Hula ni Isaias—Liwanag Para sa Bilog na Katawohan I

Kapitulo Otso: Si Jehova Dios Yaon sa Saiyang Banal na Templo

Isaias 6:​1-​13

1, 2. (a) Kasuarin si propeta Isaias nagkaigwa kan bisyon nia kan templo? (b) Taano ta nawara ki Hadeng Uzias an pabor ni Jehova?

“KAN taon na si Hadeng Uzias nagadan naheling ko man si Jehova, na nagtutukaw sa trono na halangkawon asin nasa itaas, asin an saiyang gayad nakapapano sa templo.” (Isaias 6:1) Paagi sa mga tataramon na ini kan propeta, minapoon an ika-6 na kapitulo kan libro ni Isaias. Idto taon nin 778 B.C.E.

² An pagreynar ni Uzias sa laog nin 52 na taon bilang hade kan Juda, sa kadaklan na parte, pambihira kamapanggana. Ginigibo “an tama sa mga mata ni Jehova,” nakamtan nia an pagsuportar nin Dios sa saiyang mga proyekto sa militar, pagtogdok, asin agrikultura. Alagad an kapangganahan nia iyo man an ikinapahamak nia. Pag-abot nin panahon, nagin mapaabaw-abaw an puso nia, “kaya sia guminawe na bakong fiel tumang ki Jehova na saiyang Dios asin nagduman sa templo ni Jehova tanganing magtotong nin insenso.” Huli sa pangahas na aktong ini asin sa pagkaanggot nia tumang sa mga saserdote na nagsagwe sa saiya, si Uzias nagadan na sarong daoton. (2 Cronica 26:3-22) Kan panahon na ini na pinonan ni Isaias an saiyang paglilingkod bilang sarong propeta.

3. (a) Aktuwal daw na naheling ni Isaias si Jehova? Ipaliwanag. (b) Anong eksena an naheling ni Isaias, asin sa anong dahelan?

³ Dai sinasabi sa sato kun haen si Isaias kan maheling nia an bisyon. Alagad an naheling nia paagi sa saiyang pisikal na mga mata malinaw na sarong bisyon, bakong aktuwal na pakaheling sa Makakamhan sa gabos, ta “mayo nin tawong nakaheling sa Dios kasuarin man.” (Juan 1:18; Exodo 33:20) Pero, an maheling an Kaglalang, si Jehova, dawa sa bisyon, sarong makangingirhat na eksena. Nakatukaw sa sarong halangkawon na trono, na nagsisimbolisar kan katongdan nia bilang daing katapusan na Hade asin Hokom, an Unibersal na Namamahala asin Burabod nin gabos na gobyernong lehitimo! An gayad kan saiyang halaba, pahiwas sa ibaba na gubing nakapano sa templo. Inaapod si Isaias sa paglilingkod bilang propeta na magbabantog kan kadakulaan kan soberanong kapangyarihan asin hustisya ni Jehova. Bilang preparasyon, tatawan sia nin bisyon kan kabanalan nin Dios.

4. (a) Taano ta segurado na simboliko an mga paglaladawan ki Jehova na naheling sa bisyon asin nasusurat sa Biblia? (b) Ano an nanonodan manongod ki Jehova sa bisyon ni Isaias?

⁴ Si Isaias daing paglaladawan na itinatao kan itsura ni Jehova sa saiyang bisyon​—bakong arog kan mga bisyon na isinurat ni Ezequiel, Daniel, asin Juan. Asin an mga salaysay na iyan gabos magkalaenlaen sa kun ano an naheling sa langit. (Ezequiel 1:26-28; Daniel 7:​9, 10; Kapahayagan 4:​2, 3) Minsan siring, dapat na isaisip kun anong klase asin kun ano an katuyohan kan mga bisyon na ini. An mga iyan bakong literal na mga paglaladawan kan presensia ni Jehova. Dai kayang maheling nin pisikal na mata an espirituwal,  ni na kayang saboton kan limitadong isip nin tawo an rona nin mga espiritu. Huli kaini, itinatao kan mga bisyon sa pananaram nin tawo an impormasyon na dapat na ipaabot. (Ikomparar an Kapahayagan 1:1.) Sa bisyon ni Isaias dai kaipuhan an paglaladawan sa itsura nin Dios. Sinasabi kan bisyon ki Isaias na si Jehova yaon sa saiyang banal na templo asin na sia banal saka dalisay an saiyang mga paghokom.

