Kamo daw Talagang Nagtataong Konsiderasyon sa Iba?

KAMO daw napikar nang marhay huli sa bakong marahay na gawe-gawe nin saro? Kamo daw marikas na minahiro kun may nakalalaog na nakararaot na mga impluwensia sa tahaw kan saindong dayupot na mga kaibaiba?

An listo asin marigon na aksion kun beses kaipuhan tanganing paontokon an paglakop nin magabat na kasalan. Halimbawa, kan namemeligrong maramogan an mga Israelita huli sa daing supog na paggibo nin sala kaidtong ika-15 siglo B.C.E., an makoapo ni Aaron na si Fineas naggibo nin desididong aksion tanganing haleon an maraot. Inaprobaran ni Jehova Dios an ginibo nia, na nagsasabi: “Si Fineas . . . pinasibog an sakong grabeng kaanggotan sa mga aki ni Israel paagi sa dai nanggad nia pagtogot nin pakikiribal sa sako sa tahaw ninda.”​—Bilang 25:1-11.

Tama an ginibo ni Fineas na sumpoon an paglakop nin pagkaolakit. Alagad paano man an manongod sa labi-labing gurobgutob sa mga pagkukulang nin iba? Kun kita mahiro nin pabiglabigla o mayo nin makatanosan na dahelan, kita magigin bako nanggad na parasurog nin katanosan kundi sarong tawo na dai nagtataong konsiderasyon sa iba​—saro na dai nagpapasensia sa mga pagkabakong sangkap nin iba. Ano an makatatabang sa sato tanganing malikayan an natatagong peligrong ini?

‘Si Jehova Nagpapatawad kan Gabos Nindong Kasalan’

Si Jehova “Dios na maimon (maigot); Dios na dai nagtotogot nin pakikiribal.” (Exodo 20:​5, nota sa ibaba) Bilang an Kaglalang, sia may deretso na hagadon an satong dai nababangang debosyon. (Kapahayagan 4:11) Pero, si Jehova nagtataong konsiderasyon sa mga kaluyahan nin tawo. Kun siring, may labot sa saiya an salmistang si David nag-awit: “Si Jehova maheherakon asin maugayon, maluway sa pagkaanggot asin abunda sa mamomoton na kabootan. Dai sia maghahanap nin sala sagkod lamang . . . Dai nia ginibo sa sato an sono sa satong mga kasalan; dai man nia itinao sa sato an maninigo sa sato sono sa satong mga pagkakasala.” Iyo, kun kita nagsosolsol, an Dios ‘nagpapatawad kan gabos niatong kasalan.’​—Salmo 103:​3, 8-10.

Huling nasasabotan nia an makasalan na naturalesa nin mga tawo, si Jehova dai ‘nagpaparahanap nin sala’ sa nagsosolsol na mga paragibo nin sala. (Salmo 51:5; Roma 5:12) Sa katunayan, katuyohan nia na haleon an kasalan asin pagkabakong sangkap. Sagkod na iyan maotob nin lubos, imbes na itao sa sato “an maninigo sa sato,” an Dios maboot na nagpapatawad basado sa atang na pantubos ni Jesu-Cristo. Mayo sa sato an hohokoman na angay na maligtas kun si Jehova dai nagpaheling nin pagkaherak kun angay. (Salmo 130:3) Makapagpapasalamat nanggad kita na an satong langitnon na Ama, na tama sanang naghahagad nin dai nababangang debosyon, sarong maheherakon na Dios!

Kaipuhan an Pagkatimbang

Mantang an Soberanong Kagurangnan kan uniberso nagpapaheling nin konsiderasyon sa pagtratar sa mga tawong bakong sangkap, bako daw na maninigo ta man na gibohon iyan? An pagtaong konsiderasyon tinawan nin kahulogan na “an disposisyon na magin mapasensia sa mga opinyon o ginigibo nin iba.” Kita daw personalmenteng may disposisyon na siring kaiyan​—an inklinasyon na magpaheling nin pasensia asin pagpopogol kun an iba may sinasabi o ginigibo na bako man grabeng kasalan alagad tibaad bakong angay na mga tataramon o gibo?

Siempre, kaipuhan niato na likayan an pagigin sobra kamakonsiderasyon. Halimbawa, grabeng danyos an nagigibo kun tinatawan nin konsiderasyon kan mga autoridad sa relihion an abuserong mga padi na daing ontok na nanlulupig nin mga aking lalaki asin babae. “Ibinibilang an nangyari  sa mga aki na mga insidente sana nin kasalan,” an sinabi nin sarong reporter sa Irlandia, “an mga autoridad sa iglesia ibinalyo sana [sa ibang lugar] an nagkakasalang padi.”

