An Bendisyon ni Jehova Nakapayayaman sa Sato
An Bendisyon ni Jehova Nakapayayaman sa Sato
“An bendisyon ni Jehova—iyan an nakapayayaman, asin dai nia iyan dinadagdagan nin kakologan.”—TALINHAGA 10:22.
1, 2. Taano an kaogmahan ta bakong konektado sa materyal na kayamanan?
KONTROLADO nin materyalistikong mga pinag-aaabot an buhay nin minilyon ngonyan. Alagad nakapaoogma daw sa sainda an materyal na mga bagay? “Dai ko magirumdoman kaidto na an mga tawo nagin mamondoon manongod sa kamugtakan kan saindang buhay,” an sabi kan The Australian Women’s Weekly. Sinabi pa kaiyan: “Iyan masakit paniwalaan pero totoo. Sinabihan kami na an Australia marahayon an kamugtakan sa ekonomiya, na nungka pa kaidto na nagin mas marahay an buhay. . . . Sa ibong kaiyan lakop an pesimismo sa bilog na nasyon. An mga lalaki asin babae pareho nakamamate na igwa nin kulang sa saindang buhay alagad dai ninda masabi kun ano iyan.” Totoo nanggad an Kasuratan sa pagsabi na ni an kaogmahan ni an buhay dai minagikan sa mga bagay na satong nasasadirihan!—Eclesiastes 5:10; Lucas 12:15.
2 Itinotokdo kan Biblia na an pinakadakulang kaogmahan minagikan sa bendisyon nin Dios. Mapadapit digdi, an Talinhaga 10:22 nagsasabi: “An bendisyon ni Jehova—iyan an nakapayayaman, asin dai nia iyan dinadagdagan nin kakologan.” An kakologan sa parate minagikan sa mahanab na pagkua nin materyal na kayamanan. Angay nanggad, si apostol Pablo nagpatanid: “Idtong mga determinadong yumaman nahoholog sa sugot asin sa siod patin sa dakol na rungaw asin nakararaot na mawot, na nagdadara sa mga tawo sa kalaglagan asin kapahamakan. Huli ta an pagkamoot sa kuarta gamot nin gabos na klase nin nakadadanyar na bagay, asin sa pag-aabot sa pagkamoot na ini an nagkapira nagkaralagalag parayo sa pagtubod asin sinaksak an bilog nindang sadiri nin dakol na kakologan.”—1 Timoteo 6:9, 10.
3. Taano an mga lingkod nin Dios ta nag-aagi nin mga pagbalo?
3 Sa ibong na lado, inaabotan nin mga bendisyon na daing kakologan an gabos na “danay na naghihinanyog sa tingog ni Jehova.” (Deuteronomio 28:2) Pero, tibaad maghapot an nagkapira, ‘Kun dai dinadagdagan nin kakologan an bendisyon ni Jehova, taano ta dakol sa mga lingkod nin Dios an nagdudusa?’ Ihinahayag kan Biblia na an mga pagbalo sa sato itinotogot nin Dios alagad sa katunayan naggigikan ki Satanas, sa saiyang maraot na sistema, asin sa satong bakong sangkap na naturalesa. (Genesis 6:5; Deuteronomio 32:4, 5; Juan 15:19; Santiago 1:14, 15) Si Jehova an gikanan kan “lambang marahay na balaog asin lambang sangkap na regalo.” (Santiago 1:17) Huli kaini, an saiyang mga bendisyon nungkang nagtatao nin kakologan. Kun siring estudyaran niato an nagkapira sa sangkap na mga balaog nin Dios.
An Tataramon nin Dios—Sarong Daing Kaagid na Balaog
4. Anong bendisyon asin daing kaagid sa halagang balaog an nakakamtan kan banwaan ni Jehova durante kan “panahon [na ini] kan katapusan”?
