Paano Makakapamogol sa Satong Puso an Katoninongan kan Cristo?

“Togotan nindo na an katoninongan kan Cristo mamogol sa saindong puso, huli ta, sa katotoohan, kamo inapod dian sa sarong hawak.”—COLOSAS 3:15.

1, 2. Sa anong paagi na “an katoninongan kan Cristo” namomogol sa puso nin Kristiano?

AN MAMOGOL sarong tataramon na dai gusto nin dakol, huli ta iyan nagpapasabong sa isip nin pamimirit asin pagmanipular. Kun siring, an sadol ni Pablo sa mga kapwa Kristiano sa Colosas, na “Togotan nindo na an katoninongan kan Cristo mamogol sa saindong puso,” tibaad mansayon nin nagkapira na bakong rasonable. (Colosas 3:15) Bako daw na kita mga libre ahente moral? Taano ta maninigo niatong togotan an ano man o siisay man na mamogol sa satong puso?

² Dai ni Pablo sinasabihan an mga taga Colosas na isuko an saindang libreng kabotan. An termino sa Griego na trinadusir na “mamogol” sa Colosas 3:15 konektado sa termino para sa nag-aarbitrar na nagtatao nin premyo sa atletikong mga kompetisyon kan kaaldawan na idto. An mga nakikokompetensia may katalingkasan na sakop kan mga regulasyon kan kawat, alagad sa katapustapusi, an nag-aarbitrar an nagdedesisyon kun siisay an nagsunod sa mga regulasyon asin kun siring nanggana sa kompetisyon. Kaagid kaiyan, igwa kita nin katalingkasan na gumibo nin dakol na desisyon sa buhay, alagad mantang ginigibo niato iyan, an katoninongan kan Cristo maninigong pirmeng magin “nag-aarbitrar”​—o, siring kan pagkatradusir kaiyan kan paratradusir na si Edgar J. Goodspeed, “an nagkokontrol na prinsipyo” sa satong puso.

3. Ano “an katoninongan kan Cristo”?

³ Ano “an katoninongan kan Cristo”? Iyan an pagigin trangkilo, an pagkakalmadong nasa laog, na nakukua niato kun kita nagigin mga disipulo ni Jesus asin makaaram na kita namomotan asin aprobado ni Jehova Dios asin kan saiyang Aki. Kan madali nang bayaan ni Jesus an saiyang mga disipulo, sinabihan nia sinda: “Itinatao ko sa saindo an sakong katoninongan. . . . Dai mahadit an saindong puso ni matakot man.” (Juan 14:27) Sa laog nin haros 2,000 na taon, an katoninongan na iyan nakamtan kan fiel na linahidan na mga miembro kan hawak ni Cristo, asin ngonyan an saindang mga kaibaiba, an “ibang karnero,” nagkakamit man kaiyan. (Juan 10:16) An katoninongan na iyan maninigong magin namomogol na impluwensia sa satong puso. Kun kita nakaeeksperyensia nin grabeng pagbalo, matatabangan kita kaiyan na malikayan na maparalisar nin takot o magin labi-labi an pagkapurisaw. Helingon niato kun paano ini totoo kun kita napapaatubang sa inhustisya, kun kita pinupurisaw nin kahaditan, asin kun kita nakakamate na kita daing halaga.

Kun Kita Napapaatubang sa Inhustisya

4. (a) Paano naaraman ni Jesus an manongod sa inhustisya? (b) Ano an nagin reaksion kan mga Kristiano na biktima nin inhustisya?

