Pagbuyboy na Nagbubunga nin Pagkaomay

“KAN ako dai naggigirong an sakuyang mga tolang nanluya huli sa sakuyang pag-agrangay sa bilog na aldaw. Huli ta aldaw asin banggi an saimong kamot magabat sa sako. An kalabasan kan sakuyang buhay naribayan na siring sa alang na init nin tig-init.” (Salmo 32:​3, 4) An nakatataros sa pusong mga tataramon na iyan puedeng nagpabanaag kan hararom na kolog nin boot na namatean ni Hadeng David kan suanoy na Israel, kolog na kagibohan nia mismo paagi sa pagtago imbes na pagbuyboy kan magabat na kasalan.

Si David sarong tawo na igwa nin pambihirang mga abilidad. Sia sarong pusoan na guerrero, ekspertong estadista, parasurat nin berso, asin musikero. Pero, sia nagsarig, bako sa saiyang mga abilidad, kundi sa saiyang Dios. (1 Samuel 17:​45, 46) Sia ilinadawan bilang sarong tawo na an puso “bilog ki Jehova.” (1 Hade 11:4) Alagad an sarong kasalan na nakomiter nia nangorognang maninigong kondenaron, asin tibaad iyan an ipinasentido nia sa Salmo 32. Dakol kitang manonodan sa pagsiyasat sa mga kamugtakan na nagbunga kan saiyang kasalan. Mamamansayan ta an mga natatagong peligro na dapat likayan siring man maheheling an pangangaipo na ibuyboy an satong mga kasalan tanganing ikabalik an satong relasyon sa Dios.

An Sarong Maimbod na Hade Nagkasala

An nasyon nin Israel nakikilaban sa sarong kampanya militar tumang sa mga Amonita, alagad si David nag-eerok sa Jerusalem. Sarong banggi mantang naglalakawlakaw sa bubongan kan saiyang palasyo, narisa nia an sarong magayon na babae na nagkakarigos sa kataed na harong. Dai nia pinogolan an saiyang sadiri kundi nagpoon na magkaigwa nin malaad na horot sa saiya. Kan maaraman na sia si Bat-seba, an agom ni Urias, na sarong soldados sa saiyang hukbo, ipinaapod sia ni David, asin sinambayan nia ini. Sa katapustapusi ipinaaram ni Bat-seba ki David na sia bados.​—2 Samuel 11:​1-5.

Si David nasilo. Kun mahayag an saindang kasalan, kagadanan an penalidad para sa saindang duwa. (Levitico 20:10) Kaya nagpakana sia nin sarong plano. Ipinaapod nia an agom ni Bat-seba, si Urias, hale sa ralaban. Pakatapos na sia pagparahapoton manongod sa guerra, pinagbotan ni David si Urias na pumuli sa saiyang harong. Si David naglalaom na paluluwason kaini na si Urias an ama kan aki ni Bat-seba.​​—2 Samuel 11:​6-9.

Sa kasusupgan ni David, dai dinalaw ni Urias an saiyang agom. Sinabi ni Urias na dai nia lamang pepensaron na pumuli mantang an hukbo nagtitios nin sakit sa ralaban. Kun an sarong hukbo nin Israel nakikilaban sa sarong kampanya militar, an mga soldados dai nakikidorog, maski sa sadiri nindang agom. Kaipuhan na sinda magdanay na malinig sa seremonyal na paagi. (1 Samuel 21:5) Dangan inimbitaran ni David si Urias na magkakan asin binurat ini, alagad habo pa man giraray niang pumuli sa saiyang agom. Kinondenar kan fiel na iginawe ni Urias an magabat na kasalan ni David.​—2 Samuel 11:10-​13.

An siod na ginibo kan saiya mismong kasalan orog pang huminigot an pagkagapos ki David. Sa pagkadesesperar naheling nia an saro sanang paagi na makabutas. Pinabalik nia si Urias sa ralaban na may darang surat sa heneral kan hukbo, si Joab. An intension kan halipot na surat malinaw: “Ibugtak nindo si Urias sa enotan kan pinakagrabeng pag-atake sa ralaban, asin umatras kamo sa likod nia, asin dapat siang bumagsak asin magadan.” Paagi sa surat, garo baga ikinatago kan makapangyarihan na hade an saiyang mga ginibo, na ipinagadan si Urias.​—2 Samuel 11:14-17.

Pakatapos tolos kan peryodo nin pagmondo ni Bat-seba para sa saiyang agom, inagom sia ni David. Naglihis an panahon, asin namundag an saindang aki. Durante kan gabos na pangyayaring ini, si David nagdanay na silensio manongod sa saiyang  mga kasalan. Tibaad hinihingoa niang ipangatanosan an saiyang mga ginibo sa saiya man sana. Bako daw na si Urias nagadan na may onra sa ralaban kapareho nin iba? Dugang pa, bako daw na sinuway nia an saiyang hade paagi sa pagsayumang dumanan an saiyang agom? An ‘madayang puso’ gagamiton an gabos na klase nin pangangatanosan tanganing ipangatanosan an kasalan.​—Jeremias 17:9; 2 Samuel 11:25.

