Daogon an mga Balakid sa Saindong Pag-oswag!

AN SAINDONG kotse nakakambio, asin an makina nag-aandar, alagad iyan habong mag-abante. May problema daw an makina? Dai, may sarong dakulang gapo na nakatangil sa atubangan kan saro sa mga rueda. An paghale sana kaiyan an kaipuhan tanganing umabante an kotse.

Sa kaparehong paagi, an nagkapira sa mga nakikipag-adal kan Biblia sa mga Saksi ni Jehova may mga balakid na puedeng nakakaolang sa saindang espirituwal na pag-oswag. Halimbawa, nagpatanid si Jesus na an mga bagay na arog kan “kahaditan kan palakaw na ini nin mga bagay asin an mapandayang kapangyarihan nin kayamanan” puedeng ‘lamoson an tataramon’ kan katotoohan asin olangon an pagtalubo.​—Mateo 13:22.

Para sa iba, an natural na mga kinatodan o kaluyahan an minabagat kan saindang pag-oswag. Gusto nin sarong lalaking Hapon na an ngaran Yutaka an mensahe kan Biblia, pero igwa sia nin magabat na problema sa paghuego. Parate na niang prinobaran na daogon an maraot na kinatodan na ini alagad dai nagin mapanggana. An saiyang pagkabangkag an nakapapierde sa saiya nin dakulang kantidad nin kuarta, tolong harong, respeto kan saiyang pamilya, asin saiya mismong dignidad. Puede daw niang haleon an singkogan na ini asin magin sarong Kristiano?

O estudyare an sarong babae na an ngaran Keiko. Sa tabang kan Biblia, nahale nia an mga bisyo na arog kan idolatriya, inmoralidad, asin paghimalad. Minsan siring, inaadmitir ni Keiko: “An pinakadakulang olang sa sako iyo an paninigarilyo. Dakol nang beses na prinobaran kong pumondo alagad dai ko magibo.”

Tibaad igwa man kamo nin garo baga dai mahahaleng balakid na nag-oolang sa saindong pag-oswag. Ano man iyan, makasisierto kamo na sa tabang nin Dios, iyan puedeng daogon.

Girumdomon an hatol ni Jesus sa saiyang mga disipulo pakatapos na dai ninda mapaluwas an demonyo sa sarong lalaki na naghehelang nin subi-subi. Pakatapos na magibo ni Jesus an dai ninda nagibo, sinabihan nia an saiyang mga disipulo: “Kun kamo igwa nin pagtubod na siring kadakula kan pisog nin mustasa, masasabihan nindo an bukid na ini, ‘Bumalyo ka hale digdi pasiring duman,’ asin iyan mabalyo, asin mayo nin ano man na dai nindo magigibo.” (Mateo 17:14-20; Marcos 9:17-29) Iyo, an sarong problema na garo dakulaon na bukid sa sato saditon asin daing sinabi sa satong makapangyarihan sa gabos na Kaglalang.​—Genesis 18:14; Marcos 10:27.

Pag-aram sa mga Olang sa Pag-oswag

Bago nindo mapangganahan an mga balakid, kaipuhan nindong aramon kun ano man nanggad an mga balakid na iyan. Paano nindo magigibo iyan? Kun beses an sarong miembro kan kongregasyon, siring kan sarong magurang sa kongregasyon o an saro na inaadalan kamo sa Biblia, aapodon an atension nindo sa sarong bagay. Imbes na ikaanggot an siring na mamomoton na hatol, maninigo na mapakumbaba nindong ‘hinanyogon an disiplina asin magin madonong.’ (Talinhaga 8:33) Sa ibang panahon, tibaad naririsa nindo an saindong mga kaluyahan paagi sa pag-adal nindo sa Biblia. Iyo, an tataramon nin Dios “buhay asin mapuersa.” (Hebreo 4:12) Puedeng ibuyagyag kan pagbasa nin Biblia asin mga publikasyon na basado sa Biblia an kairairaroming mga kaisipan, saboot, asin motibo nindo. Tinatabangan kamo kaiyan na ebalwaron an sadiri nindo oyon sa halangkawon na mga pamantayan ni Jehova. Ihinahayag asin inaaram kaiyan an mga bagay na tibaad nakakaolang sa espirituwal na pag-oswag nindo.​—Santiago 1:23-25.

