Dumiretso sa laog

Dumiretso sa mga laog

Magpadagos sa Pag-ani!

Magpadagos sa Pag-ani!

Magpadagos sa Pag-ani!

“An mga nagsasabwag nin banhi na may mga luha mag-aaraning may magayagayang kurahaw.”—SALMO 126:5.

1. Taano ta dapat na ‘makimaherak sa Kagurangnan kan anihon na magsobol nin mga paraani’ ngonyan?

PAKATAPOS kan ikatolong biahe sa paghuhulit ni Jesu-Cristo sa Galilea, sinabihan nia an saiyang mga disipulo: “An anihon mahiwas, alagad an mga paraani kakadikit.” (Mateo 9:37) Iyo man an situwasyon sa Judea. (Lucas 10:2) Mantang totoo iyan kaidtong haros 2,000 na taon na an nakaagi, ano an kamugtakan ngonyan? Bueno, durante kan nakaaging taon nin paglilingkod, labing 6,000,000 na Saksi ni Jehova an nagpadagos sa piguratibong pag-ani sa tahaw kan 6,000,000,000 katawo sa kinaban, na an dakol sa sainda “naanitan asin nagkakaralagalag siring sa mga karnero na mayong pastor.” Kaya an sadol ni Jesus na ‘makimaherak sa Kagurangnan kan anihon na magsobol nin mga paraani sa saiyang anihon’ balido man ngonyan kapareho kaidtong dakol nang siglo an nakaagi.​—Mateo 9:​36, 38.

2. Ano an nakaaapod kan atension nin mga tawo sa sato?

2 Sinimbag ni Jehova Dios, an Kagurangnan kan anihon, an pakimaherak na magsobol nin dakol pang paraani. Asin kanigoan na kagayagayahan an makikabtang sa ginigiyahan nin Dios na pag-aning ini! Minsan ngani pipira sana an kabilangan niato kun ikokomparar sa mga nasyon, an maigot na pakikikabtang niato sa paghuhulit kan Kahadean asin paggibo nin mga disipulo nakaaapod kan atension nin kinaban sa sato. Sa dakol na nasyon parate kitang nasasambitan sa media. An tanog nin timbre sa sarong drama sa telebisyon puedeng magin dahelan nin pagsabi na yaon an mga Saksi ni Jehova. Iyo, an satong Kristianong aktibidad bilang piguratibong mga paraani aram na marhay sa ika-21 siglo.

3. (a) Paano ta naaaraman na narisa an aktibidad na paghuhulit kan Kahadean kaidtong enot na siglo? (b) Taano ta masasabi niato na sinusuportaran kan mga anghel an satong ministeryo?

3 An kinaban nakarisa man kan mga aktibidad na paghuhulit kan Kahadean kan enot na siglo asin pinaglamag an mga parabalangibog kan maogmang bareta. Sa siring, si apostol Pablo nagsurat: “Sa paghona ko kaming mga apostol an huring ibinugtak nin Dios sa eksibisyon bilang mga lalaking itinalaga sa kagadanan, huli ta kami [an mga apostol] nagin sarong panteatrong dadalanon sa kinaban, asin sa mga anghel, asin sa mga tawo.” (1 Corinto 4:9) Kaagid kaiyan, an pagpapadagos niato bilang mga parabalangibog kan Kahadean sa ibong nin paglamag nakaaapod kan atension nin kinaban sa sato asin mahalaga iyan para sa mga anghel. Sabi kan Kapahayagan 14:6: “Naheling ko [si apostol Juan] an saro pang anghel na naglalayog sa tahaw kan langit, asin igwa sia nin daing katapusan na maogmang bareta na ipahahayag bilang nakaoogmang notisya sa mga nag-eerok sa daga, asin sa lambang nasyon asin tribo asin tataramon patin banwaan.” Iyo, sinusuportaran kita kan mga anghel sa satong ministeryo​—sa satong pag-ani!​—Hebreo 1:​13, 14.

“Ikaoongis Kamo”

4, 5. (a) Anong patanid an itinao ni Jesus sa saiyang mga disipulo? (b) Taano ta ‘ikinaoongis’ an mga lingkod nin Dios sa presenteng panahon?

