Mga Kahoy na Nagdadanay sa Halawig na Panahon

AN sarong kantil tibaad garo baga bakong an pinakamarahay na lugar na togdokan kan saindong harong, nangorogna kun iyan nasa itaas nin kabukidan. minsan siring, apisar kan garo baga mga disbentaha, may nagkapirang kahoy na alpine na higot na marhay an pagkakapot sa siring na mga kantil nin darakulang gapo, na dai minamate an siring sa yelong lipot kun tiglipot asin tinatagalan an mga kakulangan nin oran kun tig-init.

SA PARATE, an pusog na mga kahoy na ini bakong siring kanakagugulat kan mga kapareho ninda an klase na nasa kapatagan. An saindang poon tibaad sarasaralabid asin biriribid asin napurog na marhay an saindang pagtalubo. An nagkapira garo pa ngani natural na bonsai​—pinorma asin tinapas kan masakit na klima asin kan kadikit na daga na tinutuboan ninda.

Mantang sinda nagdadanay sa saro sa pinakamasakit na mga kamugtakan sa daga, tibaad honaon nindo na an siring na mga kahoy halipot an buhay. Alagad kabaliktaran kaiyan an totoo. Hinihingako nin nagkapira na an Matusalem, sarong bristlecone pine na nabubuhay sa lugar na an langkaw 3,000 metros sa White Mountains sa California, 4,700 na taon an edad. Sinasabi kan The Guinness Book of Records 1997 na an ispesimen na ini an pinakagurang na kahoy na nabubuhay sa planeta. Si Edmund Schulman, na nagsiyasat sa suanoy na mga kahoy na ini, nagpaliwanag: “An bristlecone pine . . . garo baga nagdadanay na buhay huli sa kasakitan. An gabos na mas gurang nang indibiduwal na [mga poon nin pine] sa White Mountains manonompongan na nasa langkaw na haros 3,000 metros sa sarong mara, magapong kadlagan.” Nadiskobre man ni Schulman na an pinakagurang na mga ispesimen kan iba pang pine nabubuhay man sa masakit na mga kamugtakan.

Dawa ngani dapat nindang pangganahan an kasakitan, an mga halimbawang ini nin pakatagal lubos na nakikinabang sa duwang bentaha ninda. An saindang napapasuhay na kamugtakan, na dikit an pananom, nagpoprotehir sa sainda tumang sa pagkasolo nin kadlagan, saro sa pinakadakulang mga peligro sa gurang nang mga kahoy. Saka an saindang mga gamot pinasisikad sinda nin marigon na marhay sa kantil nin dakulang gapo na linog sana an puedeng makapahiro sa sainda.

Sa Biblia an fiel na mga lingkod nin Dios iinaagid sa mga kahoy. (Salmo 1:​1-3; Jeremias 17:7, 8)  Sinda man puedeng mapaatubang sa kasakitan huli sa saindang kamugtakan. An paglamag, maluyang salud, o nakapanluluyang kadukhaan puedeng baloon nin grabe an saindang pagtubod, nangorogna kun an kasakitan nagpapadagos sa dakol na taon. Minsan siring, an saindang Kaglalang, na nagdisenyo sa mga kahoy na nakatatagal nanggad sa mga kasakitan, inaasegurar an mga nagsasamba sa saiya na susuportaran nia sinda. An Biblia nanunuga sa mga naninindogan: “Paririgonon nia kamo, pakokosogon nia kamo.”​—1 Pedro 5:​9, 10.

‘An paninindogan, pagdanay na marigon, o paghihingoa nin saro’ iyo an ideya sa likod kan berbo sa Griego na sa parate tinatradusir na “tagalan” sa Biblia. Siring kan mga kahoy na alpine, an marahay na pagkagamot iyo an liabe sa pakatagal. Kun manongod sa mga Kristiano, kaipuhan nindang makagamot nin marigon ki Jesu-Cristo tanganing makapanindogan nin marigon. “Mantang inako nindo si Cristo Jesus na Kagurangnan,” an isinurat ni Pablo, “padagos kamong maglakaw na kasaro nia, na nakagamot asin itinitindog dian sa saiya patin pinaririgon sa pagtubod, siring sa pagkatokdo sa saindo, na nagsosopay sa pagtubod na may pagpasalamat.”​—Colosas 2:​6, 7.

Nasabotan ni Pablo na kaipuhan an makosog na espirituwal na mga gamot. Sia mismo nakipagtusayan sa “sarong tonok sa laman,” asin tinagalan nia an grabeng paglamag sa bilog na ministeryo nia. (2 Corinto 11:23-27; 12:7) Alagad nadiskobre nia na sa kosog nin Dios puede siang magpadagos. “Igwa ako kan kosog para sa gabos na bagay huli sa saiya na nagtatao nin puersa sa sako,” an ipinahayag nia.​—Filipos 4:13.

Siring kan ipinaheheling kan halimbawa ni Pablo, an mapangganang Kristianong pakatagal dai nakadepende sa paborableng mga kamugtakan. Arog kan mga kahoy na alpine na mapangganang sinasagupa an mga bagyo sa dakol na siglo, kita man makapaninindogan kun kita nakagamot ki Cristo asin minadepende sa puersa na itinatao nin Dios. Apuera kaini, kun kita makatagal sagkod sa katapusan, igwa kita kan oportunidad na makaeksperyensia mismo kan pagkaotob nin saro pang panuga nin Dios: “Magigin siring sa mga aldaw nin kahoy an mga aldaw kan sakuyang banwaan.”​—Isaias 65:22; Mateo 24:13.