Pag-adal sa Biblia—Para daw Iyan sa Saindo?

“DAI dapat basahon kun mayo nin padi.” An patanid na ini minalataw sa kapinonan nin nagkapirang Biblia na sadiri kan mga Katoliko. “Bilang mga Katoliko dai kita pirmeng nalalantad sa Biblia,” an sabi ni Kay Murdy kan Katolikong Institusyon sa Biblia sa Los Angeles, “alagad iyan nagbabago na.” Oras na marealisar kan mga Katoliko kun paano puedeng makaapektar sa saindang buhay an Banal na Kasuratan, an sabi nia, “nagkakaigwa sinda mismo nin pagkagutom asin pagkapaha sa Biblia.”

Mapadapit sa pagbagong ini, kinokotar kan magasin na U.S. Catholic an sarong nagkokoordinar sa relihiosong edukasyon na nagsabi na an mga Katoliko na uminayon sa mga klase sa pag-adal sa Biblia nagsaboot na “sinda pinag-imotan bilang mga Katoliko, asin na igwa nin kadakol na kayamanan sa Biblia. Gusto nindang makua an nagkapira sa mga kayamanan na iyan na sa boot ninda saindang nalipasan.”

Ano man an kamugtakan, anong “kayamanan” an yaon na dapat diskobrehon nin sarong estudyante kan Biblia? Pensara: Mawot daw nindong maaraman kun paano mapanggaganahan an mga kahaditan sa aroaldaw na buhay? Paano nindo mapagdadanay an katoninongan sa laog kan pamilya? Taano ta igwa nin kadakol na bastos asin antisosyal na gawe-gawe? Ano an dahelan kan kadahasan sa tahaw nin mga hoben ngonyan? An masasarigan na mga simbag digdi asin sa iba pang nakariribaraw na mga hapot manonompongan sa Tataramon nin Dios, an Biblia, asin an mga iyan magigin “kayamanan,” sa katunayan, bako sanang para sa mga Katoliko o Protestante kundi siring man para sa mga Budista, Hindu, Muslim, Shintoista, para sa mga ateista asin agnostiko pa ngani. Siring sa pagkasabi kaiyan kan salmista, ‘an tataramon nin Dios ilawan sa saiyang bitis, asin liwanag sa saiyang dalan.’ Puede man na magin totoo iyan sa saindo.​—Salmo 119:105.