Pag-abante Pasiring sa Pangultimong Kapangganahan!

“Uya! sarong maputing kabayo; asin an nangangabayo dian igwa nin arko; asin may koronang itinao sa saiya, asin sia nagluwas sa pandaog asin sa pagtapos kan saiyang pandadaog.”​—KAPAHAYAGAN 6:2.

1. Anong mga pangyayari sa ngapit an naheling ni Juan sa bisyon?

PAAGI sa pasabong nin Dios, nahimo ni apostol Juan na tumanaw nin mga 1,800 na taon sa ngapit asin iladawan an pagpatukaw ki Cristo sa trono bilang Hade. Kinaipuhan ni Juan an pagtubod tanganing maniwala sa naheling nia sa bisyon. Kita ngonyan igwa nin malinaw na ebidensia na an ihinulang pagtukaw na ini sa trono nangyari kan 1914. Paagi sa mga mata nin pagtubod, naheheling ta si Jesu-Cristo na ‘minaluwas sa pandaog asin sa pagtapos kan saiyang pandadaog.’

2. Ano an nagin reaksion kan Diablo sa pagkamundag kan Kahadean, asin ebidensia ini nin ano?

 ² Kasunod kan pagkamundag kan Kahadean, si Satanas pinalayas sa langit, na nagin dahelan kan saiyang pakikilaban nin mas makosog asin may orog na kabangisan alagad dai nanggad nadadagdagan an saiyang tsansa na manggana. (Kapahayagan 12:7-12) Dahelan sa saiyang kaanggotan an mga kamugtakan sa kinaban orog pang nagigin kritikal. An sosyedad nin tawo garo baga nagkakasuruhaysuhay. Para sa Mga Saksi ni Jehova malinaw na ebidensia ini na an saindang Hade nag-aabante tanganing ‘taposon an saiyang pandadaog.’

Pag-establisar nin Bagong Kinaban na Sosyedad

3, 4. (a) Anong organisasyonal na mga pagliliwat an ginibo sa Kristianong kongregasyon poon kan mamundag an Kahadean, asin taano ta kaipuhan an mga iyan? (b) Ano an nagin pakinabang kan mga pagliliwat na ini, siring kan ihinula ni Isaias?

³ Kan mamundag an Kahadean, idto panahon nang ioyon nin orog pa an ibinalik na Kristianong kongregasyon​—na ngonyan igwa nin nadugangan na pan-Kahadean na mga paninimbagan​—sa arogan kan Kristianong kongregasyon kan enot na siglo. Sa siring, sa luwas kaiyan na Hunyo 1 asin 15, 1938, siniyasat kan The Watchtower kun paano maninigong magpunsionar an Kristianong organisasyon. Kan huri, an luwas kan Disyembre 15, 1971, mas malinaw na ipinamidbid an Namamahalang Grupo sa presenteng panahon sa artikulong “A Governing Body as Different From a Legal Corporation” (sa Bicol, “Sarong Namamahalang Grupo na Laen sa Legal na Korporasyon”). Kan 1972, nagnombra nin mga grupo nin kamagurangan tanganing tumabang asin magdirehir sa lokal na mga kongregasyon.

⁴ An pagkabalik kan tamang pangangataman nagpakosog na marhay sa Kristianong kongregasyon. Nakakontribwir man digdi an mga probisyon na ginibo kan Namamahalang Grupo na tokdoan an kamagurangan sa saindang mga obligasyon,  kabale an pagsasanay sa sainda sa hudisyal na mga bagay. An gradwal na mga pag-oswag may koneksion sa mga areglo kan daganon na organisasyon nin Dios asin an positibong mga resulta kaini ihinula sa Isaias 60:17: “Kasalihid kan kalongkaki dadarahon ko digdi an bulawan, asin kasalihid kan batbat dadarahon ko digdi an pirak, asin kasalihid kan kahoy, kalongkaki, asin kasalihid kan mga gapo, batbat; asin nonombrahan ko an katoninongan bilang saimong mga paraataman asin an katanosan bilang saimong mga namamahala.” An positibong mga pagliliwat na ini nagpaheling kan pagbendisyon nin Dios asin ebidensia kan pag-aprobar nin Dios sa mga luminuwas tanganing maigot na suportaran an saiyang Kahadean.

5. (a) Ano an nagin reaksion ni Satanas sa pagbendisyon ni Jehova sa saiyang banwaan? (b) Kaoyon kan Filipos 1:​7, ano an nagin reaksion kan banwaan ni Jehova sa kaanggotan ni Satanas?

