An Diablo—Bakong Superstisyon Sana

“Sa bilog na Bagong Tipan maheheling an grabeng pagkakalaban sa tahaw kan puersa nin Dios asin nin karahayan, sa sarong lado, asin kan karatan na pinangengenotan ni Satanas, sa ibong na lado. Bako ining pakasabot nin saro o duwang parasurat, kundi lakop na pinagkakaoroyonan. . . . Kun siring an patotoo kan Bagong Tipan malinaw. Si Satanas totoong labi-labi karaot, pirmeng laban sa Dios asin sa banwaan nin Dios.”​—“The New Bible Dictionary.”

KUN siring, taano ta hinahaboan nin dakol na naghihingakong Kristiano​—asin naghihingakong tinutubod an Biblia​—an ideya na igwa nin totoong Diablo na nag-eeksister? Huli ta, an totoo, dai ninda inaako an Biblia bilang Tataramon nin Dios. (Jeremias 8:9) Sabi ninda, an ipinahayag kan mga kagsurat kan Biblia iyo an mga pilosopiya kan mga nasyon na nasa palibot ninda asin dai ipinaabot nin eksakto an katotoohan hale sa Dios. Halimbawa, an Katolikong teologo na si Hans Küng nagsurat: “An mitolohikong mga ideya manongod ki Satanas na may kaibang hukbo  nin mga demonyo . . . nakalaog hale sa mitolohiyang Babilonyo pasiring sa enot na Judaismo asin hale dian nakalaog sa Bagong Tipan.”​—On Being a Christian.

Alagad an Biblia bako sanang tataramon nin mga tawo; iyan talaga an ipinasabong na Tataramon nin Dios. Madonong, kun siring, na seryosohon niato an sinasabi kaiyan manongod sa Diablo.​—2 Timoteo 3:​14-​17; 2 Pedro 1:​20, 21.

Ano an Saboot ni Jesus?

Nagtubod si Jesu-Cristo na an Diablo totoo. Si Jesus dai tinentaran nin sarong maraot na yaon sa laog nia. Sia inatake nin sarong totoong persona na kan huri inapod nia na “an namamahala sa kinaban.” (Juan 14:30; Mateo 4:1-11) Nagtubod man sia na an iba pang mga linalang na espiritu nagsuportar ki Satanas sa saiyang maraot na mga pakana. Pinaomayan nia an mga tawong “sinaniban nin demonyo.” (Mateo 12:​22-​28) Dawa an publikasyon nin ateista na A Rationalist Encyclopædia nagkomento dapit sa kahulogan kaini kan ini magsabi: “Ini an pirmeng nagigin singkogan kan mga teologo kun paanong inako kan Jesus kan mga Ebanghelyo an paniniwala sa mga demonyo.” Kan magtaram si Jesus manongod sa Diablo asin sa saiyang mga demonyo, dai nia sana inootro an mga superstisyon na hale sa mitolohiyang Babilonyo. Aram nia na sinda totoong nag-eeksister.

Makakanood kita nin orog manongod sa Diablo kun eestudyaran niato an mga tataramon ni Jesus sa relihiosong mga paratokdo kan kaaldawan nia: “Gikan kamo sa saindong ama na Diablo, asin boot nindo na gibohon an mga mawot kan saindong ama. An sarong iyan sarong paragadan kan sia pumoon, asin dai sia nagdanay sa katotoohan, huli ta mayo sa saiya an katotoohan. Kun sia nagtataram nin putik, sia nagtataram oyon sa saiyang sadiring boot, huli ta sia sarong putikon asin iyo an ama kan kaputikan.”​—Juan 8:44.

Oyon digdi, an Diablo, sarong ngaran na an kahulogan “parabalobagi,” “sarong putikon asin iyo an ama kan kaputikan.” Sia an enot na linalang na nagputik manongod sa Dios, asin ginibo nia iyan kaidto pa sa hardin nin Eden. Sinabi ni Jehova na an satong enot na mga magurang “siertong magagadan” kun makakan sinda hale sa kahoy kan pakamidbid sa marahay asin maraot. Paagi sa ngoso nin sarong halas, sinabi ni Satanas na bakong totoo an mga tataramon na iyan. (Genesis 2:17; 3:4) Angay nanggad, sia inapod na “an enot na halas, an inaapod Diablo asin Satanas.”​—Kapahayagan 12:9.