4 Mapadapit sa “panahon kan katapusan,” an hula ni Daniel nagsasabi: “An tunay na kaaraman magigin abunda.” Minsan siring, linimitaran ini kan mga tataramon na: “Mayo lamang nin maraot na makasasabot; alagad an mga igwa nin pakarorop makasasabot.” (Daniel 12:4, 10) Imahinara iyan! An Tataramon nin Dios—partikular na an mga hula—ipinapahayag na may kadonongan nin Dios kaya an mga maraot dai nakasasabot kan tunay na kahulogan kaiyan, pero an banwaan ni Jehova iyo. “Hayag takang inoomaw, Ama, Kagurangnan kan langit asin daga,” an pamibi kan Aki nin Dios, “huli ta maingat mong itinago an mga bagay na ini sa mga madonong asin intelektuwal, asin ihinayag iyan sa mga omboy.” (Lucas 10:21) Kanigoan na bendisyon an magkaigwa kan daing kaagid na balaog na nasusurat na Tataramon nin Dios, an Biblia, asin an mapabilang sa mga tinawan ni Jehova nin espirituwal na pakarorop!—1 Corinto 1:21, 27, 28; 2:14, 15.
5. Ano an kadonongan, asin paano ta iyan makakamtan?
5 Mayo lamang kutana kita nin espirituwal na pakarorop kun bakong dahel sa “kadonongan hale sa itaas.” (Santiago 3:17) An kadonongan iyo an abilidad na gamiton an kaaraman asin pakasabot tanganing resolberan an mga problema, likayan o olangon an mga peligro, aboton an mga pasohan, o magtao nin tamang hatol. Paano ta makakamtan an diosnon na kadonongan? An Talinhaga 2:6 nagsasabi: “Si Jehova mismo nagtatao nin kadonongan; gikan sa saiyang ngoso may kaaraman asin pakamansay.” Iyo, bebendisyonan kita ni Jehova nin kadonongan kun kita prosegido sa paghagad kaiyan sa pamibi, kun paanong tinawan nia si Hadeng Salomon “nin madonong asin mapagsabot na puso.” (1 Hade 3:11, 12; Santiago 1:5-8) Tanganing kamtan an kadonongan, dapat man na danay kitang naghihinanyog ki Jehova paagi sa regular na pag-adal asin pag-aplikar kan saiyang Tataramon.
6. Taano ta madonong na iaplikar an mga ley asin prinsipyo nin Dios sa satong buhay?
6 Manonompongan sa mga ley asin prinsipyo kan Biblia an pangenot na mga halimbawa nin diosnon na kadonongan. Nakikinabang kita digdi sa gabos na paagi—sa pisikal, mental, emosyonal, asin espirituwal. An salmista angay na nag-awit: “An ley ni Jehova sangkap, na nagpapaomay kan kalag. An pagirumdom ni Jehova mapagtitiwalaan, na nagpapadonong sa daing kabatidan. An mga pagboot ni Jehova tanos, nagpapagayagaya sa puso; an togon ni Jehova malinig, nagpapaliwanag kan mga mata. An pagkatakot ki Jehova dalisay, nagdadanay sagkod lamang. An hudisyal na mga desisyon ni Jehova tunay; an mga iyan napatunayan na gabos matanos. Iyan orog na dapat mawoton kisa sa bulawan, iyo, kisa sa dakol na dalisay na bulawan.”—Salmo 19:7-10; 119:72.
7. Ano an nagigin resulta nin pagbasangbasang sa matanos na mga pamantayan nin Dios?
7 Sa ibong na lado, an mga nagbabasangbasang sa matanos na mga pamantayan nin Dios dai nakanonompong kan kaogmahan asin katalingkasan na hinahanap ninda. Maabot an panahon, madidiskobre ninda na an Dios dai maoolog-olog, huli ta aanihon nin saro an saiyang itinatanom. (Galacia 6:7) An minilyon na nagbabasangbasang sa mga prinsipyo sa Biblia nag-aani nin makaturotristeng mga epekto na arog baga nin dai ginustong pagbados, nakaririmarima nin makuri na helang, o nakadadanyar na mga adiksion. Apuera sana kun may pagsolsol na babagohon ninda an saindang pamumuhay, an saindang dalan sa katapustapusi madara sa sainda sa kagadanan asin tibaad kalaglagan sa kamot nin Dios.—Mateo 7:13, 14.
