Pinagsasararo nin Tunay na Pagsamba an mga Tawo

MINSAN ngani an relihion sa pankagabsan nakapababanga sa katawohan, an pagsamba sa iyo sanang tunay na Dios an igwa nin puersa na pagsararoon an mga tawo. Kan an Israel iyo an piniling banwaan nin Dios, dakol na sinserong Hentil an naakit sa tunay na pagsamba. Halimbawa, binayaan ni Rut an mga dios kan tinuboan niang Moab asin nagsabi ki Noemi: “An saimong banwaan magigin sakong banwaan, asin an saimong Dios sakong Dios.” (Rut 1:16) Pag-abot kan enot na siglo C.E., dakol na Hentil an nagin parasamba kan tunay na Dios. (Gibo 13:48; 17:4) Sa huri kan an mga apostol ni Jesus nagpoon na magbiahe pasiring sa hararayong lugar na dara an maogmang bareta, an iba pang sinserong mga tawo nagkasararo sa pagsamba sa tunay na Dios. “Kamo nagdolok sa Dios hale sa saindong mga idolo tanganing maglingkod sa sarong nabubuhay asin tunay na Dios,” an isinurat ni apostol Pablo. (1 Tesalonica 1:9) An pagsamba daw sa tunay na Dios igwa kan siring na nakakapasararong puersa ngonyan?

Nag-iinsistir an mga mapagduda na sala an magsabi nin “tunay na mga parasamba” o “an tunay na Dios.” Iyan an puedeng magin saboot ninda huli ta mayo sindang aram na ano man na gikanan na dian puedeng manodan an katotoohan. Alagad narealisar kan mga naghahanap kan katotoohan hale sa dakol na pinaghalean na an pagsamba bakong basado sa kun ano an gusto mo. An solamenteng saro na maninigo sa satong pagsamba iyo an Kaglalang kan gabos na bagay​—si Jehova Dios. (Kapahayagan 4:11) Sia an tunay na Dios, asin sia an may deretsong magdesisyon kun paano sia sasambahon.

Tanganing matabangan kitang mamansayan an saiyang mga kahagadan, si Jehova nagkomunikar sa sato paagi sa saiyang Tataramon, an Biblia. Haros gabos sa daga ngonyan puedeng makakua kan kompletong Biblia o mga kabtang kaiyan. Dugang pa, an Aki nin Dios nagsabi: “Kun kamo magdanay sa sakong tataramon, . . . mamimidbid nindo an katotoohan.” (Juan 8:​31, 32) Kun siring, an katotoohan puedeng maaraman. Asin minilyon na sadiosan an puso hale sa manlaenlaen na pinaghalean na mga relihion an makosog an boot na inaako an katotoohan na ini asin nagkakasararo sa tunay na pagsamba.​—Mateo 28:​19, 20; Kapahayagan 7:​9, 10.

Pambilog na Kinaban na Pagkasararo sa Satong Panahon!

Sarong pambihirang hula kan libro sa Biblia na Sofonias an nagsasabi manongod sa pag-iribanan nin mga tawo hale sa laen-laen na pinaghalean. Iyan nagsasabi: “Sa panahon na iyan itatao ko [ni Jehova Dios] sa mga banwaan an pagbago sa dalisay na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.” (Sofonias 3:9) Abaang gayon na paglaladawan ini nin nabagong mga tawo na may pagkasararong naglilingkod sa Dios!

Noarin ini mangyayari? An Sofonias 3:8 nagsasabi: “‘Padagos kamong maghalat sa sako,’ an sabi ni Jehova, ‘sagkod sa aldaw na ako mabuhat sa samsam, huli ta an sakuyang hudisyal na desisyon iyo na tiriponon an mga nasyon, sararoon an mga kahadean, tanganing ibubo sa sainda an sakong kabangisan, an gabos kong naglalaad na kaanggotan; huli ta mauubos an bilog na daga kan kalayo nin sakuyang kaigotan.’” Iyo, durante kan panahon na tinitipon ni Jehova an mga nasyon alagad bago nia ibubo sa sainda an saiyang naglalaad na kaanggotan, itinatao nia sa mga mahoyo sa daga an pagliwat sa sarong dalisay na tataramon. An panahon na iyan ngonyan na, huli ta an pagtipon sa gabos na nasyon sa guerra kan dakulang aldaw nin Dios na Makakamhan sa gabos sa Armagedon naponan na.​—Kapahayagan 16:​14, 16.

