Sia ‘Nagtagal Sagkod sa Katapusan’
Sia ‘Nagtagal Sagkod sa Katapusan’
SA SARONG pasale sa video kan 1993 na ipinadalan sa bagong mga miembro kan mga tawohan sa opisina prinsipal kan Mga Saksi ni Jehova, ipinahayag ni Lyman Alexander Swingle an saiyang saboot manongod sa paglilingkod ki Jehova: “Magadan na sulot pa an saindong mga sapatos!” *
Ginibo nanggad kan 90 anyos na si Tugang na Swingle an inenkaminar niang gibohon nin iba. Sia ‘nagtagal sagkod sa katapusan.’ (Mateo 24:13) Minsan ngani may minamate sa pisikal, kan Mierkoles, Marso 7, sia nag-atender sa sarong miting kan Namamahalang Grupo kan Mga Saksi ni Jehova na miembro sia kaiyan. Kan suminunod na Martes naggrabe an saiyang kamugtakan, asin kan alas 4:26 n.a., Marso 14, idineklarar kan doktor nia na sia gadan na.
Si Lyman Swingle nagpoon na maglingkod sa pankinaban na opisina prinsipal kan Mga Saksi ni Jehova sa Brooklyn, Nueva York, kan Abril 5, 1930. Sia naglingkod duman nin haros 71 taon. Si Lyman enot na iinasignar sa gibohan nin libro, dangan sa kuartong imprentahan, asin nagtabang man sia sa paggibo nin tinta. Sa katunayan, si Tugang na Swingle naggamit nin mga 25 taon sa kuartong gibohan nin tinta. Naglingkod man sia nin mga 20 taon bilang miembro kan mga tawohan sa pagsurat sa opisina prinsipal. Sa ultimong 17 taon kan saiyang buhay, sia nagtrabaho sa Treasurer’s Office.
Si Lyman pusoan na parabalangibog kan Kahadean nin Dios. Sa saiyang enot na mga taon sa Brooklyn, sia asin an saiyang kakuarto, si Arthur Worsley, parateng naglalayag kaidto sa saro kan mga baroto kan mga Saksi sa Salog nin Hudson. Naggagamit nin laudispiker, ginamit ninda an dakol na katapusan kan semana na nagbobrodkast kan mensahe kan Kahadean sa mga komunidad na harani sa pangpang.
Si Tugang na Swingle namundag kan Nobyembre 6, 1910, sa Lincoln, Nebraska, alagad dai nahaloy pagkatapos an pamilya nagbalyo sa Salt Lake City, Utah. Duman, kan 1913, an saiyang mga magurang nagin mga Estudyante sa Biblia, an apod kaidto sa Mga Saksi ni Jehova. Sa nag-aging mga taon, an pamilyang Swingle nagpadagos sa dakol na nagdadalaw na nagpapahayag hale sa opisina prinsipal kan mga Saksi sa Brooklyn, asin an mga lalaking ini nagkaigwa nin positibong impluwensia ki Lyman. Kan 1923, sa edad na 12 anyos, sia nabautismohan bilang simbolo kan saiyang pagdusay sa Dios.
Pakapaglingkod nin labing 26 na taon sa Brooklyn bilang daing agom, nadugangan an kualidad kan buhay ni Lyman sa dai masokol na paagi kan maagom nia si Crystal Zircher kan Hunyo 8, 1956. Sinda dai puedeng pagsuwayon, na magkaibanan na nakikikabtang sa ministeryo sagkod kan magadan si Crystal kan 1998. Mga tolong taon bago kaidto, si Crystal inatake na nagresulta sa grabeng pagkabaldado nia. An aroaldaw na pagigin kalabot ni Lyman sa pag-ataman sa saiya sarong halimbawa nin debosyon na nakainspirar sa gabos, nangorogna sa mga nakaheling ki Lyman na mamomoton na nagbubusol kan silyang de rueda sa mga bangketa sa pagtaraed mantang iinaalok ni Crystal an The Watchtower asin Awake! sa nag-aaragi.
Si tugang na Swingle sarong prangka, madinamayon na tawo kaya napamahal sia sa mga nakamidbid sa saiya. Kapareho kan saiyang ama asin ina, igwa sia kan paglaom na basado sa Biblia na mabuhay kaiba ni Jesu-Cristo sa langitnon na Kahadean, sarong paglaom na kompiado kitang naabot na nia ngonyan.—1 Tesalonica 4:15-18; Kapahayagan 14:13.
[Nota sa Ibaba]
^ par. 2 Ini nangangahulogan na magadan mantang aktibo pa sa gibohon nin saro.
[Ritrato sa pahina 31]
Si Tugang na Swingle naglingkod nin mga 25 taon sa kuartong gibohan nin tinta
[Ritrato sa pahina 31]
Si Lyman asin Crystal dai puedeng pagsuwayon