An mga Serafin

5. (a) Siisay an mga serafin, asin ano an kahulogan kan terminong iyan? (b) Taano ta tinatahoban kan mga serafin an saindang lalauogon asin bitis?

⁵ Hinanyoga! Nagpapadagos si Isaias: “May mga serafin na nagtitindog sa itaas nia. An balang saro igwa nin anom na pakpak. Paagi sa duwa tinatahoban nia an saiyang lalauogon, asin paagi sa duwa tinatahoban nia an saiyang bitis, asin paagi sa duwa sia naglalayog.” (Isaias 6:2) An Isaias kapitulo 6 iyo an solamenteng lugar sa Biblia na manonompongan niato an pagkasambit sa mga serafin. Malinaw na sinda mga linalang na anghel na naglilingkod ki Jehova na halangkawon an ranggo sa mga pribilehio asin sa onra, ta sinda nakadestino sa palibot kan langitnon na trono ni Jehova. Bakong arog kan mapalangkaw na si Hadeng Uzias, sinda nasa saindang katongdan na may biyong kapakumbabaan asin kababaan nin boot. Huli ta sinda nasa presensia kan langitnon na Soberano, tinatahoban ninda an saindang lalauogon nin sarong padis na pakpak; asin huli sa reberensia sa banal na lugar, tinatahoban ninda an saindang bitis nin saro pang padis na pakpak. Huling harani sa Unibersal na Soberano, orog pang irinayo kan mga serafin an atension sa sadiri, tangani na dai mawara an atension sa personal na kamurawayan nin Dios. An terminong “mga serafin,” na nangangahulogan “mga nagkakalayo” o “mga naglalaad,” nagsusuherir na sinda nagliliwanag, pero itinatago ninda an saindang lalauogon sa orog na liwanag asin kamurawayan ni Jehova.

6. Ano an kamugtakan kan mga serafin kun ikokomparar ki Jehova?

⁶ Ginagamit kan mga serafin an ikatolong padis kan saindang pakpak sa paglayog asin, daing duwa-duwa, tanganing makalayoglayog, o ‘makatindog,’ sa lugar ninda. (Ikomparar an Deuteronomio 31:15.) Kun manongod sa saindang kamugtakan, nagkokomento si Propesor Franz Delitzsch: “An mga serafin tunay na dai mapuesto nin mas halangkaw sa payo Nia na nagtutukaw sa trono, kundi naglalayoglayog sinda sa ibabaw kan Saiyang halabang gubing na nakapano sa tiriponan.” (Commentary on the Old Testament) Ini garo baga rasonable. Sinda “nagtitindog sa itaas,” bakong bilang mas halangkaw an ranggo kisa ki Jehova, kundi bilang nagseserbi sa saiya, makinuyog asin andam na maglingkod.

7. (a) Anong asignasyon an inootob kan mga serafin? (b) Taano ta tolong beses na ipinahahayag kan mga serafin an kabanalan nin Dios?

⁷ Hinanyoga, ngonyan, an pribilehiadong mga serafin na idto! “An saro nagkurahaw sa saro asin nagsabi: ‘Banal, banal, banal si Jehova nin mga hukbo. An kabilogan kan daga iyo an saiyang kamurawayan.’ ” (Isaias 6:3) An asignasyon sa sainda seguradohon na ikinapahahayag an kabanalan ni Jehova asin na rinerekonoser an saiyang kamurawayan sa bilog na uniberso, na kabtang kaiyan an daga. An kamurawayan nia naheheling sa gabos niang linalang asin madali nang mamansayan kan gabos na nag-eerok sa daga. (Bilang 14:21; Salmo 19:1-3; Habacuc 2:14) An tripleng pagpahayag, “banal, banal, banal,” bakong ebidensia nin Trinidad. Imbes, iyan tripleng pagdodoon kan kabanalan nin Dios. (Ikomparar an Kapahayagan 4:8.) Si Jehova banal sa sokol na labi sa gabos.

