Makikabtang sa Kagayagayahan nin Pagtatao!
Makikabtang sa Kagayagayahan nin Pagtatao!
“Igwang orog na kaogmahan sa pagtao kisa pag-ako.”—GIBO 20:35.
1. Paano ipinaheheling ni Jehova an kagayagayahan nin pagtatao?
AN KAGAYAGAYAHAN na maaraman an katotoohan asin an ibinubungang mga bendisyon mahalagang marhay na mga balaog gikan sa Dios. An mga nakamimidbid ki Jehova igwa nin dakol na dahelan na maggayagaya. Alagad minsan ngani igwa nin kagayagayahan sa pag-ako nin regalo, igwa man nin kagayagayahan sa pagtao kaiyan. Si Jehova an Paratao nin “lambang marahay na balaog asin lambang sangkap na regalo,” asin sia an “maogmang Dios.” (Santiago 1:17; 1 Timoteo 1:11) Sia nagtatao nin ikararahay na katokdoan sa gabos na naghihinanyog, asin sia naoogmang marhay sa pagkuyog kan mga tinotokdoan nia, kun paanong an mga magurang naggagayagaya kun an saindang mga aki naghihimate sa mamomoton na instruksion.—Talinhaga 27:11.
2. (a) Ano an sinabi ni Jesus manongod sa pagtatao? (b) Anong kaogmahan an inaako ta kun itinotokdo ta sa iba an katotoohan sa Biblia?
2 Kaagid kaiyan, kan uya digdi sa daga naogma si Jesus na maheling an mga tawo na positibong naghihimate sa saiyang pagtotokdo. Kinotar ni apostol Pablo si Jesus na nagsasabi: “Igwang orog na kaogmahan sa pagtao kisa pag-ako.” (Gibo 20:35) An kaogmahan na inaako niato kun itinotokdo ta sa iba an katotoohan sa Biblia bako sanang an satispaksion na may mapaoyon kita sa satong relihiosong mga tinutubod. Orog pa dian, iyan an kagayagayahan na maaraman na kita nagtatao nin sarong bagay na totoo asin nagdadanay an halaga. Paagi sa pagtatao sa espirituwal, matatabangan ta an mga tawo na pakinabangon an saindang sadiri ngonyan asin sa bilog na panahon na daing sagkod.—1 Timoteo 4:8.
An Pagtatao Nagbubunga nin Kagayagayahan
3. (a) Paano ipinahayag ni apostol Pablo asin Juan an saindang kagayagayahan sa pagtabang sa iba sa espirituwal? (b) Taano ta sarong kapahayagan nin pagkamoot an pagtao kan katotoohan sa Biblia sa satong mga aki?
3 Iyo, kun paanong naggagayagaya si Jehova asin si Jesus sa pagtao nin espirituwal na mga balaog, an mga Kristiano iyo man. Naggayagaya si apostol Pablo na maaraman na nakatabang sia sa iba na manodan an katotoohan sa Tataramon nin Dios. Sa kongregasyon sa Tesalonica, sia nagsurat: “Ano an samong paglaom o kagayagayahan o korona nin kaogmahan—tara, bako daw na kamo?—sa atubangan kan satong Kagurangnan na Jesus sa saiyang presensia? Tunay na kamo an samong kamurawayan asin kagayagayahan.” (1 Tesalonica 2:19, 20) Si apostol Juan, na pinanonongdan an saiyang mga aki sa espirituwal, nagsurat man: “Dai na ako nin orog pa kadakulang dahelan sa pagpasalamat kisa mga bagay na ini, na madangog ko na an sakong mga aki padagos na naglalakaw sa katotoohan.” (3 Juan 4) Isip-isipa man an kagayagayahan sa pagtabang sa satong sadiring mga aki na magin satong mga aki sa espirituwal! An pagpadakula sa mga aki sa “disiplina asin pagtatanos nin isip ni Jehova” sarong kapahayagan nin pagkamoot kan mga magurang. (Efeso 6:4) Paagi kaiyan ipinaheheling nin mga magurang na sinda interesado sa daing sagkod na ikararahay kan saindang mga aki. Kun naghihimate an mga ini, an mga magurang nakamamate nin dakulang kagayagayahan asin satispaksion.
