Magin Magayagayang mga Paraani!

“An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.”​—MATEO 9:​37, 38.

1. Ano an nagtatabang sa sato na magpadagos sa paggibo kan kabotan nin Dios?

KUN ginigirumdom ta an aldaw kan satong bautismo bilang saro sa mga lingkod ni Jehova, baga man iyan nangyari pira pa sana o dakol nang taon an nakaagi, tibaad garo baga kasuodma lang iyan. An pag-omaw ki Jehova an nagin pinakasentro kan satong dusay na buhay. Mantang binabakal ta an angay na panahon sa pagtabang sa iba na madangog asin posibleng akoon an mensahe kan Kahadean, an magayagayang paglilingkod ki Jehova an pangenot sa sato. (Efeso 5:​15, 16) Sagkod sa aldaw na ini, naheheling ta na an panahon marikason na minaagi kun kita sibot, “na dakol an gigibohon sa gibohon kan Kagurangnan.” (1 Corinto 15:58) Minsan ngani may naaatubang kitang mga problema, an kagayagayahan niato sa paggibo kan kabotan ni Jehova an nagpapahiro sa sato.​—Nehemias 8:10.

2. Ano an nakakokontribwir sa kagayagayahan na naeeksperyensiahan niato sa piguratibong pag-ani?

² Bilang mga Kristiano, kita nakikikabtang sa sarong piguratibong pag-ani. An pagtipon sa mga indibiduwal para sa buhay na daing katapusan ibinaing ni Jesu-Cristo sa pag-ani. (Juan 4:35-38) Huling nakikikabtang kita sa siring na aktibidad na pag-ani, makaparirigon sa boot na siyasaton an kagayagayahan kan enot na Kristianong mga paraani. Rerepasohon ta an tolong bagay na nakakokontribwir sa kagayagayahan na naeeksperyensiahan niato sa presenteng pag-ani. Ini iyo an (1) satong mensahe nin paglaom, (2) kapangganahan kan satong paghanap, asin (3) an satong aktitud na may pakikipagkatoninongan bilang mga paraani.

Isinugo Bilang mga Paraani

3. Sa anong bagay nakaeksperyensia nin kagayagayahan an enot na mga parasunod ni Jesus?

³ Kanigoan an pagkaliwat kan buhay kan enot na mga paraani​—partikular na an 11 fiel na apostol ni Jesus​—kan aldaw kaidtong 33 C.E. kan sinda magduman sa sarong bukid sa Galilea tanganing tagboon an binuhay liwat na si Cristo! (Mateo 28:16) “Labing limang gatos na tugang” an tibaad presente sa okasyon na idto. (1 Corinto 15:6) Nag-aningal sa saindang mga talinga an sugo na itinao sa sainda ni Jesus. Sinabihan nia sinda: “Paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.” (Mateo 28:​19, 20) Sa ibong nin makuring paglamag, nakaeksperyensia sinda nin dakulang kagayagayahan sa pag-ani mantang naheheling nindang naeestablisar sa sunod-sunod na lugar an mga kongregasyon nin mga parasunod ni Cristo. Pag-abot nin panahon, ‘an maogmang bareta ihinuhulit na sa gabos na linalang sa sirong nin langit.’​—Colosas 1:23; Gibo 1:8; 16:5.