8. Ano an resulta kan mga pagpahayag kan mga serafin?

⁸ Minsan ngani dai sinasabi kun pira an serafin, tibaad may mga grupo nin serafin na nakapuesto harani sa trono. Sa awit na magayon pagdangogon, sunod-sunod nindang inootro an pagpahayag kan kabanalan asin kamurawayan nin Dios. Anong resulta an maririsa niato? Paghinanyog giraray mantang nagpapadagos si Isaias: “An mga itokan kan mga tata nagpoon na magtakig huli sa tingog kan saro na nagkukurahaw, asin an harong mismo luway-luway na napano nin aso.” (Isaias 6:4) Sa Biblia, an aso o panganoron parateng nagtatao nin naheheling na ebidensia kan presensia nin Dios. (Exodo 19:18; 40:​34, 35; 1 Hade 8:​10, 11; Kapahayagan 15:5-8) Iyan tanda nin kamurawayan na dian kitang mga linalang na tawo dai makadodolok.

Alangan, Pero Lininig

9. (a) Ano an epekto kan bisyon ki Isaias? (b) Ano an risang-risang pagkakalaen ni Isaias asin ni Hadeng Uzias?

⁹ An bisyon na ini kan trono ni Jehova nagkaigwa nin hararom na epekto ki Isaias. Isinurat nia: “Suminabi ako: ‘Herak man sa sako! Huli ta ako garo man sana pinasilensio, huli ta ako tawong maati an mga ngabil, asin ako nag-eerok sa tahaw nin banwaan na maati an mga ngabil; huli ta an sakuyang mga mata nakaheling sa Hade mismo, si Jehova nin mga hukbo!’ ” (Isaias 6:5) Magkalaen nanggad si Isaias asin si Hadeng Uzias! Inagaw  ni Uzias an katongdan kan linahidan na grupo nin mga saserdote asin daing galang na linaog an kuartong Banal kan templo. Minsan ngani naheling ni Uzias an mga kandelerong bulawan, an bulawan na altar nin insenso, asin an mga lamesa kan “tinapay nin Presensia,” dai nia naheling an lalauogon ni Jehova na may pag-oyon o naresibi an ano man na espesyal na sugo hale sa saiya. (1 Hade 7:48-50; nota sa ibaba) Sa ibong na lado, si propeta Isaias dai pinalimanlimanan an kabilogan na grupo nin mga saserdote o linaog an templo. Pero, nakaheling sia nin bisyon ki Jehova na yaon sa saiyang banal na templo asin nagkaonra na tawan nin direktang sugo hale sa Dios. Minsan ngani an mga serafin dai nangangahas na humeling sa natutukaw sa tronong Kagurangnan kan templo, si Isaias tinogotan, sa bisyon, na humeling sa “Hade mismo, si Jehova nin mga hukbo!”

10. Taano ta grabe an takot ni Isaias kan maheling an bisyon?

¹⁰ An pagkakalaen na naheling ni Isaias sa pag-oltanan kan kabanalan nin Dios asin kan saiya mismong pagkamakasalan nagpamate sa saiya na sia maation. Natakot na marhay, nangatanosan sia na sia magagadan. (Exodo 33:20) Nadadangog nia an mga serafin na inoomaw an Dios paagi sa malinig na mga ngabil, alagad an mga ngabil nia maati asin orog pang nadigtaan kan pagigin maati kan mga ngabil kan banwaan na sa tahaw kaiyan sia nag-eerok asin nadadangog nia an mga itinataram. Banal si Jehova, asin dapat na ipabanaag kan saiyang mga lingkod an kualidad na iyan. (1 Pedro 1:​15, 16) Dawa ngani napili na si Isaias bilang representante sa pagtaram nin Dios, narealisar niang marhay an pagigin makasalan nia asin mayo sia kan malinig na mga ngabil na angay sa representante sa pagtaram kan mamuraway asin banal na Hade. Ano daw an magigin simbag kan kalangitan?

11. (a) Ano an ginibo kan saro sa mga serafin, asin ano an isinisimbolisar kan ginibong ini? (b) Paano an paghorophorop sa sinabi kan serafin ki Isaias makatatabang sa sato kun an pagmate niato alangan kita bilang mga lingkod nin Dios?

