Kun Paano Kamo Makagigibo nin Marahay na mga Desisyon

AN LIBRENG kabotan sarong balaog hale sa Dios. Kun mayo kaiyan, kita magigin siring sa mga robot, na mayo nin kontrol sa satong mga ginigibo. Minsan siring, kun igwa kaiyan, napapaatubang kita sa mga kadepisilan. Huling igwa nin libreng kabotan, kaipuhan kitang gumibo nin mga desisyon mantang kita nabubuhay.

Siempre, an dakol na desisyon medyo bako man na mahalaga. An iba, siring baga kan kun anong karera an pipilion o kun baga maagom, puedeng maapektaran an bilog niatong ngapit. Pero an iba naaapektaran an ibang tawo. An nagkapirang desisyon na ginigibo nin mga magurang dakula an epekto sa saindang mga aki. Dugang pa, kaipuhan niatong manimbag sa Dios sa dakol na desisyon na ginigibo niato.​—Roma 14:12.

An Pangangaipo Para sa Tabang

An mga tawo mayo nin marahay na rekord kun mapadapit sa paggibo nin desisyon. An saro sa pinakaenot na mga desisyon nin tawo na nakarekord nagin kapahapahamak. Nagdesisyon si Eva na kakanon an prutas na malinaw na ipinagbawal nin Dios. An saiyang pagpili, na basado sa paslong kamawotan, an nagdara sa saiyang agom na umiba sa saiya sa pakisuway sa Dios, asin nagresulta nin grabeng pagdusa para sa katawohan. Sa dakol na kaso, mas ibinabasar pa man giraray kan mga tawo an saindang mga desisyon sa paslong mga pagmawot kisa sa tamang mga prinsipyo. (Genesis 3:​6-​19; Jeremias 17:9) Asin kun napapaatubang sa magabat na mga desisyon, sa parate naririsa niato an satong mga limitasyon.

Bakong makangangalas, kun siring, na kun naggigibo nin importanteng mga desisyon, dakol an naghahagad nin tabang sa gikanan na mas halangkaw kisa tawo. Irinekord sa Biblia an sarong pangyayari kan si Nabucodonosor, na yaon sa tahaw nin sarong kampanya militar, igwa nin desisyon na dapat gibohon. Minsan ngani sia sarong hade, nakamate sia nin pangangaipong “makihumapot sa dibinasyon,” magkonsulta sa mga espiritu. Huli kaini, an rekord nagsasabi: “Yinugyug nia an mga pana. Naghapot sia paagi sa terafim; nagheling sia sa katoy.” (Ezequiel 21:21) Kaagid kaiyan ngonyan, dakol an nagkokonsulta sa mga parahimalad asin astrologo patin sa iba pang mga paagi nakikihumapot sa mga espiritu. Alagad an mga ini mapandaya asin nakakalagalag.​—Levitico 19:31.

Igwa nin Saro na biyong masasarigan asin sa bilog na kasaysayan nagtabang sa mga tawo sa paggibo nin madonong na mga desisyon. An saro na iyan mayo na nin iba kundi si Jehova Dios. Halimbawa, kan suanoy na mga panahon, itinao nin Dios sa saiyang nasyon, an Israel, an Urim asin an Tummim​—na posibleng sagradong mga bagay na ginagamit sa pagpabunotan kun an nasyon napapaatubang sa mga situwasyon na may dakulang importansia. Paagi sa Urim asin Tummim, itinatao ni Jehova an direktang mga simbag sa mga hapot asin tinatabangan an kamagurangan kan Israel tanganing seguradohon na an saindang mga desisyon kaoyon kan saiyang kabotan.​—Exodo 28:30; Levitico 8:8; Bilang 27:21.