4. Sa anong mga kamugtakan isinugo an mga disipulo ni Cristo?

⁴ Sa kapinonan kan saiyang ministeryo sa Galilea, inapod ni Jesus an 12 apostol asin isinugo sinda na partikularmenteng ibalangibog: “An kahadean  kan kalangitan naghaharani na.” (Mateo 10:1-7) Sia mismo “naglibot sa gabos na siudad asin baryo [sa Galilea], na nagtotokdo sa saindang mga sinagoga asin naghuhulit kan maogmang bareta kan kahadean asin nagpapaomay sa gabos na klase nin kahelangan asin gabos na klase nin kamatean.” Naherak si Jesus sa mga kadaklan “huli ta sinda naanitan asin nagkakaralagalag siring sa mga karnero na mayong pastor.” (Mateo 9:​35, 36) Huling natudok an boot, sinabihan nia kun siring an saiyang mga disipulo: “Iyo, an anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon [si Jehova Dios] na magsobol nin mga paraani sa saiyang anihon.” (Mateo 9:​37, 38) An ebalwasyon ni Jesus kan pangangaipo nin mga paraani kapareho man sa Judea kan anom na bulan na sana kan saiyang daganon na ministeryo an natatada. (Lucas 10:2) Sa duwang okasyon na iyan, isinugo nia an saiyang mga parasunod bilang mga paraani.​—Mateo 10:5; Lucas 10:3.

An Satong Mensahe nin Paglaom

5. Anong klaseng mensahe an ibinabalangibog niato?

⁵ Bilang mga lingkod ni Jehova sa presenteng panahon, magayagaya kitang minasimbag sa pangapodan para sa mga paraani. An sarong bagay na nakakontribwir nin dakula sa satong kagayagayahan iyo na kita nagpapaabot nin mensahe nin paglaom sa mga pinanluluyahan nin boot asin nagmomondo nin makuri. Arog kan mga disipulo ni Jesus kan enot na siglo, kanigoan an pribilehio niato na ibalangibog an maogmang bareta​—sarong tunay na mensahe nin paglaom​—sa mga “naanitan asin nagkakaralagalag siring sa mga karnero na mayong pastor”!

6. Sa anong aktibidad nakikabtang an mga apostol kan enot na siglo?

⁶ Pag-abot kan kabangaan kan enot na siglo, si apostol Pablo sibot na naghuhulit kan maogmang bareta. Asin seguradong epektibo an saiyang pag-ani, ta kan magsurat sa mga Kristiano sa Corinto kan mga 55 C.E., sia nagsabi: “Ipinaaaram ko sa saindo, mga tugang, an maogmang bareta na ipinahayag ko sa saindo, na inako man nindo, na pinaninindogan man nindo.” (1 Corinto 15:1) An mga apostol asin an iba pang enot na mga Kristiano mahigos na mga paraani. Minsan ngani dai sinasabi sato kan Biblia kun pirang apostol an buhay pa sagkod kan importanteng mga pangyayari na natapos sa kalaglagan kan Jerusalem kan 70 C.E., aram nanggad niato na si apostol Juan padagos pang naghuhulit mga 25 taon pakalihis kaiyan.​—Kapahayagan 1:9.

7, 8. Anong mensahe nin paglaom an ibinabalangibog kan mga lingkod ni Jehova na may orog na pagkaapurado ngonyan kisa kasuarin man?

⁷ Dangan nag-abot an dakol na siglo nin pangingibabaw kan klero nin Kakristianohan, an apostatang “tawo nin katampalasanan.” (2 Tesalonica 2:3) Minsan siring, sa paghinanapos kan ika-19 siglo, an mga nagmaigot na ioyon an saindang buhay sa orihinal na Kristianismo inako an mensahe nin paglaom, na ipinapahayag an Kahadean. Sa katunayan, poon sa enot na luwas kaiyan (Hulyo 1879), kabale sa titulo kan magasin na ini an mga tataramon na “Herald of Christ’s Presence” (sa Bicol, “Nagbabalangibog kan Presensia ni Cristo”), “Herald of Christ’s Kingdom” (sa Bicol, “Nagbabalangibog kan Kahadean ni Cristo”), o “Nagpapahayag kan Kahadean ni Jehova.”

⁸ An langitnon na Kahadean nin Dios inestablisar sa kamot ni Jesu-Cristo kan 1914, asin ibinabalangibog ta ngonyan an mensahe nin paglaom na may orog na pagkaapurado kisa kaidto. Taano? Huli ta kabale sa mga bendisyon kan pamamahala kan Kahadean an harani nang katapusan kan presenteng maraot na sistema. (Daniel 2:44) May mas marahay pa daw na mensahe dian? Asin may maorog pa daw kitang kagayagayahan kisa pakikikabtang sa pagpahayag kan Kahadean bago dumatong an “dakulang kahorasaan”?​—Mateo 24:21; Marcos 13:10.

