Maggayagaya sa Kaaraman Dapit ki Jehova

“Maogma an mga nagdadangog sa tataramon nin Dios asin nag-ootob kaiyan!”—LUCAS 11:28.

1. Kasuarin si Jehova nagpoon na magkomunikar sa mga tawo?

NAMOMOTAN ni Jehova an mga tawo asin interesado siang gayo sa saindang ikararahay. Bakong makangangalas, kun siring, na sia nagkokomunikar sa sainda. An pagkomunikar na ini nagpoon sa tatamnan nin Eden. Segun sa Genesis 3:​8, sarong beses “kaidtong madoros na oras kan aldaw,” “nadangog [ni Adan asin Eva] an tingog ni Jehova Dios.” May mga nagsusuherir na ini nangangahulogan na ugale ni Jehova na magkomunikar ki Adan kan panahon na ini, na posibleng aroaldaw. Ano man an kamugtakan, linilinaw kan Biblia na an Dios nagtao nin panahon bako sanang tangani na magtao nin mga instruksion sa enot na tawo kundi tokdoan man sia kan kaipuhan niang maaraman tanganing magibo an saiyang mga paninimbagan.​​—Genesis 1:​28-​30.

2. Paano isinuhay kan enot na mag-agom an saindang sadiri sa paggiya ni Jehova, asin ano an resulta?

² Tinawan ni Jehova si Adan asin Eva nin buhay, pakasakop sa mga hayop, asin autoridad sa enterong daga. May saro sanang ipinangalad​—dai sinda dapat kumakan sa kahoy kan pakamidbid sa marahay asin maraot. Huling inimpluwensiahan ni Satanas, sinuway ni Adan asin Eva an pagboot nin Dios. (Genesis 2:​16, 17; 3:1-6) Pinili nindang humiro nin independiente, na sinda an nagdesisyon para sa sainda man sana kun ano an tama asin kun ano an sala. Sa paggibo kaiyan, may kamangmangan na isinuhay ninda an saindang sadiri sa paggiya kan saindang mamomoton na Kaglalang. An resulta kapahapahamak para sa sainda asin sa saindang dai pa namumundag na mga aki. Si Adan asin Eva guminurang asin sa kahurihurihi nagadan na mayo nin paglaom na buhayon liwat. Minana kan mga gikan ninda an kasalan asin an epekto kaiyan, an kagadanan.​​—Roma 5:12.

3. Taano ta nagkomunikar si Jehova ki Cain, asin ano an reaksion ni Cain?

³ Sa ibong kan pagrebelde sa Eden, si Jehova padagos na nagkomunikar sa saiyang mga tawong linalang. Si Cain, an panganay na aki ni Adan asin Eva, namemeligro kaidto na daogon kan kasalan. Pinatanidan sia ni Jehova na sia mapapahamak asin sinadol sia na ‘gumibo nin marahay.’ Sinayumahan ni Cain an mamomoton na hatol na ini asin ginadan an saiyang tugang. (Genesis 4:3-8) Sa siring, an enot na tolong tawo sa daga gabos suminayuma sa malinaw na paggiya na itinao kan saro na nagtao sa sainda nin buhay, an Dios na nagtatao nin instruksion sa saiyang banwaan tanganing sinda makinabang. (Isaias 48:17) Sierto nanggad na nakadedesganar ini para ki Jehova!

Ihinayag ni Jehova an Saiyang Sadiri sa mga Lalaki kan Suanoy

4. Mapadapit sa mga gikan ni Adan, sa ano kompiado si Jehova, asin anong mensahe nin paglaom an itinao nia?

⁴ Minsan ngani yaon sa saiya an gabos na deretso na putolon an pagkomunikar sa mga tawo, dai iyan ginibo ni Jehova. Kompiado sia na an nagkapirang gikan ni Adan madonong na hihimateon an Saiyang paggiya. Halimbawa, kan sinesentensiahan si Adan asin Eva, ihinula ni Jehova an pagdatong nin sarong “banhi” na mahampang sa Halas, si Satanas na Diablo. Pag-abot nin panahon, si Satanas lulugadon sa payo na ikagagadan nia. (Genesis 3:15) An hulang ini sarong magayagayang mensahe nin paglaom para sa “mga nagdadangog sa tataramon nin Dios asin nag-ootob kaiyan.”​—Lucas 11:28.