⁴ Si Hadeng Salomon nagsabi: “An tawo nagsakop sa tawo sa saiyang ikararaot.” (Eclesiastes 8:9) Aram ni Jesus na totoo an mga tataramon na iyan. Kan nasa langit, naheling nia an grabeng inhustisya na ginigibo kan mga tawo sa lambang saro. Kan uya sa daga, inagihan nia mismo an pinakadakulang inhustisya kan sia, sarong tawo na daing kasalan, sahotan nin paglanghad asin ginadan bilang sarong kriminal. (Mateo 26:63-​66; Marcos 15:27) Ngonyan, lakop pa man giraray an inhustisya, asin an tunay na mga Kristiano nagdusa nin labi-labi, huling ‘ikinaoongis kan gabos na nasyon.’ (Mateo 24:9) Pero, sa ibong kan makatatakot na mga eksperyensia  sa mga kampo de konsentrasyon para sa pangadan kan Nazi asin sa Gulag kan Sobyet, sa ibong kan pagigin mga biktima nin madahas na pagsururog, mga akusasyon na bakong totoo, asin pag-atake paagi sa pagputik, an katoninongan kan Cristo pinagdanay sindang marigon. Inarog ninda si Jesus, na manongod sa saiya satong mababasa: “Kan sia pinagmumuda, dai sia nagbalos na magmuda. Kan sia nagdudusa, dai sia nan-uma, kundi padagos na ipinagkatiwala an saiyang sadiri sa saro na naghohokom nin matanos.”​—1 Pedro 2:23.

5. Kun may madangog kita na garo baga inhustisya sa kongregasyon, ano an maninigo na konsideraron nguna niato?

⁵ Sa mas sadit nanggad na kamugtakan, tibaad isipon ta na igwa nin saro na trinatar sa bakong makatanosan na paagi sa laog kan Kristianong kongregasyon. Sa siring na kamugtakan, tibaad magsaboot kita kapareho ni Pablo, na nagsabi: “Siisay an nasisingkog, asin dai ako naaanggot?” (2 Corinto 11:29) Ano an magigibo niato? Maninigo niatong hapoton an satong sadiri, ‘Talaga daw na iyan inhustisya?’ Sa parate, dai niato aram an gabos na detalye. Tibaad grabe an satong reaksion pakatapos na madangog an saro na naghihingakong nakaaaram. Tama sana, an Biblia nagsasabi: “An siisay man na kablas nagtutubod sa gabos na tataramon.” (Talinhaga 14:15) Kaya kaipuhan na kita magmaan.

6. Paano niato aatubangon an pinaghohonang inhustisya sa laog kan kongregasyon?

⁶ Pero, ipamugtak ta baga na kita mismo an nagin biktima nin pinaghohonang inhustisya. Ano an magigin reaksion nin saro na igwa kan katoninongan kan Cristo sa saiyang puso? Tibaad maheling niato an pangangaipo na kaolayon an indibiduwal na iniisip tang nagkasala sa sato. Pakatapos kaiyan, imbes na ipakipag-olay an bagay na iyan sa siisay man na mahinanyog, taano ta dai iyan darahon ki Jehova sa pamibi asin magtiwala sa saiya na seseguradohon niang magibo an hustisya? (Salmo 9:​10; Talinhaga 3:5) Posibleng marhay na huling nagibo na iyan, kita maninigoan na resolberan an bagay na iyan sa satong puso asin ‘dai maggirong.’ (Salmo 4:4) Sa kadaklan na kamugtakan, maaplikar an konseho ni Pablo: “Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro. Kun paanong kamo sueltong pinatawad ni Jehova, siring man an gibohon nindo.”​—Colosas 3:13.

7. Ano an maninigo na pirme niatong girumdomon sa satong pagtratar sa satong mga tugang?

⁷ Pero, ano man an ginigibo niato, kaipuhan na girumdomon niato na minsan ngani dai niato makokontrol an nangyari, makokontrol niato an satong reaksion. Kun bakong timbang an satong reaksion sa pinaghohonang inhustisya, puedeng magkaigwa iyan nin mas nakadadanyar na epekto sa satong katoninongan kisa sa inhustisya mismo. (Talinhaga 18:14) Puede pa ngani kitang masingkog asin umontok sa pakikiasosyar sa kongregasyon sagkod na maniwala kita na ikinatao na an hustisya. Isinurat kan salmista na para sa mga namomoot sa mga ley ni Jehova “mayo nin masisingkogan.” (Salmo 119:165) An totoo, an gabos nakaeeksperyensia nin inhustisya sa panapanahon. Nungkang togotan an siring na makamomondong mga eksperyensia na makaolang sa saindong paglilingkod ki Jehova. Imbes, togotan an katoninongan kan Cristo na mamogol sa saindong puso.