Sarong Mapangganang Paghanap

9. Anong instruksion an itinao ni Jesus sa saiyang mga disipulo, asin ano an nagin reaksion kan mga tawo sa mensahe kan Kahadean?

⁹ An saro pang bagay na nakakokontribwir sa satong kagayagayahan bilang mga paraani iyo an kapangganahan kan paghanap niato sa mga nagigin disipulo asin minaiba sato sa pag-ani. Kaidtong 31-​32 C.E., ininstruksionan ni Jesus an saiyang mga disipulo: “Sa ano man na siudad o baryo kamo lumaog, hanapon nindo kun siisay dian an maninigo.” (Mateo 10:11) Bakong gabos na indibiduwal maninigo, siring kan ipinaheling nindang reaksion sa mensahe kan Kahadean. Minsan siring, maigot na ihinulit kan mga disipulo ni Jesus an maogmang bareta saen man may mga tawo.

10. Paano ginibo ni Pablo an paghanap nia sa mga maninigo?

 ¹⁰ Pagkagadan asin pagkabuhay liwat ni Jesus, an paghanap sa mga maninigo nagpadagos na may kaigotan. Si Pablo nakipangatanosan sa mga Judio sa saindang sinagoga asin sa mga tawong nasa sadan sa Atenas. Kan magpatotoo sia sa Areopago sa siudad na iyan nin Grecia, “an nagkapira uminiba sa saiya asin nagturubod, na saro man sa sainda si Dionisio, sarong hokom kan korte nin Areopago, asin an sarong babae na inaapod Damaris, asin an iba pa laen sa sainda.” Saen man magduman si Pablo, sia arogan man sa paghuhulit “sa publiko asin sa pagharongharong.”​—Gibo 17:​17, 34; 20:20.

11. Anong mga paagi nin pagmiministeryo an ginamit kaidtong dakol nang taon an nakaagi?

¹¹ Durante kan ultimong mga dekada kan ika-19 siglo, an linahidan na mga Kristiano pusoan na nakikabtang sa paghanap sa mga maninigo. Sa sarong artikulo na may titulong “Linahidan na Maghulit,” an Zion’s Watch Tower na Hulyo/Agosto 1881 nagsabi: “An paghuhulit kan maogmang bareta . . . ipinapaabot ‘sa mga mahoyo’​—an mga andam na magdangog asin nakadadangog, tanganing organisaron hale sa sainda an hawak kan Cristo, an kairibang mga paramana.” Sa parate sinasabat kaidto kan mga paraani nin Dios an mga tawong hale sa pagsimba asin tinatawan sinda nin mga pulyeto na igwa nin sono sa Kasuratan na mga mensahe na dinisenyo tanganing pukawon an paborableng reaksion kan mga maninigo. Pakatapos na ebalwaron giraray an pagigin epektibo kan paaging ini nin paghuhulit, an Watch Tower na Mayo 15, 1903, nagsadol sa mga paraani na iwaras an mga pulyeto “sa harong-harong, kada Domingong hapon.”

