Tabang Tanganing Masabotan an Biblia

AN Biblia sarong daing kaagid na libro. An mga kagsurat kaiyan naghihingakong pinasabngan nin Dios, asin an laog kaiyan nagtatao nin bastanteng prueba na an paghihingako totoo. (2 Timoteo 3:16) Kabilang sa iba pang bagay, ipinaheheling kan Biblia kun saen kita hale, kun taano ta yaon kita digdi, asin kun saen kita paduman. Daing duwa-duwa na iyan sarong libro na maninigo sa satong pag-estudyar!

Tibaad naprobaran na nindong basahon an Biblia alagad nanompongan nindo na iyan masakit saboton. Tibaad dai nindo aram kun saen mahanap tanganing makua an mga simbag sa saindong mga hapot. Kun arog kaiyan, dai kamo nagsosolo. An saindong situwasyon arog kan sarong lalaki na nabuhay kan enot na siglo. Sia nagbibiahe sa sarong karuwahe, hale sa Jerusalem pasiring sa saiyang tinuboan na daga, an Etiopia. An opisyal na Etiopeng ini nagbabasa nin makosog sa makahulang libro sa Biblia na Isaias, na isinurat labing siete sientos na taon bago kaini.

Bigla na sana, kinaolay sia kan sarong lalaki na nagdadalagan kaabay kan karuwahe. An lalaki iyo si Felipe, sarong disipulo ni Jesus, asin hinapot nia an Etiope: “Ano nasasabotan mo talaga an binabasa mo?” An Etiope nagsimbag: “An totoo, paano ko magigibo iyan, kun daing gumiya sa sako?” Dangan inagda nia si Felipe na sumakay sa karuwahe. Ipinaliwanag ni Felipe an kahulogan kan teksto na binabasa kan lalaki asin ipinahayag sa saiya an “maogmang bareta manongod ki Jesus.”​​—Gibo 8:​30-​35.

Kun paanong tinabangan ni Felipe an Etiopeng idto tanganing  masabotan an Tataramon nin Dios kaidtong haloy na an nakaagi, tinatabangan kan Mga Saksi ni Jehova an mga tawo na masabotan an Biblia ngonyan. Maoogma sindang tabangan man kamo. Sa parate, pinakamarahay na pag-adalan an Biblia sa sistematikong paagi, na minapoon sa pundamental na mga katokdoan sa Kasuratan. (Hebreo 6:1) Mantang nag-ooswag kamo, makakaya na nindong akoon an inaapod ni apostol Pablo na “matagas na kakanon”​—an boot sabihon, mas hararom na mga katotoohan. (Hebreo 5:14) Minsan ngani an Biblia an saindong pinag-aadalan, an iba pang mga publikasyon​—mga pantabang sa pag-adal kan Biblia​—puedeng makatabang sa saindo na makua asin masabotan an mga teksto sa Biblia dapit sa manlaenlaen na tema.

Sa parate an pag-adal puedeng iareglo sa oras asin lugar na kombenyente para sa saindo. An nagkapira nag-aadal pa ngani paagi sa telepono. An pag-adal dai ginigibo na garo sa eskuelahan; iyan sarong pribadong areglo na ibinagay sa saindong personal na mga sirkunstansia, kaiba na an saindong pinaghalean asin inadalan. Dai nindo kaipuhan na magbayad para sa siring na pag-adal sa Biblia. (Mateo 10:8) Mayo nin eksaminasyon, asin dai kamo makamamateng napapasupog. An saindong mga hapot sisimbagon, asin makakanood kamo kun paano mapararani sa Dios. Pero taano ta maninigo nindong pag-adalan an Biblia? Estudyare an nagkapirang rason kun taano ta an pag-adal sa Biblia puedeng magtao nin kagayagayahan sa saindong buhay.