8. Taano ta maogma an mga namomoot sa Tataramon nin Dios?
8 Minsan siring, an mga namomoot sa Tataramon nin Dios asin iinaaplikar iyan aabotan kan nagsosopay na bendisyon ngonyan asin sa ngapit. Sinda tama sanang nakamamate na pinatalingkas kan ley nin Dios, totoong maogma, asin galagang hinahalat an panahon na sinda patatalingkason sa kasalan asin sa nakagagadan na mga epekto kaiyan. (Roma 8:20, 21; Santiago 1:25) An paglaom na ini segurado huli ta iyan nakadepende sa pinakamamomoton na balaog nin Dios sa katawohan—an atang na pantubos kan saiyang Aking bugtong, si Jesu-Cristo. (Mateo 20:28; Juan 3:16; Roma 6:23) An labi sa gabos na balaog na iyan pinatutunayan an rarom kan pagkamoot nin Dios para sa katawohan asin naggagarantiya nin daing katapusan na mga bendisyon para sa gabos na danay na naghihinanyog ki Jehova.—Roma 8:32.
Nagpapasalamat sa Balaog na Banal na Espiritu
9, 10. Paano kita nakikinabang sa balaog ni Jehova na banal na espiritu? Magtao nin halimbawa.
9 An saro pang mamomoton na balaog nin Dios na maninigo niatong pasalamatan iyo an saiyang banal na espiritu. Kan aldaw nin Pentecostes 33 C.E., sinadol ni apostol Pedro an kaburunyogan na presente sa Jerusalem: “Magsorolsol kamo, asin an lambang saro logod sa saindo mabautismohan sa ngaran ni Jesu-Cristo para sa kapatawadan kan saindong mga kasalan, asin aakoon nindo an daing bayad na balaog kan banal na espiritu.” (Gibo 2:38) Ngonyan, si Jehova nagtatao nin banal na espiritu sa saiyang nagdusay na mga lingkod na namimibi para dian asin gustong gibohon an saiyang kabotan. (Lucas 11:9-13) Kan suanoy na mga panahon, an pinakamakosog na puersang ini sa uniberso—an banal na espiritu, o puersa aktiba, nin Dios—nagtaong puersa sa mga lalaki asin babae na may pagtubod, kabale an enot na mga Kristiano. (Zacarias 4:6; Gibo 4:31) Kaya man kaiyan na gibohon iyan para sa sato, dawa pa kita mapaatubang sa magabat na mga balakid o kadepisilan bilang banwaan ni Jehova.—Joel 2:28, 29.
10 Estudyare an halimbawa ni Laurel, na nagkapolio asin nabuhay sa tabang kan aparato sa paghangos sa laog nin 37 taon. * Sa ibong kan saiyang masakit na marhay na kamugtakan, sia naglingkod nin maigot sa Dios sagkod na sia magadan. Sa nag-aging mga taon, si Laurel inabot kan nagsosopay na bendisyon ni Jehova. Halimbawa, natabangan nia an mga 17 indibiduwal na magkaigwa nin tamang kaaraman kan katotoohan sa Biblia, minsan ngani sia dai makahiro sa saiyang aparato 24 oras an aldaw! An saiyang situwasyon nagpapagirumdom kan mga tataramon ni apostol Pablo: “Kun noarin ako maluya, saka man ako mapuersa.” (2 Corinto 12:10) Iyo, an ano man na kapangganahan na tibaad kamtan niato sa paghuhulit kan maogmang bareta resulta, bakong kan satong sadiring abilidad asin puersa, kundi kan tabang nin Dios paagi sa banal na espiritu, na itinatao nia sa mga danay na naghihinanyog sa saiyang tingog.—Isaias 40:29-31.
11. Anong mga kualidad an pinaluluwas kan espiritu nin Dios sa mga nagsosolog kan “bagong personalidad”?
11 Kun kita makinuyog na naghihinanyog sa Dios, an saiyang espiritu nagpapaluwas sa sato kan mga kualidad nin pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri. (Galacia 5:22, 23) An “bunga [na ini] kan espiritu” kabtang kan “bagong personalidad” na isinosolog kan mga Kristiano karibay kan ano man na masiba asin garo sa hayop na mga karakteristiko na tibaad ipinaheheling ninda kaidto. (Efeso 4:20-24; Isaias 11:6-9) Mahalagang marhay sa bungang ini an pagkamoot, na “sangkap na bungkos nin pagkasararo.”—Colosas 3:14.
