Aabotan Ka daw kan Bendisyon ni Jehova?

“An gabos na bendisyon na ini maabot nanggad sa saimo asin aabotan ka, huli ta ika danay na naghihinanyog sa tingog ni Jehova na saimong Dios.”—DEUTERONOMIO 28:2.

1. Ano an madeterminar kun baga mga bendisyon o maldisyon an aakoon kan mga Israelita?

KAN madali nang matapos an saindang 40 taon na pagbaklay sa kaawagan, an mga Israelita nagkakampo sa Kaplanodohan nin Moab. An Dagang Panuga nasa enotan ninda. Isinurat ngonyan ni Moises an libro nin Deuteronomio, na kaiba an sunod-sunod na mga bendisyon asin maldisyon, o sumpa. Kun an banwaan nin Israel ‘danay na maghihinanyog sa tingog ni Jehova’ paagi sa pagkuyog sa saiya, “aabotan” sinda kan mga bendisyon. Namotan sinda ni Jehova bilang saiyang “espesyal na rogaring” asin boot niang ipaheling an saiyang puersa para sa sainda. Alagad kun dai sinda danay na maghihinanyog sa saiya, sierto man na aabotan sinda kan mga maldisyon.​—Deuteronomio 8:10-14; 26:18; 28:​2, 15.

2. Ano an kahulogan kan mga berbo sa Hebreo na trinadusir na “danay na naghihinanyog” asin “aabotan” sa Deuteronomio 28:2?

² An berbo sa Hebreo na trinadusir na “danay na naghihinanyog” sa Deuteronomio 28:2 nangangahulogan nin dagos-dagos na paghiro. An banwaan ni Jehova bako sanang dapat na maghinanyog sa saiya paminsanminsan; sinda dapat na danay na naghihinanyog bilang dalan nin buhay. Saka sana sinda aabotan kan mga bendisyon nin Dios. An berbo sa Hebreo na trinadusir na “aabotan” rinekonoser bilang terminong ginagamit sa pangangayam na pinakaparateng nangangahulogan “madakop” o “malapag.”

3. Paano kita magigin arog ni Josue, asin taano ini ta mahalagang marhay?

³ An Israelitang namomoon na si Josue piniling maghinanyog ki Jehova asin kun siring nagkamit nin mga bendisyon. Sinabi ni Josue: “Pumili kamo ngonyan kun siisay an saindong paglilingkodan . . . Kun para sa sako asin sa sakong kasararo sa harong, kami maglilingkod ki Jehova.” Sa puntong iyan, an banwaan nagsimbag: “Mayo man lamang sa samong paghonahona na bayaan si Jehova tanganing maglingkod sa ibang mga dios.” (Josue 24:​15, 16) Huli sa marahay na aktitud ni Josue, kabilang sia sa nagkapira sa saiyang kapag-arakian na nagkapribilehio na lumaog sa Dagang Panuga. Ngonyan, kita nagtitindog sa tata nin sarong nakalalabing marhay na Dagang Panuga​—sarong paraisong daga na dian an mga bendisyon na orog pa nganing nagsosopay kisa kaidtong panahon ni Josue naghahalat sa gabos na may pag-oyon nin Dios. Aabotan daw kamo kan siring na mga bendisyon? Iyo kun kamo danay na maghihinanyog ki Jehova. Tanganing tabangan kamo na parigonon an saindong determinasyon na gibohon iyan, estudyare an kasaysayan kan nasyon kan suanoy  na Israel siring man an nakapagtotokdong mga halimbawa nin indibiduwal.​—Roma 15:4.

Bendisyon o Maldisyon?

4. Bilang simbag sa pamibi ni Salomon, ano an itinao nin Dios sa saiya, asin ano an maninigong saboot niato sa siring na mga bendisyon?

