“Ano an Nangyayari sa Pransia?”

An “libertad, mahal na libertad,” mga tataramon hale sa “La Marseillaise,” an himno nasyonal kan Pransia. Daing duda, an libertad sarong bagay na dapat tawan nin halaga. Pero, an dai pa sana nahahaloy na mga pangyayari sa Pransia nakahahadit ta an pundamental na mga katalingkasan pinaluluya. Iyan an dahelan na, kan Biernes, Nobyembre 3, 2000, manampulong ribong Saksi ni Jehova an nagwaras nin total na 12 milyones na kopya nin sarong espesyal na pulyeto na may titulong “Ano an Nangyayari sa Pransia? Puede daw na Rumuro an Katalingkasan?”

SA LAOG nin nagkapirang taon na ngonyan, an mga Saksi ni Jehova sa Pransia inaatake nin laen-laen na grupong politikal asin anti-sekta. Nagbunga ini nin mga problema para sa mga Saksi bilang indibiduwal, kongregasyon, asin sa bilog na nasyon. Minsan siring, kan Hunyo 23, 2000, an Conseil d’État, an korte suprema de administratibo sa Pransia, nagpaluwas nin dai malilingawan na desisyon na nagkompirmar sa presenteng opinyon kan 31 mas hababang korte sa labing 1,100 na kaso. Kinompirmar kan korte suprema na an pagsambang ginigibo kan mga Saksi ni Jehova biyong kaoyon kan ley sa Pransia asin na an saindang mga Kingdom Hall igwa nin deretso sa iyo man sanang piskal na mga iksemsion na itinatao sa ibang relihion.

Minsan siring, biyong iniignoro an desisyon na ini, an Ministri kan Kayamanan kan Gobyerno sa Pransia padagos na isinasayuma sa Mga Saksi ni Jehova an iksemsion sa buhis na itinatao kan ley sa relihiosong mga organisasyon. An Ministri nagpataw nin 60 porsientong buhis sa mga kontribusyon na itinatao kan mga Saksi asin mga katood ninda na asosyado sa 1,500 na lokal na kongregasyon sa Pransia. An kasong ini kinokontestar pa sa presente.

An katuyohan kan nasambit na kampanya iyo na ibuyagyag an masakit paniwalaan pero  totoong nangyayari na ini asin itampok an mga peligro na maririsa sa siring na arbitraryong buhis asin sa iprinoponer na mga ley na mapaluya sa relihiosong katalingkasan kan gabos. *

Sarong Halawig na Aldaw

Kan alas dos nin aga, pinonan kan mga Saksi sa nagkapirang kongregasyon an pagwaras sa luwas kan mga istasyon nin tren asin mga pabrika dangan sa mga aeropuerto. Pag-alas sais, mata na an Paris. Mga 6,000 na boluntaryo an nakapuesto sa estratehikong mga lugar tanganing ranihon an mga nag-aaragi pasiring sa saindang trabaho. An sarong hoben na babae nagkomento: “Marahay an ginigibo nindo para sa relihiosong katalingkasan. Bako sanang mga Saksi ni Jehova an imbuelto.” Sa Marseilles, labing 350 Saksi an nanao kan pulyeto sa mga istasyon nin tren sa irarom kan daga asin sa mga tinampo. Mayo pang sarong oras, iinanunsiar kan radyo nasyonal an kampanya, na sinasabihan an mga naghihinanyog na dai mabigla kun dolokon sinda kan mga Saksi ni Jehova. Sa Strasbourg, an lokasyon kan Korte sa mga Deretso nin Tawo sa Europa, an mga biahero sa istasyon sentral matiyagang nagpirila tanganing matawan kan saindang kopya. An sarong abogado nagkomento na, baga man an opinyon nia laen kan sa sato, interesado niang sinusubaybayan an satong kaso, huli ta an satong laban importante asin makatanosan.

Kan alas otso, sa ibong kan makosog na oran, an 507 Saksi sa siudad nin Grenoble sa Alpes sinurod an mga tinampo o ikinaag an pulyeto sa mga buson. An mga nagmamaneho nin kotse asin trambia, kan maheling na may nangyayari, pinapondo an saindang mga sasakyan tanganing humagad nin pulyeto. Sa solnopan na siudad nin Poitiers, an mga biahero na nag-aarabot lunad sa tren kan alas nuebe nakaresibi na kan pulyeto sa saindang pinaghalean. Sa Mulhouse, harani sa linderos kan Alemania, 40,000 na kopya an ikinapanao na.

Pag-alas dies, dakol na kongregasyon an ikinawaras na an labing kabanga kan saindang mga pulyeto. Mantang nag-aagi an oras kan aga, kakadikit na tawo an nagsasayuma, asin dakol na interesanteng pag-orolay an nagin resulta. Sa Besançon, labing 80 kilometros sana an distansia sa linderos nin Suiza, sarong hoben na lalaki an nagpahayag nin interes sa Biblia asin naghapot kun taano ta tinotogotan nin Dios an pagdusa. Inimbitaran sia kan Saksi na ipadagos an pag-oolay sa haraning Kingdom Hall, kun saen naponan tolos an pag-adal sa Biblia sa brosyur na Ano an Kahagadan sa Sato nin Dios?

