Mga Hapot Hale sa mga Parabasa

Gurano kalawig na panahon nagdusa si Job?

Naghohona an nagkapira na an mga pagbalo ki Job naglawig nin dakol na taon, alagad an libro nin Job dai nagsasabi kan siring na halawigon na pagdusa.

An enot na kabtang kan mga pagbalo ki Job, an pagkawara kan mga miembro nin pamilya asin rogaring, garo baga halipot sana. Mababasa niato: “Asin uminabot an aldaw na an . . . mga aking lalaki [ni Job] asin an saiyang mga aking babae nagkakarakan asin nag-iirinom nin arak sa harong kan saindang matuang tugang.” Uminabot ki Job an surunodsunod na bareta na sia nawaran​—kan saiyang mga baka, saiyang mga asno, saiyang mga karnero, saiyang mga kamelyo, asin kan mga surugoon na nag-aataman sa kahayopan na idto. Minalataw na pakatapos tolos kaiyan naaraman ni Job an pagkagadan kan saiyang mga aking lalaki asin mga aking babae, na “nagkakarakan asin nag-iirinom nin arak sa harong kan saindang matuang tugang.” Garo baga an gabos na ini nangyari sa laog nin sarong aldaw.​—Job 1:13-19.

An sunod na kabtang kan mga pagbalo ki Job seguradong nangyari sa mas halawig na panahon. Duminolok si Satanas ki Jehova asin naghingako na si Job madadaog kun sia personalmente an magdudusa​—an saiya mismong hawak. Dangan nagkaigwa si Job nin “nakagagadan na pigsa poon sa dapan kan saiyang bitis sagkod sa alimpoporo kan saiyang payo.” An paglakop kan helang na ini sa bilog niang hawak tibaad nahaloyhaloy. Asin posibleng marhay na nagkaipo nin panahon tanganing an bareta kan “gabos na kapahamakan na ini” makaabot sa saiyang mga pararanga daa, na nagduruman sa saiya.​—Job 2:​3-​11.

Si Elifaz hale sa Teman sa daga nin Edom, asin si Zofar hale sa lugar sa amihanan-solnopan na Arabia, kaya an lugar na iniistaran ninda bakong harayo sa lugar ni Job sa Uz, na yaon gayod sa amihanan na Arabia. Minsan siring, si Bildad sarong Suhita, asin masasabotan na an saiyang banwaan nag-iistar sa gilid kan Eufrates. Kun si Bildad yaon sa saiyang lugar na iniistaran kan panahon na idto, tibaad aboton nin mga semana o bulan tanganing maaraman nia an situwasyon ni Job asin magbaklay pasiring sa Uz. Siempre, posible na an tolo yaon sa palibot kan lugar ni Job kan pumoon an saiyang pagdusa. Ano man an kamugtakan, kan umabot an tolong kaibaiba ni Job, sinda “nagdanay na nakatukaw sa daga kaiba nia sa laog nin pitong aldaw asin pitong banggi” na dai nagtataram.​—Job 2:​12, 13.

Dangan uminabot an pangultimong kabtang kan mga pagbalo ki Job, na an mga detalye kaiyan an nakapano sa dakol na kapitulo kan libro. Igwa nin sunod-sunod na mga debate o diskurso kan mga pararanga daa, asin si Job parateng nagsisimbag. Pagkatapos kaiyan, an hoben na si Eliu nagtao nin pagsagwe, asin hale sa kalangitan ikinorehir ni Jehova si Job.​—Job 32:​1-6; 38:1; 40:​1-6; 42:1.

Huli kaini, an pagdusa ni Job asin an pagkaresolber kaiyan tibaad nangyari sa laog nin pirang bulan, tibaad kulang sa sarong taon. Tibaad aram nindo paagi sa eksperyensia na an depisil na mga pagbalo garo baga magpapadagos sagkod lamang. Pero, dai niato dapat na lingawan na iyan matatapos, arog kan ki Job. Gurano man kalawig na magpadagos an mga pagbalo na inaatubang niato, girumdomon ta an pagsuportar nin Dios, siring kan ipinababanaag sa ipinasabong na mga tataramon: “Minsan ngani an kasakitan naagi sana asin magian, iyan nagbubunga para sa samo nin kamurawayan na paorog nang paorog an gabat asin daing katapusan.” (2 Corinto 4:17) Si apostol Pedro nagsurat: “Pakapagdusa nindo sa kadikit na panahon, an Dios kan gabos na dai na kutana maninigong kabootan, na nag-apod sa saindo sa saiyang daing katapusan na kamurawayan na kasaro ni Cristo, iyo an matapos mismo kan saindong pagpatood, paririgonon nia kamo, pakokosogon nia kamo.”​—1 Pedro 5:10.