Estorya nin Buhay

Magayagaya Asin Mapagpasalamat sa Ibong nin Makamomondong Kawaran

ISINAYSAY NI NANCY E. PORTER

Hunyo 5, 1947 kaidto, sarong maalingahot na banggi sa Bahamas, mga isla na harani sa timog-sirangan na baybayon kan Estados Unidos. An sarong opisyal sa imigrasyon dai linalaoman na sinongko kami kan sakong agom na si George. Iinabot nia sa samo an sarong surat na nagsasabi na dai na nagugustohan an samong presensia sa mga isla asin na kami kaipuhan na “humale tolos sa kolonya!”

KAMI ni George an enot na mga misyonero kan Mga Saksi ni Jehova na nagduman sa Nassau, an pinakadakulang siudad sa Bahamas. Pakagradwar sa ikawalong klase nin Gilead, sarong paadalan para sa mga misyonero sa amihanan na Nueva York, idinestino kami digdi. Ano an ginibo mi na nagbunga nin siring kagrabeng reaksion pakalihis sana nin tolong bulan mi duman? Asin paanong pakalihis nin mga labing 50 taon, yaon pa giraray ako digdi?

Pagsasanay Para sa Ministeryo

An sakong ama, si Harry Kilner, mapuersa an nagin impluwensia sa kinaabtan kan sakong buhay. Sia nagtao nin marahayon na halimbawa sa sako, na dakol an isinasakripisyo tanganing magin saro sa Mga Saksi ni Jehova. Minsan ngani bakong marahay an kamugtakan kan saiyang salud, sia naghuhulit nin haros kada katapusan kan semana, na maigot na ineenot an intereses kan Kahadean. (Mateo 6:33) Tikapo kaming marhay sa pinansial,  alagad an saiyang pahirahayan nin sapatos sentro nin espirituwal na aktibidad sa Lethbridge, Alberta, Canada, kan mga taon nin 1930. An kaenot-enote kong mga rekuerdo mapadapit sa bilog na panahon na mga ministro kan Mga Saksi ni Jehova, na inaapod na mga payunir, na nagsosongko sa samong harong asin nag-eestorya nin mga eksperyensia.

Kan 1943, pinonan ko an paglilingkod bilang payunir harani sa Fort Macleod asin Claresholm, Alberta. Kan panahon na idto an samong paghuhulit ipinangalad sa Canada na resulta kan pagmisrepresentar kan mga nagkokontra durante kan Guerra Mundial II. An samong teritoryo sagkod sa 50 kilometros sa tig-ibong na direksion, alagad huling hoben asin mabagsik pa, daing ano man sa samo an magbisikleta o maglakaw tanganing aboton an saradit na komunidad asin oma sa lugar na iyan. Durante kan panahon na idto, nagkaoportunidad ako na makipag-olay sa nagkapirang naggradwar sa Gilead, asin an saindang mga eksperyensia pinukaw sa sako an pagmawot na magin sarong misyonera.

Kan 1945, nagpakasal ako ki George Porter, na taga Saskatchewan, Canada. An saiyang mga magurang nagin maigot na mga Saksi poon pa kan 1916, asin pinili man nia an bilog na panahon na ministeryo bilang saiyang karera. An enot ming destino iyo an magayon na Kababan nin Lynn sa Amihanan na Vancouver, Canada. Dai nahaloy pakalihis kaiyan inimbitaran kami sa Gilead.

Nakipag-olay ako sa mga naggradwar sa manlaenlaen na teolohikong seminaryo sa nag-aging mga taon asin naheling ko kun paano luway-luway na rinaot kan saindang teolohikong pagsasanay an saindang pagtubod sa Dios asin sa saiyang Tataramon, an Biblia. Sa kabaliktaran, an samong nanodan sa Gilead nagpatarom kan samong abilidad na mag-isip asin pinakamahalaga sa gabos nagpakosog sa samong pagtubod ki Jehova Dios asin sa saiyang Tataramon. An samong mga kaklase idinestino sa Tsina, Singapore, India, mga nasyon sa Aprika, Amerika del Sur, asin sa iba pang lugar. Nagigirumdoman ko pa an kaogmahan kan maaraman mi na idedestino kami sa tropikal na mga isla kan Bahamas.