Kun Kita Pinupurisaw nin Kahaditan

8. Ano an nagkapirang dahelan nin kahaditan, asin ano an puedeng ibunga nin kahaditan?

⁸ An kahaditan totoong marhay na kabtang kan buhay sa “huring mga aldaw” na ini. (2 Timoteo 3:1) Totoo, sinabi ni Jesus: “Umontok na kamo sa paghadit dapit sa saindong kalag sa kun baga ano  an saindong kakakanon o dapit sa saindong hawak sa kun ano an saindong gugubingon.” (Lucas 12:22) Alagad bakong gabos na kahaditan causa nin kapurisawan manongod sa materyal na mga bagay. Si Lot “napupurisaw na gayo” huli sa kabikoan kan Sodoma. (2 Pedro 2:7) Si Pablo pinurisaw nin “paghadit para sa gabos na kongregasyon.” (2 Corinto 11:28) Grabe an kasakitan ni Jesus kan banggi bago kan saiyang kagadanan kaya “an saiyang ganot nagin siring sa mga toro nin dugo na nagdadalahay sagkod sa daga.” (Lucas 22:44) Malinaw nanggad, bakong gabos na kahaditan ebidensia nin maluyang pagtubod. Minsan siring, ano man an causa kaiyan, kun an kahaditan grabe asin nagpapadagos, puedeng halean kita kaiyan nin katoninongan. Dinaog nin kahaditan an nagkapira, na nagpangyari sa sainda na magsaboot na dai na ninda ikakapadagos an pag-asikaso sa mga paninimbagan na kalabot sa paglilingkod ki Jehova. An Biblia nagsasabi: “An kahaditan sa puso nin tawo iyo an mapaduko dian.” (Talinhaga 12:25) Kun siring, ano an puede niatong gibohon kun kita nag-aagi nin kahaditan?

9. Ano an nagkapirang praktikal na paagi na magigibo tanganing mahale an kahaditan, alagad anong mga causa nin kahaditan an dai puedeng haleon?

⁹ Sa nagkapirang situwasyon, tibaad may magigibo kitang praktikal na mga paagi. Kun medikal na problema an pinakadahelan kan satong paghadit, madonong na tawan iyan nin atension, minsan ngani an siring na mga bagay personal na desisyon. * (Mateo 9:12) Kun kita nagagabatan sa dakol na paninimbagan, tibaad puedeng idelegar an nagkapira kaini sa iba. (Exodo 18:13-​23) Pero, kumusta man idtong​—siring sa mga magurang​—may magabat na mga paninimbagan na dai puedeng idelegar? Kumusta man kun an sarong Kristiano namumuhay kaiba nin nagkokontrang agom? Kumusta man kun an pamilya nasa masakit na kamugtakan sa pagbuhay o nag-eerok sa lugar nin guerra? Malinaw nanggad, dai niato puedeng haleon an gabos na causa nin kahaditan sa sistemang ini nin mga bagay. Pero, puede niatong preserbaron an katoninongan kan Cristo sa satong puso. Paano?

10. Ano an duwang paagi na puedeng hingoahon nin sarong Kristiano na haleon an kahaditan?

¹⁰ An sarong paagi iyo an pagkua nin karangahan  sa Tataramon nin Dios. Si Hadeng David nagsurat: “Kan an sakuyang nakariribok na mga kaisipan duminakol sa sakong boot, an saimong mga panranga nakaranga sa sakong kalag.” (Salmo 94:19) An “mga panranga” ni Jehova puedeng manompongan sa Biblia. An regular na pagkonsulta sa ipinasabong na Librong iyan makatatabang na preserbaron an katoninongan kan Cristo sa satong puso. An Biblia nagsasabi: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.” (Salmo 55:22) Kaagid kaiyan, si Pablo nagsurat: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:​6, 7) An odok asin regular na pamibi matabang sa sato na preserbaron an satong katoninongan.

11. (a) Paanong si Jesus marahay na halimbawa kun dapit sa pamimibi? (b) Paano niato maninigong mansayon an pamibi?