Estudyare an saro pang halimbawa. Kan inapod si Gedeon tanganing pangenotan an hukbo nin Israel tumang sa Midian, kaipuhan niang magdesisyon kun baga aakoon an siring na halangkawon na pribilehio. Si Gedeon, na gustong maasegurar giraray na susuportaran sia ni Jehova, naghagad nin sarong  milagrosong tanda. Namibi sia na an balukag nin karnero na yaon sa luwas nin magdamlag mabasa nin ambon alagad ta an daga sa palibot kaiyan magdanay na mara. Kan sumunod na banggi, hinagad nia na an balukag nin karnero magdanay na mara mantang an daga sa palibot kaiyan sagom nin ambon. May kabootan na itinao ni Jehova ki Gedeon an mga tanda na hinagad nia. Bilang resulta, nagibo ni Gedeon an tamang desisyon asin, sa pagsuportar nin Dios, biyong nadaog an mga kalaban kan Israel.​—Hukom 6:​33-​40; 7:​21, 22.

Kumusta Man Ngonyan?

Ngonyan, nagtatao pa man giraray si Jehova nin tabang sa mga lingkod nia kun sinda napapaatubang sa importanteng mga desisyon. Paano? Maninigo daw kitang humagad, arog ni Gedeon, nin ‘pagbalo paagi sa balukag nin karnero,’ na mga tanda hale ki Jehova tanganing ipaheling sa sato an dalan na dapat tang dumanan? Nag-isip-isip an sarong mag-agom kun baga maninigo sindang bumalyo tanganing maglingkod kun saen mas dakula an pangangaipo para sa mga parahulit kan Kahadean. Tanganing matabangan sindang makapagdesisyon, guminibo sinda nin sarong pagbalo. Ipapabakal ninda an saindang harong sa itinalagang kantidad. Kun an harong mabakal sa sarong itinalaan na petsa sa itinalagang kantidad o mas halangkaw pa, sasaboton ninda iyan bilang tanda na gusto nin Dios na bumalyo sinda. Kun dai mabakal an harong, ikokonklusyon ninda na habo nin Dios na bumalyo sinda.

Dai nabakal an harong. Iyan daw nagpaparisa na habo ni Jehova na maglingkod an mag-agom na ini kun saen mas dakula an pangangaipo? Siempre, magigin kapangahasan an pagsabi nin positibo kun ano an ginigibo o dai ginigibo ni Jehova para sa saiyang mga lingkod. Dai niato masasabi na si Jehova nungkang nag-iinterbenir ngonyan tanganing ipaheling an kabotan nia para sa sato. (Isaias 59:1) Minsan siring, mayo kitang deretso na asahan an siring na pag-interbenir sa satong mayor na mga desisyon, na garo man sana ipinapabaya na sa Dios an paggibo niato nin desisyon. Tara, dawa si Gedeon sa kadaklan na panahon kan saiyang buhay kinaipuhan na gumibo nin mga desisyon na mayo nin milagrosong mga tanda hale ki Jehova!

Pero, sinasabi talaga kan Biblia na makukua an paggiya nin Dios. Ihinuhula kaiyan an dapit sa satong panahon: “An saimong mga talinga makadadangog nin tataramon sa likod mo na nagsasabi: ‘Iyo ini an dalan. Maglakaw kamo dian,’ enkaso kamo pumatoo o enkaso kamo pumawala.” (Isaias 30:21) Kun kita napapaatubang sa importanteng mga pagpili, tama nanggad na hingoahon na makasegurado na an satong desisyon kaoyon kan kabotan nin Dios asin nagpapabanaag kan saiyang nakalalabing kadonongan. Paano? Paagi sa pagkonsulta sa saiyang Tataramon asin pagtogot dian na magin ‘ilawan sa satong bitis, asin liwanag sa satong dalan.’ (Salmo 119:105; Talinhaga 2:​1-6) Tanganing magibo ini, kaipuhan niatong kultibaron an ugale na paglaog sa isip kan tamang kaaraman hale sa Biblia. (Colosas 1:​9, 10) Asin kun napapaatubang sa sarong pagdedesisyon, kaipuhan niato an maingat na pagsiyasat sa gabos na prinsipyo sa Biblia na may koneksion sa bagay na iyan. An siring na pagsiyasat mapangyari sa sato na “makasierto sa orog na mahalagang mga bagay.”​—Filipos 1:​9, 10.