5, 6. Sa anong mga paagi nagkomunikar si Jehova sa saiyang banwaan bago kan enot na siglo C.E., asin paano sinda nakinabang digdi?

⁵ Ikinomunikar ni Jehova an saiyang kabotan sa fiel na mga patriarka kan suanoy, arog baga ki Noe,  Abraham, Isaac, Jacob, asin Job. (Genesis 6:​13; Exodo 33:1; Job 38:​1-3) Kan huri, paagi ki Moises nagtao sia nin kompletong kodigo nin mga ley para sa nasyon nin Israel. Nakinabang sinda sa Ley ni Moises sa dakol na paagi. Paagi sa pagkuyog dian, an Israel isinuway sa gabos na iba pang nasyon bilang espesyal na banwaan nin Dios. Sinierto nin Dios sa mga Israelita na kun kukuyogon ninda an Ley, bebendisyonan nia sinda bako sanang sa materyal kundi sa espirituwal man, na gigibohon sinda na mani sarong kahadean nin mga saserdote, sarong banal na nasyon. An Ley nagtao pa ngani nin mga reglamento sa pagkakan asin sanidad na nagkontribwir sa marahay na salud. Minsan siring, nagpatanid man si Jehova dapit sa makaturotristeng ibubunga nin pagsuway.​—Exodo 19:​5, 6; Deuteronomio 28:1-68.

⁶ Pag-abot nin panahon, an iba pang ipinasabong na libro idinagdag sa kanon kan Biblia. An mga estorya sa kasaysayan nagsaysay dapit sa mga ginibo ni Jehova sa mga nasyon asin banwaan. An mga libro nin berso magayonon na ilinadawan an saiyang mga kualidad. Isinabi na bago pa kan mga libro nin hula an pagkaotob sa ngapit kan kabotan ni Jehova. Maingat na pinag-adalan asin iinaplikar kan fiel na mga lalaki kan suanoy an ipinasabong na mga isinurat na ini. An saro nagsurat: “An saimong tataramon ilawan sa sakong bitis, asin liwanag sa sakong dalan.” (Salmo 119:105) Sa mga andam na maghinanyog, si Jehova nagtao nin edukasyon asin kaliwanagan.

Nag-orog an Liwanag

7. Minsan ngani naggibo si Jesus nin mga milagro, sa ano sia sa pangenot midbid, asin taano?

⁷ Kan enot na siglo, an Judiong mga grupong relihioso dinagdagan nin mga tradisyon nin tawo an Ley. An Ley iinaplikar sa salang paagi, asin imbes na magin gikanan nin kaliwanagan, iyan nagin magabat huli sa mga tradisyon na idto. (Mateo 23:2-4) Minsan siring, kan 29 C.E., nagtunga si Jesus bilang an Mesiyas. An misyon nia bako sanang itao an saiyang buhay para sa katawohan kundi patin “magpatotoo sa katotoohan.” Minsan ngani naggibo sia nin mga milagro, sa pangenot midbid sia bilang “an Paratokdo.” An saiyang katokdoan garo liwanag na tuminaros sa espirituwal na kadikloman na nakatahob sa isip nin mga tawo. Si Jesus tamang nagsabi: “Ako iyo an ilaw kan kinaban.”​—Juan 8:12; 11:28; 18:37.

8. Anong ipinasabong na mga libro an isinurat kan enot na siglo C.E., asin paano nakinabang dian an enot na mga Kristiano?

⁸ Kan huri idinagdag an mga Ebanghelyo, apat na isinurat na pagkasaysay kan buhay ni Jesus,  asin an libro nin Gibo, sarong kasaysayan kan paglakop kan Kristianismo pagkagadan ni Jesus. Yaon man an ipinasabong na mga surat kan mga disipulo ni Jesus, siring man an makahulang libro nin Kapahayagan. An mga isinurat na ini, kaiba an Hebreong Kasuratan, iyo an kabilogan kan kanon kan Biblia. Sa tabang kan ipinasabong na libreriyang ini, mahihimo kan mga Kristiano na ‘lubos na masabotan sa isip kaibanan kan gabos na banal kun ano an lakbang asin laba asin langkaw patin rarom’ kan katotoohan. (Efeso 3:14-18) Magkakaigwa sinda “kan isip ni Cristo.” (1 Corinto 2:16) Minsan siring, dai lubos na nasabotan kan enot na mga Kristianong idto an lambang aspekto kan mga katuyohan ni Jehova. Nagsurat si apostol Pablo sa mga kapagtubod: “Sa ngonyan kita nagheheling nin malibog paagi sa salming na metal.” (1 Corinto 13:12) May maheheling sa siring na salming alagad bako an gabos na detalye. An mas lubos na pakasabot sa Tataramon nin Dios sa ngapit pa.

