Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Taano an mga hapot na pinalataw sa Job kapitulo 38 ta maninigong estudyaran dawa ngonyan?

Dakol sa makangangalas na mga gibo na tinawan nin Dios nin atension an dai lubos na nasasabotan dawa kan modernong mga sientista. Kabale digdi an kun paano pinagdadanay kan grabidad an daga sa orbita, kun ano talaga an liwanag, kun taano ta daing katapusan an pagkalaenlaen nin mga niebe, kun paano napoporma an mga toro nin oran, asin kun paano kalabot an enerhiya sa mga dagoldol.​​—4/15, pahina 4-​11.

• Anong mga halimbawa sa Biblia an makakatabang sa sato na makaya an negatibong mga saboot?

Si Asaf, Baruc, asin Noemi napaatubang sa mga panahon nin panluluya nin boot o iba pang negatibong mga saboot, asin makakatabang sa sato an rekord sa Kasuratan kan saindang mapangganang pag-atubang sa siring na mga situwasyon.​​—4/15, pahina 22-4.

• Ano an nagkapirang praktikal na paagi tangani na matabangan an Kristianong mga balo?

An mga katood puedeng magtao nin maboot asin malinaw na tabang. An mga miembro kan pamilya o iba pa tibaad nasa kamugtakan na makatao nin pinansial o materyal na tabang, kun saen may tunay na pangangaipo. Makakatabang man an mga kapwa Kristiano paagi sa pagtao nin mamomoton na tabang nin pagigin magkatood, pagtao nin espirituwal na suporta asin karangahan.​​—5/1, pahina 5-7.

• Taano ta importante na magpakasal ‘sana sa Kagurangnan,’ na isinasadol kan 1 Corinto 7:39?

An pag-agom sa daing pagtubod parateng nagigin kapahapahamak. Apuera dian, an pagsunod sa sadol na ini nin Dios kaimbodan ki Jehova Dios. Kun sinusunod ta an Tataramon nin Dios, dai kita kinokondenar kan satong puso. (1 Juan 3:​21, 22)​​—5/15, pahina 20-1.

• Huling si Jehova an makakapatawad kan satong mga kasalan, taano an mga Kristiano ta nagbubuyboy nin magabat na mga kasalan sa kamagurangan na lalaki sa kongregasyon?

Iyo, kapatawadan ni Jehova kan magabat na mga kasalan an kaipuhan na hagadon nin sarong Kristiano. (2 Samuel 12:13) Alagad kun paanong tinawan ni propeta Natan nin tabang si David, matatabangan man nin maygurang na kamagurangan na lalaki sa kongregasyon an nagsosolsol na mga parakasala. An pagdolok sa kamagurangan kaoyon kan instruksion na itinao sa Santiago 5:​14, 15.​​—6/1, pahina 31.

• Ano an ebidensia na maninigo niatong asikasohon an mga ilo asin balo na nangangaipo?

Ipinaheheling kan historikong rekord na an siring na pag-asikaso tanda nin tunay na pagsamba sa tahaw kan suanoy na mga Hebreo sagkod kan enot na mga Kristiano. (Exodo 22:​22, 23; Galacia 2:​9, 10; Santiago 1:27) Iiniba ni apostol Pablo sa Kasuratan an klarong mga instruksion para sa mga Kristiano na asikasohon an mga balong nangangaipo. (1 Timoteo 5:​3-​16)​​—6/15, pahina 9-​11.

• Ano an liabe sa sarong maogma, makahulogan na buhay?

Dapat niatong kultibaron asin papagdanayon an tamang relasyon ki Jehova, an satong langitnon na Ama. An pag-adal sa Biblia sarong importanteng tabang sa satong paggibo mismo kaiyan.​​—7/1, pahina 4-5.

• An lambang tawo daw igwa nin inmortal na espiritu na nagdadanay na buhay pagkagadan?

Minsan ngani an nagkapira naniniwala na may espiritu​​—bakong kalag​​—na inmortal, dai sinusuportaran kan Biblia an ideyang ini. Ipinaheheling kaiyan na pagnagadan an tawo, sia minabalik sa kabokabo asin dai na nag-eeksister. Alagad nasa Dios pa man giraray an kakayahan na ibalik sia sa buhay, kaya an ano man na paglaom para sa buhay sa ngapit, paagi sa pagkabuhay liwat, nakadepende sa Dios. (Eclesiastes 12:7)​​—7/15, pahina 3-6.

• Haen si Daniel kan an tolong Hebreo baloon sa kaplanodohan nin Dura?

Mayong sinasabi an Biblia. Tibaad dai obligado si Daniel na dumuman huli sa saiyang ranggo, o tibaad mayo sia dahel sa sarong opisyal na asignasyon. Alagad makakokompiar kita na dai nia ikinompromiso an saiyang pagigin fiel ki Jehova.​​—8/1, pahina 31.