“An mga Lugad na Hale sa Sarong Katood”

NAHELING ni apostol Pablo an pangangaipong magtao nin pagtatanos sa mga Kristiano sa Galacia kan enot na siglo. Posibleng tangani na malikayan an ano man na paghinanakit, sia naghapot: “Bueno, kun siring, ako daw nagin kaiwal nindo huli ta isinasabi ko sa saindo an katotoohan?”​—Galacia 4:16.

Sa ‘pagsabi kan katotoohan,’ si Pablo dai nagin kaiwal ninda. Sa katunayan, sia naghiro kaoyon kan prinsipyo sa Biblia: “An mga lugad na hale sa sarong katood fiel.” (Talinhaga 27:​6, King James Version) Aram nia na puedeng malugadan an amor propio kan mga napapasala. Pero, aram nia na an pagpogol na itao sa parakasala an kaipuhan niang disiplina puedeng mangahulogan nin pagdehar kan kapahayagan nin pagkamoot ni Jehova Dios sa tawong iyan. (Hebreo 12:​5-7) Kun siring, bilang fiel na katood na nasa puso an panhaloyan na intereses kan kongregasyon, si Pablo dai nagsibog sa pagtao nin nagtatanos na hatol.

Ngonyan, inootob kan Mga Saksi ni Jehova an sugo sa sainda na ‘gumibo nin mga disipulo sa mga tawo kan gabos na nasyon, na tinotokdoan sinda na otobon an gabos na bagay na ipinagboot ni Jesu-Cristo.’ Sa paggibo kaiyan, an sinserong mga Kristianong ini dai ikinokompromiso an mga katotoohan sa Biblia na nagbubuyagyag asin nagkokondenar sa salang doktrina asin bakong sa Kristianong mga gawe-gawe. (Mateo 15:9; 23:9; 28:​19, 20; 1 Corinto 6:​9, 10) Imbes na magin mga kaiwal na dapat haboan, sinda nagpapaheling kan interes nin tunay na mga katood.

Igwa nin pakarorop na ipinasabong nin Dios, an salmista nagsurat: “Kun hampakon ako kan matanos, iyan magigin mamomoton na kabootan; asin kun sagweon nia ako, iyan magigin lana sa payo, na dai hahaboan kan sakuyang payo.”—Salmo 141:5.