⁴ Durante kan kadaklan na panahon kan pagreynar ni Hadeng Salomon, an mga Israelita nag-ako nin ekstraordinaryong mga bendisyon hale ki Jehova. Nagkaigwa sinda nin abundang seguridad asin marahay na mga bagay. (1 Hade 4:25) Napabantog an kayamanan ni Salomon, minsan ngani dai sia naghagad sa Dios nin materyal na kayamanan. Imbes, kan hoben pa asin dai pang kabatidan, sia namibi na magkaigwa nin makinuyog na puso​—kahagadan na itinao ni Jehova paagi sa pagbendisyon sa saiya nin kadonongan asin pakasabot. Pinangyari kaini na si Salomon maghokom nin tama sa banwaan, na nakamamansay sa kalaenan kan marahay asin maraot. Minsan ngani an Dios nagtao man sa saiya nin kayamanan asin kamurawayan, bilang hoben na lalaki, pinahalagahan ni Salomon an nakalalabing halaga nin espirituwal na kayamanan. (1 Hade 3:9-13) Baga man kita igwang dakol na materyal na bagay o mayo, makapagpapasalamat nanggad kita kun nakakamtan niato an bendisyon ni Jehova asin kita mayaman sa espirituwal!

5. Ano an nangyari kan an banwaan nin Israel asin Juda dai nagdanay sa paghinanyog ki Jehova?

⁵ Dai ikinapaheling kan mga Israelita an apresasyon sa bendisyon ni Jehova. Huling dai sinda danay na naghinanyog sa saiya, inabotan sinda kan ihinulang mga maldisyon. Nagresulta ini sa pagkongkistar kan saindang mga kaiwal asin pagkadistiero kan mga nag-eerok sa Israel asin Juda. (Deuteronomio 28:36; 2 Hade 17:​22, 23; 2 Cronica 36:17-20) Nanodan daw kan banwaan nin Dios basado sa siring na pagdusa na an inaabotan kan mga bendisyon nin Dios iyo sana idtong mga danay na naghihinanyog ki Jehova? An Judiong natatada na nagpuli sa saindang dagang tinuboan kan 537 B.C.E. nagkaoportunidad na ipaheling kun baga sinda nagkaigwa na “nin puso na may kadonongan” asin ngonyan nasabotan na ninda an pangangaipo na danay na maghinanyog sa Dios.​—Salmo 90:12.

6. (a) Taano ta isinugo ni Jehova si Haggeo asin Zacarias na maghula sa saiyang banwaan? (b) Anong prinsipyo an malinaw na ipinaheheling kan mensahe nin Dios paagi ki Haggeo?

⁶ An mga Judio na pinapuli sa sadiring daga nagtogdok nin altar asin pinonan an trabaho sa templo sa Jerusalem. Alagad kan magkaigwa nin mapuersang pagkontra, an saindang kaigotan nagpoon na lumuya asin napondo an pagtogdok. (Esdras 3:1-3, 10; 4:1-4, 23, 24) Pinonan man nindang ipaorog an personal na kaginhawahan. Huli kaini, isinugo nin Dios an mga propetang si Haggeo asin Zacarias tanganing pukawon liwat an kaigotan kan saiyang banwaan para sa tunay na pagsamba. Paagi ki Haggeo, si Jehova nagsabi: “Panahon daw ini na kamo mismo mag-istar sa saindong mga harong na may mga entrepanyo, mantang an harong na ini [nin pagsamba] raot? . . . Isentro nindo an saindong puso sa saindong mga dalan. Nagsabwag kamo nin kadakol na banhi, alagad an ilinalaog kakadikit. May karakanan, alagad iyan bakong sagkod na mabasog. . . . Asin sia na nagpapatangdan nagpapatangdan nin supot na may mga labot.” (Haggeo 1:4-6) An pagsakripisyo kan espirituwal na intereses tanganing pag-aaboton an materyal na mga bentaha dai nagreresulta sa bendisyon ni Jehova.​—Lucas 12:15-21.

7. Taano ta sinabi ni Jehova sa mga Judio: “Isentro nindo an saindong puso sa saindong mga dalan”?

⁷ Bangkag sa pan-aroaldaw na problema, nalingawan kan mga Judio na aabotan sana sinda kan mga bendisyon nin Dios na oran asin mabungang kapanahonan kun sinda magdadanay na makinuyog sa Dios, dawa kinokontra. (Haggeo 1:​9-​11) Kun siring, angay nanggad an sadol na: “Isentro nindo an saindong puso sa saindong mga dalan”! (Haggeo 1:7) Garo man sana sinasabi sa sainda ni Jehova: ‘Mag-isip kamo! Helinga nindo an koneksion kan basang sanang pagpapagal nindo sa oma asin an gabang kamugtakan kan sakong harong nin pagsamba.’ An ipinasabong na mga tataramon kan propeta ni Jehova sa katapustapusi nakataros sa puso kan mga naghihinanyog, huli ta ipinagpadagos kan banwaan an gibohon sa templo, na nahaman iyan kan 515 B.C.E.