4 Kan sugoon an mga apostol ni Jesus bilang mga paraani, sinunod ninda an saiyang instruksion na magin ‘maingat siring sa mga halas pero inosente siring sa mga salampati.’ Idinugang ni Jesus: “Mag-ingat kamo sa mga tawo; huli ta kamo dadarahon ninda sa lokal na mga hokoman, asin hahampakon ninda kamo sa saindang mga sinagoga. Tara, dadarahon kamo sa atubangan nin mga gobernador asin hade huli sako, sa pagpatotoo sainda asin sa mga nasyon. . . . Asin ikaoongis kamo nin gabos na tawo huli sa ngaran ko; alagad an makatagal sagkod sa katapusan iyo an maliligtas.”​—Mateo 10:16-22.

5 ‘Ikinaoongis’ kita ngonyan huli ta “an bilog na kinaban namumugtak sa kapangyarihan kan maraot,” si Satanas na Diablo, na iyo an pangenot na kaiwal nin Dios asin kan Saiyang banwaan. (1 Juan 5:19) Namamasdan kan satong mga kaiwal an satong espirituwal na prosperidad alagad nagsasayumang iatribwir iyan ki Jehova. Naheheling kan mga paratumang an satong maogma, nakahuyom na mga lalauogon mantang kita magayagayang nakikikabtang sa pag-ani. Napapangalas sinda sa satong pagkasararo! Sa katunayan, tibaad napipiritan sindang admitiron iyan kun sinda nagbibiahe sa ibang nasyon asin maheling ninda na an ginigibo kan mga Saksi ni Jehova duman kapareho man sana kan gibohon na naheheling sa saindang dagang tinuboan. Siempre, aram ta na sa itinalaan na panahon si Jehova, an satong kasurog asin gikanan kan satong pagkasararo, mamimidbid maski kan satong mga kaiwal.​—Ezequiel 38:10-12, 23.

6. Ano an asegurasyon sa sato mantang kita nakikikabtang sa pag-ani, alagad anong mga hapot an minalataw?

6 Itinao kan Kagurangnan kan anihon sa saiyang Aki, si Jesu-Cristo, “an gabos na autoridad sa langit asin sa daga.” (Mateo 28:18) Sa siring ginagamit ni Jehova si Jesus na magdirehir sa pag-ani paagi sa langitnon na mga anghel asin sa linahidan na “fiel asin may diskresion na oripon” na yaon digdi sa daga. (Mateo 24:45-47; Kapahayagan 14:​6, 7) Alagad paano ta makakaya an pagtumang kan mga kaiwal pero mapagdanay pa man giraray an satong kagayagayahan mantang kita nagpapadagos sa pag-ani?

7. Anong ugale an maninigo na pagmaigotan niatong papagdanayon kun may pagtumang o paglamag?

7 Kun napapaatubang kita sa pagtumang o direktang paglamag pa ngani, hagadon ta an tabang nin Dios tanganing mapagdanay ta an ugale na arog kan ki Pablo. Sia nagsurat: “Kun minumuda, kami nag-oomaw; kun pinaglalamag, kami nagtitios; kun pinaglilibak, kami nakikimaherak.” (1 Corinto 4:​12, 13) An disposisyon na ini, kaiba an satong mataktikang ministeryo sa publiko, kun beses nakaliliwat sa aktitud kan mga paratumang sa sato.

8. Anong pag-asegurar liwat an nakukua nindo sa mga tataramon ni Jesus na nasusurat sa Mateo 10:28?

8 Maski an huma na kagadanan dai nakakapaluya sa satong kaigotan bilang mga paraani. Daing takot na ibinabalangibog niato an mensahe kan Kahadean na hayagan sagkod sa mapupuede. Asin nagkukua kita nin nakaparirigon sa boot na pag-asegurar liwat gikan sa mga tataramon ni Jesus: “Dai kamo matakot duman sa mga minagadan kan hawak alagad dai nakagagadan kan kalag; kundi matakot kamo sa saiya na nakalalaglag kapwa kan kalag asin hawak sa Gehenna.” (Mateo 10:28) Aram ta na an satong langitnon na Ama iyo an Paratao nin buhay. Binabalosan nia an mga nagdadanay na may integridad sa saiya asin fiel na nagpapadagos sa pag-ani.