Maninigo man na makipag-olay kita ki Jehova sa pamibi, kompiado na dadangogon nia kita. Abaa kanakararanga na ieksplikar sa satong mamomoton na Dios an desisyon na kaipuhan na gibohon niato asin an mga pagpipilian na kinokonsiderar niato! Dangan, kompiado kitang makahahagad nin paggiya sa paggibo kan tamang desisyon. Sa parate, ipagigirumdom sa sato kan banal na espiritu an mga prinsipyo sa Biblia na aplikado, o tibaad tabangan kita kaiyan na masabotan nin mas malinaw an sarong  teksto na may koneksion sa satong situwasyon.​—Santiago 1:​5, 6.

Si Jehova nagtatao man nin mga maygurang sa kongregasyon na puede niatong ipakipag-olay an satong mga desisyon. (Efeso 4:​11, 12) Pero, sa pagkonsulta sa iba, dai niato maninigong arogon an ginigibo kan mga minadolok sa manlaenlaen na tawo sagkod na sa katapustapusi manompongan ninda an saro na nagsasabi kan gusto nindang madangog. Dangan sinusunod ninda an sadol kaini. Maninigo man niatong girumdomon an nagpapatanid na halimbawa ni Roboam. Kan napaatubang sia sa magabat na desisyon, nag-ako sia nin marahayon na sadol hale sa kamagurangan na lalaki na naglingkod kaiba kan saiyang ama. Minsan siring, imbes na sunodon an saindang hatol, sia nagkonsulta sa hoben na mga lalaki na kagubay nia. Huling sinunod an sadol ninda, sia nakagibo nin maraot na marhay na desisyon asin bilang resulta nawara an dakulang kabtang kan saiyang kahadean.​—1 Hade 12:​1-​17.

Kun naghahagad nin hatol, hagadon iyan sa mga may eksperyensia sa buhay asin may igong kaaraman sa Kasuratan patin may hararom na paggalang sa tamang mga prinsipyo. (Talinhaga 1:5; 11:14; 13:20) Kun posible, tawan nin panahon na horophoropon an imbueltong mga prinsipyo asin an gabos na impormasyon na natipon nindo. Mantang nasasabotan nindo an mga bagay sa liwanag kan Tataramon ni Jehova, an tamang desisyon posibleng marhay na magin mas risang-risa.​—Filipos 4:​6, 7.

An mga Desisyon na Ginigibo Niato

An nagkapirang desisyon madaling gibohon. Kan pagbotan na pumondo sa paghuhulit, aram kan mga apostol na kaipuhan nindang padagos na maghulit manongod ki Jesus, asin tolos-tolos nindang inimpormaran an Sanhedrin kan saindang desisyon na kuyogon an Dios imbes na tawo. (Gibo 5:​28, 29) An iba pang desisyon tibaad nangangaipong orog na pag-isipan huli ta mayo nin direktang sinasabi an Biblia manongod sa bagay na iyan. Pero, an mga prinsipyo sa Biblia parateng matao nin liwanag sa pinakamarahay na desisyon na gigibohon. Halimbawa, minsan ngani dakol na klase nin aling-alingan ngonyan an mayo kan panahon ni Jesus, igwa nin malinaw na sinasabi an Biblia kun ano an inooyonan ni Jehova asin kun ano an ikinaaanggot nia. Sa siring, an siisay man na Kristiano na naiimbuelto sa mga aling-alingan na nagpapalakop nin kadahasan, inmoralidad, o pagigin rebelyoso nakagibo nin maraot na desisyon.​—Salmo 97:10; Juan 3:​19-​21; Galacia 5:​19-​23; Efeso 5:​3-5.

Kun beses, an duwang desisyon tibaad parehong tama. An paglilingkod kun saen mas dakula an pangangaipo sarong marahayon na pribilehio asin puedeng magbunga nin dakulang mga bendisyon. Alagad kun an saro huli sa sarong dahelan magdesisyon na dai gibohon iyan, sia puede pa man giraray na makagibo nin marahay sa sadiri niang kongregasyon. May beses na, tibaad mapaatubang kita sa sarong desisyon na matao sa sato nin oportunidad na ipaheling an rarom kan satong debosyon ki Jehova o kun ano an pinakaimportante sa satong buhay. Sa siring, tinotogotan kita ni Jehova na gamiton an satong libreng kabotan tanganing ipaheling kun ano talaga an yaon sa puso niato.