12. Paano niato ginibong orog na epektibo an satong paghuhulit? Iilustrar.

¹² Sa nakaagi pa sanang mga taon, pinahiwas ta an satong ministeryo paagi sa pagkaolay sa mga tawo sa ibang mga lugar apuera sa saindang harong. Nagin epektibong marhay ini sa mga nasyon na dahelan sa mga kamugtakan sa pagbuhay asin paglilibang an mga tawo mayo sa saindang harong sa mga panahon na kita sa parate nagsosongko. Kan mariparo nin sarong Saksi sa Inglaterra asin kan saiyang kaibaiba na an mga namamasyar regular na minaharale lunad sa auto pakatapos magpahorohayahay sa baybayon, kinosogan ninda an saindang boot na lumunad sa mga auto asin ipresentar sa mga pasahero an mga kopya kan An Torrengbantayan asin Awake! Sa laog nin sarong bulan, nakawaras sinda nin 229 kopya. Ibinareta ninda: “Dai kami natakot sa paghuhulit sa baybayon, sa komersial na teritoryo, o sa ano man na iba pang angat na puedeng mapaatubang sa samo huli ta aram mi na si Jehova pirmeng nasa kampi niamo.” Nakakua sinda nin sarong ruta nin magasin, nakapoon nin sarong pag-adal sa Biblia, asin sindang duwa nakikabtang sa paglilingkod bilang auxiliary payunir.

13. Anong pagliliwat sa satong ministeryo an kinakaipuhan ngonyan sa nagkapirang lugar?

¹³ Mantang nagpapadagos an paghanap sa mga maninigo, sa nagkapirang lugar tibaad kaipuhan na maingat na ebalwaron giraray an satong ministeryo. Minsan ngani kinatodan na nin dakol na Saksi na maghulit sa harong-harong kada Domingong aga, sa nagkapirang lugar nanompongan ninda na an pagsongko nin amay sa harong kan mga tawo bakong gayong epektibo huli ta an mga nakaistar tibaad torog pa. Paagi sa pagliwat sa mga iskedyul ninda, an dakol na Saksi ngonyan ginigibo an paghanap pagtaodtaod na sa aldaw, puedeng pakatapos  kan Kristianong mga pagtiripon. Asin tunay na nagin mabunga an paghanap na ini. Kan nakaaging taon an kabilangan kan mga parabalangibog kan Kahadean sa bilog na kinaban luminangkaw nin 2.3 porsiento. Ini nagtatao nin onra sa Kagurangnan kan anihon asin nin kagayagayahan sa satong puso.

Papagdanayon an Katoninongan sa Pag-ani

14. Paagi sa anong aktitud niato iinaatubang an satong mensahe, asin taano?

¹⁴ An saro pang dahelan kan satong kagayagayahan konektado sa aktitud na may pakikipagkatoninongan na ipinaheheling niato sa pag-ani. “Sa paglaog nindo sa harong,” sabi ni Jesus, “magtaong galang kamo sa pamilya; asin kun an harong maninigo, an katoninongan na minawot nindo dian pabayaan na dumatong dian.” (Mateo 10:​12, 13) An pagtaong galang sa Hebreo asin an katumbas na termino sa Biblikong Griego pareho igwa kan ideya na ‘Mapakarhay man logod kamo.’ An saboot na ini an naggigiya sa satong pagdolok sa mga tawo kun naghuhulit kita kan maogmang bareta. Inaasahan niato na sinda mahimate nin paborable sa mensahe kan Kahadean. Para sa mga naghihimate, yaon an posibilidad nin pakiulian sa Dios mantang pinagsosolsolan ninda an saindang mga kasalan, nagbabakle, asin ginigibo an saiyang kabotan. Dangan, an pakipagkatoninongan sa Dios minagiya man sa buhay na daing katapusan.​—Juan 17:3; Gibo 3:19; 13:​38, 48; 2 Corinto 5:18-20.

15. Paano niato mapagdadanay an matoninong na aktitud kun may nakakaatubang kitang bakong paborableng reaksion sa satong paghuhulit?

¹⁵ Paano ta mapagdadanay an satong katoninongan kun bakong paborable an reaksion sa sato? Nagsabi si Jesus: “Kun [an harong] bakong maninigo, bumalik sa saindo an katoninongan gikan sa saindo.” (Mateo 10:13) An pagkasaysay ni Lucas manongod sa pagsugo sa 70 disipulo kabale an sinabi ni Jesus: “Kun an katood nin katoninongan yaon dian, an saindong katoninongan mapapasaiya. Alagad kun mayo, iyan mabuelta sa saindo.” (Lucas 10:6) Kun pinapaabotan ta kan maogmang bareta an mga tawo, ginigibo ta iyan sa tamang paagi na may marahay na ugale asin sa paagi na matoninong. An indiperenteng simbag, reklamo, o daing kabootan na tataramon nin sarong kagharong nagtatao sana nin lugar na ‘bumalik sa sato’ an satong matoninong na mensahe. Alagad dai ini nakahahale kan satong katoninongan, na sarong bunga kan banal na espiritu ni Jehova.​—Galacia 5:​22, 23.