⁵ Naheling ni Satanas an mamomoton na atension asin paggiya nin Dios sa saiyang banwaan pagkatapos na mamundag an Kahadean. Halimbawa, kan 1931 an sadit na grupong ini nin mga Kristiano hayag na nagsabi na sinda bako sanang Mga Estudyante sa Biblia. Kaoyon kan Isaias 43:​10, sinda mga Saksi ni Jehova! Nagkanorongod man o dai, an Diablo nagpaluwas nin sunod-sunod na dai pang kaagid na paglamag sa bilog na globo. Dawa sa mga nasyon na parate nang midbid sa relihiosong katalingkasan, arog kan Estados Unidos, Canada, asin Alemania, an mga Saksi paorootrong napiritan na ipakilaban an legal na mga kaso tanganing papagdanayon an saindang katalingkasan sa pagsamba. Kan 1988, rinepaso kan Korte Suprema kan E.U. an 71 kaso may labot sa Mga Saksi ni Jehova, na an dos-tersio kaiyan dinesisyonan apabor sa sainda. Ngonyan, sa bilog na kinaban, nagpapadagos an legal na mga kaso tanganing, arog kan enot na siglo, magkaigwa nin “pagdepensa saka legal na pagpatunay sa maogmang bareta.”​—Filipos 1:7.

6. Naolang daw kan mga pagbabawal asin pagprohibir an banwaan ni Jehova sa pag-abante? Iilustrar.

⁶ Durante kan mga taon nin 1930, kaidtong mga aldaw bago kan Guerra Mundial II, ibinawal o pigprohibir kan diktatoryal na mga gobyerno an gibohon kan Mga Saksi ni Jehova sa Alemania, España, asin Hapon, sa pagsambit nin tolo sana. Alagad kan taon 2000, an tolong nasyon sanang ini nagkaigwa nin haros 500,000 na aktibong parabalangibog kan Kahadean nin Dios. Iyan haros sampulong doble kan kabilangan nin mga Saksi sa enterong kinaban kan 1936! Malinaw nanggad, dai maoolang kan mga pagbabawal asin pagprohibir an banwaan ni Jehova sa pag-abante sa pangengenot kan mapangganang Namomoon sa sainda, si Jesu-Cristo.

7. Ano an pambihirang nangyari kan 1958, asin anong dramatikong mga pagbabago an nangyari poon kaidto?

⁷ Kanigoan na prueba kan pag-abanteng ini kan, kaidtong 1958, gibohon sa Siudad nin Nueva York an pinakadakulang kombension kasuarin man kan Mga Saksi ni Jehova, an Kabotan nin Dios na Internasyonal na Asamblea, na may pinakahalangkaw na kabilangan nin nag-atender na 253,922. Kan 1970 nabuksan na an saindang gibohon sa tolong nasyon na nasambitan sa enotan, apuera sa inaapod kaidto na Sirangan na Alemania. Alagad an mga Saksi prohibido pa kaidto sa dakulaon na Unyon Sobyet asin sa kaalyadong mga nasyon kaiyan sa Warsaw Pact. Ngonyan, sa dating Komunistang mga nasyon na ini, igwa na nanggad nin labi sa kabangang milyon na aktibong Saksi.

8. Ano an nagin resulta kan pagbendisyon ni Jehova sa saiyang banwaan, asin ano an sinabi kan The Watchtower kan 1950 manongod digdi?

⁸ An Mga Saksi ni Jehova binendisyonan nin pagdakol huli ta sinda nagpadagos na “hanapon nguna an kahadean asin an . . . katanosan” nin Dios. (Mateo 6:33) Sa literal na paagi, naotob na an hula ni Isaias: “An sadit mismo magigin sangribo, asin an sadangoton magigin makosog na nasyon. Ako mismo, si Jehova, maparikas kaiyan sa kapanahonan kaiyan.” (Isaias 60:22) Asin dai pa tapos iyan. Durante sana kan nakaaging dekada, an kabilangan kan aktibong mga parasuportar sa pamamahala kan Kahadean nadagdagan nin labing 1,750,000 katawo. An mga ini boluntad na nagin kabtang nin sarong grupo na manongod dian an sarong Watchtower kan 1950 nagkomento nin arog kaini: “Iinaandam na ngonyan nin Dios an sarong bagong kinaban na sosyedad. . . . An nukleong ini mabalyo sa Armagedon, . . . an enot na malataw sa eksena sa ‘bagong daga’ . . . , na inorganisar sa teokratikong paagi, na tatao  kan organisasyonal na mga prosedimiento.” An artikulo nagtapos: “Padagos, kun siring, daing ontok, iriba kita gabos, bilang sarong bagong kinaban na sosyedad!”