4. Anong eksperyensia an nagpapaheling kan kagayagayahan nin pagtatao sa espirituwal?
4 Si Dell sarong bilog na panahon na ministrong payunir asin may limang aki. Sabi nia: “Nasasabotan kong marhay an mga tataramon ni apostol Juan huli ta dakula an pasalamat ko na an apat kan sakong mga aki ‘naglalakaw sa katotoohan.’ Aram kong nagtatao nin onra asin kamurawayan ki Jehova kun an mga pamilya sararo sa tunay na pagsamba, kaya nakamamate ako nin hararom na satispaksion na maheling an saiyang pagbendisyon sa sakong mga paghihingoa na itadom an katotoohan sa sakong mga aki. An magayon na esperansang buhay na daing katapusan sa Paraiso kaiba an sakong pamilya nagtatao sa sako nin paglaom asin nagmomotibar sa sako na magtagal sa ibong nin mga problema asin balakid.” Makamomondo, an saro sa mga aking babae ni Dell natiwalag sa kongregasyon huli sa bakong sa Kristianong gawe. Pero, nagmamaigot si Dell na papagdanayon an positibong aktitud. “Naglalaom ako na maabot an aldaw an aki kong babae mapakumbaba asin sinserong mabalik ki Jehova,” an sabi nia. “Alagad nagpapasalamat ako sa Dios na an kadaklan sa mga aki ko padagos na naglilingkod sa saiya nin fiel. An kagayagayahan na namamatean ko sarong tunay na gikanan nin kosog para sa sako.”—Nehemias 8:10.
Pagkaigwa nin Daing Katapusan na mga Katood
5. Kun itinatao ta an satong panahon asin kosog sa gibohon na paggibo nin mga disipulo, nagtatao sa sato nin satispaksion an pakaaram sa ano?
5 Sinabihan ni Jesus an saiyang mga parasunod na gumibo nin Kristianong mga disipulo asin tokdoan sinda manongod ki Jehova asin sa saiyang mga kahagadan. (Mateo 28:19, 20) Si Jehova asin si Jesus pareho daing kaimotan na tinabangan an mga tawo na manodan an dalan kan katotoohan. Kaya kun itinatao ta an satong panahon asin kosog sa paggibo nin mga disipulo, igwa kita kan satispaksion na maaraman na inaarog ta an halimbawa ni Jehova asin ni Jesus, arog kan ginibo kan enot na mga Kristiano. (1 Corinto 11:1) Sa siring na paagi kun kita nakikikooperar sa Makakamhan sa gabos na Dios asin sa saiyang namomotan na Aki, an satong buhay nagkakaigwa nin tunay na kahulogan. Kanigoan na bendisyon an mapabilang sa “mga kapwa trabahador” nin Dios! (1 Corinto 3:9) Asin bako daw na nakaoogmang marhay na pati an mga anghel igwa nin kabtang sa aktibidad na ini na paghuhulit kan maogmang bareta?—Kapahayagan 14:6, 7.
6. Kun kita nakikikabtang sa pagtatao sa espirituwal, siisay an nagigin mga katood niato?
6 Sa katunayan, paagi sa pakikikabtang sa gibohon na ini na pagtatao sa espirituwal, kita puedeng magin labi pa sa mga kapwa trabahador sa kaibanan nin Dios—kita puedeng magin daing katapusan na mga katood nia. Huli sa saiyang pagtubod, si Abraham inapod na katood ni Jehova. (Santiago 2:23) Kun pinagmamaigotan tang gibohon an kabotan nin Dios, kita puede man na magin katood nin Dios. Kun gigibohon ta iyan, kita nagigin man katood ni Jesus. Sinabi nia sa saiyang mga disipulo: “Inapod ko kamong mga katood, huli ta an gabos na bagay na nadangog ko sa sakong Ama ipinaaram ko sa saindo.” (Juan 15:15) Dakol an naggagayagaya na ibilang na mga katood nin maimpluwensiang mga tawo o haralangkaw na opisyal, alagad puede kitang ibilang na katood kan duwang pinakadakulang personahe sa bilog na uniberso!