Sarong Marahayon na Pasohan Para sa mga Paraani

16, 17. (a) Ano an pasohan ta kun nagdadalaw liwat? (b) Paano ta matatabangan an mga igwa nin hapot sa Biblia?

¹⁶ Bilang mga paraani naoogma kitang marhay na magkaigwa nin kabtang sa pagtipon nin mga tawo para sa buhay na daing katapusan. Asin kanigoan na kagayagayahan an naeeksperyensiahan  niato kun an tawong hinuhulitan ta naghihimate nin paborable, gustong makanood nin orog pa, asin nagigin “katood nin katoninongan”! Tibaad kadakol niang hapot sa Biblia asin garo imposibleng masimbag niato iyan gabos durante nin sarong pagsongko. Huling tibaad bakong tama an maghaloy sa enot na pagsongko, ano an puedeng gibohon? Puede kitang magkaigwa nin pasohan na arog kan isinuherir kaidtong mga 60 taon na an nakaagi.

¹⁷ “An gabos na saksi ni Jehova maninigo na preparadong mamayo nin modelong mga pag-adal sa Biblia.” An mga tataramon na iyan nagluwas sa ikatolong kabtang nin serye kan Model Study na pulyeto para sa pagtotokdo na ipinublikar poon 1937 sagkod 1941. Iyan nagsabi pa: “An gabos na parahayag [kan Kahadean] maninigo na magin mahigos sa pagtabang sa gabos na paaging posible sa mga tawo na may marahay na boot na nagpapaheling nin interes sa mensahe kan Kahadean. Maninigo na balikan [dalawon liwat] an mga tawong ini, na sinisimbag an laen-laen na hapot . . . , dangan ponan an modelong pag-adal . . . sa pinakamadaling panahon na magigibo nindo.” Iyo, an pasohan niato sa mga pagdalaw liwat makapoon nin pag-adal sa Biblia asin pamayohan iyan nin regular. * An makikatood na aktitud asin mamomoton na pagmakolog sa mga tawong interesado an nagpapahiro sa sato na mag-andam na marhay asin pamayohan an pag-adal sa epektibong paagi.

18. Paano ta matatabangan an mga bagohan na magin mga disipulo ni Jesu-Cristo?

¹⁸ Sa tabang kan librong Kaaraman na Minagiya Pasiring sa Buhay na Daing Katapusan asin kan mga brosyur na arog kan Ano an Kahagadan sa Sato nin Dios?, puede kitang mamayo nin epektibong mga pag-adal sa Biblia asin sa siring makapakikabtang sa pagtabang sa mga bagong interesado na magin mga disipulo. Mantang pinagmamaigotan ta na arogon an Dakulang Paratokdo, si Jesu-Cristo, posibleng marhay na an siring na mga inaadalan sa Biblia makakanood man sa satong toninong, magayagayang ugale, sa satong sinseridad, asin sa satong paggalang sa mga pamantayan asin giya ni Jehova. Kun tinatabangan ta an mga bagohan paagi sa mga simbag sa saindang mga hapot, gibohon ta man an makakaya ta na tokdoan sinda kun paano ninda masisimbag an mga naghahapot sa sainda. (2 Timoteo 2:​1, 2; 1 Pedro 2:21) Bilang piguratibong mga paraani, seguradong ipaggagayagaya niato na may promedyong 4,766,631 pag-adal sa Biblia an pinamayohan sa bilog na kinaban kaining nakaaging taon nin paglilingkod. Kita espesyalmenteng magayagaya kun kita personal na kabilang sa mga paraani na igwa nin kabtang sa aktibidad na pag-adal sa Biblia.