Halimbawa, ipamugtak ta baga na kinatodan nin sarong inaadalan sa Biblia an pagparaisip sa inmoral na mga pantasiya. Tibaad sa paghona nia mayo nin peligro sa paggibo kaiyan, na nangangatanosan na sia dai man aktuwal na naggigibo nin ano man na maraot. Sa saiyang padagos na pag-adal, nabasa nia an mga tataramon sa Santiago 1:​14, 15: “An lambang saro nababalo paagi sa pagkabutong asin pagkaakit sa saiya kan saiyang sadiring kamawotan. Dangan an kamawotan, kun iyan nangidam na, nangangaki nin kasalan; an kasalan man, kun iyan ikasagibo na, nagbubunga nin kagadanan.” Ngonyan naheheling na nia kun gurano kanakadadanyar sa saiyang pag-oswag an pagpadagos sa dalan na ini! Paano nia hahaleon an olang na ini?​—Marcos 7:21-23.

Pagdaog sa mga Balakid

Tibaad sa tabang nin sarong maygurang na Kristiano, an inaadalan puedeng gumibo nin dugang na pagsiyasat sa Tataramon nin Dios, na ginagamit an Watch Tower Publications Index. * Halimbawa an titulong “Thoughts” (sa Bicol, “mga Kaisipan”), itinotokdo an sarong parabasa sa dakol na ipinublikar na artikulo na tinatratar an pagdaog sa nakadadanyar na mga pantasiya. Itinatampok kan mga artikulong ini an nakatatabang na mga teksto sa Biblia, siring sa Filipos 4:​8, na nagsasabi: “Ano man na totoo, ano man na seryosong bagay, ano man na matanos, ano man na malinig, ano man na madaling kamotan, ano man na marahay an dangog, ano man na birtud asin ano man na inoomaw, padagos na horophoropon an mga bagay na ini.” Iyo, an inmoral na mga kaisipan kaipuhan na salidahan nin malinig, nakaparirigon na mga kaisipan!

 Durante kan saiyang pagsiyasat, daing duda na maaaraman kan estudyante an iba pang mga prinsipyo sa Biblia na matabang sa saiya na malikayan an pagpagabat sa saiyang problema. Halimbawa, an Talinhaga 6:27 asin Mateo 5:28 nagpapatanid tumang sa paglaog sa isip nin saro nin mga bagay hale sa materyal na nakapupukaw sa sekso. “Iharayo mo an sakuyang mga mata sa pakaheling kan daing halaga,” an pamibi kan salmista. (Salmo 119:37) Siempre, bakong igo an pagbasa sana kan mga tekstong ini sa Biblia. “An puso kan matanos naghohorophorop,” an sabi kan madonong na tawo. (Talinhaga 15:28) Paagi sa pagpensar bako sanang sa kun ano an ipinagboboot nin Dios kundi sa kun taano man ta ipinagboboot nia iyan, an inaadalan magkakaigwa nin mas hararom  na pakasabot kan kadonongan asin pagkarasonable kan mga dalan ni Jehova.

Sa katapustapusi, an saro na nagmamaigot na daogon an kaolangan na ini sa saiyang pag-oswag maninigo na sueltong hagadon an tabang ni Jehova. Total, aram na marhay nin Dios an pagkagibo sa sato, na kita bakong sangkap, gibo sa kabokabo. (Salmo 103:14) An daing ontok na pamimibi sa Dios para sa tabang, kaiba an prosegidong mga paghihingoa na likayan an pagpadara sa inmoral na mga pantasiya, sa kahurihurihi kawiliwiling marhay an ibubunga​—sarong malinig, dai nagagabatan na konsensia.​—Hebreo 9:14.