Kun Paano Mi Nahimong Magdanay

Kun ikokomparar sa pagbiahe kan samong mga kaklase, halipot an samong biahe pasiring sa Bahamas. Dai nahaloy naoogma na kami sa maalingahot na panahon, asul na kalangitan, kolor turkesang tubig, mga edipisyong bahado an kolor, asin sa dai mabilang na mga bisikleta. Minsan siring, an enot na pinakahararom na nakatudok sa sakong isip iyo an sadit na grupo nin limang Saksi na naghalat sa samo kan dumatong an samong baroto. Dai nahaloy naaraman mi na an kultura digdi laen na marhay sa kinatodan mi na. Halimbawa, hinagad sa sakong agom na dai na ako apodon sweetheart sa publiko, huli ta an ekspresyon na iyan sa parate ginagamit para sa pakipagrelasyon sa iba apuera sa agom.

Dai nahaloy an klero, na minalataw na natatakot sa samong sueltong pakikiiba sa mga tawo, salang inakusaran kami na mga Komunista. Bilang resulta,  naresibi mi an pagboot na humale sa nasyon. Alagad an mga Saksi​—na mayo pang 20 sa mga isla kan panahon na idto​—tolos-tolos na nakakua nin rinibong pirma sa sarong kahagadan na togotan kaming magdanay. Sa siring, nabaliktad an pagboot na pagpahale.

Pasiring sa Bagong Teritoryo

Marikas na tuminubo an katotoohan sa Biblia sa mga puso na namomoot sa Dios, kaya dugang pang mga misyonero hale sa Gilead an ipinadara sa Bahamas. Dangan, kan 1950, naestablisar an sarong sangang opisina. Pakalihis nin sampulong taon, si Milton Henschel, saro sa mga miembro kan opisina prinsipal sa Brooklyn, Nueva York, nagsongko sa Bahamas asin hinapot an mga misyonero kun may gustong magduman asin ponan an paghuhulit sa saro pang isla kan Bahamas. Nagboluntaryo kami ni George, asin sa siring nagpoon an sa katapustapusi nagin 11 taon na pagdanay sa Long Island.

An islang ini, saro sa dakol na minakompuesto kan Bahamas, 140 kilometros an laba asin 6 kilometros an lakbang, asin kaidto, mayo talaga iyan nin mga banwaan. An kabisera, an Clarence Town, igwa nin mga 50 harong. Primitibong marhay an pamumuhay​—mayo nin koryente, sistema sa tubig, o lutoan sa laog kan harong o instalasyon nin mga tubo. Kaya kinaipuhan ming mag-adaptar sa inaapod na buhay sa puerang isla. Digdi an salud nin tawo paboritong topiko nin orolay. Nanodan mi na dai iiba sa samong pataratara an hapot na, “Kumusta ka ngonyan?” huli ta an simbag sa parate sarong halawigon na pagsaysay kan bilog na nakaaging medikal na kamugtakan nin saro.

An kadaklan kan samong paghuhulit ginigibo mi sa mga kusina huli ta an mga tawo manonompongan sa parate sa saindang kusina sa luwas na inatopan asin may dapog na ginagatongan nin kahoy. An mga komunidad prinsipalmenteng binibilog nin dukha alagad maboot na marhay na mga paraoma o parasira. An kadaklan sa sainda bako sanang relihioso kundi superstisyoso man na marhay. An pambihirang mga pangyayari sa parate tinatawan nin kahulogan bilang mga tanda.

An klero dai lamang nag-alangan na lumaog sa harong nin mga tawo na dai man imbitado asin pinaparakit an mga literatura sa Biblia na iwinalat mi duman. Sa siring nasisindak ninda an mga maluya an boot, alagad bakong gabos minaulnok sa takot sa sainda. Halimbawa, an sarong mabagsik na 70 anyos na babae nagsayumang patakot. Mawot nia mismong masabotan an Biblia, asin pag-abot nin panahon sia nagin Saksi kaiba nin dakol pa. Mantang nagdadakol an nanonompongan mi na interesadong mga tawo, kinaipuhan ni George na magmaneho nin 300 kilometros sa nagkapirang Domingo, na tinatabangan an mga siring na umatender sa samong pagtiripon.

Durante kan enot na mga bulan na mayo pa nin ibang Saksi, napagdanay mi ni George an samong espirituwalidad paagi sa pagkaigwa kan gabos na regular na Kristianong pagtiripon. Dugang pa, maigot ming sinunod an sarong programa kada Lunes na banggi na pag-adal kan leksion sa magasin na Torrengbantayan asin pagbasa niamo sa Biblia. Binabasa mi man an gabos na isyu kan An Torrengbantayan asin Awake! pakaresibi mi tolos kaiyan.