8. Anong sadol an itinao ni Jehova sa mga Judio kan kaaldawan ni Malaquias, asin taano?

⁸ Paghaloyhaloy, kan kaaldawan ni propeta Malaquias, an mga Judio nagpoon giraray na magsibogsibog sa espirituwal, na nagtatao pa ngani nin dai maaakong mga atang sa Dios. (Malaquias 1:6-8) Sa siring, sinadol sinda ni Jehova na darahon an ikasampulong kabtang kan saindang ani sa saiyang tambobong asin baloon sia kun baga dai nia bukasan  sa sainda an mga gaha kan kalangitan asin ulaan nanggad sinda nin bendisyon sagkod na mayo na nin kulang. (Malaquias 3:10) Kanigoan kamangmang kan mga Judio na magpagal para sa mismong mga bagay na itatao nin Dios sa sainda nin abunda kun sinda sana danay na maghihinanyog sa saiyang tingog!​—2 Cronica 31:10.

9. Sisiyasaton niato an buhay nin siisay na tolong indibiduwal sa rekord kan Biblia?

⁹ Apuera sa pag-atubang kan kasaysayan kan nasyon nin Israel, isinasaysay kan Biblia an buhay nin dakol na indibiduwal na nag-ako nin bendisyon o maldisyon nin Dios, depende sa kun baga sinda nagdanay sa paghinanyog ki Jehova o dai. Helingon niato kun ano an manonodan niato sa tolo sa sainda​—si Booz, Nabal, asin Ana. Mapadapit digdi, tibaad gusto nindong basahon an libro nin Rut siring man an 1 Samuel 1:1–​2:21 patin 1 Samuel 25:2-42.

Si Booz Naghinanyog sa Dios

10. Sa ano magkapareho si Booz asin Nabal?

¹⁰ Minsan ngani bakong magkatemporanyo si Booz asin Nabal, magkapareho sinda sa nagkapirang bagay. Halimbawa, pareho sinda nag-erok sa nasyon nin Juda. Sinda mayaman na kagsadiri nin daga, asin pareho nagkaigwa nin espesyal na oportunidad na ipaheling an mamomoton na kabootan sa saro na nangangaipo. Alagad sagkod sana dian an pagkakapareho ninda.

11. Paano ipinaheling ni Booz na sia danay na naghihinanyog ki Jehova?

¹¹ Si Booz nabuhay durante kan kapanahonan nin mga hokom sa Israel. Tinatrato nia na may paggalang an iba, asin iginagalang siang marhay kan saiyang mga paraani. (Rut 2:4) Bilang pagkuyog sa Ley, sinegurado ni Booz na sa saiyang oma, may itinadang magugutol para sa mga nagsasakit nin makuri asin dukha. (Levitico 19:​9, 10) Ano an ginibo ni Booz kan maaraman nia an manongod ki Rut asin Noemi saka kan maheling an kahigosan ni Rut sa pagsustento sa saiyang may edad nang panugangan na babae? Tinawan nia si Rut nin espesyal na konsiderasyon asin pinagbotan an saiyang mga tawohan na pabayaan siang maggutol sa saiyang oma. Paagi sa saiyang mga tataramon asin mamomoton na mga gibo, ihinayag ni Booz na sia sarong espirituwal na tawo na naghinanyog ki Jehova. Kun siring sia nag-ako kan pabor asin bendisyon nin Dios.​—Levitico 19:18; Rut 2:5-16.

12, 13. (a) Paano ipinaheling ni Booz an hararom na paggalang sa ley ni Jehova dapit sa pagbalukat? (b) Inabotan nin anong mga bendisyon nin Dios si Booz?