Dai Sumuko

Ano man na problema an pinaglalabanan nindo, girumdomon na kun beses an pagbalik sa dati nangyayari. Kun mangyari iyan, natural sanang madesganar. Minsan siring, girumdomon an sinasabi sa Galacia 6:9: “Dai kita mag-ontok sa paggibo nin karahayan, huli ta sa talaan na kapanahonan kita mag-aani kun kita dai mapagal.” An debotong mga lingkod nin Dios na siring ki David asin Pedro nakaeksperyensia nin nagkapirang makasusupog na pagkasudya. Alagad dai sinda puminondo. Mapakumbaba nindang inako an hatol, naggibo nin kaipuhan na mga pagbabago, asin pinatunayan ninda na sinda marahayon na mga lingkod nin Dios. (Talinhaga 24:16) Sa ibong kan mga sala ni David, inapod sia ni Jehova na “lalaking nakaoyon sa sakong puso, na magibo kan gabos na mawot ko.” (Gibo 13:22) Siring man si Pedro nakabawi sa saiyang mga sala asin nagin harigi sa Kristianong kongregasyon.

Dakol ngonyan an nakapanggana man sa pagdaog sa mga balakid. Inako ni Yutaka, na nasambitan sa enotan, an alok na pag-adal sa Biblia. Sia nagsasaysay: “An suporta asin bendisyon ni Jehova sa kada pag-abante ko an nakatabang sa sako na daogon an sakong problema sa paghuego. Dakula an sakong kagayagayahan sa pakaeksperyensia sa pagigin totoo kan mga tataramon ni Jesus​—na kun may pagtubod, dawa an ‘mga bukid’ puedeng pabalyohon.” Pag-abot nin panahon, si Yutaka nagin ministeryal na lingkod sa kongregasyon.

Kumusta man si Keiko, na nagin adikto sa tabako? Isinuherir sa saiya kan tugang na babae na namamayo nin pag-adal sa saiya na basahon nia an manlaenlaen na artikulo sa Awake! dapit sa temang adiksion sa tabako. Ilinaag pa ngani ni Keiko an mga tataramon sa 2 Corinto 7:1 sa saiyang auto bilang aroaldaw na pagirumdom na magdanay na malinig sa pagheling ni Jehova. Pero, dai sia makapondo. “Desganado akong marhay sa sadiri ko,” an paggirumdom ni Keiko. “Kaya pinonan kong hapoton an sadiri ko kun ano talaga an gusto ko​—gusto ko daw na paglingkodan si Jehova o si Satanas?” Kan magdesisyon sia na si Jehova an gusto niang paglingkodan, namibi sia nin maigot para sa tabang. “Sa sakong pagkabigla,” an nagigirumdoman nia, “napondo ko an sakong paninigarilyo na daing gayo nin sakit. Pinagbabasolan ko sana na dai tolos ako naghiro.”

Kamo puede man na magin mapanggana sa pagdaog sa mga balakid sa saindong pag-oswag. Mientras na orog na ikinokomporme nindo an saindong mga kaisipan, pagmawot, tataramon, asin gawe-gawe sa mga pamantayan kan Biblia, orog man kamong magkakaigwa nin paggalang sa sadiri asin kompiansa. An saindong espirituwal na mga tugang na lalaki asin babae, siring man an mga miembro kan pamilya, marerepreskohan asin maeenkaminar kun sinda makaibaiba nindo. An pinakaimportante sa gabos, maparararom nindo an saindong relasyon ki Jehova Dios. Nanuga sia na ‘hahaleon nia an ano man na olang sa dalan kan saiyang banwaan’ kun nagdudulag sa kontrol ni Satanas. (Isaias 57:14) Asin makasisierto kamo na kun maigot nindong hihingoahon na haleon asin daogon an mga balakid sa saindong espirituwal na pag-oswag, bebendisyonan kamo nin igo ni Jehova.

[Nota sa Ibaba]

[Ritrato sa pahina 28]

Nanuga si Jesus na kun may pagtubod, an garo bukid na balakid mapanggaganahan

[Ritrato sa pahina 30]

An pagbasa kan Biblia nagpapakosog sa satong paghihingoa na haleon an espirituwal na mga depekto