9. Anong pagkamit nin kaliwanagan an nangyari durante kan “huring mga aldaw”?

⁹ Sa ngonyan, nabubuhay kita sa peryodo na inaapod “huring mga aldaw,” sarong peryodo na igwa nin “delikadong mga panahon na masakit pakibagayan.” (2 Timoteo 3:1) Ihinula ni propeta Daniel na durante kan panahon na ini “an tunay na kaaraman magigin abunda.” (Daniel 12:4) Huli kaini, tinatabangan ni Jehova, an Dakulang Parakomunikar, an mga sadiosan an puso na masabotan an kahulogan kan saiyang Tataramon. Kadakoldakol nang tawo ngonyan an nakasasabot na si Cristo Jesus pinatukaw na sa trono sa dai naheheling na kalangitan kan 1914. Aram man ninda na madali na niang taposon an gabos na karatan asin gibohon an daga na sarong lakop sa globong paraiso. An importanteng aspektong ini kan maogmang bareta kan Kahadean ihinuhulit ngonyan sa bilog na daga.​—Mateo 24:14.

10. Sa nag-aging mga siglo, ano an nagin reaksion kan mga tawo sa hatol ni Jehova?

¹⁰ Iyo, sa bilog na kasaysayan ikinomunikar ni Jehova an saiyang kabotan asin katuyohan sa mga tawo digdi sa daga. Isinasaysay kan rekord sa Biblia an dakol na naghinanyog, nag-aplikar kan diosnon na kadonongan, asin binendisyonan huli kaiyan. Sinasabi kaiyan an dapit sa iba pa na sinayumahan an mamomoton na hatol nin Dios, na naglakaw sa kapahapahamak na dalan ni Adan asin Eva. Iinilustrar ni Jesus an situwasyon na ini kan sia magtaram dapit sa duwang simbolikong dalan. An saro pasiring sa kalaglagan. Huling halakbang asin mahiwas, iyan an linalakawan kan dakol na habo kan Tataramon nin Dios. An saro pang dalan pasiring sa buhay na daing katapusan. Minsan ngani piot, iyan an dalan kan pipira na inaako kun ano man nanggad an Biblia, an Tataramon nin Dios, asin namumuhay kaoyon kaiyan.​—Mateo 7:​13, 14.

Pag-apresyar kan Yaon sa Sato

11. An satong kaaraman asin pagtubod sa Biblia ebidensia nin ano?

¹¹ Kabilang daw kamo sa mga pinili an dalan pasiring sa buhay? Kun iyo, daing duda na boot nindong magdanay dian. Paano nindo iyan magigibo? Regular asin may pag-apresyar na horophoropon an mga bendisyon na itinao sa saindong buhay kan pakaaram sa mga katotoohan sa Biblia. An mismong bagay na kamo naghimate sa maogmang bareta ebidensia kan bendisyon nin Dios. Ipinarisa ini ni Jesus kan sia mamibi sa saiyang Ama sa mga tataramon na ini: “Hayag takang inoomaw, Ama, Kagurangnan kan langit asin daga, huli ta itinago mo an mga bagay na ini sa mga madonong asin may inadalan asin ipinahayag mo iyan sa mga aking sadit.” (Mateo 11:25) An mga parasira asin parasingil nin buwis nasabotan an katokdoan ni Jesus, mantang an halangkaw an inadalan na mga namomoon sa relihion dai. Sinabi pa ni Jesus:  “Dai nin nakadodolok sa sako kun dai sia dagkahon kan Ama na nagsugo sa sako.” (Juan 6:44) Kun kamo nakaaram kan Biblia asin kamo nagtutubod patin nagsusunod sa mga katokdoan kaiyan, ebidensia ini na kamo dinagka ni Jehova. Rason iyan na maggayagaya.