Nagadan an sakong ama mantang kami nasa Long Island. Kan suminunod na tig-init, 1963, iinareglo mi na si Nanay dumigdi asin mag-erok na harani sa samo. Minsan ngani sia gurang na, sia nakaadaptar pa nin igo asin nag-erok sa Long  Island sagkod na sia magadan kan 1971. Ngonyan, an Long Island igwa na nin kongregasyon na may bagong Kingdom Hall.

Sarong Angat na Makologon sa Boot

Kan 1980, narisa ni George na nagpopoon na magraot an saiyang salud. Sa siring nagpoon an saro sa pinakamakolog na eksperyensia sa sakong buhay​—an maheling an sakong namomotan na agom, kapwa trabahador, asin kadamaydamay na madaog kan helang na Alzheimer’s. An bilog niang personalidad nagbago. An ultimo asin pinakanakapanluluya nin biyo na kabtang naglawig nin mga apat na taon bago sia nagadan kan 1987. Inibanan nia ako sa ministeryo asin sa mga pagtiripon sagkod na kaya nia, minsan ngani dakol na beses na napapahibi ako sa mga paghihingoa nia. An sueltong pagpaheling nin pagkamoot kan satong Kristianong mga tugang tunay na nakararanga, alagad hinihidaw ko pa man giraray siang marhay.

An saro sa pinakamahal na mga aspekto kan samong pag-agoman ni George iyo an samong dayaday asin nakaoogmang komunikasyon. Ngonyan na mayo na si George, ako orog na nagpapasalamat kisa kasuarin man na inaagda ni Jehova an saiyang mga lingkod na “mamibi nin daing ontok,” na “magmaigot . . . sa pamimibi,” asin gamiton an “gabos na porma nin pamibi.” (1 Tesalonica 5:17; Roma 12:12; Efeso 6:18) Nakararangang marhay na maaraman na si Jehova interesado sa satong ikararahay. An namatean ko siring nanggad sa salmista na nag-awit: “Pag-omawon si Jehova, na sa aroaldaw dinadara an pasan para sa sato.” (Salmo 68:19) An dai paghadit para sa masunod na aldaw, pag-ako sa sakong mga limitasyon, asin pagigin mapagpasalamat sa mga bendisyon sa aroaldaw, siring kan isinadol ni Jesus, iyo nanggad an pinakamarahay na paagi nin pamumuhay.​—Mateo 6:34.

An Magayagayang mga Balos kan Ministeryo

An pagdanay na sibot sa Kristianong ministeryo nakatabang sa sako na dai pagparaisipon nin labi-labi an nakaagi. Sa siring nadadaog ko an klase nin emosyon na puedeng magbunga nin depresyon. An pagtokdo sa iba kan katotoohan sa Biblia nagin nangongorog na gikanan nin kagayagayahan. Iyan nagtatao nin aregladong espirituwal na rutina na ginibong organisado asin marigon an sakong buhay.​—Filipos 3:16.

Sarong beses, inapodan ako nin sarong babae na napaabotan ko kan mensahe nin Kahadean mga 47 taon na an nakaagi. Sia aking babae kan saro sa enot niamong mga inaadalan sa Biblia kan kami mag-abot sa Bahamas kan 1947. An saiyang ina, ama, asin gabos niang tugang na lalaki asin babae nagin Saksi ni Jehova siring man an kadaklan nindang aki asin mga makoapo. Sa katunayan, labing 60 miembro kan pamilya kan babaeng ini mga Saksi. Alagad nungka nia mismong inako an katotoohan sa Biblia. Pero ngonyan, sia sa katapustapusi  andam nang magin lingkod ni Jehova Dios. Kanigoan kagayagayang maheling an nagkapirang Saksi na yaon sa Bahamas kan mag-abot kami ni George na nag-aumento nin labing 1,400!

Kun minsan hinahapot ako nin mga tawo kun hinihidaw ko na dai ako nagkaigwa nin sadiri kong mga aki. Siempre, an pagkaigwa nin mga aki puedeng magin sarong bendisyon. Pero, an pagkamoot na danay na ipinaheheling sa sako kan sakong espirituwal na mga aki, makoapo, asin makoapo sa tuhod sarong bagay na posibleng dai naeeksperyensiahan kan gabos na tunay na magurang. Tunay nanggad, an mga ‘naggigibo nin marahay’ asin “mayaman sa marahay na mga gibo” an pinakamaogmang mga tawo. (1 Timoteo 6:18) Iyan an dahelan kun taano ako ta nagdadanay na sibot sa ministeryo sagkod na itinotogot kan sakong salud.