Sarong Panligtas-Buhay na Mensahe

9. Paano naghimate an nagkapira sa mga sinabi ni Ezequiel, asin paano man iyan nangyayari ngonyan?

9 Kan pusoan na ipahayag ni propeta Ezequiel an mga mensahe ni Jehova sa “rebeldeng mga nasyon”​—an kahadean nin Israel asin Juda​—may nagkapirang indibiduwal na naogmang magdangog sa sinabi nia. (Ezequiel 2:3) “Uya!” sabi ni Jehova, “para sa sainda ika garo awit nin namamateng mga pagkamoot, garo sarong may magayon na boses asin nagtutugtog nin instrumentong de kuerdas sa marahay na paagi.” (Ezequiel 33:32) Minsan ngani nagustohan ninda an mga sinabi ni Ezequiel, dai ninda iyan sinunod. Ano an nangyayari ngonyan? Kun an mga mensahe ni Jehova ibinabalangibog na may kosog nin boot kan linahidan na natatada asin kan saindang kairiba, gusto nin nagkapira na magdangog manongod sa mga bendisyon kan Kahadean, alagad dai sinda naghihimate nin may pag-apresyar, dai nagigin mga disipulo, asin dai minaiba sa pag-ani.

10, 11. Sa enot na kabangaan kan ika-20 siglo, ano an ginibo tanganing ipaisi an satong panligtas-buhay na mensahe, asin may anong mga resulta?

10 Sa ibong na kampi, dakol an naghimate nin paborable sa pag-ani asin nakikabtang sa pagbalangibog kan mga mensahe nin Dios. Halimbawa, durante nin sarong serye nin Kristianong mga kombension poon 1922 sagkod 1928, malinaw na nag-aningal an mga mensahe nin paghokom sa maraot na sistema nin mga bagay ni Satanas. Ibrinodkast sa mga istasyon nin radyo an mga pagdenunsiar na ini na iinatubang sa mga asambleang idto. Pakatapos kaiyan, an banwaan nin Dios nagwaras nin minilyon na inimprentang kopya kaini.

11 Kan huring mga taon nin 1930, saro pang paagi nin paghuhulit an nabuksan​—an mga martsa para sa pagtao nin impormasyon. Kan primero, an banwaan ni Jehova nagsusulot nin mga plakard na nagpapaisi nin pampublikong mga pahayag. Kan huri, nagdara sinda nin mga plakard na may mga sarabihon na arog kan “An relihion sarong siod asin raket” asin “Paglingkodan an Dios asin si Cristong Hade.” Kun sinda nagmamartsa sa mga tinampo, nakaaapod ini kan atension nin nag-aaragi. ‘Dakulang dahelan ini tanganing an mga Saksi ni Jehova magin sentro kan atension nin publiko asin tanganing gibohon sindang pusoan,’ an sabi nin sarong tugang na lalaki na regular na nakikabtang sa gibohon na ini sa matawong mga tinampo sa Londres, Inglaterra.

12. Apuera sa mga mensahe nin paghokom nin Dios, ano an itinampok niato sa satong ministeryo, asin sairisay ngonyan an nagkakasararo sa paghuhulit kan maogmang bareta?

12 Mantang ibinabalangibog ta an mga mensahe nin paghokom nin Dios, itinatampok ta man an positibong mga aspekto kan mensahe kan Kahadean. An satong pusoan na pagpapatotoo sa eksena kan kinaban nagtatabang sa sato na mahanap an mga maninigo. (Mateo 10:11) An kadaklan sa ultimong mga miembro kan grupong linahidan naghimate sa makosogon na pangapodan para sa pag-ani durante kan mga taon nin 1920 asin 1930. Dangan, sa sarong kombension kan 1935, nadangog an makangangalas na bareta dapit sa maogmang ngapit para sa “sarong dakulang kadaklan” nin “ibang karnero” sa sarong paraisong daga. (Kapahayagan 7:9; Juan 10:16) Hinimate ninda an mga mensahe nin paghokom nin Dios asin nakisumaro sa mga linahidan sa paghuhulit kan panligtas-buhay na maogmang bareta.