12. Sa anong mga paagi nagtatao nin kaliwanagan an Biblia?

¹² An Tataramon nin Dios igwa nin nakapatatalingkas na mga katotoohan asin nagtatao nin kaliwanagan. An mga namumuhay sono sa kaaraman sa Biblia nakatatalingkas sa mga superstisyon, falsong katokdoan, asin pagkaignorante na nangingibabaw sa buhay nin minilyon. Halimbawa, an pakaaram kan katotoohan manongod sa kalag pinatatalingkas kita sa ano man na pagkatakot na puede kitang kolgan kan mga gadan o na an gadan nang mga namomotan niato nagdudusa. (Ezequiel 18:4) An pakaaram kan katotoohan manongod sa maraot na mga anghel tinatabangan kitang malikayan an mga peligro nin espiritismo. An tokdo dapit sa pagkabuhay liwat nakararanga sa mga nagadanan nin namomotan. (Juan 11:25) Ipinaheheling sa sato kan mga hula sa Biblia kun haen na kita sa sulog nin panahon asin nagtatao sa sato nin kompiansa sa mga panuga nin Dios para sa ngapit. Pinasasarig man kaiyan an satong paglaom na mabuhay sagkod lamang.

13. Paano kita nakikinabang sa pisikal huli sa paghimate sa Tataramon nin Dios?

¹³ An diosnon na mga prinsipyo sa Biblia tinotokdoan kita na mamuhay sa paagi na nagbubunga nin pisikal na mga pakinabang. Halimbawa, nanonodan niato na likayan an mga gibo na nagpaparamog kan satong hawak, arog baga kan salang paggamit nin tabako asin iba pang droga. Linilikayan ta an pag-abuso sa alkohol. (2 Corinto 7:1) An paghimate sa moral na mga ley nin Dios nagseserbing proteksion sa mga helang na ikinaoolakit paagi sa pagdodorog. (1 Corinto 6:18) Paagi sa pagkuyog sa hatol nin Dios na likayan an pagkamoot sa kuarta, dai niato rinaraot an satong katoninongan nin isip, arog kan ginigibo nin dakol, huli sa paghanap nin mga kayamanan. (1 Timoteo 6:10) Sa anong paagi kamo nakinabang sa pisikal huli  sa pag-aplikar kan Tataramon nin Dios sa saindong buhay?

14. Ano an impluwensia kan banal na espiritu sa satong buhay?

¹⁴ Kun kita namumuhay sono sa Tataramon nin Dios, inaako ta an banal na espiritu ni Jehova. Kinukultibar ta an arog-Cristong personalidad, na midbid sa pagkaigwa kan kawiliwiling mga kualidad na arog kan pagkaherak asin pakikidamay. (Efeso 4:​24, 32) Pinaluluwas man sa sato kan espiritu nin Dios an mga bunga kaiyan​—pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri. (Galacia 5:​22, 23) An mga kualidad na ini nagpapaoswag nin maogma asin makahulogan na relasyon sa iba, kaiba an mga miembro nin pamilya. Nagkakaigwa kita nin panlaog na kosog na nagtatabang sa sato na atubangon na may kosog nin boot an kasakitan. Naririsa daw nindo kun paano an banal na espiritu nakaimpluwensia sa saindong buhay na magin mas marahay?

15. Mantang iinooyon ta an satong buhay sa kabotan nin Dios, paano kita nakikinabang?

¹⁵ Mantang iinooyon niato an satong buhay sa kabotan nin Dios, pinakokosog ta an satong relasyon ki Jehova. Nagtatalubo an satong kombiksion na kita nasasabotan asin namomotan nia. Nanonodan ta paagi sa eksperyensia na sinusuportaran nia kita sa mga panahon nin kasakitan. (Salmo 18:18) Namamansayan ta na talagang hinihinanyog nia an satong mga pamibi. (Salmo 65:2) Nananarig kita sa saiyang paggiya, na kompiado na kita makikinabang dian. Asin yaon sa sato an makangangalas na paglaom na sa itinalaan na panahon dadarahon nin Dios sa pagkasangkap an mga fiel sa saiya asin itatao sa sainda an saiyang balaog na buhay na daing katapusan. (Roma 6:23) “Rumani kamo sa Dios, asin sia marani sa saindo,” an isinurat ni disipulo Santiago. (Santiago 4:8) Namamatean daw nindo na an saindong relasyon ki Jehova napakokosog mantang kamo minadayupot sa saiya?