An Diablo nagputik manongod sa kahoy kan pakamidbid sa marahay asin maraot. An pagbabawal sa pagkakan hale sa kahoy na iyan, an idiniskutir nia, mayo nin marahay na basehan; iyan pag-abuso sa kapangyarihan. Si Adan asin Eva, sabi nia, puedeng ‘magin arog nin Dios’ sa pagdedesisyon para sa sadiri ninda kun ano an marahay asin kun ano an maraot. Isinuherir ni Satanas na bilang mga libre ahente moral, maninigo na sinda lubos na makapagdesisyon para sa saindang sadiri. (Genesis 3:1-5) An pag-atakeng ini sa pagigin tama  kan paagi nin pamamahala nin Dios nagpalataw nin importanteng mga isyu. Kaya tinawan ni Jehova nin panahon na maresolberan an mga isyung ini. Nangangahulogan ini na tinogotan si Satanas na padagos na mabuhay sa halipot na panahon. An saiyang limitadong panahon marikas nang nauubos. (Kapahayagan 12:12) Pero, padagos niang isinisiblag an katawohan sa Dios paagi sa mga pagputik asin panloloko, na ginagamit an mga tawo arog kan mga eskriba asin Fariseo kan kaaldawan ni Jesus tanganing palakopon an saiyang mga katokdoan.​—Mateo 23:13, 15.

Sinabi man ni Jesus na an Diablo “sarong paragadan kan sia pumoon” asin na “dai sia nagdanay sa katotoohan.” Dai ini nangangahulogan na linalang ni Jehova an Diablo bilang “sarong paragadan.” Dai sia linalang na magin sarong klase nin mampak na namamahala sa sarong lugar nin kalayo asin pasakit para sa siisay man na kontra sa Dios. An “impierno” sa Biblia bakong an erokan ni Satanas. Iyan sana an pankagabsan na lolobngan nin katawohan.​—Gibo 2:​25-​27; Kapahayagan 20:​13, 14.

Sa kapoonpooni an Diablo yaon “sa katotoohan.” Kabtang sia kaidto kan langitnon na pamilya ni Jehova bilang sangkap na espiritung aki nin Dios. Alagad dai sia “nagdanay sa katotoohan.” Mas suno nia an sadiri niang mga dalan asin an sadiri niang mga prinsipyo na basado sa kaputikan. ‘Sia puminoon,’ bakong kan sia lalangon bilang sarong anghel na aki nin Dios, kundi kan sia tuyong nagrebelde tumang ki Jehova asin nagputik ki Adan asin Eva. An Diablo kapareho kan mga tawong nagrebelde tumang ki Jehova kan panahon ni Moises. Mababasa niato an manongod sa sainda: “Sinda guminawe nin kapahapahamak sa sadiri ninda; sinda bako niang mga aki, an kakundian sadiri ninda.” (Deuteronomio 32:5) Arog man kaiyan an masasabi manongod ki Satanas. Sia nagin “paragadan” kan sia magrebelde asin magin responsable sa pagkagadan ni Adan asin Eva saka, sa katunayan, kan bilog na pamilya nin tawo.​—Roma 5:12.

Suwayan na mga Anghel

An ibang mga anghel uminiba ki Satanas sa saiyang pagrebelde. (Lucas 11:​14, 15) An mga anghel na ini “nagbaya sa saindang sadiring tamang erokan” asin nagmateryalisar sa mga hawak nin tawo tanganing kamtan an seksuwal na relasyon sa “mga aking babae nin mga tawo” kan kaaldawan ni Noe. (Judas 6; Genesis 6:1-4; 1 Pedro 3:​19, 20) “An ikatolong kabtang kan mga bitoon sa langit,” o an minoriya kan espiritung mga linalang, pinili an dalan na ini.​—Kapahayagan 12:4.

Ilinaladawan kan labi-labi kasimbolikong libro nin Kapahayagan an Diablo bilang “sarong dakulang dragon na kolor kalayo.” (Kapahayagan 12:3) Taano? Bakong huli ta sia literal na makatatakot, makanos an hawak. Sa katunayan, dai niato aram kun anong klase an hawak kan espiritung mga linalang, alagad posible na si Satanas dai napapalaen sa ibang anghel na espiritung linalang sa bagay na iyan. Minsan siring, an “sarong dakulang dragon na kolor kalayo” angay na deskripsion sa dai naiinggustohan, makatatakot, makapangyarihan, asin mapanlaglag na disposisyon ni Satanas.