13, 14. (a) Anong karangahan an makukua sa Salmo 126:​5, 6? (b) Kun padagos kitang magtatanom asin magbabaribi, ano an mangyayari?

13 Dakulang karangahan para sa mga paraani nin Dios, asin nangorogna para sa mga nag-aagi nin paglamag, an mga tataramon sa Salmo 126:​5, 6: “An mga nagsasabwag nin banhi na may mga luha mag-aaraning may magayagayang kurahaw. Sia na daing saltong minalakaw, na nagtatangis pa ngani, dara an supot nin banhi, daing salto na mabalik na may magayagayang kurahaw, dara an saiyang mga goygoy.” An mga tataramon kan salmista manongod sa pagsabwag asin pag-ani nag-iilustrar kan pag-asikaso asin pagbendisyon ni Jehova sa natatada na nagbalik hale sa pagkabihag sa suanoy na Babilonya. Naogma sindang marhay kan sinda makatalingkas, alagad puedeng naghibi sinda kan nagsasabwag nin banhi sa napabayaan na daga na dai nakultibar durante kan 70 taon na pagkadistiero ninda. Minsan siring, an mga nagpadagos sa saindang mga aktibidad na pagsabwag asin pagtotogdok nagkamit nin mga bunga asin satispaksion sa saindang pagpapagal.

14 Puedeng lumuha kita kun nag-aagi nin pagbalo o kun kita o an satong mga kapagtubod nagdudusa huli sa katanosan. (1 Pedro 3:14) Sa satong pag-ani, tibaad sa primero nasasakitan kita huli ta garo baga mayo kitang ikatokdong resulta kan satong mga paghihingoa sa ministeryo. Alagad kun padagos kitang magtatanom asin magbabaribi, an Dios an mapatubo kaiyan, na sa parate sa paaging dai niato inaasahan. (1 Corinto 3:6) Ipinaheheling nanggad ini kan mga resulta kan satong pagwaras nin mga Biblia asin mga publikasyon na sono sa Kasuratan.

15. Tumao nin halimbawa kan pagigin kapakipakinabang kan Kristianong mga publikasyon sa pag-ani.

15 Horophoropa an halimbawa nin sarong lalaki na an ngaran Jim. Kan magadan an saiyang ina, nakua nia sa mga rogaring kaini an sarong kopya kan librong Life​​—How Did It Get Here? By Evolution or by Creation? * Binasa nia iyan na may interes. Sa pakikipag-olay sa sarong Saksi na nagdolok sa saiya sa tinampo, uminoyon si Jim na songkoon sia liwat, asin nagresulta ini sa pag-adal sa Biblia. Marikas an pag-oswag ni Jim sa espirituwal, idinusay an saiyang sadiri ki Jehova, asin nabautismohan. Sinabi nia sa iba pang miembro kan saiyang pamilya an manongod sa saiyang nanodan. Bilang resulta, an tugang niang babae asin lalaki nagin Saksi ni Jehova, asin kan huri si Jim nagkapribilehiong maglingkod bilang bilog na panahon na boluntaryo sa Bethel sa Londres.

Pinaglalamag Pero Magayagaya

16. (a) Taano ta naeksperyensiahan an kapangganahan sa pag-ani? (b) Anong patanid an itinao ni Jesus mapadapit sa epekto kan maogmang bareta, alagad paagi sa anong aktitud niato dinodolok an mga tawo?

