minilyon na tawo sa bilog na kinaban an nag-ebalwar kan mga katunayan asin nagin kombensido na an Mga Saksi ni Jehova sana an naggigibo kan tunay na relihion. Ini an nagin konklusyon ninda basado sa itinotokdo kan Mga Saksi ni Jehova asin kun paano sinda minagawe, asin basado man sa mga pakinabang na itinatao kan saindang relihion. (Isaias 48:17) Minilyon an garo man sana nagsasabi, siring kan ihinula sa Zacarias 8:23: “Maiba kami sa saindo, huli ta nabaretaan niamo na an Dios yaon dian sa saindo.”
17. Taano ta bakong pangahas an Mga Saksi ni Jehova sa pagsabi na nasa sainda an tunay na relihion?
17 Pangahas daw an Mga Saksi ni Jehova sa pagsabi na sinda sana an igwa kan pagsuportar nin Dios? An totoo, pareho iyan kan an mga Israelita sa Egipto magsabi na sinda igwa kan pagsuportar nin Dios apisar kan paniniwala kan mga Egipcio, o kan an mga Kristiano kan enot na siglo magsabi na sinda igwa kan pagsuportar nin Dios na bakong kabale an mga relihionistang Judio. An mga katunayan mismo an nagpapatotoo kaiyan. Sa 235 kadagaan ginigibo kan Mga Saksi ni Jehova an ihinula ni Jesus na gigibohon kan saiyang tunay na mga parasunod sa panahon kan katapusan: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14.
18, 19. (a) Taano ta mayo nin dahelan an Mga Saksi ni Jehova na pumondo sa saindang paghuhulit, minsan ngani sinda tinutumang? (b) Paano sinusuportaran kan Salmo 41:11 an katunayan na an mga Saksi igwa kan pagsuportar nin Dios?
18 Padagos na gigibohon kan Mga Saksi ni Jehova an sugo na ini, na nungkang totogotan an paglamag o pagtumang na makaolang sa saindang aktibidad. An gibohon ni Jehova dapat asin talagang hahamanon. An lambang pagprobar kan iba durante kan nakaaging siglo na olangon an mga Saksi sa paghaman kan gibohon nin Dios sa kahurihurihi biyong nasudya, ta si Jehova nanuga: “An ano man na armas na gibohon tumang sa saimo dai magkakaepekto, asin an arin man na dila na tumindog tumang sa saimo sa paghokom saimong kokondenaron. Iyo ini an rogaring na panonondon kan mga lingkod ni Jehova, asin an saindang katanosan gikan sa sako.”—Isaias 54:17.
19 Na an Mga Saksi ni Jehova mas makosog asin mas aktibo ngonyan kisa kaidto—asin ini sa atubangan nin lakop sa kinaban na pagtumang—prueba na naoogma si Jehova sa saindang ginigibo. Si Hadeng David nagsabi: “Paagi kaini naaaraman ko nanggad na ika naogmang marhay sa sako, huli ta an sakong kaiwal dai nagkukurahaw na may kapangganahan laban sa sako.” (Salmo 41:11; 56:9, 11) An mga kaiwal nin Dios nungkang makakukurahaw na may kapangganahan laban sa banwaan ni Jehova, ta an Namomoon sa sainda, si Jesu-Cristo, nag-aabante pasiring sa pangultimong kapangganahan!
Masisimbag daw Nindo?
• Ano an nagkapirang suanoy na halimbawa nin mga tawo na igwa kan pagsuportar nin Dios?
• Ano an nagkapirang nagpapamidbid na tanda kan tunay na relihion?
• Taano kamo ta personal na kombensido na an Mga Saksi ni Jehova igwa kan pagsuportar nin Dios?
[Mga Hapot Para sa Pag-adal]
[Ritrato sa pahina 13]
An mga nagmamawot na mapasainda an pagsuportar nin Dios dapat na ibasar an saindang katokdoan solamente sa saiyang Tataramon
[Ritrato sa pahina 15]
An Kristianong kamagurangan nagseserbing mga halimbawa para sa aripompon