¹² An pinakalataw na ebidensia na si Booz danay  na naghihinanyog ki Jehova iyo an daing kaimotan na pagsunod nia sa ley nin Dios dapit sa pagbalukat. Ginibo ni Booz an gabos niang makakaya tanganing seguradohon na an mana kan saiyang paryente​—an nagadan na agom ni Noemi, si Elimelec​—magdanay sa pamilya ni Elimelec. Paagi sa “pag-agom kan bayaw,” an sarong balong babae mapaagom sa pinakaharaning paryente kan saiyang gadan nang agom tangani na an mana magdanay sa aking lalaki na mamumundag sa sainda. (Deuteronomio 25:5-10; Levitico 25:47-49) Iprinesentar ni Rut an saiyang sadiri sa pag-agom karibay ni Noemi, na lampas na sa edad nin pangangaki. Pakatapos na an sarong mas haraning paryente ni Elimelec magsayuma na tabangan si Noemi, inagom ni Booz si Rut. An saindang aking lalaki na si Obed ibinilang na aki ni Noemi asin an legal na eredero ni Elimelec.​—Rut 2:​19, 20; 4:​1, 6, 9, 13-16.

¹³ Si Booz inabotan nin nagsosopay na mga bendisyon huli sa saiyang daing kaimotan na pagkuyog sa ley nin Dios. Paagi sa saindang aking si Obed, sinda ni Rut binendisyonan kan pribilehio na magin mga apoon ni Jesu-Cristo. (Rut 2:12; 4:​13, 21, 22; Mateo 1:​1, 5, 6) Basado sa daing kaimotan na mga gibo ni Booz, manonodan ta na an inaabotan kan mga bendisyon iyo idtong mga nagpapaheling nin pagkamoot sa iba asin naghihiro kaoyon kan mga kahagadan nin Dios.

Si Nabal Dai Naghinanyog

14. Anong klaseng tawo si Nabal?

¹⁴ Bakong arog ni Booz, si Nabal dai naghinanyog ki Jehova. Linapas nia an ley nin Dios: “Kamotan mo an saimong kapwa nin siring sa saimo man sana.” (Levitico 19:18) Si Nabal bakong espirituwal na tawo; sia “daing herak asin maraot sa saiyang mga gibo.” Dawa an mga tawohan nia an pagheling sa saiya “daing kamanungdanan na tawo.” Angay sana, an saiyang ngaran, an Nabal, nangangahulogan “daing isip,” o “lolong.” (1 Samuel 25:​3, 17, 25) Kaya paano mahiro si Nabal kan sia nagkaoportunidad na ipaheling an kabootan sa saro na nangangaipo​—si David, an linahidan ni Jehova?​—1 Samuel 16:13.

15. Paano trinatar ni Nabal si David, asin paano si Abigail napapalaen sa saiyang agom sa bagay na ini?

¹⁵ Kan nagkakampo sa palibot kan aripompon ni Nabal, si David asin an saiyang mga tawohan, na dai man naghahagad nin bayad, nagtaong proteksion tumang sa mga grupo nin tulisan. “Nagin lanob sinda sa palibot niamo sa banggi sagkod sa aldaw,” an sinabi kan saro sa mga pastor ni Nabal. Minsan siring, kan maghagad nin kakanon an mga mensahero ni David, si Nabal ‘pasilyak sindang inanggotan’ asin pinahale sinda na daing dara. (1 Samuel 25:2-16) An agom ni Nabal, si Abigail, tolos-tolos na nagdara nin mga kakanon ki David. Anggot na marhay, popohoon na kuta ni David si Nabal asin an saiyang mga tawohan. Sa siring an inisyatiba ni Abigail nagligtas sa buhay nin dakol asin inolang si David na magkasala sa dugo. Alagad an kahanaban asin pagkadaing herak ni Nabal grabe nang marhay. Pakalihis nin mga sampulong aldaw, “hinampak ni Jehova si Nabal, kaya sia nagadan.”​—1 Samuel 25:18-38.