16 Taano ta nagkaigwa nin siring na kapangganahan an pag-ani? Huli ta sinunod kan linahidan na mga Kristiano asin kan saindang kairiba an mga instruksion ni Jesus: “An sinasabi ko sa saindo sa kadikloman, isabi nindo sa liwanag; asin an ihinihinghing saindo, ihulit nindo hale sa mga atop.” (Mateo 10:27) Minsan siring, makakaasa kita na magkakaigwa nin mga kasakitan, ta nagpatanid si Jesus: “An tugang matao kan saiyang tugang sa kagadanan, asin an ama kan saiyang aki, asin an mga aki matumang sa mga magurang asin ipapagadan sinda.” Sinabi pa ni Jesus: “Dai kamo mag-isip na ako napadigdi sa pagdara nin katoninongan sa daga; ako napadigdi sa pagdara, bakong nin katoninongan, kundi nin minasbad.” (Mateo 10:​21, 34) Bakong intension ni Jesus na pagbarangaon an mga pamilya. Alagad kun minsan iyan an epekto kan maogmang bareta. Totoo man iyan sa mga lingkod nin Dios ngonyan. Kun nagsosongko kita sa mga pamilya, bako tang intension na magdara nin pagkabaranga. Mawot niato na an gabos umako kan maogmang bareta. Kun siring, hinihingoa niato na dolokon an gabos na miembro nin sarong pamilya sa maboot, may simpatiyang paagi na nagpapangyari sa satong mensahe na magin nakakaakit sa mga “may tamang tendensia sa buhay na daing katapusan.”​—Gibo 13:48.

17. Paano isinisiblag an mga nagsusuportar sa soberaniya nin Dios, asin ano an sarong halimbawa kaini?

17 Isiniblag kan mensahe kan Kahadean an mga nagsusuportar sa soberaniya nin Dios. Halimbawa, horophoropa kun paano an satong mga kapwa parasamba napalaen na marhay huli ta ‘itinao ninda ki Cesar an mga bagay na ki Cesar alagad sa Dios an mga bagay na sa Dios’ kaidtong panahon kan Sosyalismo Nasyonal sa Alemania. (Lucas 20:25) Bakong arog kan mga namomoon sa relihion asin mga Kristiano sa ngaran sana na asosyado sa mga iglesia nin Kakristianohan, an mga lingkod ni Jehova nanindogan nin marigon, na nagsayumang balgahon an mga prinsipyo sa Biblia. (Isaias 2:4; Mateo 4:10; Juan 17:16) An propesorang si Christine King, autor kan librong The Nazi State and the New Religions, nagkomento: “Solamente tumang sa mga Saksi na daing naginibo an gobyerno [na Nazi], ta minsan ngani rinibo an ginadan ninda, an gibohon nagpadagos asin kan Mayo 1945 an mobimiento kan mga Saksi ni Jehova buhay pa, mantang an Sosyalismo Nasyonal mayo na.”

18. Anong aktitud an ipinaheheling kan banwaan ni Jehova sa ibong nin paglamag?

18 Importante nanggad an aktitud na ipinaheheling kan banwaan ni Jehova kun sinda napapaatubang sa paglamag. Minsan ngani tibaad humanga sa satong pagtubod an sekular na mga autoridad, sinda nagpapahayag nin pagngalas na kita mayo nin karaotan nin boot o makuring kaanggotan. Halimbawa, an mga Saksi na natadang buhay sa Holocaust parateng nagpapahayag nin kagayagayahan asin pagkakontento mantang sinasalingoy ninda an saindang mga inagihan. Aram ninda na tinatawan sinda ni Jehova nin “puersa na labi sa ordinaryo.” (2 Corinto 4:7) An mga linahidan na kaibanan niato igwa kan asegurasyon na an saindang “ngaran isinurat sa kalangitan.” (Lucas 10:20) An saindang pakatagal nagbubunga nin paglaom na dai napapasiring sa pagkadesganar, asin iyan man an kombiksion kan fiel na mga paraani na may daganon na mga paglaom.​​—Roma 5:​4, 5.

