“Talaga daw na Kinokondenar nin Dios an mga Tawo na Masolo sa Impierno?”

“Nag-aadal kamo nin teolohiya?”

Ikinabigla ni Joel asin Carl an hapot na ini. An duwang hoben na lalaki​—mga boluntaryo na naglilingkod sa opisina prinsipal kan Mga Saksi ni Jehova sa Brooklyn, Nueva York​​—naghehelingheling sa sarong kaharaning tindahan nin libro. Mantang sinisiyasat ni Joel an mga konkordansia sa Biblia, si Carl nag-eestorya sa saiya manongod sa nagin pakikipag-olay nia sa ministeryo. Huling nadangog nin dai tinutuyo an mga parte kan pag-oolay na ini, an sarong lalaki na nagtitindog sa kaharani nadagka na magrani sa sainda.

Minsan siring, an lalaki igwa nin mas personal na kinapupurisawan kisa kun baga an duwang hoben na lalaki nag-aadal nin teolohiya. Sia nagpaliwanag: “Saro akong Judio, asin sinabihan ako kan nagkapira sa sakong Kristianong mga katood na ako masosolo sa impierno huli ta hinaboan si Jesus kan mga Judio. Ini nakapupurisaw na marhay sa sako. An siring na padusa na hale sa sarong mamomoton na Dios garo baga bakong makatanosan. Talaga daw na kinokondenar nin Dios an mga tawo na masolo sa impierno?”

Sinabi ni Joel asin Carl sa sinserong lalaking ini na sinda maigot na mga estudyante sa Biblia. Ipinaheling ninda sa saiya hale sa Kasuratan na an mga gadan daing pag-aram asin natotorog sana sa kagadanan na naghahalat nin pagkabuhay liwat. Huli kaini, dai sinda nakaeeksperyensia nin pagpasakit o makolog na kalayo sa impierno. (Salmo 146:​3, 4; Eclesiastes 9:​5, 10; Daniel 12:13; Juan 11:11-​14, 23-​26) Pagkatapos kan saindang 45 minutos na pag-orolay, itinao kan lalaki an saiyang adres ki Joel asin Carl patin naghagad nin dugang pang impormasyon sa temang iyan.

Kun an impierno sarong lugar nin pagpasakit sa kalayo, may mahagad daw na siisay man na darahon sia duman? Pero, an patriarkang si Job, na nagmamawot na makadulag sa saiyang mamondong kamugtakan, naghagad: “Siisay daw an matao kaini sa sako, na protehiran mo ako sa impierno, asin itago ako sagkod na makalihis an grabe mong kaanggotan?” (Job 14:​13, Douay Version) Malinaw nanggad, si Job dai nagtubod na an impierno sarong lugar nin pagpasakit. Imbes, sia naghagad nin pagprotehir dian. An kagadanan sarong kamugtakan nin dai pag-eksister, asin an impierno sa Biblia iyo an pankagabsan na lolobngan nin katawohan.

Kun gusto nindo nin dugang na impormasyon manongod sa kun ano an nangyayari sa sato kun kita magadan asin kun ano an tibaad paglaom pakatapos kaiyan, kamo maogmang iniimbitaran na himateon an minasunod na alok.