Kristianong Pagkamoot—Sarong Balaog na Dapat Pakamahalon
12. Paano ipinaheling ni Tabita asin kan mga Kristiano kan enot na siglo an pagkamoot?
12 An Kristianong pagkamoot saro pang nakaoogmang balaog hale ki Jehova—bagay na angay sana niatong pakamahalon. Iyan ginigiyahan nin prinsipyo, alagad iyan nagsosopay nanggad sa kapadangatan kaya iyan mas nakapadadayupot sa mga nagtutubod kisa magigibo pa ngani nin relasyon sa laman. (Juan 15:12, 13; 1 Pedro 1:22) Halimbawa, estudyare si Tabita, sarong marahayon na Kristiana kan enot na siglo. “Sia pano nin marahay na mga gibo asin mga balaog nin pagkaherak,” nangorogna para sa mga babaeng balo sa kongregasyon. (Gibo 9:36) An mga babaeng ini tibaad may mga paryente, alagad gusto ni Tabita na gibohon an makakaya nia na tabangan asin parigonon an boot ninda. (1 Juan 3:18) Kanigoan karahay na halimbawa an itinao ni Tabita! An sa magturugang na pagkamoot an nagpahiro ki Prisca asin Aquila na ‘isapeligro an saindang liog’ para ki Pablo. An pagkamoot man an nakamotibar ki Epafras, Lucas, Onesiforo, asin iba pa na tabangan an apostol mantang sia nabibilanggo sa Roma. (Roma 16:3, 4; 2 Timoteo 1:16; 4:11; Filemon 23, 24) Iyo, an siring kaiyan na mga Kristiano ngonyan “nagkakaminorootmootan,” sarong nakaoogmang balaog hale sa Dios na nagpapamidbid sa sainda bilang tunay na mga disipulo ni Jesus.—Juan 13:34, 35.
13. Paano ta ikapaheheling na odok niatong inaapresyar an satong Kristianong kasararoan nin magturugang?
13 Pinakamamahal daw nindo an pagkamoot na ipinaheheling sa Kristianong kongregasyon? Kamo daw nagpapasalamat sa satong espirituwal na kasararoan nin magturugang, na lakop sa bilog na globo? An mga ini man nakaoogma asin nakapayayaman na mga balaog hale sa itaas. Paano niato ikapaheheling na pinahahalagahan ta an mga iyan? Paagi sa pagtao nin sagradong paglilingkod sa Dios, paagi sa pakikikabtang sa Kristianong mga pagtiripon, asin paagi sa pagpaheling nin pagkamoot asin iba pang bunga kan espiritu nin Dios.—Filipos 1:9; Hebreo 10:24, 25.
“Balaog na mga Lalaki”
14. Ano an kahagadan sa sarong Kristiano kun sia maglilingkod bilang magurang sa kongregasyon o sarong ministeryal na lingkod?
14 An Kristianong mga lalaki na nagmamawot na maglingkod sa saindang mga kapagtubod bilang kamagurangan o mga ministeryal na lingkod may marahay na pasohan. (1 Timoteo 3:1, 8) Tanganing makualipikar sa mga pribilehiong ini, an sarong tugang na lalaki dapat na magin espirituwal na tawo, kabisado an Kasuratan asin maigot sa ministeryo sa langtad. (Gibo 18:24; 1 Timoteo 4:15; 2 Timoteo 4:5) Dapat na sia nagpapaheling nin kapakumbabaan, kababaan nin boot, asin pasensia, huli ta dai inaabotan kan mga bendisyon nin Dios an mga tawong pangahas, mapalangkaw, asin ambisyoso. (Talinhaga 11:2; Hebreo 6:15; 3 Juan 9, 10) Kun may agom, sia dapat na magin sarong mamomoton na payo nin pamilya na may kakayahan na pangenotan nin marahay an bilog niang kasararo sa harong. (1 Timoteo 3:4, 5, 12) Huli ta pinahahalagahan nia an espirituwal na kayamanan, aakoon kan siring na tawo an bendisyon ni Jehova.—Mateo 6:19-21.