9. Paano nagin kapakipakinabang an mga bagay na nanodan sa nakaaging mga taon kan Mga Saksi ni Jehova?

⁹ Mientras tanto, an padagos na nag-ooswag na bagong kinaban na sosyedad na ini nagkaigwa nin praktikal na kaaraman na nagin mahalagang marhay ngonyan asin puedeng durante pa ngani kan gibohon na pagbabalik sa dati pagkatapos kan Armagedon. Halimbawa, an mga Saksi nakanood na mag-organisar nin darakulang kombension, magtao nin marikas na ayudang pan-emerhensia, asin marikas na magtogdok nin mga edipisyo. An aktibidad na ini an nagin dahelan tanganing hangaan asin igalang nin dakol an Mga Saksi ni Jehova.

Pagkorehir sa Salang mga Impresyon

10, 11. Ipaheling kun paano ikinorehir an salang mga impresyon manongod sa Mga Saksi ni Jehova.

¹⁰ Pero, may mga tawo na sinasahotan an Mga Saksi ni Jehova nin pagigin palaen sa sosyedad nin tawo. Sa pangenot dahelan ini sa basado sa Biblia na paninindogan kan mga Saksi manongod sa mga bagay na arog kan pagpaineksion nin dugo, neutralidad, pagsigarilyo, asin moral na gawe-gawe. Alagad paorog nang paorog na nagpopoon na admitiron kan publiko na an mga punto de vista kan mga Saksi maninigo na konsideraron. Halimbawa, an sarong doktora sa Polandia inapodan sa telepono an opisinang pan-administratibo kan Mga Saksi ni Jehova asin nagsabi na nagkapirang oras na pinagdebatehan nia asin kan saiyang mga kapropesyon sa ospital an manongod sa pagpaineksion nin dugo. An pinonan kan diskusyon iyo an sarong artikulo na nagluwas kan aldaw na idto sa diaryong Dziennik Zachodni sa Polandia. “Ako personalmenteng namomondo na nganangana an paggamit nin dugo sa langtad nin medisina,” an inadmitir kan doktora. “Dapat na bagohon ini, asin naoogma ako na may nagbangon kan temang iyan. Boot kong humagad nin dugang na impormasyon.”

 ¹¹ Durante nin sarong komperensia na ginibo kan nakaaging taon, an medikal na mga autoridad hale sa Canada, Estados Unidos, Europa, asin Israel pinag-orolayan an materyal na sinadya tanganing tabangan an mga doktor na bolongon an mga pasyente na dai naggagamit nin dugo. Sinabi sa miting na ini, na ginibo sa Switzerland, na sarongat sa lakop na opinyon, an totoo mas halangkaw an kabilangan nin nagagadan na mga pasyente na inineksionan nin dugo kisa mga pasyente na dai inineksionan. An mga pasyenteng Saksi sa pankagabsan mas madaling nakakaluwas sa ospital kisa mga inineksionan nin dugo, na nakababawas man kan gastos sa pagpabolong.

12. Tumao nin halimbawa kun paano inomaw nin prominenteng mga indibiduwal an paninindogan kan Mga Saksi ni Jehova mapadapit sa neutralidad sa politika.

¹² Dakol man an positibong ikinomento manongod sa neutral na paninindogan kan Mga Saksi ni Jehova bago asin durante kan Guerra Mundial II kan tioson ninda an pagsalakay kan Nazi. An video na Jehovah’s Witnesses Stand Firm Against Nazi Assault, na ginibo kan Mga Saksi ni Jehova asin angay sanang ipinadalan nin enot sa kampo de konsentrasyon sa Ravensbrück sa Alemania kan Nobyembre 6, 1996, nakapukaw nin dakol na paborableng komento. Sa pagpopoon nin kaparehong pagpadalan kaiyan sa bantog sa karatan na kampo de konsentrasyon sa Bergen-Belsen kan Abril 18, 1998, an direktor kan Sentro Para sa Edukasyon Politikal sa Lower Saxony, si Dr. Wolfgang Scheel, nag-admitir: “An saro sa pinakamakasusupog na mga katotoohan sa kasaysayan iyo na sinayumahan kan Mga Saksi ni Jehova an Sosyalismo Nasyonal na igwang determinasyon na orog kadakula kisa kan sa mga iglesiang Kristiano. . . . Ano man an tibaad saboot niato manongod sa katokdoan asin pagigin relihioso kan Mga Saksi ni Jehova, an saindang karigonan durante kan rehimen na Nazi maninigo na igalang.”