¹¹ Si Jesus marahayon na halimbawa sa bagay na ini. May beses na mapagngayongayo siang nakipag-olay sa saiyang langitnon na Ama sa laog nin dakol na oras. (Mateo 14:23; Lucas 6:12) An pamibi nakatabang sa saiya na tagalan an pinakagrabeng pagbalo. Kan banggi bago kan saiyang kagadanan, an saiyang kapurisawan biyong naggrabe. An saiyang reaksion? Sia namibi “nin odok pa logod.” (Lucas 22:44) Iyo, an sangkap na Aki nin Dios tawong parapamibi. Kun siring, lalo nang maninigong kultibaron kan saiyang bakong sangkap na mga parasunod an ugale na pamimibi! Tinokdoan ni Jesus an saiyang mga disipulo na “danay na mamibi asin dai manluya.” (Lucas 18:1) An pamibi tunay asin mahalagang marhay na pakikikomunikar sa Saro na midbid kita nin orog pa kisa pakamidbid niato sa satong sadiri. (Salmo 103:14) Tanganing mapreserbar ta an katoninongan kan Cristo sa satong puso, kita ‘mamimibi nin daing ontok.’​—1 Tesalonica 5:17.

Pagdaog sa Satong mga Limitasyon

12. Sa anong mga dahelan tibaad honaon nin nagkapira na bakong igo an saindang paglilingkod?

¹² Minamansay ni Jehova an lambang lingkod nia bilang mahalagang marhay. (Haggeo 2:​7, nota sa ibaba) Minsan siring, dakol an nasasakitan na akoon ini. An nagkapira tibaad nanluluya an boot huli sa naglalangkaw na edad, nagdadakulang mga obligasyon sa pamilya, o nagluluyang salud. An iba tibaad nagsasaboot na sinda daing sukat huli sa miserableng mga inagihan. An iba pa tibaad nariribok huli sa nakaaging mga sala, na nagdududa kun baga mapatatawad pa sinda ni Jehova. (Salmo 51:3) Ano an puedeng gibohon manongod sa siring na mga saboot?

13. Igwa nin anong pagranga sono sa Kasuratan para sa mga nagsasaboot na sinda dai nakagigibo nin igo?

¹³ An katoninongan kan Cristo masierto sa sato kan pagkamoot ni Jehova. Ikababalik niato an katoninongan na iyan sa satong puso paagi sa paghorophorop sa bagay na si Jesus nungkang nagsabi na an satong halaga sinosokol paagi sa pagkomparar kan ginigibo niato sa ginigibo nin iba. (Mateo 25:​14, 15; Marcos 12:41-​44) An talagang idinoon nia kaimbodan. Sinabihan nia an saiyang mga disipulo: “An nakatagal sagkod sa katapusan iyo an maliligtas.” (Mateo 24:13) Si Jesus mismo “pinagduhagi” nin mga tawo, pero dai sia nagduda na sia namomotan kan saiyang Ama. (Isaias 53:3; Juan 10:17) Asin sinabi nia sa saiyang mga disipulo na sinda man namomotan. (Juan 14:21) Tanganing idoon ini, sinabi ni Jesus: “Bakong ipinapabakal an duwang dignos nin sarong sentimo na kadikit sana an halaga? Alagad ni saro sa sainda dai mahoholog sa daga na dai naaaraman kan saindong Ama. Alagad an mismong buhok kan saindong payo bilang gabos. Kun siring, dai kamo matakot: orog kamong mahalaga kisa dakol na dignos.” (Mateo 10:29-31) Kanigoan kanakapaoogmang garantiya kan pagkamoot ni Jehova!

14. Igwa kita nin anong garantiya na pinahahalagahan ni Jehova an lambang saro sa sato?

¹⁴ Sinabi man ni Jesus: “Dai nin nakadodolok sa sako kun dai sia dagkahon kan Ama na nagsugo sa sako.” (Juan 6:44) Mantang kita dinagka ni Jehova na sunodon si Jesus, seguradong mawot Nia na kita makaligtas. Sinabihan ni Jesus an saiyang mga disipulo: “Bakong kawiliwili para sa Ama na nasa langit na an saro kaining saradit na ini mapahamak.” (Mateo 18:14) Kun siring, kun kamo naglilingkod na bulaos an puso, makapaggagayagaya kamo sa saindong marahay na mga gibo. (Galacia 6:4) Kun kamo riniribok nin nakaaging  mga sala, makasisierto kamo na si Jehova “bulaos” na magpapatawad sa mga talagang nagsosolsol. (Isaias 43:25; 55:7) Kun sa ano man na ibang dahelan nanluluya an saindong boot, girumdomon na “si Jehova harani sa mga nababaak an puso; asin an mga nasasakitan an espiritu saiyang iliniligtas.”​—Salmo 34:18.