Mga Sala na Nagbunga nin Kasalan

Paano magigibo ni David, na sarong mamomoton sa katanosan, na pababaon an sadiri paagi sa pagsambay asin tuyong paggadan? An mga banhi kan saiyang kasalan minalataw na nakatanom sa laog nin sarong lawig nin panahon. Tibaad ipagngalas ta kun taano si David ta dai kaiba kan saiyang mga tawohan, na sinusuportaran sinda sa saindang kampanya militar tumang sa mga kaiwal ni Jehova. Sa kabaliktaran, si David nagpapahayahay sa saiyang palasyo, na dian an mga kahaditan sa pakikilaban mayo nanggad sa isip nia tanganing haleon an saiyang salang horot para sa agom nin sarong fiel na soldados. Ngonyan, sarong proteksion para sa tunay na mga Kristiano an aktibong pagpartisipar sa espirituwal na mga aktibidad kaiba kan saindang kongregasyon asin pakikikabtang nin regular sa pag-eebanghelyo.​—1 Timoteo 6:12.

An hade kan Israel pinagbotan na gumibo nin kopya kan Ley asin basahon iyan aroaldaw. Itinatao kan Biblia an dahelan para digdi: “Tanganing sia makanood na matakot ki Jehova na saiyang Dios tanganing otobon an gabos na tataramon kan ley na ini asin kan mga kukuyogon na ini paagi sa paggibo kaiyan; tanganing an saiyang puso dai magpalangkaw sa saiyang mga tugang na lalaki asin tanganing dai sia sumuhay sa togon patoo o pawala.” (Deuteronomio 17:18-20) Minalataw na posibleng dai sinusunod ni David an pagboot na iyan kan panahon na nakomiter nia an magabat na mga kasalan na ini. An regular na pag-adal asin paghorophorop sa Tataramon nin Dios siertong makatatabang na protehiran kita sa paggibo nin sala sa delikadong mga panahon na ini.​—Talinhaga 2:10-12.

Dugang pa, an ultimo kan Sampulong Togon espesipikong nagsabi: “Dai mo pagmawoton an agom na babae kan saimong kapwa.” (Exodo 20:​17) Kan panahon na idto si David igwa nin dakol na agom asin sambay. (2 Samuel 3:​2-5) Alagad dai sia kaiyan prinotehiran na mawoton an saro pang nakaaatraer na babae. An pagkasaysay na ini nagpapagirumdom sa sato kan pagigin seryoso kan mga tataramon ni Jesus: “An lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mateo 5:28) Imbes na papagdanayon sa isip an siring na salang pagmawot, magin kitang listo na haleon iyan sa satong isip asin puso.

Pagsolsol Asin Pagkaherak

An sadiosan na pagkasaysay sa Biblia manongod sa kasalan ni David sierto na dai ibinugtak dian tanganing panigoan an seksuwal na horot nin saro. An rekord nagtatao sa sato nin oportunidad na maheling an mapuersa asin nakapahihirong kapahayagan kan saro sa marahayon na mga kualidad ni Jehova​—an saiyang pagkaherak.​—Exodo 34:​6, 7.

Pakapangaki ni Bat-seba nin aking lalaki, isinugo ni Jehova si propeta Natan tanganing atubangon si David. Ini sarong akto nin pagkaherak. Kun si David dai dinolok asin nagdanay na silensio, posible na sia magtagas sa dalan nin kasalan. (Hebreo 3:13) Marahay sana, si David naghimate sa pagkaherak nin Dios. An eksperto alagad malinaw na mga tataramon ni Natan tinudok an konsensia ni David, asin mapakumbaba niang inadmitir na sia nagkasala tumang sa Dios. Sa katunayan, an Salmo 51, na nagtatratar kan kasalan ni David may koneksion ki Bat-seba, isinurat pakatapos na sia magsolsol asin magbuyboy kan saiyang magabat na kasalan. Dai man logod niato togotan na tumagas an satong puso enkaso madaog kita nin magabat na kasalan.​—2 Samuel 12:​1-​13.

Si David pinatawad, alagad dai sia pinalibre sa disiplina o sa mga epekto kan saiyang kasalan. (Talinhaga 6:27) Paanong dai sia didisiplinahon? Kun pababayaan sana nin Dios an gabos, an saiyang mga pamantayan magkakaigwa nin katuyawan. Magigin siang daing epekto arog kan Halangkaw na Saserdoteng si Eli, na inanggotan sana nin dikit an saiyang maraot na mga aking lalaki asin pinabayaan sindang ipadagos an saindang maraot na mga gibo. (1 Samuel 2:​22-​25) Pero, dai ni Jehova sineserahan an Saiyang mamomoton na kabootan sa nagsosolsol. An saiyang pagkaherak, arog nin nakagiginhawa, malipot na tubig, matabang sa napasala na tagalan an mga epekto kan kasalan. An init kan kapatawadan nin Dios asin an nakaparirigon na pakikiasosyar sa mga kapagtubod nakakapaomay. Iyo, basado sa pantubos ni Cristo, an  nagsosolsol puedeng manamitan an ‘mga kayamanan kan dai na kutana maninigong kabootan nin Dios.’​—Efeso 1:7.