7. (a) Paano an sarong babae nagkaigwa nin tunay na katood? (b) Naeksperyensiahan na man daw nindo iyan?
7 Dugang pa, kun tinatabangan ta an mga tawo na mamidbid an Dios, sinda nagigin man mga katood niato, na nagtatao sa sato nin espesyal na kaogmahan. Si Joan, na taga Estados Unidos, nagpoon na adalan sa Biblia an sarong babae na an ngaran Thelma. Minsan ngani napaatubang si Thelma sa pagkontra kan pamilya sa saiyang pag-adal, sia nagpadagos asin nabautismohan pakalihis nin sangtaon. Si Joan nagsurat: “An samong asosasyon dai natapos dian; imbes, iyan nagin pagkakatood na luminawig nin mga 35 taon na ngonyan. Parate kaming magkaibanan sa ministeryo asin sa mga kombension. Pag-abot nin panahon, buminalyo ako nin harong na 800 kilometros an rayo. Alagad padagos akong pinadadarahan ni Thelma kan pinakamamomoton asin pinakanakaoogmang mga surat, na sinasabi sa sako na naoogma siang magirumdoman ako asin pinasasalamatan ako na magin saiyang katood asin halimbawa saka sa pagtokdo sa saiya kan katotoohan sa Biblia. An pagkaigwa nin siring na dayupot asin mahal na katood sarong marahayon na balos para sa sakong paghihingoa na tabangan sia na makanood manongod ki Jehova.”
8. Anong positibong aktitud an matabang sa sato sa ministeryo?
8 An oportunidad na makanompong nin saro na gustong makanood kan katotoohan puedeng makatabang sa sato na magtagal dawa kun an kadaklan kan mga tawong nanonompongan niato kakadikit an o mayo nin interes sa Tataramon ni Jehova. An siring na pagkaindiperente puedeng magin angat sa satong pagtubod asin pakatagal. Pero, makatatabang sa sato an positibong aktitud. Si Fausto, na taga Guatemala, nagsabi: “Kun ako nagpapatotoo sa iba, iniisip ko na magigin kanigoan karahay kun an tawong kaolay ko magin sarong espirituwal na tugang na lalaki o babae. Iniisip-isip ko na kisuerra sarong tawo na manonompongan ko an tibaad maogmang umako kan katotoohan sa Tataramon nin Dios pag-abot nin panahon. An kaisipan na iyan an nagtatabang sa sako na magpadagos asin nagtatao sa sako nin tunay na kagayagayahan.”
Pagtipon nin mga Kayamanan sa Langit
9. Ano an sinabi ni Jesus manongod sa mga kayamanan sa langit, asin ano an manonodan ta digdi?
9 An paggibo nin mga disipulo, baga man mga aki niato o ibang indibiduwal, bakong pirmeng pasil. Puedeng mangaipo iyan nin panahon, pasensia, asin pagmamaigot. Pero girumdomon na dakol an gustong maghigos tanganing magtipon nin dakol na materyal na bagay, mga bagay na sa parate dai nagtatao sa sainda nin kagayagayahan asin na dai nagdadanay sagkod lamang. Sinabihan ni Jesus an mga nagdadangog sa saiya kaidto na mas marahay pang maghingoa para sa espirituwal na mga bagay. Sia nagsabi: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Imbes, magtipon kamo nin mga kayamanan sa langit, na duman an polilya o takla dai nakararaot, asin an mga parahabon dai nananalakat asin dai naghahabon.” (Mateo 6:19, 20) Paagi sa pag-aaabot sa espirituwal na mga pasohan—na kabale an pakikikabtang sa mahalagang gibohon na paggibo nin mga disipulo—magkakaigwa kita kan satispaksion na maaraman na ginigibo ta an kabotan nin Dios asin na babalosan nia kita. Si apostol Pablo nagsurat: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.”—Hebreo 6:10.