Sa parate, an iba naaapektaran kan satong mga desisyon. Halimbawa, an mga Kristiano kan enot na siglo naggayagaya na magin talingkas sa dakol na restriksion kan Ley. Halimbawa, nangahulogan ini na puede nindang akoon o sayumahan an kakanon na maati segun sa Ley. Pero, inenkaminar sinda na konsideraron an konsensia kan iba kun nagdedesisyon kun baga gagamiton an katalingkasan na ini. An mga tataramon ni Pablo dapit sa bagay na ini puedeng  umaplikar sa dakol na desisyon na ginigibo niato: “Dai kamo magin mga dahelan nin pagkasingkog.” (1 Corinto 10:32) An pagmawot na dai makapasingkog sa iba an tibaad makatabang sa pagdeterminar sa dakol na desisyon na ginigibo niato. Total, an pagkamoot sa kapwa an ikaduwa sa nakalalabi sa gabos na togon.​—Mateo 22:​36, 39.

An Resulta kan Satong mga Desisyon

An mga desisyon na ginibo na igwa nin marahay na konsensia asin basado sa mga prinsipyo kan Biblia pirmeng magkakaigwa nin marahay na resulta sa kahurihurihi. Siempre, sa halipot na panahon tibaad magresulta iyan sa sarong personal na pagsakripisyo. Kan sinabi kan mga apostol sa Sanhedrin an saindang desisyon na padagos na maghulit manongod ki Jesus, sinda hinampak bago sinda binutasan. (Gibo 5:40) Kan magdesisyon an tolong Hebreo​​—si Sadrac, Mesac, asin Abednego​—na dai sinda mahuruhod sa bulawan na imahen ni Nabucodonosor, isinapeligro ninda an saindang buhay. Andam nindang atubangon an posibilidad na an desisyon ninda puedeng mangahulogan kan saindang kagadanan. Alagad aram ninda na sinda ooyonan asin bebendisyonan nin Dios.​—Daniel 3:​16-19.

Kun mapaatubang kita sa mga problema pakatapos na gibohon an sono sa konsensiang desisyon, bako iyan na rason tanganing honaon na an desisyon sala. An “panahon asin pagkanorongod” puedeng makaapektar nin bakong paborable sa resulta kan dawa mga desisyon na may pinakamarahay na intension. (Eclesiastes 9:11) Dugang pa, kun beses tinotogotan ni Jehova an kasakitan tanganing baloon an rarom kan satong dedikasyon. Kinaipuhan ni Jacob na magdamlag na makigumolan sa sarong anghel bago nakakua nin bendisyon. (Genesis 32:24-​26) Kita tibaad kaipuhan man na makigumolan sa kasakitan, dawa kun ginigibo niato an tama. Pero, kun an satong mga desisyon kaoyon kan kabotan nin Dios, makakokompiar kita na tatabangan nia kita na makatagal asin na sa katapustapusi bebendisyonan nia kita.​—2 Corinto 4:7.

Huli kaini, kun naggigibo nin importanteng desisyon, dai magsarig sa sadiri nindong kadonongan. Siyasaton an mga prinsipyo sa Biblia na aplikado. Ipakipag-olay ki Jehova an manongod sa bagay na iyan. Kun posible, magkonsulta sa maygurang na mga kapwa Kristiano. Dangan magin makosog an boot. Gamiton an saindong tao nin Dios na libreng kabotan sa responsableng paagi. Gumibo nin marahay na desisyon asin ipaheling ki Jehova na an saindong puso tanos sa atubangan nia.

[Ritrato sa pahina 29]

Konsultahon an Tataramon nin Dios bago gumibo nin importanteng mga desisyon

[Mga Ritrato sa pahina 29, 30]]

Ipakipag-olay ki Jehova an mga desisyon na kaipuhan nindong gibohon

[Ritrato sa pahina 31]

Puede nindong ipakipag-olay an saindong mayor na mga desisyon sa maygurang na mga Kristiano