Si Satanas asin an mga demonyo igwa na ngonyan nin estriktong mga restriksion. Dai na sinda puedeng magmateryalisar arog kan puede nindang gibohon kaidto. Dai nahaloy pakatapos na maestablisar an Kahadean nin Dios sa kamot ni Cristo kan 1914, ihinolog sinda sa palibot kan daga.​—Kapahayagan 12:​7-9.

An Diablo Sarong Kalaban na Masakit Daogon

Dawa siring, an Diablo saro pa man giraray na kalaban na masakit daogon. Sia “naglalakaw na siring sa nagngangarob na leon, na naghahanap nin masisiba.” (1 Pedro 5:8) Sia bakong malibog na prinsipyo nin karatan na yaon sa satong bakong sangkap na hawak. Totoo, aroaldaw talagang nakikipagtusayan kita tumang sa sato mismong makasalan na mga inklinasyon. (Roma 7:​18-​20) Alagad an tunay na pakipagtusayan iyo an “tumang  sa mga namamahala sa kinaban sa kadikloman na ini, tumang sa maraot na mga puersang espiritu sa langitnon na mga lugar.”​—Efeso 6:12.

Gurano kalakop an impluwensia kan Diablo? “An bilog na kinaban namumugtak sa kapangyarihan kan maraot,” an sabi ni apostol Juan. (1 Juan 5:19) Siempre, habo niatong pagparaisipon an manongod sa Diablo o togotan an superstisyosong pagkatakot sa saiya na garo makaparalisar sa sato. Pero, madonong na kita magdanay na puka sa mga paghihingoa nia na butahon kita sa katotoohan asin raoton an satong integridad sa Dios.​—Job 2:​3-5; 2 Corinto 4:​3, 4.

An Diablo dai man pirmeng naggagamit nin maringis na mga paagi sa pag-atake sa mga gustong gibohon an kabotan nin Dios. Kun beses, ginigibo nia an sadiri nia na garo “anghel nin liwanag.” Pinatanidan ni apostol Pablo an mga Kristiano sa peligrong ini kan sia nagsurat: “Ako natatakot na tibaad, siring na nadaya kan halas si Eva paagi sa katusohan kaiyan, maraot an saindong isip parayo sa sinseridad asin kalinigan na para sa Cristo.”​—2 Corinto 11:​3, 14.

Kun siring kaipuhan niato na ‘magmata, magin puka, asin tumangon sia, na marigon sa pagtubod.’ (1 Pedro 5:​8, 9; 2 Corinto 2:11) Likayan na maniobrahon kita ni Satanas paagi sa pakikisale sa ano man na konektado sa okulto. (Deuteronomio 18:​10-​12) Magin maigot na estudyante kan Tataramon nin Dios, na ginigirumdom na si Jesu-Cristo paorootrong sinambit an Tataramon nin Dios kan sia sugotan kan Diablo. (Mateo 4:​4, 7, 10) Mamibi para sa espiritu nin Dios. Matatabangan kamo kan bunga kaiyan na likayan an mga gibo kan laman, na epektibong marhay na pinalalakop ni Satanas. (Galacia 5:​16-​24) Siring man, odok na mamibi ki Jehova kun minsan paano namamatean nindo na iniimpluwensiahan kamo kan Diablo asin kan saiyang mga demonyo.​—Filipos 4:​6, 7.

Dai kaipuhan na matakot nin grabe sa Diablo. Si Jehova nanunuga nin tunay na proteksion tumang sa ano man na puedeng gibohon ni Satanas. (Salmo 91:​1-4; Talinhaga 18:10; Santiago 4:7, 8) “Padagos kamong magkaigwa nin kosog sa Kagurangnan asin sa kapangyarihan kan saiyang kosog,” an sabi ni apostol Pablo. Dangan kamo ‘marigon na makapaninindogan tumang sa mga pakana kan Diablo.’​—Efeso 6:​10, 11.

[Ritrato sa pahina 5]

Aram ni Jesus na an Diablo sarong totoong persona

[Ritrato sa pahina 6]

“An bilog na kinaban namumugtak sa kapangyarihan kan maraot”

[Credit Line]

Retrato na kua kan NASA

[Mga Ritrato sa pahina 7]

Manindogan kamo tumang sa Diablo paagi sa pag-adal kan Tataramon nin Dios asin pamimibi nin regular