13, 14. (a) Anong may marahay na paghusgar na obserbasyon para sa enot na mga Kristiano an dai linalaoman na itinao nin sarong tawo? (b) Tumao nin mga halimbawa nin paborableng mga ikinomento para sa banwaan nin Dios ngonyan.

¹³ Kun an prominenteng mga indibiduwal o mga desisyon nin korte lumuwas na apabor sa Mga Saksi ni Jehova may labot sa kontrobersial na mga isyu, puedeng makaina iyan sa mga prehuwisyo asin nagpapangyari sa mga Saksi na trataron nin mas paborable. Sa parate nagbubukas ini kan dalan tanganing makaolay ninda an mga tawo na kaidto habong maghinanyog. Nakaoogma kun siring an mga ginigibong iyan, asin totoong inaapresyar iyan kan Mga Saksi ni Jehova. Ipinagigirumdom kaini sa sato an nangyari kan enot na siglo sa Jerusalem. Kan an Sanhedrin, an Judiong korte suprema, gustong ipagadan an mga Kristiano huli sa maigot na paghuhulit ninda, si Gamaliel, na “sarong paratokdo sa Ley na iginagalang kan bilog na banwaan,” nagpatanid asin nagsabi: “Mga lalaki nin Israel, tawe nindo nin atension an saindong sadiri kun manongod sa intension nindong gibohon dapit sa mga tawong ini. . . . Dai kamo makilabot sa mga tawong ini, kundi pabayae sana nindo sinda; (huli ta, kun an pakanang ini o an gibohon na ini gikan sa mga tawo, iyan madadaog; alagad kun iyan gikan sa Dios, dai nindo sinda madadaog;) ta kun dai, tibaad kamo makua na sa katunayan mga parapakilaban tumang sa Dios.”​—Gibo 5:33-39.

¹⁴ Arog ki Gamaliel, may prominenteng mga indibiduwal na kasuarin pa sana nagtaram apabor sa relihiosong katalingkasan para sa Mga Saksi ni Jehova. Halimbawa, an dating tsirman kan Internasyonal na Akademya Para sa Katalingkasan sa Relihion Asin Paniniwala nagtao nin argumento: “An relihiosong mga diretso nin sarong relihion dai maninigong isayuma huli sana ta an marigon na mga tinutubod kaini ibinibilang kan sosyedad na dai mapupuede o bakong sono sa kostumbre.” Asin an sarong propesor sa sientipikong pag-adal sa relihion sa unibersidad nin Leipzig iinatubang an sarong pertinenteng hapot mapadapit sa sarong komisyon kan gobyerno nin Alemania na inestablisar tanganing mag-imbestigar sa relihioso daang mga sekta: “Taano ta an relihiosong mga minoriya sana an maninigo na paagihon sa pagsiyasat asin bako an duwang dakulang iglesia [an Iglesia Katolika Romana asin an Iglesia Luterano]?” Madali tang maheling an simbag sa mga tataramon nin sarong dating opisyal sa Alemania, na nagsurat: “Daing duda na sa likod kaiyan, an mga panatiko sa iglesia an  nagdikta sa politikal na ginibo kan komisyon kan gobyerno.”

Kiisay Kita Naglalaom Para sa Pakaginhawa?

15, 16. (a) Taano ta limitado an pagigin epektibo kan ginibo ni Gamaliel? (b) Paano nagin limitado an tolo pang maimpluwensiang indibiduwal sa saindang nagibo para ki Jesus?

¹⁵ An sinabi ni Gamaliel nagdodoon sana kan katunayan na an gibohon na suportado nin Dios dai puedeng masudya. An enot na mga Kristiano daing duwa-duwa na nakinabang sa saiyang sinabi sa Sanhedrin, alagad dai ninda liningawan na totoo man an sinabi ni Jesus na lalamagon an saiyang mga parasunod. An ginibo ni Gamaliel an nagpaontok sa mga plano kan mga namomoon sa relihion na ipagadan sinda, alagad dai kaiyan biyong nahale an paglamag, ta satuyang mababasa: “Digdi sinda naghinanyog sa saiya, asin tiniripon ninda an mga apostol, hinampak sinda, asin pinagbotan sinda na mag-ontok sa pagtaram basado sa ngaran ni Jesus, asin binutasan sinda.”​—Gibo 5:40.

