Kapangganahan sa Konstitusyonal na Korte Pederal

AN Mga Saksi ni Jehova sa Alemania nagkamit nin dai malilingawan na kapangganahan sa Konstitusyonal na Korte Pederal sa Karlsruhe. Sa siring naggibo sinda nin importanteng lakdang may koneksion sa pagrekonoser sa sainda.

An Mga Saksi ni Jehova aktibo sa Alemania sa laog nin labi nang 100 na taon. Tinagalan ninda an makuring paglamag sa mga kamot kan duwang diktadura sa ika-20 siglo​—an mga Sosyalista Nasyonal asin an mga Komunista. Poon kan 1990, hiningoa kan mga Saksi na makua an legal na pagrekonoser bilang sarong korporasyon na may pampublikong ley. Kasunod nin duwang paborableng desisyon nin korte asin sarong pagkadaog, an mga Saksi nag-apelar sa Konstitusyonal na Korte Pederal, na iinanunsiar an desisyon kaiyan kan Disyembre 19, 2000.

Biyong Sararong Desisyon Apabor sa Mga Saksi ni Jehova

An gabos na pitong mahistrado kan korte nagdesisyon apabor sa mga Saksi. Ginibong imbalido kan mga huwes an sarong desisyon kaidtong 1997 kan Korte Administratibo Pederal asin pinagbotan an korteng iyan na estudyaran liwat an aplikasyon kan mga Saksi.

Ginamit kan Konstitusyonal na Korte Pederal an okasyon na iyan tanganing magkomento dapit sa pundamental na relasyon kan Estado asin kan mga grupong relihioso. Sa pundamental, an kategoriya nin sarong relihion “dinedeterminaran, bakong paagi sa mga paniniwala kaiyan, kundi paagi sa gawe-gawe kaiyan.”

An korte nagkomento man na kun ginigibo kan mga Saksi an “Kristianong neutralidad,” “dai [ninda] inaatake an prinsipyo nin demokrasya” asin “dai [ninda] mawot na salidahan an demokrasya nin ibang porma nin gobyerno.” Huli kaini, an dai pagpartisipar sa politikal na mga eleksion dai maninigong akoon na ebidensia tumang sa mga Saksi sa paghagad ninda nin legal na pagrekonoser.​—Juan 18:36; Roma 13:1.

Sinabi pa kan korte na an sarong may pagtubod​—Saksi man o iba an relihion​—kun beses mamumugtak sa situwasyon kun saen an mga hinahagad kan Estado asin an mga kahagadan kan saiyang relihion magkakontra. Kun sunodon kan indibiduwal an saiyang konsensia paagi sa “pagkuyog sa mga doktrina nin relihion kisa ley,” puedeng mansayon ini kan Estado bilang may katanosan asin oyon sa itinotogot kan relihiosong katalingkasan.​—Gibo 5:29.

Nagin titulo nin mga bareta an desisyon kan korte. Sa haros gabos na peryodiko sa Alemania yaon an bareta dapit sa kaso. An gabos na mayor na telebisyon asin istasyon nin radyo nagbrodkast nin bareta o mga interbio. An ngaran na Jehova dai noarin man kaidto natawan nin siring kahiwas na publisidad sa Alemania.

[Picture Credit Line sa pahina 8]

AP Photo/Daniel Maurer