An pagbalyo sana daw sa siring na tawo sarong halimbawa nin tamang pagtaong konsiderasyon? Bako nanggad! Halimbawa togotan nin sarong konseho nin mga doktor an sarong iresponsableng siruhano na magpadagos sa pag-opera, na ibinabarobalyo sia sa mga ospital, dawa ngani nagagadan o napaparalisar nia an saiyang mga pasyente. An salang pakamate nin kaimbodan sa mga kapropesyon puedeng magbunga nin siring na “pagtaong konsiderasyon.” Alagad kumusta man an mga biktima na nagadan o biyong nadanyaran huli sa pabaya o kriminal pa ngani na mga gibo?

Igwa man nin peligro sa pagpaheling nin kadikiton na konsiderasyon. Kan si Jesus uya pa digdi sa daga, salang ginamit nin nagkapirang Judio na midbid bilang mga Zealot an halimbawa ni Fineas sa pagprobar na ipangatanosan an saindang sadiring mga aktibidad. An sarong sobra nang marhay na ginigibo kan nagkapirang Zealot iyo an “pakikisalak sa kadaklan sa Jerusalem durante nin mga kapiestahan asin kaagid na mga okasyon asin sinasaksak nin punyal an mga ikinaaanggot ninda na dai nag-aaram.”

Bilang mga Kristiano, nungka tang gigibohon an ginibo kan mga Zealot na inaatake sa pisikal an mga tawong ikinaaanggot niato. Alagad medyo nadadara daw kita nin dai pagtaong konsiderasyon na atakehon sa ibang mga paagi an mga dai niato nasosonoan​—tibaad paagi sa paglibak sa sainda? Kun kita talagang nagtataong konsiderasyon, dai kita magamit nin siring na makolog na pananaram.

An mga Fariseo kan enot na siglo saro pang grupo na dai nagtataong konsiderasyon. Daing ontok na kinokondenar ninda an iba asin dai nagpapasensia sa pagkabakong sangkap nin tawo. Minenos kan mapalangkaw na mga Fariseo an ordinaryong mga tawo, na pinapakaraot sinda bilang “mga tawong isinumpa.” (Juan 7:49) May marahay na dahelan, idinenunsiar ni Jesus an nagpapakangmatanos na mga tawong idto, na sinasabi: “Herak man sa saindo, mga eskriba asin Fariseo, mga parasaginsagin! huli ta nagtatao kamo nin tinagba kan yerbabuena asin kan anis patin kan komino, alagad liningawan nindo an mas magabat na mga bagay kan Ley, arin na baga, an hustisya asin pagkaherak patin pagigin fiel. An mga bagay na ini obligasyon na gibohon, pero bakong tanganing basangbasangon an ibang bagay.”​—Mateo 23:23.

Sa pagsabi kaini, dai ni Jesus pinasasadit an halaga kan pag-otob kan Ley ni Moises. Ipinaheheling nia sana na an “mas magabat,” o mas mahalaga, na mga aspekto kan Ley naghahagad na iaplikar iyan na may pagkarasonable asin pagkaherak. Kanigoan kan kalaenan ni Jesus asin kan saiyang mga disipulo sa dai nagtataong konsiderasyon na mga Fariseo asin Zealot!

Dai kinokonsinte ni Jehova Dios magin ni Jesu-Cristo an karatan. Dai na mahahaloy, ‘babalosan an mga dai nakamimidbid sa Dios asin an mga dai nagkukuyog kan maogmang bareta.’ (2 Tesalonica 1:6-10) Minsan siring, sa saiyang kaigotan para sa katanosan, ipinabanaag ni Jesus sa gabos na panahon an mapasensia, maheherakon, asin mamomoton na pagmakolog kan saiyang makalangit na Ama sa gabos na gustong gibohon an tama. (Isaias 42:​1-3; Mateo 11:​28-​30; 12:​18-​21) Kanigoan karahay na halimbawa an itinao sa sato ni Jesus!

Pasensiosong Magpatiriostios

Minsan ngani puedeng dakula an kaigotan ta para sa tama, iaplikar niato an hatol ni apostol Pablo: “Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro. Kun paanong kamo sueltong pinatawad ni Jehova, siring man an gibohon nindo.” (Colosas 3:13; Mateo 6:​14, 15) An pagtaong konsiderasyon naghahagad nin pagpatiriostios sa mga pagkukulang asin sala nin balang saro sa bakong sangkap na kinaban na ini. Kaipuhan kitang magin makatanosan manongod sa linalaoman niato sa iba.​—Filipos 4:5.