Sarong Kayamanan na Daing Kaagid

16. Anong mga pagbakle an ginibo nin nagkapirang Kristiano kan enot na siglo?

¹⁶ Pinagirumdom ni Pablo an linahidan nin espiritung mga Kristiano kan enot na siglo na an nagkapira sa sainda kaidto mga parapakisaro, parasambay, homoseksuwal, parahabon, mahanab, paraburat, paramuda, asin parakikil. (1 Corinto 6:9-11) An katotoohan sa Biblia an nagpangyari sa sainda na gumibo nin dakulang mga pagbakle; sinda “nahugasan na.” Probaring imahinaron kun ano nang klase an buhay nindo kun mayo an nakapatatalingkas na mga katotoohan na nanodan nindo sa Biblia. Sierto nanggad na an katotoohan sarong kayamanan na dai nanggad nin kaagid. Kanigoan kita kaogma na si Jehova nagkokomunikar sa sato!

17. Paano an Mga Saksi ni Jehova pinakakakan sa espirituwal sa Kristianong mga pagtiripon?

¹⁷ Dugang pa, isip-isipa an bendisyon na yaon sa sato sa satong kasararoan nin magturugang na kompuesto nin manlaenlaen na rasa! “An fiel asin may diskresion na oripon” nagtatao nin espirituwal na pagkakan sa igong panahon, kabale an mga Biblia, magasin, asin iba pang publikasyon sa kadakoldakol na tataramon. (Mateo 24:45-47) Sa mga pagtiripon kan kongregasyon durante kan taon 2000, rinepaso kan Mga Saksi ni Jehova sa dakol na kadagaan an tampok na mga kabtang gikan sa walong mayor na libro kan Hebreong Kasuratan. Hinorophorop ninda an buhay nin 40 personahe sa Biblia na tinokar sa Insight on the Scriptures. Inestudyaran ninda an mga un-kuarto kan librong The Greatest Man Who Ever Lived asin an haros bilog na libro na Pay Attention to Daniel’s Prophecy! Treinta y sais na sekondaryong artikulo an tinokar hale sa magasin na Torrengbantayan apuera sa 52 na artikulong pinag-adalan. Dugang pa, an banwaan ni Jehova pinakakan paagi sa 12 luwas kan An Satong Ministeryo sa Kahadean asin semanal na pampublikong pahayag dapit sa laen-laen na tema sa Biblia. Kanigoan kaabundang suplay nin espirituwal na kaaraman an itinao!

18. Sa anong mga paagi kita tinatabangan sa laog kan Kristianong kongregasyon?

 ¹⁸ Sa bilog na kinaban, labing 91,000 na kongregasyon an nagtatao nin pagsuportar asin pamparigon sa boot paagi sa mga pagtiripon asin asosasyon. Tinatawan man kita nin pagsuportar kan maygurang na mga kapwa Kristiano na andam na tumabang sa sato sa espirituwal. (Efeso 4:11-13) Iyo, nakinabang kitang marhay paagi sa pag-ako nin kaaraman sa katotoohan. Sarong kagayagayahan an mamidbid asin paglingkodan si Jehova. Kanigoan katotoo kan mga tataramon kan salmista na nagsurat: “Maogma an banwaan na an Dios iyo si Jehova!”—Salmo 144:15.

Nagigirumdoman daw Nindo?

• Kiisay si Jehova nagkomunikar kaidtong mga panahon bago kan mga Kristiano?

• Paano nag-orog an espirituwal na liwanag kan enot na siglo? sa presenteng mga panahon?

• Anong mga bendisyon an ibinubunga kan pamumuhay sono sa kaaraman dapit ki Jehova?

• Taano ta naggagayagaya kita sa satong kaaraman dapit sa Dios?

[Mga Hapot Para sa Pag-adal]

[Mga Ritrato sa pahina 8, 9]

Ikinomunikar ni Jehova an saiyang kabotan ki Moises, Noe, asin Abraham

[Ritrato sa pahina 9]

Sa satong kaaldawan, si Jehova nagtao nin liwanag sa saiyang Tataramon

[Mga Ritrato sa pahina 10]

Isip-isipa an bendisyon na yaon sa sato sa satong kasararoan nin magturugang na kompuesto nin dakol na rasa!