10. (a) Taano si Jesus ta igwa nin espirituwal na mga kayamanan? (b) Paano itinao ni Jesus an saiyang panahon asin kosog, asin may anong dakulang pakinabang para sa iba?
10 Kun mahigos kita sa paggibo nin mga disipulo, kita nagtitipon para sa sato man sana nin “mga kayamanan sa langit,” kaoyon sa sinabi ni Jesus. Ipinamamate kaini sa sato an kagayagayahan nin pag-ako. Kun kita daing kaimotan na nagtatao, kita man sana mismo an napayayaman. Si Jesus mismo fiel na naglingkod ki Jehova sa laog nin binilyon na taon. Isip-isipa an kayamanan na natipon nia sa langit! Minsan siring, dai hinanap ni Jesus an saiyang sadiring interes. Si apostol Pablo nagsurat: “Itinao [ni Jesus] an saiya man sana para sa satong mga kasalan tanganing ikaligtas nia kita sa presenteng maraot na palakaw nin mga bagay sono sa kabotan kan satong Dios asin Ama.” (Galacia 1:4) Bako sanang itinao ni Jesus nin daing kaimotan an saiyang panahon asin kosog sa ministeryo nia kundi itinao nia an saiya mismong buhay bilang pantubos tanganing an iba magkaigwa kan oportunidad na magtipon nin mga kayamanan sa langit.
11. Taano ta mas marahay an espirituwal na mga regalo kisa materyal na regalo?
11 Paagi sa pagtokdo sa iba manongod sa Dios, tinatabangan ta sinda na masabotan kun paano man sinda makatitipon nin dai nararaot na espirituwal na mga kayamanan. Ano pang orog na regalo an ikatatao nindo? Kun an sarong katood tatawan nindo nin mamahalon na relo, kotse, o harong pa ngani, an katood na iyan posibleng marhay na mapasalamat asin maoogma, asin mamamatean nindo an kagayagayahan nin pagtatao. Alagad ano an magigin kamugtakan kan regalong iyan pakalihis nin 20 taon? 200 na taon? 2,000 na taon? Sa ibong na kampi, kun itatao nindo an saindong panahon asin kosog tanganing tabangan an saro na maglingkod ki Jehova, puede niang pakinabangan an regalong iyan sagkod lamang.
Paghanap sa mga Gusto kan Katotoohan
12. Paano itinao nin dakol an saindang panahon asin kosog tanganing tabangan an iba sa espirituwal?
12 Tanganing makikabtang sa kagayagayahan nin pagtatao sa espirituwal, an banwaan ni Jehova nagduduman sa kaporoporohi kan daga. Rinibo an nagbaya nin harong asin pamilya tanganing maglingkod bilang misyonero sa kadagaan kun saen kinaipuhan nindang mag-adaptar sa bagong mga lenguahe asin kultura. An iba nagbalyo sa mga lugar sa saindang sadiring nasyon kun saen mas nangangaipo nin mga parabalangibog kan Kahadean? An iba pa nag-adal nin ibang lenguahe, na nagbubukas nin bagong mga oportunidad na maghulit sa mga dayo sa saindang sadiring lugar. Halimbawa, pakatapos na padakulaon an duwang aki na ngonyan naglilingkod na sa pankinaban na opisina prinsipal kan Mga Saksi ni Jehova, an sarong mag-agom sa New Jersey, E.U.A., nagpoon na magpayunir asin nag-adal nin Intsik. Sa nag-aging tolong taon, sinda namayo nin mga pag-adal sa Biblia sa 74 katawo na Intsik an tataramon na nag-eeskuela sa sarong kaharaning kolehio. Mapahihiwas daw nindo an saindong ministeryo minsan paano tanganing maeksperyensiahan an orog na kagayagayahan sa paggibo nin mga disipulo?