16. Paano niato maaarog si Booz asin isikwal an gawe-gawe ni Nabal?

¹⁶ Kanigoan nanggad an kalaenan ni Booz asin ni Nabal! Mantang maninigo niatong haboan an daing herak asin maimot na ugale ni Nabal, arogon niato an kabootan asin kadaihan nin kaimotan ni Booz. (Hebreo 13:16) Magigibo niato iyan paagi sa pag-aplikar kan hatol ni apostol Pablo: “Mantang igwa kita nin marahayrahay na panahon para kaiyan, gumibo kita kan marahay sa gabos, alagad orog na sa mga may relasyon sa sato sa pagtubod.” (Galacia 6:10) Ngonyan, an “ibang karnero” ni Jesus, mga Kristiano na may daganon na paglaom, may pribilehio na gibohan nin marahay an linahidan ni Jehova, an natatada sa 144,000, na tatawan nin inmortalidad sa langit. (Juan 10:16; 1 Corinto 15:50-53; Kapahayagan 14:​1, 4) Minamansay ni Jesus an siring na mamomoton na mga gibo na garo man sana ginibo sa saiya mismo, asin an paggibo kan marahay na mga bagay na ini minaresulta sa nagsosopay na bendisyon ni Jehova.​—Mateo 25:34-40; 1 Juan 3:18.

An mga Pagbalo Asin Bendisyon ki Ana

17. Anong mga pagbalo an napaatubang ki Ana, asin anong aktitud an ipinaheling nia?

¹⁷ Inabotan man kan bendisyon ni Jehova an diosnon na babaeng si Ana. Sia nag-erok sa mabukid na rehion nin Efraim kaiba kan saiyang agom na Levita, si Elcana. Huling itinotogot asin kontrolado kan Ley, igwa sia nin saro pang agom​—si Penina. Si Ana nagdanay na baog, sarong kasusopgan para sa sarong Israelitang babae, mantang si Penina may nagkapirang aki. (1 Samuel 1:1-3; 1 Cronica 6:​16, 33, 34) Minsan siring, imbes na  rangahon si Ana, si Penina guminawe sa bakong mamomoton na paagi na ikinauyam ni Ana kaya sia naghihibi asin dai nang ganang kumakan. Mas grabe pa, ini nangyayari “taon-taon,” kada magduman an pamilya sa harong ni Jehova sa Silo. (1 Samuel 1:4-8) Kanigoan kadaing kabootan sa kabtang ni Penina, asin kanigoan na pagbalo para ki Ana! Pero, nungkang binasol ni Ana si Jehova; ni nagpawalat sia sa harong kun an saiyang agom minaduman sa Silo. Kun siring, sa kahurihurihi segurado na aabotan sia nin nagsosopay na bendisyon.

18. Anong halimbawa an itinao ni Ana?

¹⁸ Si Ana nagtao nin marahayon na halimbawa para sa banwaan ni Jehova ngonyan, nangorogna sa mga tibaad nakolgan huli sa daing kabootan na mga sinasabi nin iba. Sa siring na mga situwasyon, an pagsiblag kan sadiri bako an solusyon. (Talinhaga 18:1) Dai tinogotan ni Ana an mga pagbalo sa saiya na paluyahon an saiyang pagmawot na magin presente sa lugar na dian itinotokdo an Tataramon nin Dios asin an saiyang banwaan nagtitiripon tanganing sumamba. Kun siring sia nagdanay na makosog sa espirituwal. An rarom kan saiyang espirituwalidad nahayag sa saiyang magayon na pamibi na isinurat sa 1 Samuel 2:1-10. *

19. Paano niato ikapaheheling an satong apresasyon sa espirituwal na mga bagay?

¹⁹ Bilang mga lingkod ni Jehova sa presenteng panahon, kita dai nagsasamba sa tabernakulo. Minsan siring, puede niatong ipaheling an satong apresasyon sa espirituwal na mga bagay, kapareho ni Ana. Halimbawa, puede niatong ipaheling an satong hararom na apresasyon sa espirituwal na kayamanan paagi sa satong regular na presensia sa Kristianong mga pagtiripon, asamblea, asin kombension. Gamiton niato an mga okasyon na ini tanganing magparinigonan nin boot sa tunay na pagsamba ki Jehova, na nagtao sato kan “pribilehio na daing takot na magtao nin sagradong paglilingkod sa saiya na may kaimbodan asin katanosan.”​—Lucas 1:​74, 75; Hebreo 10:​24, 25.

20, 21. Paano binalosan si Ana huli sa saiyang diosnon na debosyon?