An pagtaong konsiderasyon sa iba dai nanggad nangangahulogan nin pag-aprobar sa paggibo nin sala o pagigin buta sa mga sala. An nagkapirang aspekto nin kaisipan o gawe-gawe nin sarong kapagtubod tibaad medyo bakong kaoyon kan mga pamantayan ni Jehova. Minsan ngani an pagsuhay tibaad bako pang seryosong marhay tangani na magbunga nin paghabo nin Dios, iyan tibaad magtao nin patanid na nagpapaheling na kaipuhan  an pagliwat. (Genesis 4:​6, 7) Kanigoan kamamomoton kun an mga may espirituwal na mga kualipikasyon maghingoang itanos liwat sa espiritu nin kahoyoan an sarong napapasala! (Galacia 6:1) Pero tanganing magin mapanggana sa paghihingoang ini, kinakaipuhan na humiro huli sa pagmakolog imbes na sa mapagtatsar na paagi.

“Sa Mahoyong Boot Asin Hararom na Paggalang”

Kumusta man an pagpaheling nin pasensia sa mga tawo na an relihiosong mga punto de vista laen kan sa sato? An sarong “Leksion Para sa Gabos” na ipinaskil sa gabos na Eskuelahan Nasyonal na naestablisar sa Irlandia kan 1831 nagsasabi: “Bakong intension ni Jesu-Cristo na ipirit an saiyang relihion sa mga tawo paagi sa dahas. . . . An pakikiiwal sa satong mga kataed asin pag-abuso sa sainda bakong an paagi na makombensir sinda na kita an tama asin sinda an sala. Mas posibleng makombensir sinda na mayo kita nin Kristianong espiritu.”

Si Jesus nagtokdo asin naggawe sa paagi na nakaakit sa mga tawo sa Tataramon nin Dios, kaya kita maninigo na magin siring man. (Marcos 6:​34; Lucas 4:​22, 32; 1 Pedro 2:21) Bilang sangkap na tawo na tinawan nin Dios nin espesyal na pakarorop, nakababasa sia nin puso. Kun siring, kun kinakaipuhan, si Jesus nakataram nin makolog na mga pagdenunsiar sa mga kaiwal ni Jehova. (Mateo 23:13-33) Bakong dai pagtaong konsiderasyon sa kabtang nia na gibohon ini.

Bakong arog ki Jesus, mayo kitang kakayahan na magbasa nin puso. Huli kaini, maninigo niatong sunodon an hatol ni apostol Pedro: “Santipikaron nindo an Cristo bilang Kagurangnan sa saindong puso, na pirmeng andam na gumibo nin pagdepensa sa atubangan nin lambang tawo na naghahagad sa saindo nin rason para sa saindong paglaom, alagad ginigibo iyan sa mahoyong boot asin hararom na paggalang.” (1 Pedro 3:15) Bilang mga lingkod ni Jehova, maninigo niatong idepensa an satong tinutubod huli ta iyan marigon na nakabase sa Tataramon nin Dios. Alagad kaipuhan niatong gibohon ini sa paagi na nagpapaheling nin paggalang sa iba asin sa saindang sinserong mga pinaniniwalaan. Si Pablo nagsurat: “An saindo logod na pagtaram danay na igwa nin kabootan, na tinimplahan nin asin, tanganing maaraman nindo kun paano kamo matao nin simbag sa lambang saro.”​—Colosas 4:6.

Sa saiyang bantog na Sermon sa Bukid, sinabi ni Jesus: “An gabos na boot nindong gibohon sa saindo nin mga tawo, gibohon man nindo sa sainda.” (Mateo 7:12) Kaya, kun siring, kita pasensiosong magpatiriostios asin magpaheling nin paggalang sa mga hinuhulitan niato kan maogmang bareta. Paagi sa pagtimbang sa satong kaigotan para sa katanosan nin pagtaong konsiderasyon na basado sa Biblia, paoogmahon niato si Jehova asin kita magigin talagang nagtataong konsiderasyon sa iba.

[Ritrato sa pahina 23]

Likayan an dai nagtataong konsiderasyon na aktitud kan mga Fariseo

[Ritrato sa pahina 23]

Ipinabanaag ni Jesus an nagtataong konsiderasyon na aktitud kan saiyang Ama. Iyo man daw kamo?