Atamanon an mga Ilo Asin Babaeng Balo sa Saindang Kasakitan

Bakong depisil na rekonoseron na kita nabubuhay sa sarong bakong mamomoton na kinaban. Ipinanonongod sa klase nin mga tawo na nabubuhay durante kan “huring mga aldaw,” si apostol Pablo nagsurat: “Maabot an delikadong mga panahon na masakit pakibagayan. Huli ta an mga tawo magigin mga mamomoton sa sainda man sana, . . . mga dai nin natural na kapadangatan.” (2 Timoteo 3:​1-3) Abaa katotoo kan mga tataramon na iyan!

AN MORAL na mga kamugtakan sa satong panahon an sarong dahelan kan kadaihan nin pagkaherak sa puso nin dakol. Padikit nin padikit an interes nin mga tawo sa ikararahay nin iba, sa nagkapirang kaso dawa sa mga miembro kan sainda mismong pamilya.

Bako nanggad na paborable an mga epekto kaini sa kadaklan na, huli sa manlaenlaen na sirkunstansia, nagin grabe an pagtios. An kabilangan nin mga babaeng balo asin ilo daing ontok na nagdadakol bilang resulta nin mga guerra, natural na mga kalamidad, asin pagkadaing madudumanan kan mga tawong naghahanap nin pailihan. (Eclesiastes 3:19) “Labing 1 milyon [na aki] an nailo o napasuway sa saindang mga pamilya bilang resulta nin guerra,” an sabi kan sarong bareta hale sa United Nations Children’s Fund. Aram man nindo an manongod sa dakulang kabilangan nin nagsosolo, inabandonar, o diborsiadang mga ina na inaatubang an masakit na gibohon na mabuhay asin atamanon an saindang pamilya na mayong suporta nin agom. An situwasyon pinagrabe pa kan katunayan na an nagkapirang nasyon napapaatubang sa grabeng krisis sa ekonomiya, na nagpapangyari sa dakol na namamanwaan ninda na mabuhay sa labi-labing kadukhaan.

Huli kaini, igwa daw nin ano man na paglaom para sa mga nakaeeksperyensia nin kasakitan? Paano puedeng pagianon an pagdusa kan mga babaeng balo asin ilo? Mahahale pa daw an problemang ini?

Mamomoton na Pag-asikaso Kaidtong mga Panahon kan Biblia

An pag-asikaso sa pisikal asin espirituwal na mga pangangaipo kan mga babaeng balo asin ilo kaidto pa sarong mahalagang kabtang nin pagsamba sa Dios. Kun nag-aani kan saindang mga tipasi o prutas, dai na kinukua kan mga Israelita an mga natada sa oma, na ginugutol iyan para sa sainda man sana. An paggutol itinatada “para sa nakikihimanwa, para sa aking lalaki na daing ama asin para sa babaeng balo.” (Deuteronomio 24:​19-21) Malinaw na sinasabi kan Ley ni Moises: “Kamong banwaan dai magpasakit nin makuri sa siisay man na babaeng balo o aking lalaki na daing ama.” (Exodo 22:​22, 23) An  mga babaeng balo asin ilo na sinasabi sa Biblia tamang-tamang nagrerepresentar sa mas dukhang mga tawo, huli ta pagkagadan kan agom na lalaki asin ama o kan parehong magurang, an nabayaan na mga miembro kan pamilya tibaad mawalat na solo asin dukhang-dukha. An patriarkang si Job nagsabi: “Ililigtas ko an nagsasakit na naghahagad nin tabang, asin an aking lalaki na daing ama patin an siisay man na mayo nin parasorog.”​—Job 29:12.

Durante kan enot na mga aldaw kan Kristianong kongregasyon, an pag-asikaso sa mga nagsasakit asin tunay na nangangaipo bilang resulta kan pagkawara nin mga magurang o nin agom na lalaki sarong nagpapamidbid na kabtang nin tunay na pagsamba. May galagang pagmakolog sa ikararahay kan mga siring, an disipulong si Santiago nagsurat: “An klase nin pagsamba na malinig asin daing digta sa pagheling kan satong Dios asin Ama iyo ini: an pag-ataman sa mga ilo asin babaeng balo sa saindang kasakitan, asin an pagpadanay sa sadiri na daing digta kan kinaban.”​—Santiago 1:27.

Apuera sa pagsambit sa mga ilo asin babaeng balo, nagpaheling man si Santiago nin hararom na pagmakolog sa iba pa na mga dukha asin grabe an pagtios. (Santiago 2:​5, 6, 15, 16) Nagpaheling si apostol Pablo nin kaparehong pagkamaginirumdom. Kan itao sa saiya asin ki Bernabe an saindang asignasyon sa paghuhulit, kabilang sa naresibi nindang instruksion an ‘paggirumdom sa mga dukha.’ “Ini mismo odok ko man na pinagmaigotan na gibohon,” an puedeng masabi ni Pablo na may marahay na konsensia. (Galacia 2:​9, 10) An pagkasaysay kan mga aktibidad kan Kristianong kongregasyon dai nahaloy pagkatapos na iyan maestablisar nagsabi: “Mayo ni saro na nangangaipo sa tahaw ninda . . . Dangan idinidistribwir iyan sa kada saro, sono sa saiyang pangangaipo.” (Gibo 4:​34, 35) Iyo, an mga areglong inestablisar sa suanoy na Israel na pag-asikaso sa mga ilo, babaeng balo, asin dukhang-dukha nakaabot man sa Kristianong kongregasyon.