“Dalisay na Puso” Asin “Bagong Espiritu”

Pakatapos na magbuyboy si David, dai sia nagpadaog sa negatibong pakamate nin kadaihan nin kamanungdanan. An saiyang mga pananaram sa mga salmo na isinurat nia manongod sa mga pagbuyboy nagpapaheling kan kaginhawahan na namatean nia asin kan saiyang determinasyon na fiel na maglingkod sa Dios. Halimbawa, helinga an Salmo 32. Sa bersikulo 1, mababasa ta: “Maogma idtong an pagrebelde pinatawad, na an kasalan tinahoban.” Gurano man kagabat kan kasalan, posible an sarong maogmang resulta kun an saro sinsero sa saiyang pagsolsol. An sarong paagi tanganing ikapaheling an sinseridad na ini iyo an pag-ako nin bilog na paninimbagan sa mga iginawe nin saro, arog kan ginibo ni David. (2 Samuel 12:13) Dai sia naghingoang manarahotan sa atubangan ni Jehova o nagprobar na basolon an iba. An bersikulo 5 nagsasabi: “Sa katapustapusi itinuga ko an sakuyang kasalan sa saimo, asin dai ko tinahoban an sakuyang kaliwagan. An sabi ko: ‘Itutuga ko an sakuyang mga kalapasan ki Jehova.’ Asin ika mismo nagtaong indulto sa kaliwagan kan sakuyang mga kasalan.” An tunay na pagbuyboy nagbubunga nin kaginhawahan, kaya an saro dai na kaipuhan na pasakitan kan saiyang konsensia huli sa nakaaging mga sala.

Pakatapos na makimaherak para sa kapatawadan ni Jehova, si David naghagad: “Lalangon mo sa sakuya an dalisay na puso, O Dios, asin bugtakan mo ako nin bagong espiritu, sarong marigon.” (Salmo 51:10) An paghagad nin “dalisay na puso” asin “bagong espiritu” nagpapaheling na aram ni David an makasalan na tendensia na nasa saiya asin na kaipuhan nia an tabang nin Dios sa paglinig kan saiyang puso asin pagpoon giraray. Imbes na padaog sa pagkaherak sa sadiri, sia determinadong ipadagos an saiyang paglilingkod sa Dios. Sia namibi: “O Jehova, bukahon mo logod an mga ngabil kong ini, tanganing an sakong ngoso magbalangibog kan saimong kaomawan.”​—Salmo 51:15.

Ano an nagin reaksion ni Jehova sa sinserong pagsolsol asin determinadong paghihingoa ni David na maglingkod sa saiya? Tinawan nia si David nin nakaoogmang pag-asegurar giraray: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakatorohok sa saimo.” (Salmo 32:8) Ini pag-asegurar giraray kan personal na atension ni Jehova sa mga saboot asin pangangaipo kan sarong nagsosolsol. Si Jehova naghiro tanganing tawan si David nin orog pang  pakarorop, an abilidad na makaheling nin lihis sa panluwas na itsura nin mga bagay-bagay. Kun sa ngapit mapaatubang sa sugot, masasabotan nia an kaaabtan kan saiyang gawe-gawe asin an epekto kaiyan sa iba, asin sia puedeng humiro na may diskresion.

An pangyayaring ini sa buhay ni David nagseserbing pamparigon sa boot kan gabos na nagkasala nin magabat. Paagi sa pagbuyboy kan satong kasalan asin pagpaheling nin sinserong pagsolsol, mababawi ta an satong pinakamahalagang marhay na rogaring, an satong relasyon ki Jehova Dios. An temporaryong kakologan asin kasusupgan na tibaad kaipuhan niatong tagalan mas marahay nanggad kisa kan labi-labing kamondoan na bunga nin pagdanay na silensio, o an makatatakot na resulta nin pagtogot na kita tumagas sa rebelyosong dalan. (Salmo 32:9) Imbes kaiyan, maeeksperyensiahan niato an may pagkamoot na kapatawadan nin sarong mamomoton, maheherakon na Dios, “an Ama nin maboot na mga pagkaherak asin an Dios nin gabos na karangahan.”​—2 Corinto 1:3.

[Ritrato sa pahina 31]

Si David nag-asang madulagan an mga resulta kan saiyang kasalan paagi sa pagpagadan ki Urias