15, 16. Siisay an “balaog na mga lalaki”? Magtao nin mga halimbawa.
15 Kun an mga naglilingkod bilang kamagurangan sa kongregasyon nagmamaigot bilang mga paraebanghelyo, pastor, asin paratokdo, tinatawan ninda kita nin marahay na mga dahelan na apresyaron an siring na “balaog na mga lalaki.” (Efeso 4:8, 11) An mga nakikinabang sa saindang mamomoton na paglilingkod tibaad dai nagpapahayag kan saindang apresasyon sa gabos na panahon, alagad naheheling ni Jehova an gabos na ginigibo kan fiel na kamagurangan. Dai nia lilingawan an pagkamoot na ipinaheheling ninda para sa saiyang ngaran paagi sa paglilingkod sa saiyang banwaan.—1 Timoteo 5:17; Hebreo 6:10.
16 Estudyare an nangyari sa sarong mahigos na magurang sa kongregasyon na nagdalaw sa sarong Kristianang daragita na ooperaran sa hotok. “Sia mabooton, mapagsuportar na marhay, may pagmakolog nanggad,” an isinurat nin sarong katood kan pamilya. “Naghagad sia nin permiso na mamibi ki Jehova na kaiba kami. Mantang sia namimibi, an ama [bakong Saksi ni Jehova] napahibi, asin napaluha an gabos na nasa kuarto kan ospital. Kanigoan kamamomoton kan pamibi kan magurang na iyan, asin kanigoan kamamomoton ni Jehova na isinugo nia sia sa siring nanggad na panahon!” An saro pang Saksing pasyente nagsabi manongod sa kamagurangan na nagdalaw sa saiya: “Kan sinda dumolok sa sakong higdaan sa kuarto nin sigidong pangataman, aram ko na ano man an mangyari poon sa panahon na iyan, matatagalan ko iyan. Napakosog ako asin nagin matoninong.” Makababakal daw an siisay man nin siring na mamomoton na pagmalasakit? Nungka! Iyan balaog hale sa Dios, na itinao paagi sa Kristianong kongregasyon.—Isaias 32:1, 2.
Balaog na Ministeryo sa Langtad
17, 18. (a) Anong balaog nin paglilingkod an itinao ni Jehova sa bilog niang banwaan? (b) Anong tabang an itinao nin Dios tanganing magibo niato an satong ministeryo?
17 Mayo na nin onra na puedeng itao sa siisay man na tawo an malabi pa kisa paglilingkod ki Jehova, an Kaharohalangkawe. (Isaias 43:10; 2 Corinto 4:7; 1 Pedro 2:9) Minsan siring, an pribilehiong makikabtang sa pampublikong ministeryo bukas sa gabos—hoben asin gurang, lalaki asin babae—na tunay an pagmawot na maglingkod sa Dios. Ginagamit daw nindo an mahalagang marhay na balaog na ini? An nagkapira tibaad humabo huli ta sa boot ninda kulang sinda nin kakayahan, alagad girumdomon na si Jehova nagtatao nin banal na espiritu sa mga naglilingkod sa saiya, asin hinihipnoan kaiyan kun saen man kita may kakulangan.—Jeremias 1:6-8; 20:11.
18 Ipinaniwala ni Jehova an paghuhulit kan Kahadean sa saiyang mapakumbabang mga lingkod, bakong sa mga indibiduwal na may tendensiang magin mapalangkaw asin manarig sa saindang sadiring mga abilidad. (1 Corinto 1:20, 26-29) An mga tawong mapakumbaba asin hababa an boot rinerekonoser an saindang mga limitasyon asin minadepende sa tabang nin Dios mantang sinda nakikikabtang sa ministeryo sa langtad. Inaapresyar man ninda an espirituwal na tabang na itinatao nia paagi sa “fiel na mayordomo.”—Lucas 12:42-44; Talinhaga 22:4.