Padagos na Maggayagaya sa Pag-ani

19. Taano ta igwa nin marahay na mga dahelan na maggayagaya sa pag-ani durante kan ministeryo ni Jesus asin dai nahaloy pakatapos kaiyan?

¹⁹ Igwa nin marahay na mga dahelan na maggayagaya sa pag-ani durante kan ministeryo ni Jesus asin dai nahaloy pakatapos kaiyan. Dakol kaidto an naghimate nin paborable sa maogmang bareta. Nangorognang dakula an paggayagaya kan Pentecostes 33 C.E., ta mga 3,000 kaidto an nag-akseptar kan instruksion ni Pedro, nag-ako nin banal na espiritu ni Jehova, asin nagin kabtang kan nasyon nin espirituwal na Israel nin Dios. Tunay nanggad, an saindang kabilangan padagos na nagdakol, asin nag-abunda an kagayagayahan mantang “padagos na idinudugang sa sainda ni Jehova aroaldaw an mga naliligtas.”​—Gibo 2:37-41, 46, 47; Galacia 6:16; 1 Pedro 2:9.

20. Ano an nagtatao sa sato nin abundang kagayagayahan sa satong pag-ani?

²⁰ Kan panahon na iyan, nagkakatotoo an hula ni Isaias: “Pinadakol mo [ni Jehova] an mga tawo sa nasyon; pinadakula mo an paggayagaya para kaiyan.  Sinda naggayagaya sa atubangan mo arog kan paggayagaya sa tig-anihan, arog kan mga magayagaya kun nagbabaranga sinda nin sinamsaman.” (Isaias 9:3) Minsan ngani naheheling na niato ngonyan na haros kompleto na an ‘dakol an tawong nasyon’ na iyan nin mga linahidan, abunda an satong kagayagayahan mantang minamasdan ta an kabilangan kan iba pang mga paraani na nagdadakol taon-taon.​—Salmo 4:7; Zacarias 8:23; Juan 10:16.

21. Ano an pag-oolayan niato sa masunod na artikulo?

²¹ Tunay nanggad na igwa kita nin marahay na mga dahelan na padagos na maggayagaya sa pag-ani. An satong mensahe nin paglaom, an satong paghanap sa mga maninigo, asin an satong aktitud na may pakikipagkatoninongan​—an gabos na bagay na ini nagtatao sa sato nin kagayagayahan bilang mga paraani. Pero, nagigin dahelan iyan nin bakong paborableng reaksion nin dakol. Naeksperyensiahan ini ni apostol Juan. Ibinilanggo sia sa isla nin Patmos “huli sa pagtaram dapit sa Dios asin pagpatotoo ki Jesus.” (Kapahayagan 1:9) Kun siring, paano niato mapagdadanay an satong kagayagayahan kun napapaatubang sa paglamag asin pagtumang? Ano an matabang sa sato na tioson an nagigin may katagasan na aktitud kan dakol na hinuhulitan ta ngonyan? An sunod na artikulo niato nagtatao nin sono sa Kasuratan na tabang sa pagsimbag sa mga hapot na ini.

[Nota sa Ibaba]

Ano an Isisimbag Nindo?

• Ano an piguratibong pag-ani?

• Anong klaseng mensahe an ibinabalangibog ta?

• Taano ta mapanggana an paghanap niato nin mga disipulo?

• Paano niato pinapagdadanay an katoninongan sa pag-ani?

• Taano ta padagos kitang naggagayagaya sa pag-ani?

[Mga Hapot Para sa Pag-adal]

[Mga Ritrato sa pahina 12, 13]

Paghuhulit kan enot asin ika-20 siglo

[Mga Ritrato sa pahina 13]

Arog ki Pablo, an mga paraani sa presenteng panahon naghihingoang makaolay an mga tawo sa gabos na lugar

[Ritrato sa pahina 13]

Ibalangibog an maogmang bareta na may marahay na ugale