Siempre, an tabang na itinao tama sana asin sono  sa kaya kan indibiduwal na mga kongregasyon. An kuarta dai sinasayang, asin an totoong nangangaipo an tinatabangan. Daing Kristiano na maninigong mag-aprobetsar sa areglong ini, asin dai kaipuhan na pagabatan an kongregasyon. Malinaw na maheheling ini sa instruksion na isinabi sa 1 Timoteo 5:​3-​16. Maheheling niato dian na kun an mga paryente kan nangangaipo kayang tumabang sa sainda, kaipuhan nindang isaabaga an paninimbagan na iyan. May mga kahagadan na kaipuhan na maabot kan nangangaipong mga babaeng balo tanganing makualipikar sa tabang. Ipinapabanaag kan gabos na ini an madonong na areglo na ginagamit ni Jehova sa pag-asikaso sa mga nangangaipo. Pero, nagpapaheling man iyan na kaipuhan an pagigin timbang tanganing mayo nin siisay man na mag-aprobetsar sa ipinaheheling na kabootan.​—2 Tesalonica 3:​10-​12.

Pag-asikaso sa mga Ilo Asin Babaeng Balo Ngonyan

An mga prinsipyo na sinunod kan mga lingkod nin Dios kan nakaagi iinaaplikar pa man giraray sa mga kongregasyon kan Mga Saksi ni Jehova kun mapadapit sa pagpaheling nin pagmakolog asin pagtao nin tabang sa mga nag-aagi nin kasakitan. An sa magturugang na pagkamoot sarong nagpapamidbid na kabtang, siring kan sinabi ni Jesus: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” (Juan 13:35) Kun may mga tinitikapo o nagin biktima nin sarong kalamidad o mga epekto nin guerra o iriwal sibil, an iba pa kan internasyonal na kasararoan nin magturugang galagang naghahanap nin mga paagi tanganing makatabang sa espirituwal asin sa materyal. Tawan niato nin atension an nagkapirang eksperyensia sa presenteng aldaw na nagpapaheling kun ano an ginigibo mapadapit digdi.

Daing gayong nagigirumdoman si Pedro manongod sa saiyang ina, na nagadan kan sia sangtaon may kabanga pa sana. Kan si Pedro singko anyos, nagadan man an saiyang ama. Kaya si Pedro nawalat kaiba kan saiyang mga tugang na lalaki. An Mga Saksi ni Jehova nagdadalaw na sa saiyang ama, sa siring si Pedro asin an saiyang matuang mga tugang na lalaki nagpoon gabos na mag-adal sa Biblia.

Si Pedro nagsasaysay: “Kan suminunod mismong semana, nagpoon kaming mag-atender sa mga pagtiripon. Mantang nakikiasosyar kami sa mga tugang, namamatean mi an pagkamoot na ipinaheheling ninda sa samo. An kongregasyon sarong pailihan para sa sako huli ta ipinaheling sa sako kan mga tugang na lalaki asin babae an pagkamoot asin pagpadangat, na garo nanggad sinda mga magurang ko.” Nagigirumdoman ni Pedro na iniimbitaran sia kan saro sa Kristianong kamagurangan sa harong kaini. Duman nakakaibanan ni Pedro an pamilya sa pag-orolay-olay asin pagpaharohayahay. “Mga rekuerdo ini na pinakamamahal ko,” an sabi ni Pedro, na nagpoon na maghulit manongod sa saiyang pagtubod sa edad na 11 asin nabautismohan sa edad na 15. Huling tinabangan kan mga yaon sa kongregasyon, an saiyang matuang mga tugang uminoswag man na marhay sa espirituwal.

Yaon man an nangyari ki David. Sia asin an saiyang kakambal na babae inabandonar kan nagsuway an saindang mga magurang. Inataman sinda kan saindang mga apoon asin inaon. “Kan dumakula na kami asin narealisar mi na an samong situwasyon, nadaog kami kan pakamate nin takot asin kahaditan patin kamondoan. Kaipuhan mi nin masasandigan. An sakong inaon nagin saro sa Mga Saksi ni Jehova, asin sa tabang kaini, natokdoan kami sa katotoohan sa Biblia. Ipinamate sa samo kan mga tugang an saindang pagpadangat asin pakikikatood. Gustong-gusto ninda kami asin inenkaminar kaming aboton an mga pasohan asin padagos na maglingkod para ki Jehova. Kan ako mga dies anyos, hinahapit ako kan sarong ministeryal na lingkod tanganing makikabtang sa ministeryo sa langtad. An saro pang tugang na lalaki nagtatabang sa sakong mga gastos kun ako nag-aatender sa mga kombension. Tinabangan pa ngani ako kan sarong tugang tanganing makatao ako nin kontribusyon sa Kingdom Hall.”