Maogmang Buhay Pampamilya—Sarong Marahayon na Balaog
19. Anong mga nakakokontribwir na bagay an nagbubunga nin kapangganahan sa pagpadakula nin mga aki?
19 An pag-agom asin maogmang buhay pampamilya balaog hale sa Dios. (Rut 1:9; Efeso 3:14, 15) An mga aki mahalaga man na marhay na “mana hale ki Jehova,” na nagtatao nin kagayagayahan sa mga magurang na mapangganang itinatadom an diosnon na mga kualidad sa sainda. (Salmo 127:3) Kun kamo sarong magurang, danay na maghinanyog sa tingog ni Jehova paagi sa pagsasanay sa saindong saradit na aki sono sa saiyang Tataramon. An mga naggigibo kaiyan seguradong maeeksperyensiahan an suporta asin nagsosopay na bendisyon ni Jehova.—Talinhaga 3:5, 6; 22:6; Efeso 6:1-4.
20. Ano an puedeng makatabang sa mga magurang na an mga aki nagbaya sa tunay na pagsamba?
20 Sa ibong kan sadiosan na paghihingoa kan diosnon na mga magurang, tibaad may mga aki sinda na magdesisyon na bayaan an tunay na pagsamba pagdakula ninda. (Genesis 26:34, 35) Ini puedeng makapanluyang gayo sa emosyon kan mga magurang. (Talinhaga 17:21, 25) Minsan siring, imbes na biyong mawaran nin paglaom, tibaad makatabang sa sainda na girumdomon an ilustrasyon ni Jesus manongod sa aking gastador. Minsan ngani naglayas sa harong an aking iyan asin namuhay sa masumbikal na paagi, sa huri sia nagbalik sa harong kan saiyang ama, na inako sia sa magayagaya asin mamomoton na paagi. (Lucas 15:11-32) Ano man an tibaad mangyari, an fiel na Kristianong mga magurang makaseseguro sa pagsabot ni Jehova, sa saiyang mamomoton na pagmalasakit, asin sa saiyang seguradong suporta.—Salmo 145:14.
21. Kiisay kita maninigong maghinanyog, asin taano?
21 Kun siring, determinaron niato gabos kun ano talaga an mahalaga sa satong buhay. Kita daw bangkag na pinag-aaabot an abundansia sa materyal, na puedeng magtao nin kakologan sa sato asin sa satong pamilya? O pinag-aaabot ta daw an ‘marahay na mga balaog asin sangkap na mga regalo’ na naghahale “sa Ama kan langitnon na mga liwanag”? (Santiago 1:17) Gusto ni Satanas, “an ama kan kaputikan,” na kita magpagal para sa materyal na kayamanan asin dai mag-ako nin kaogmahan sagkod nin buhay. (Juan 8:44; Lucas 12:15) Pero, nasa puso ni Jehova an mismong pinakaikararahay niato. (Isaias 48:17, 18) Kun siring, padagos kitang maghinanyog sa satong mamomoton na langitnon na Ama asin pirmeng “magkaigwa nin labi-labi nanggad na pagkakontento” dian sa saiya. (Salmo 37:4) Kun pag-aaaboton niato an siring na pamumuhay, an daing kaagid na mga balaog asin abundang bendisyon ni Jehova magpapayaman sa sato—asin iyan mayo man lamang ni kadikit na kolog.
[Nota sa Ibaba]
^ par. 10 Helingon an Awake!, Enero 22, 1993, pahina 18-21.
Nagigirumdoman daw Nindo?
• Saen manonompongan an pinakadakulang kaogmahan?
• Ano an nagkapira sa mga balaog na itinatao ni Jehova sa saiyang banwaan?
• Taano an ministeryo sa langtad ta sarong balaog?
• Ano an puedeng gibohon nin mga magurang tanganing kamtan an bendisyon nin Dios mantang pinadadakula ninda an saindang mga aki?
[Mga Hapot Para sa Pag-adal]
[Ritrato sa pahina 16]
Ipinaheheling daw nindo an apresasyon sa balaog nin Dios na nasusurat na Tataramon nia?
[Ritrato sa pahina 17]
Sa ibong nin depisil na marhay na mga kamugtakan, si Laurel Nisbet naglingkod nin maigot sa Dios
[Mga Ritrato sa pahina 18]
Arog ki Tabita, an mga Kristiano sa presenteng panahon midbid na marhay sa saindang mga gibo nin pagkamoot
[Ritrato sa pahina 19]
An Kristianong kamagurangan may mamomoton na pagmalasakit sa mga kapagtubod