¹⁶ Kan binibista si Jesus, si Poncio Pilato, na daing nakukuang sala sa saiya, naghingoang butasan si Jesus. Alagad dai sia nagin mapanggana. (Juan 18:​38, 39; 19:​4, 6, 12-16) Dawa an duwang miembro kan Sanhedrin, si Nicodemo asin Jose na taga Arimatea, na pabor ki Jesus, limitado sa saindang nagibo na olangon an korte sa paggibo nin aksion tumang ki Jesus. (Lucas 23:50-52; Juan 7:45-52; 19:38-40) An pakaginhawa na nakakamit nin mga tawo kun saindang idinedepensa an banwaan ni Jehova​—sa ano man na rason​—limitado sa pinakamarahay na kamugtakan. An kinaban padagos na maoongis sa tunay na mga parasunod ni Cristo, kun paanong naongis sinda sa saiya. Si Jehova sana an makatatao nin lubos na pakaginhawa.​—Gibo 2:24.

17. Ano an realistikong pagmansay kan Mga Saksi ni Jehova, alagad taano ta dai nagluluya an saindang desisyon na magpadagos sa paghuhulit kan maogmang bareta?

¹⁷ Sa realistikong paagi, inaasahan kan Mga Saksi ni Jehova na magpapadagos an paglamag. An pagtumang mapondo sana kun an sistema ni Satanas nadaog na sa katapustapusi. Pero, an paglamag na ini, minsan ngani dai nakaoogma, dai nagigin dahelan tanganing pumondo an mga Saksi sa pag-otob sa sugo sa sainda na ihulit an Kahadean. Taano ta mapondo sinda, mantang yaon sa sainda an pagsuportar nin Dios? Sinda nagheheling sa saindang makosog an boot na Namomoon, si Jesu-Cristo, bilang an tamang arogan.​—Gibo 5:17-21, 27-32.

18. Ano pang kadepisilan an nasa enotan kan banwaan ni Jehova, alagad sa anong resulta sinda kombensido?

¹⁸ Sa kapoonpooni kaiyan, an tunay na relihion napaatubang na sa makosog na pagtumang. Sa dai na mahahaloy, iyan biyong sasalakayon ni Gog, si Satanas sa saiyang ibinabang kamugtakan poon kan sia palayason sa langit. Alagad magdadanay an tunay na relihion. (Ezequiel 38:14-16) An “mga hade kan bilog na ineerokan na daga,” na ginigiyahan ni Satanas, “makikipaglaban sa Kordero, alagad, huli ta sia Kagurangnan nin mga kagurangnan asin Hade nin mga hade, dadaogon sinda kan Kordero.” (Kapahayagan 16:14; 17:14) Iyo, an satuyang Hade nag-aabante pasiring sa pangultimong kapangganahan asin madali nang ‘taposon an saiyang pandadaog.’ Kanigoan na pribilehio an umabante kasabay nia, sa pakaaram na sa dai na mahahaloy mayo na ni saro na makontra pa sa mga nagsasamba ki Jehova pagsinabi nindang: “An Dios nasa kampi niato”!​—Roma 8:31; Filipos 1:​27, 28.

Ikapaliliwanag daw Nindo?

• Ano an ginibo ni Jehova tanganing pakosogon an Kristianong kongregasyon poon kan mamundag an Kahadean?

• Ano an ginibo ni Satanas tanganing hingoahon na papondohon si Cristo sa pagtapos kan saiyang pandadaog, asin ano an mga resulta?

• Ano an maninigo na magin timbang na pagmansay niato dapit sa paborableng ginigibo kan mga bakong Saksi?

• Ano an gigibohon ni Satanas sa dai na mahahaloy, asin ano an resulta?

[Mga Hapot Para sa Pag-adal]

[Ritrato sa pahina 18]

An mga kombension prueba kan pag-abante kan banwaan ni Jehova

[Mga Ritrato sa pahina 20]

An neutralidad kan mga Saksi durante kan Guerra Mundial II nagtatao nin kaomawan ki Jehova sagkod ngonyan