Mga Hapot Hale sa mga Parabasa
Mga Hapot Hale sa mga Parabasa
Sa 1 Pedro 4:3, mababasa niato na an nagkapirang Kristiano kaidto imbuelto sa “ilegal na mga idolatriya.” Bako daw na ilegal an gabos na idolatriya, kinokondenar asin ipinagbabawal nin Dios?
Iyo, sa pagmansay nin Dios, ilegal an gabos na idolatriya. An mga naghihingoang kamtan an saiyang pag-oyon dai puedeng magsagibo nin idolatriya.—1 Corinto 5:11; Kapahayagan 21:8.
Minsan siring, garo baga nagtataram si apostol Pedro manongod sa idolatriya sa laen na punto de vista. Enot na rason, sa tahaw kan dakol na suanoy na nasyon, an idolatriya parehong lakop asin mayo nin legal na restriksion hale sa mga autoridad. An boot sabihon, dai ipinagbawal kan ley kan nasyon an siring na idolatriya. An nagkapirang idolatriya kabtang pa ngani kan palakaw kan nasyon o kan gobyerno. Sa sentidong iyan, an nagkapira nakiayon sa ‘mga idolatriya na mayo nin legal na restriksion’ bago nagin mga Kristiano. (New World Translation, edisyon na 1950) Halimbawa, puedeng mangnohon na si Hadeng Nabucodonosor kan Babilonya nagpatindog nin sarong idolatrosong imahen na bulawan, alagad an mga lingkod ni Jehova na si Sadrac, Mesac, asin Abednego nagsayumang sambahon iyan.—Daniel 3:1-12.
Hale sa saro pang punto de vista, kaiba sa dakol na idolatrosong ritual an mga gibong risang marhay na sarongat sa ano man na natural na ley o sentido moral na hale sa minanang konsensia. (Roma 2:14, 15) Isinurat ni apostol Pablo an manongod sa hababaon na klaseng mga gibo na “bakong natural” asin “bastos,” asin parate na an mga ini yaon sa relihiosong mga ritual. (Roma 1:26, 27) An mga lalaki asin babaeng nakikiayon sa ilegal na idolatriya dai nagsusunod sa legal na restriksion kan naturalesa nin tawo. Angay nanggad na bayaan kan mga nagigin Kristianong idto an maraot na mga gibong idto.
Dugang pa sa nasambitan sa enotan, an siring na mga idolatriya na lakop sa tahaw kan bakong mga Judio kinokondenar ni Jehova Dios. Sa siring iyan ilegal. *—Colosas 3:5-7.
[Nota sa Ibaba]
^ par. 6 An Griegong teksto sa 1 Pedro 4:3 literal na nangangahulogan na “bakong legal na mga idolatriya.” An frase laen-laen an pagkatradusir sa Ingles na mga Biblia na ginagamit an siring sa “bawal na idolatriya,” “ipinangangalad na pagsamba sa mga idolo,” asin “tampalasan na mga idolatriya.”