13. Ano an puedeng gibohon nindo kun mawot nindong magin mas mabunga an saindong ministeryo?
13 Mawot gayod nindong marhay na mamayo nin pag-adal sa Biblia alagad dai nindo nagigibo iyan. Sa nagkapirang kadagaan masakit makanompong nin mga interesado. Tibaad an mga tawong nanonompongan nindo mayo nin interes sa Biblia. Kun siring kaiyan, tibaad puede nindong sambiton nin mas parate sa pamibi an saindong kamawotan, sa pakaaram na si Jehova asin si Jesu-Cristo pareho interesadong gayo sa gibohon na iyan asin puede kamong itokdo pasiring sa sarong tawong arog-karnero. Humagad nin suhestion sa mga kakongregasyon nindo na mas may kabatidan o mas mabunga an ministeryo. Aprobetsaran an pagsasanay asin mga suhestion na itinatao sa Kristianong mga pagtiripon. Makinabang sa konseho nin nagbibiaheng mga paraataman asin kan saindang agom. Orog sa gabos, dai noarin man sumuko. An madonong na tawo nagsurat: “Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana.” (Eclesiastes 11:6) Mientras tanto, girumdomon an fiel na mga lalaki na arog ki Noe asin Jeremias. Minsan ngani kakadikit an naghimate nin positibo sa saindang paghuhulit, nagin mapanggana an saindang ministeryo. Orog sa gabos, nakapaogma iyan ki Jehova.
Paggibo kan Pinakamakakaya Nindo
14. Ano an pagheling ni Jehova sa mga guminurang na sa paglilingkod sa saiya?
14 Tibaad dai itinotogot kan saindong mga kamugtakan na magibo an dakol na boot nindong gibohon sa ministeryo. Halimbawa, puedeng limitaran kan paggurang an saindong magigibo sa paglilingkod ki Jehova. Pero, girumdoma an isinurat kan madonong na tawo: “An pagkaigwa nin uban korona nin kagayonan kun iyan nakukua sa dalan nin katanosan.” (Talinhaga 16:31) Para ki Jehova, an buhay na ginagamit sa paglilingkod sa saiya magayon. Dugang pa, an Kasuratan nagsasabi: “Dawa sagkod sa kagurangan nin saro ako [si Jehova] an Saro na iyo man sana; asin sagkod sa pagkaubanon nin saro ako mismo padagos na magpapasan. Ako mismo mahiro nanggad, tangani na ako mismo an magpasan asin tangani na ako mismo an magpasan saka magtao nin dudulagan.” (Isaias 46:4) An satong mamomoton na langitnon na Ama nanunuga na susteniran asin suportaran an mga maimbod sa saiya.
15. Naniniwala daw kamo na nasasabotan ni Jehova an saindong mga kamugtakan? Taano?
15 Tibaad may tinitios kamong helang, pagtumang nin agom na daing pagtubod, magabat na mga paninimbagan sa pamilya, o iba pang masakit na problema. Rinerekonoser ni Jehova an mga limitasyon asin kamugtakan niato, asin namomotan nia kita huli sa satong odok na mga paghihingoa na paglingkodan sia. Totoo iyan maski ngani an satong ginigibo tibaad mas dikit kisa nagigibo kan iba. (Galacia 6:4) Aram ni Jehova na kita bakong sangkap, asin realistiko sia sa saiyang linalaoman sa sato. (Salmo 147:11) Kun ginigibo ta an satong pinakamakakaya, puede kitang makaseguro na kita mahalagang marhay sa pagheling nin Dios asin na dai nia lilingawan an satong fiel na mga gibo.—Lucas 21:1-4.