¹¹ Imbes na palayason an hamak na si Isaias sa atubangan kan presensia ni Jehova, huminiro an mga serafin sa pagtabang sa saiya. Sinasabi kan rekord: “Sa puntong iyan, an saro sa mga serafin luminupad pasiring sa sakuya, asin yaon sa saiyang kamot an namumulang baga na kinua nia nin sipit sa altar. Asin dinutaan nia an sakuyang ngoso asin nagsabi: ‘Uya! Nadutaan na kaini an saimong mga ngabil, asin an saimong sala nawara na asin tinubos na an saimong kasalan.’ ” (Isaias 6:​6, 7) Sa simbolikong sentido, an kalayo nakakadalisay. Kan idinuduta an namumulang baga hale sa banal na kalayo kan altar sa mga ngabil ni Isaias, sinierto kan serafin ki Isaias na an saiyang mga kasalan tinubos na sa sokol na kaipuhan tangani na sia mag-ako kan pabor nin Dios asin nin sugo. Abaa kanakapakokosog liwat kaini sa satong boot! Kita man makasalan asin alangan na dumolok sa Dios. Alagad kita binalukat sa merito kan atang na pantubos ni Jesus asin puede nang mag-ako kan pabor nin Dios asin dumolok sa saiya sa pamibi.​—2 Corinto 5:​18, 21; 1 Juan 4:10.

12. Anong altar an naheling ni Isaias, asin ano an epekto nin kalayo?

¹² An nagpapagirumdom giraray sa sato na ini sarong bisyon iyo an pagkasambit sa “altar.” (Ikomparar an Kapahayagan 8:3; 9:13.) Duwa an altar sa templo sa Jerusalem. Sa atubangan mismo kan lipod kan Kabanalbanale yaon an sadit na altar nin insenso, asin sa atubangan kan entrada pasiring sa santuaryo yaon an dakulang altar nin atang, na duman dai pinaparong an kalayo. (Levitico 6:​12, 13; 16:​12, 13) Alagad an daganon na mga altar na ini tipiko, nagrerepresentar sa mas darakulang bagay. (Hebreo 8:5; 9:23; 10:5-10) Kalayo hale sa langit an tuminumtom sa dolot na tinotong na nasa ibabaw kan altar kan inaguraron an templo ni Hadeng Salomon. (2 Cronica 7:1-3) Asin ngonyan kalayo hale sa tunay, langitnon na altar an huminale kan pagigin maati kan mga ngabil ni Isaias.

13. Ano an ihinapot ni Jehova, asin siisay an iiniiba nia sa pagsabi niang “samo”?

¹³ Maghinanyog kita kaiba ni Isaias. “Nadangog ko an tingog ni Jehova na nagsasabi: ‘Siisay an sakong susugoon, asin siisay an maduman para sa samo?’ Asin ako nagsabi: ‘Uya ako! Sugoa ako.’ ” (Isaias 6:8) An hapot ni Jehova malinaw na an intension pasimbagon si Isaias, ta mayo man nin ibang propetang tawo sa bisyon. Dai mamamaluan na iyan pag-agda ki Isaias na magin mensahero ni Jehova. Alagad taano ta an hapot ni Jehova, “Siisay an maduman para sa samo?” Sa pagbalyo hale sa singular na personal na pronombreng “sako” pasiring sa plural na pronombreng “samo,” iiniiba ngonyan ni Jehova an kisuerra saro pang persona. Siisay? Bako daw na ini an saiyang bugtong na Aki, na kan huri nagin an tawong si Jesu-Cristo? Tunay nanggad, sa Aki man na ini nagsabi an Dios, “Gibohon niato an tawo sa satong ladawan.” (Genesis 1:26; Talinhaga 8:​30, 31) Iyo, kaabay ni Jehova sa langitnon na korte an saiyang bugtong na Aki.​—Juan 1:14.

14. Paano suminimbag si Isaias sa pag-agda ni Jehova, asin anong halimbawa an itinatao nia sa sato?

¹⁴ Si Isaias dai nagduwaduwa sa pagsimbag! Ano man an mensahe, tolos-tolos siang nagsimbag: “Uya ako! Sugoa ako.” Ni naghapot man sia kun ano an makukua nia sa pag-ako kan asignasyon. An saiyang espiritu na listong kumuyog marahay na halimbawa para sa gabos na lingkod nin Dios ngonyan, na isinugo na ihulit ‘an maogmang baretang ini kan kahadean sa bilog na ineerokan na daga.’ (Mateo 24:14) Kapareho ni Isaias, fiel sindang nagdadanay sa asignasyon sa sainda asin hinahaman an “pagpatotoo sa gabos na nasyon,” sa ibong nin lakop na dai paghimate. Asin nag-aabante sinda na may kompiansa, kapareho ni Isaias, sa pakaaram na an sugo sa sainda may pinakahalangkaw na autorisasyon.

[Mga Hapot Para sa Pag-adal]