Magin Mapagpasalamat Asin Magin Maogma

“AN NATURAL na tendensia nin pagpasalamat sarong pundamental na eksperyensia nin tawo,” sabi kan Calgary Herald, sarong peryodiko sa Canada. Kinotar kan Herald an nagkapirang nuebe anyos na estudyante sa elementarya na pinasurat kan saindang maestra manongod sa gabos na bagay na ipinagpapasalamat ninda. An sarong aki nagsabi na sia nagpapasalamat para sa saiyang pamilya ‘huli ta inataman sia ninda.’ Sarong aking babae man an nagpapasalamat para sa saiyang pamilya, na nagsabi: “Pinapagdadanay ninda akong ligtas, may marahay na salud, inaataman ako, namomotan ako, pinakakakan ako, asin kun bako sa sakong mga magurang, mayo kutana ako sa dagang ini.”

An pagigin ingrato nagbubunga nin pabalikbalik na pagkadeskontento. Segun sa pilosopo-teologo na si J. I. Packer, “kita linalang na mabuhay na nagdedepende sa Dios asin parareho nagdedenependehan sa lambang saro.” Ipinagigirumdom kaini sa sato an madonong na hatol kan Biblia na itinao kaidtong dakol na siglo na an nakaagi, na nagsasabi: “Ipaheling nindo na kamo nagpapasalamat.” (Colosas 3:15) An mga kapahayagan nin pagpasalamat asin odok sa pusong utang na boot sa iba nagtatabang tanganing kultibaron an may pagmakolog na relasyon.

Apuera kaini, paagi sa pag-apresyar asin pagpapahalaga sa lambang saro, ipinapaheling man niato na kita mapagpasalamat ki Jehova, asin naririsa nia ini. An Biblia nagsasabi: “An . . . mga mata [ni Jehova] naglilibot sa bilog na daga tanganing ipaheling an saiyang kosog para duman sa mga an puso bilog para sa saiya.” (2 Cronica 16:9) Inaasegurar kita nin Dios na nagigirumdoman asin pinakamamahal nia an pagkamoot na ipinaheheling kan mga tawo para sa saiyang ngaran. (Hebreo 6:10) Iyo, igwa kita nin marahay na dahelan na ipaheling na kita mapagpasalamat huli ta an diosnon na kualidad na ini, kun ipinahahayag aroaldaw, nakapaoogma ki Jehova asin nakakokontribwir sa satong kaogmahan. Iyan arog kan pagkasabi sa Talinhaga 15:13: “An magayagayang puso igwa nin marahay na epekto sa lauog.”