16. Sa anong paagi nakikikabtang an bilog na kongregasyon sa paggibo nin disipulo?
16 Girumdomon man na an gibohon na paggibo nin mga disipulo pagtarabangan nin grupo. Bakong sarong indibiduwal an naggigibo nin disipulo, kun paanong bakong sarong toro nin oran an nagtatao nin sustansia sa sarong tinanom. Totoo, an sarong Saksi tibaad makanompong nin sarong interesado asin mamayo nin pag-adal sa Biblia. Alagad oras na an bagohan na iyan umatender sa Kingdom Hall, an bilog na kongregasyon an nagtatabang sa saiya na mamidbid an katotoohan. An mainit na pakikiiba kan kasararoan nin magturugang nagpapaheling kan impluwensia kan espiritu nin Dios. (1 Corinto 14:24, 25) An mga aki asin tinedyer nagtatao nin nakapahihirong mga komento, na nagpapaheling sa bagohan na an satong kaakian napapalaen sa mga hoben sa kinaban. An mga may helang, mga maluya an hawak, asin mga may edad na sa kongregasyon an nagtotokdo sa mga bagohan kun ano an kalabot sa pakatagal. Ano man an satong edad o mga limitasyon, kita gabos igwa nin mahalagang kabtang sa pagtabang sa mga bagohan mantang nagrararom an saindang pagkamoot sa katotoohan sa Biblia asin sinda nag-ooswag pasiring sa bautismo. An lambang oras na ginagamit ta sa ministeryo, an lambang pagdalaw liwat, an lambang pakikipag-olay sa sarong interesado sa Kingdom Hall, tibaad garo baga bakong mahalaga, alagad kabtang iyan nin makakamhan na gibo na hinahaman ni Jehova.
17, 18. (a) Apuera sa pakikikabtang sa paggibo nin mga disipulo, paano kita puedeng makikabtang sa kagayagayahan nin pagtatao? (b) Paagi sa pakikikabtang sa kagayagayahan nin pagtatao, siisay an inaarog ta?
17 Siempre, apuera sa pakikikabtang sa mahalagang gibohon na paggibo nin mga disipulo, kita bilang mga Kristiano nakikikabtang man sa kagayagayahan nin pagtatao sa iba pang mga paagi. Puede kitang magtagama nin pondo tanganing makakontribwir sa pagsuportar sa dalisay na pagsamba asin pagtabang sa mga nangangaipo. (Lucas 16:9; 1 Corinto 16:1, 2) Puede kitang humanap nin mga oportunidad na ipaheling an pagkamapagpasakat sa iba. (Roma 12:13) Puede kitang magmaigot na ‘gumibo kan marahay sa gabos, alagad orog na sa mga may relasyon sa sato sa pagtubod.’ (Galacia 6:10) Asin sa simple pero mahalagang mga paagi, puede kitang magtao sa iba—sarong surat, apod sa telepono, regalo, praktikal na tabang, pagparigon sa boot.
18 Paagi sa pagtatao, ipinaheheling ta na inaarog ta an satong langitnon na Ama. Ipinaheheling ta man an sa magturugang na pagkamoot niato, an nagpapamidbid na tanda nin tunay na mga Kristiano. (Juan 13:35) An paggirumdom sa mga bagay na ini makatatabang sa sato na makikabtang sa kagayagayahan nin pagtatao.
Ikapaliliwanag daw Nindo?
• Paano itinao ni Jehova asin ni Jesus an halimbawa sa pagtatao sa espirituwal?
• Paano kita magkakaigwa nin daing katapusan na mga katood?
• Anong mga paagi an puede tang gibohon tanganing magin mas mapanggana an satong ministeryo?
• Paano puedeng makikabtang an gabos sa kongregasyon sa kagayagayahan nin pagtatao?
[Mga Hapot Para sa Pag-adal]
[Mga Ritrato sa pahina 13]
Kun sinusunod nin mga aki an pagsasanay, an mga magurang nakamamate nin dakulang kagayagayahan asin satispaksion
[Ritrato sa pahina 15]
Sa paggibo nin mga disipulo, magkakaigwa kita nin tunay na mga katood
[Ritrato sa pahina 16]
Pinapasan kita ni Jehova sa paggurang
[Mga Ritrato sa pahina 17]
Sa simple pero mahalagang mga paagi, nakaeeksperyensia kita nin kagayagayahan sa pagtatao