15. (a) Paano naghihingoa si Satanas na halean kita kan satong katoninongan? (b) Puede kitang magkaigwa nin anong kompiansa ki Jehova?

¹⁵ Gustohon ni Satanas na halean kamo kan saindong katoninongan. Sia an kagtugdas kan minanang kasalan na dian kita gabos nakikipagtusayan. (Roma 7:21-24) Seguradong gusto niang magsaboot kamo na dahel sa saindong pagkabakong sangkap an saindong paglilingkod dai maaako nin Dios. Nungkang togotan an Diablo na paluyahon an boot nindo! Aramon an saiyang mga pakana, asin togotan an pakaaram na iyan na gibohon kamong determinado na magtagal. (2 Corinto 2:11; Efeso 6:11-13) Girumdomon, “an Dios orog kadakula kisa satong puso asin nakaaaram kan gabos na bagay.” (1 Juan 3:20) An naheheling ni Jehova bako sana an satong mga depekto. Naheheling man nia an satong mga motibo asin intension. Kun siring, maranga sa mga tataramon kan salmista: “Dai pababayaan ni Jehova an saiyang banwaan, ni tatalikdan an saiyang rogaring.”​—Salmo 94:14.

Nagkakasararo sa Katoninongan kan Cristo

16. Paanong kita dai nagsosolo mantang kita nagmamaigot na makatagal?

¹⁶ Si Pablo nagsurat na maninigo niatong togotan an katoninongan kan Cristo na mamogol sa satong puso huli ta kita “inapod dian sa sarong hawak.” An linahidan na mga Kristiano na sinuratan ni Pablo inapod na magin kabtang kan hawak ni Cristo, siring kan mga natatada kan linahidan ngonyan. An saindang mga kaibaibang “ibang karnero” kasaro ninda bilang “sarong aripompon” sakop nin “sarong pastor,” si Jesu-Cristo. (Juan 10:16) Magkairiba, an sarong pambilog na kinaban na “aripompon” na minilyon an bilang tinotogotan an katoninongan kan Cristo na mamogol sa saindang puso. An pakaaram na dai kita nagsosolo nakatatabang na kita makatagal. Si Pedro nagsurat: “Tumangon [nindo si Satanas], na marigon sa pagtubod, sa pakaaram na an siring man na mga pagtios nangyayari sa bilog na kasararoan nin saindong mga tugang sa kinaban.”​—1 Pedro 5:9.

17. Igwa kita nin anong dahelan na togotan an katoninongan kan Cristo na mamogol sa satong puso?

¹⁷ Kun siring, an gabos logod padagos na kultibaron an katoninongan, an mahalagang marhay na bunga kan banal na espiritu nin Dios. (Galacia 5:​22, 23) An mga makua ni Jehova na daing digta, dai nin kanawayan patin nasa katoninongan sa kahurihurihi bebendisyonan nin buhay na daing sagkod sa sarong paraisong daga, na dian magdadanay an katanosan. (2 Pedro 3:​13, 14) Yaon sato an gabos na dahelan na togotan an katoninongan kan Cristo na mamogol sa satong puso.

[Nota sa Ibaba]

Nagigirumdoman daw Nindo?

• Ano an katoninongan kan Cristo?

• Paano puedeng mamogol sa satong puso an katoninongan kan Cristo kun kita napapaatubang sa inhustisya?

• Paano nakatatabang sa sato an katoninongan kan Cristo na kayanon an kahaditan?

• Paano kita rinaranga kan katoninongan kan Cristo kun kita nagsasaboot na kita daing halaga?

[Mga Hapot Para sa Pag-adal]

[Ritrato sa pahina 15]

Sa atubangan kan mga nagsasahot sa saiya, ipinagkatiwala ni Jesus an saiyang sadiri ki Jehova

[Ritrato sa pahina 16]

Arog kan nagpapaogmang kugos nin sarong mamomoton na ama, an mga pagranga ni Jehova puedeng paginhawahon an satong kahaditan

[Ritrato sa pahina 18]

Pinahahalagahan na marhay nin Dios an pakatagal