Sarong aldaw sa opisina nin sarong dentista, dinolok ako nin sarong babae asin nagsabi, “Dai po nindo ako midbid, alagad midbid ko po kamo, asin gusto ko sanang ipaaram sa saindo na namomotan ko kamo.” Dangan isinaysay nia kun paano nia nanodan an katotoohan sa Biblia asin kun gurano sia nagpapasalamat na kaming mga misyonero nagduman sa Bahamas.

Sa saro pang pangyayari kan ako magpuli hale sa bakasyon, nanompongan ko an sarong rosas sa pinto kan ineerokan ko ngonyan sa sangang opisina kan Mga Saksi ni Jehova sa Nassau. Igwa iyan nin mensahe, “Naoogma kami na nakapuli na kamo.” An sakong puso nagsusulwak sa pagpasalamat, asin iyan nagpapangyari na kamotan kong marhay si Jehova kun naheheling ko an klase nin mga tawo na nagin bunga kan saiyang Tataramon, organisasyon, asin espiritu! Tunay nanggad, an nangangataman na kamot ni Jehova sa parate ipinapahayag paagi sa mga tawong nasa palibot niato.

Nagsusulwak sa Pagpasalamat

An sakong buhay dai nagin pirmeng pasil, ni an mga aspekto kaiyan pasil ngonyan. Alagad igwa ako nin kadakol na dahelan na magin mapagpasalamat​—an mga kagayagayahan kan ministeryo, an pagkamoot asin kapadangatan kan kadakol na Kristianong tugang na lalaki asin babae, an mamomoton na pag-ataman kan organisasyon ni Jehova, an magayon na mga katotoohan sa Biblia, an paglaom na makaibahan an mga namomotan kun sinda buhayon na liwat, asin an mga rekuerdo nin 42 na taon na pag-agoman kaiba nin sarong fiel na lingkod ni Jehova. Bago kami nagpakasal, ipinamibi ko na logod ako pirmeng makatabang sa sakong agom na magdanay sa bilog na panahon na ministeryo, na namotan niang marhay. Maugayon na sinimbag ni Jehova an pamibing iyan. Kaya mawot kong ipahayag an sakong pagpasalamat ki Jehova paagi sa pagigin fiel sa saiya sa gabos na panahon.

An Bahamas popular na dumanan nin mga turista, na naggagasto nin rinibong dolyar tanganing magduman asin maeksperyensiahan an ikinaoogmang marhay na mga bagay sa tropiko. Huling pinili ko na maglingkod ki Jehova saen man giyahan kan saiyang organisasyon, nagkaigwa ako kan magayagayang eksperyensia na magbiahe poon sa sarong poro kan mga islang ini pasiring sa ibong na poro, na ibinabalangibog an maogmang bareta kan Kahadean nin Dios. Alagad mas mahalaga, naaraman ko asin rinimpos ko an pagkamoot kan pinakamarahay sa makikatood na mga taga Bahamas.

Ako nagpapasalamat na marhay sa mga nagpaabot kan katotoohan sa sakong mga magurang, na itinanom man sa sakong lumbod na isip asin puso an makosog na pagmawot na hanapon nguna an Kahadean nin Dios. An hoben na mga lingkod ni Jehova ngonyan puede man na mag-ako nin dakol na bendisyon kun sinda maglaog sa “dakulang tata” na pasiring sa dakulang mga oportunidad nin pinahiwas na ministeryo. (1 Corinto 16:9) Kamo man magsusulwak sa pagpasalamat kun gamiton nindo an saindong buhay tanganing magtaong onra sa “Dios nin mga dios,” si Jehova.​—Deuteronomio 10:17; Daniel 2:47.

[Ritrato sa pahina 24]

Paghuhulit sa tinampo sa Victoria, B.C., kan 1944

[Ritrato sa pahina 24]

Kami ni George nag-atender sa Paadalan nin Gilead kan 1946

[Ritrato sa pahina 25]

Kaiba si George sa atubangan kan erokan nin mga misyonero sa Nassau, Bahamas, kan 1955

[Ritrato sa pahina 26]

An erokan nin mga misyonero sa Deadman’s Cay, na dian kami naglingkod poon 1961 sagkod 1972