Magpadagos sa Pag-ani

19. Anong epektibong mga paagi an ginamit na sa Kristianong ministeryo?

19 Dai pa aram kun sagkod noarin kita totogotan ni Jehova na makikabtang sa piguratibong pag-ani. Mientras tanto, maninigo tang tandaan na an mga paraani igwa nin espesipikong mga paagi sa paggibo kan saindang trabaho. Kaagid kaiyan, makaseseguro kita na an satong pagigin fiel sa paggamit kan probado nang mga paagi nin paghuhulit magigin epektibo. Sinabihan ni Pablo an mga kapwa Kristiano: “Nakikimaherak ako sa saindo, magin kamong mga paraarog sa sako.” (1 Corinto 4:16) Kan mitingon ni Pablo sa Mileto an kamagurangan na taga Efeso, ipinagirumdom nia sa sainda na dai sia nagpogol sa pagtokdo sa sainda “sa publiko asin sa pagharongharong.” (Gibo 20:​20, 21) Nanodan kan kaibaiba ni Pablo na si Timoteo kun ano an mga paagi kan apostol asin kun siring ikatotokdo nia ini sa mga taga Corinto. (1 Corinto 4:17) Binendisyonan nin Dios an mga paagi nin pagtotokdo ni Pablo, kun paanong bebendisyonan man nia an pagpapadagos niato sa hayagan na paghuhulit kan maogmang bareta sa harong-harong, sa mga pagdalaw liwat, sa pag-adal sa Biblia, asin saen man na may mga tawong manompongan.​—Gibo 17:17.

20. Paano sinabi ni Jesus na igwang abundang espirituwal na pag-ani, asin paano ini nagkatotoo sa nakaagi pa sanang mga taon?

20 Pakatapos na magpatotoo sa sarong Samaritana harani sa Sicar kan 30 C.E., si Jesus nagtaram manongod espirituwal na pag-ani. Sinabihan nia an saiyang mga disipulo: “Tingagan an saindong mga mata asin helinga an kaomahan, ta sinda maputi na para sa pag-ani. Ngonyan pa nag-aako na nin tangdan an paraani asin nagtitipon kan bunga para sa buhay na daing katapusan, tanganing an parasabwag asin an paraani makapaggayagayang magkaibanan.” (Juan 4:34-36) Posible na naheling na ni Jesus an epekto kan pagkatuparan ninda kan Samaritana, ta dakol an nagturubod sa saiya huli sa patotoo kan babae. (Juan 4:39) Sa nakaagi pa sanang mga taon, may laen-laen na nasyon na hinale na an mga restriksion sa Mga Saksi ni Jehova o tinawan sinda nin legal na pagrekonoser, na sa siring nagbubukas nin bagong mga langtad para sa pag-ani. An resulta iyo na sarong abundang espirituwal na pag-ani an ginigibo. Sa katunayan, sa bilog na kinaban, naeeksperyensiahan an nagsosopay na mga bendisyon mantang kita magayagayang nagpapadagos na makikabtang sa espirituwal na pag-ani.

21. Taano ta may dahelan kitang magpadagos bilang magayagayang mga paraani?

21 Kun an pananom hinog na asin puede nang anihon, an mga paraani dapat na humirong may pagkaapurado. Dapat sindang magtrabaho na daing pag-atraso. Ngonyan, kaipuhan kitang magtrabaho nin mahigos asin may pakamate nin pagkaapurado huli ta kita nabubuhay na sa “panahon kan katapusan.” (Daniel 12:4) Iyo, may naaatubang kitang mga pagbalo, alagad igwa nin mas dakol na naaaning mga parasamba ki Jehova kisa kaidto. Aldaw ini kun siring nin paggayagaya. (Isaias 9:3) Kun siring, bilang magayagayang mga paraani, magpadagos kita sa pag-ani!

[Nota sa Ibaba]

^ par. 15 Ipinublikar asin iwinaras kan Mga Saksi ni Jehova.

Ano an Isisimbag Nindo?

Paano sinimbag kan Kagurangnan kan anihon an pakimaherak na magsobol nin dakol pang paraani?

Minsan ngani kita ‘ikinaoongis,’ anong ugale an pinapagdadanay niato?

Taano ta magayagaya kita maski ngani kita pinaglalamag?

Taano ta maninigo kitang magpadagos sa pag-ani na may pakamate nin pagkaapurado?

[Mga Hapot Para sa Pag-adal]

[Mga Ritrato sa pahina 16, 17]

An mga nakikikabtang sa espirituwal na pag-ani sinusuportaran kan mga anghel

[Ritrato sa pahina 18]

An mga martsa para sa pagtao nin impormasyon nagin dahelan na an mensahe kan Kahadean nakaapod kan atension nin dakol

[Ritrato sa pahina 18]

Kita nagtatanom asin nagbabaribi, alagad an Dios an nagpapatubo