 Si David nabautismohan kan sia 17 anyos, asin sa huri sia nagpoon na maglingkod sa sangang opisina kan Mga Saksi ni Jehova sa Mejico. Dawa ngonyan rinerekonoser nia: “May nagkapirang magurang sa kongregasyon na dakula an itinatabang sa sakong edukasyon asin nagtatao sa sako nin nakatatabang na hatol. Sa paaging ini napapangganahan ko an pakamate nin takot asin kahaditan patin kapungawan.”

Si Abel, sarong magurang sa sarong kongregasyon sa Mejico na may nagkapirang babaeng balo na nangangaipo nin tabang, nagsasaysay: “Kombensido ako na an pinakakaipuhan kan mga babaeng balo iyo an emosyonal na pagsuportar. May mga panahon na sinda nag-aagi nin depresyon; napupungaw sinda. Kun siring, mahalagang marhay na magin mapagsuportar, na hinihinanyog sinda. Parate niamo [mga magurang sa kongregasyon] sindang dinadalaw. Importanteng magtao nin panahon sa paghinanyog sa saindang mga problema. Nagkokontribwir ini sa saindang pakamate nin espirituwal na karangahan.” Minsan siring, kaipuhan man kun beses an pinansial na tabang. “Nagtotogdok kami ngonyan nin harong para sa sarong tugang na babaeng balo,” an isinaysay kasubago ni Abel. “Ginagamit mi an nagkapirang Sabado asin nagkapirang hapon durante kan semana sa pagtrabaho sa saiyang harong.”

Manongod sa saiya mismong eksperyensia sa pagtao nin tabang sa mga ilo asin babaeng balo, an saro pang magurang sa kongregasyon nagsasabi: “Naniniwala ako na mas nangangaipo pa nganing marhay nin Kristianong pagkamoot an mga ilo kisa mga babaeng balo. Narisa ko na mas may posibilidad sindang makamate na hinahaboan kisa mga aki asin barobata na may duwa pang magurang. Kaipuhan ninda an dakol na kapahayagan nin sa tugang na pagpadangat. Marahay na hanapon sinda pakatapos kan mga pagtiripon tanganing kumustahon sinda. May sarong may agom nang tugang na lalaki na nailo kan sia aki pa. Pirme ko siang tinataratara nin may init sa mga pagtiripon, asin kinukugos nia ako kun naheheling nia ako. Pinakokosog kaini an bogkos kan tunay na sa tugang na pagkamoot.”

‘Ililigtas ni Jehova an Dukha’

Kaipuhan an pagsarig ki Jehova tanganing makaya an mga situwasyon kan mga babaeng balo asin ilo. Sinasabi manongod saiya: “Si Jehova nagbabantay sa mga nakikihimanwa; an aking lalaki na daing ama asin an babaeng balo saiyang tinatabangan.” (Salmo 146:9) An lubos na solusyon sa arog kaining mga problema maabot sana paagi sa Kahadean nin Dios sa pamamahala ni Jesu-Cristo. Makahulang ilinaladawan an pamamahalang iyan kan Mesiyas, an salmista nagsurat: “Ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas.”​—Salmo 72:​12, 13.

Mantang orog na nagrarani na an katapusan kan presenteng sistema nin mga bagay, an pangigipit na inaatubang kan mga Kristiano sa pankagabsan siertong madugang. (Mateo 24:​9-​13) Kada aldaw kaipuhan kan mga Kristiano na magpaheling nin dugang pang pagmakolog sa lambang saro asin “magkaigwa nin makosog na pagkamoot sa lambang saro.” (1 Pedro 4:​7-​10) An mga Kristianong lalaki, nangorogna an mga kamagurangan, kaipuhan na magpaheling nin pagmakolog asin pakikidamay sa mga nailo. Asin an maygurang na mga babae sa kongregasyon dakula an ikatataong suporta sa mga babaeng balo asin magin gikanan nin karangahan. (Tito 2:​3-5) Sa katunayan, an gabos puedeng makakontribwir paagi sa aktibong pagpaheling nin pagmakolog sa iba pa na nag-aagi sa kasakitan.

An tunay na mga Kristiano dai ‘minapinto kan saindang mamomoton na pagdamay’ kun ‘naheheling ninda an saindang tugang na nasa pangangaipo.’ Aram na aram ninda an paghimate sa konseho ni apostol Juan: “Saradit na aki, mamoot kita, bakong sa tataramon ni sa dila, kundi sa gibo asin katotoohan.” (1 Juan 3:​17, 18) Kaya ‘atamanon niato an mga ilo asin babaeng balo sa saindang kasakitan.’​—Santiago 1:27.

[Blurb sa pahina 11]

“Mamoot kita, bakong sa tataramon ni sa dila, kundi sa gibo asin katotoohan.”—1 Juan 3:18

[Mga Ritrato sa pahina 10]

Inaataman kan tunay na mga Kristiano an mga ilo asin babaeng balo sa materyal, sa espirituwal, asin sa emosyon