²⁰ Naobserbaran ni Jehova an diosnon na debosyon ni Ana asin binalosan sia nin abunda. Sa saro kan taonan na mga pagbiahe kan pamilya pasiring sa Silo, an nagluluhang si Ana odok na namibi sa Dios asin nanuga: “O Jehova nin mga hukbo, kun saimong mamasdan nanggad an kasakitan kan saimong oripon na babae asin girumdomon nanggad ako, asin dai mo lilingawan an saimong oripon na babae asin tawan nanggad an saimong oripon na babae nin sarong aking lalaki, itatao ko sia ki Jehova sa gabos na aldaw kan saiyang buhay.” (1 Samuel 1:9-11) Dinangog nin Dios an pakimaherak ni Ana asin binendisyonan sia nin aking lalaki, na nginaranan niang Samuel. Kan butason na an aki, dinara nia ini sa Silo tanganing an aki makapaglingkod sa tabernakulo.​—1 Samuel 1: 20, 24-28.

²¹ Si Ana nagpaheling nin pagkamoot sa Dios asin inotob an saiyang panuga sa saiya may koneksion ki Samuel. Asin isip-isipa an nagsosopay na bendisyon na nakamtan ninda ni Elcana huli ta an saindang namomotan na aki naglingkod sa tabernakulo ni Jehova! Dakol na Kristianong magurang an igwa man nin nakakaagid na mga kagayagayahan asin bendisyon huli ta an saindang mga aking lalaki asin babae naglilingkod bilang bilog na panahon na mga ministrong payunir, miembro nin pamilyang Bethel, o sa iba pang paagi na nagtataong onra ki Jehova.

Danay na Maghinanyog ki Jehova!

22, 23. (a) Sa ano kita makasisierto kun kita danay na maghihinanyog sa tingog ni Jehova? (b) Ano an eestudyaran sa masunod na artikulo?

²² Sa ano kita makasesegurado kun kita danay na maghihinanyog ki Jehova? Kita magigin mayaman sa espirituwal kun ipaheheling niato an bilog na kalag na pagkamoot sa Dios asin ootobon an satong pagdusay sa saiya. Dawa pa kun an pagpadagos  sa siring na pamumuhay nangangahulogan na kita dapat na magtagal nin grabeng mga pagbalo, dai malilikayan na aabotan kita kan bendisyon ni Jehova​—na sa parate sa mas dakulang mga paagi kisa maiimahinar niato.​—Salmo 37:4; Hebreo 6:10.

²³ Dakol na bendisyon an itatao sa banwaan nin Dios sa ngapit. Huli sa makinuyog na paghinanyog ki Jehova, iingatan an “sarong dakulang kadaklan” sa “dakulang kahorasaan” asin makaeeksperyensia kan mga kagayagayahan sa buhay sa bagong kinaban nin Dios. (Kapahayagan 7:9-14; 2 Pedro 3:13) Duman paninigoan nin lubos ni Jehova an matanos na mga kamawotan kan bilog niang banwaan. (Salmo 145:16) Minsan siring, arog kan ipaheheling kan masunod na artikulo, dawa ngonyan pa idtong mga danay na naghihinanyog sa tingog ni Jehova binebendisyonan nin ‘marahay na mga balaog asin sangkap na regalo hale sa itaas.’​—Santiago 1:17.

[Nota sa Ibaba]

Nagigirumdoman daw Nindo?

• Ano an puedeng itokdo sa sato kan kasaysayan kan Israel manongod sa mga bendisyon nin Dios?

• Sa ano magkalaen si Booz asin Nabal?

• Paano ta maaarog si Ana?

• Taano ta maninigo na danay kitang maghinanyog sa tingog ni Jehova?

[Mga Hapot Para sa Pag-adal]

[Ritrato sa pahina 10]

Ipinamibi ni Hadeng Salomon na magkaigwa sia nin makinuyog na puso, asin binendisyonan sia ni Jehova nin kadonongan

[Ritrato sa pahina 12]

Trinatar ni Booz an iba na may paggalang asin kabootan

[Ritrato sa pahina 15]

Si Ana binendisyonan sa nagsosopay na paagi huli sa pagsarig ki Jehova