Kan odto ginamit kan dakol na Saksi an saindang pahingalo sa odto tanganing maghulit nin saro o duwang oras. Sa bilog na hapon, nagpadagos an pagwaras, na kadakol na kongregasyon an nakatapos pag-abot nin alas tres o alas kuatro kan hapon na idto. Sa pangenot na pagibohan nin tsampan sa siudad nin Reims, an nagkapirang tawo na nakipag-adal o nakiasosyar na sa mga Saksi ni Jehova kaidto nagsabi na gusto giraray nindang ipadagos an saindang pakikiasosyar sa kongregasyon. Sa Bordeaux tolong pag-adal sa Biblia an naponan. Sa siudad man sanang iyan, an sarong Saksi naglaog sa sarong tindahan tanganing bumakal nin diaryo asin naheling nia sa counter an sarong tapong nin mga pulyeto. An kagsadiri, na dating Saksi, nakaresibi kan pulyeto asin, huling narealisar an importansia kaiyan, ipinaseroks iyan tanganing ipanao nia mismo.

Sa Le Havre, Normandy, nabigla an sarong babaeng Protestante kan madangog sa radyo na an mga kontribusyon kan mga Saksi ni Jehova pinapatawan nin buhis. Galaga niang inako an pulyeto  asin pinelisitar an mga Saksi huli sa pagpahayag nin pagkontra sa siring na inhustisya. Kan alas 7:20 n.b., an bareta sa rehional na TV sa Lyons nagkomento dapit sa pagwaras, na nagsasabi: “Kasubagong aga mas pasil pang makalikay sa pag-oltanan kan mga toro nin oran kisa likayan an mga pulyeto kan mga Saksi ni Jehova.” Duwang Saksi an ininterbio asin ipinaliwanag an mga dahelan kan kampanya.

An mga Saksi na gustong makikabtang pagkatapos kan saindang sekular na trabaho nagwaras nin mga pulyeto sa papuli na nag-aaragi asin ibinugtak an iba sa mga buson. Sa mga banwaan na arog kan Brest asin Limoges​​—na bantog sa porselana kaiyan​—an mga tawong nagruruluwas sa sinehan kan alas 11:00 n.b. kabilang sa mga ultimong nakaresibi kan pulyeto kan aldaw na iyan. An natadang mga pulyeto tinipon asin iwinaras kan sunod na aga.

Mga Resulta

An sarong Saksi nagsurat: “Paghona kan mga kaiwal ta napapaluya ninda kita. An totoo, kabaliktaran an nangyayari.” Sa kadaklan na kongregasyon, labing 75 porsiento kan mga Saksi an nakikabtang kan aldaw na iyan, na an nagkapira 10, 12, o 14 oras an ginamit sa aktibidad na ini. Sa Hem, sa amihanan nin Pransia, pagkatapos nin pambangging relyibo, an sarong Saksi nagwaras kan pulyeto poon alas singko nin aga sagkod alas tres nin hapon. Sa kaharaning Denain, na duman igwa nang kongregasyon poon 1906, 75 Saksi an naggamit nin 200 na oras sa pagwaras kan pulyeto kan Biernes. An iba, sa ibong kan kagurangan, kamatean, asin maraot na panahon, desidido man na makikabtang. Halimbawa, sa Le Mans an tolong babae na labi nang 80 anyos naggamit nin duwang oras sa pagkaag kan pulyeto sa mga buson, asin an sarong Saksi na nasa silyang de rueda nanao kan pulyeto sa atubangan kan istasyon nin tren. Asin kanigoan kanakaparirigon sa boot na maheling an kadakol na dating inaktibong Saksi na nakikabtang sa espesyal na aktibidad na ini!

Daing duda, an pagwaras na ini nagbunga nin dakulang patotoo. An mga tawo sa gabos na klase nin pamumuhay, na an dakol bihirang makaolay sa saindang harong, natawan nin kopya kan pulyeto. Kadakol na indibiduwal an naniwala na an nahaman kan aksion na ini bako sana nanggad na para sa proteksion kan kapakanan kan mga Saksi. Minansay iyan kan dakol bilang sarong depensa sa katalingkasan nin konsensia asin pagsamba kan gabos na Pranses. Bilang ebidensia kaini, may mga tawo na naghagad nin dugang pang kopya kan pulyeto na itatao sa mga katood, katrabaho, o paryente.

Iyo, an mga Saksi ni Jehova sa Pransia nag-oorgolyo na ipamidbid an ngaran ni Jehova asin idepensa an intereses kan Kahadean. (1 Pedro 3:15) Odok na linalaoman ninda na sinda ‘makapamumuhay nin tiwasay asin toninong na may lubos na diosnon na debosyon asin kapormalan’ asin na rinibo pa an maiba sa sainda sa pag-omaw sa saindang langitnon na Ama, si Jehova.​—1 Timoteo 2:2.

[Nota sa Ibaba]