Tanganing pagsararoon an saiyang banwaan, tinatawan sinda ni Jehova nin sarong dalisay na tataramon. Kaiba sa bagong tataramon na ini an tamang pakasabot sa katotoohan sa Biblia manongod  sa Dios asin sa saiyang mga katuyohan. Kalabot sa pagtaram kan dalisay na tataramon an pagtubod sa katotoohan, pagtokdo kaiyan sa iba, asin pamumuhay kaoyon sa mga ley asin prinsipyo nin Dios. Nagkakaipo iyan nin pagrayo sa nakababangang politika asin paghale sa puso kan maimot na mga aktitud, siring baga kan rasismo asin nakababangang nasyonalismo na karakteristiko kan kinaban na ini. (Juan 17:14; Gibo 10:​34, 35) An gabos na sadiosan an puso na may pagkamoot sa katotoohan puedeng makanood kan tataramon na ini. Estudyare kun paanong an limang tawo na nasambitan sa naenot na artikulo​—na dati suruhaysuhay na marhay huli sa relihion​—sararo na ngonyan sa pagsamba sa saro asin iyo sanang tunay na Dios, si Jehova.

Sinda Nagkakasararo sa Tunay na Pagsamba

Kan si Fidelia, an debotong Katoliko Romano, magbakal nin Biblia para sa leksion sa eskuelahan kan saiyang aking babae, hinagad nia sa padi nia na ipaliwanag basado dian kun ano an nangyari sa lima niang aki na nagkagaradan. “Nakadedesganar nanggad!” sabi nia. Kaya kan sinongko sia kan mga Saksi ni Jehova, hinapot nia sinda kan kaparehong hapot. Pakabasaha sa sadiri niang Biblia kan katotoohan manongod sa kamugtakan kan mga gadan, narealisar nia kun paano sia dinaya kan saiyang iglesia. Nanodan nia na an mga gadan daing pakaaram asin kun siring dai nagsasakit sa Limbo o saen pa man. (Salmo 146:4; Eclesiastes 9:5) Hinale ni Fidelia an gabos niang relihiosong imahen, binayaan an iglesia, asin nagpoon na mag-adal sa Biblia. (1 Juan 5:21) Sa laog kan nakaaging sampulong taon, ikinaogma nia an pagtotokdo sa iba kan katotoohan na sono sa Kasuratan.

Nagbalyo si Tara na taga Kathmandu sa sarong nasyon na pipira sana an templo nin Hindu. Nagbisita sia kun siring sa sarong simbahan nin Metodista sa paglaom na mapanigoan an saiyang espirituwal na mga pangangaipo. Alagad dai nia nakua an simbag sa hapot nia manongod sa pagdusa nin mga tawo. Dangan nanompongan sia kan mga Saksi ni Jehova asin inalokan sia nin pag-adal sa Biblia. Si Tara nagsabi: “Narealisar ko na an sarong Dios nin pagkamoot dai puedeng magin responsable sa gabos na pagdusa sa kinaban . . . Naoogma akong marhay sa tinatanaw na bagong kinaban na may katoninongan asin pagkaoroyon.” (Kapahayagan 21:​3, 4) Hinale ni Tara an mga imahen sa Hindu, nagpondo sa pagsunod sa relihiosong mga kostumbre kan saiyang tinuboan na lugar, asin nanompongan an tunay na kaogmahan sa pagtabang na mapanigoan an espirituwal na mga pangangaipo kan iba bilang sarong Saksi ni Jehova.

Si Panya, an Budista, sarong parahimalad kan enot na manompongan sia kan mga Saksi ni Jehova sa Bangkok, kaya naakit sia sa mga hula sa Biblia. Isinaysay ni Panya: “Kan manodan ko kun taano ta an presenteng mga kamugtakan laen sa katuyohan kan Kaglalang sa kapoonpooni asin kun paano nia iinareglo na remedyohan an danyos na ginibo kan mga naghabo sa saiya asin sa saiyang soberaniya, garo man sana may sarong tahob na hinale sa sakong mga mata. An gabos manongod sa mensahe kan Biblia nagkakaoroyon na marhay. Namotan ko si Jehova bilang sarong persona; ini an nagmotibar sa sako na gibohon an aram kong tama. Gustong-gusto kong tabangan an iba na maheling an kalaenan kan kadonongan nin tawo asin diosnon na kadonongan. Talagang nabago kan tunay na kadonongan an sakong buhay.”

Pag-abot nin panahon, nagpoon na seryosong magduda si Virgil sa saiyang relihiosong mga paniniwala. Imbes na mamibi sa Dios para sa paagi na matabangan an mga itom asin para sa ibinibilang niang sarong rasistang organisasyon na garo nagpapaluwas nin pagkaongis sa mga puti, namibi sia para sa katotoohan, ano man iyan, saen man iyan. “Pagmata ko pagkaaga pakatapos kan sakong odok na pamimibi sa Dios,” an paggirumdom ni Virgil, “nakakua ako nin sarong magasin na Torrengbantayan sa harong. . . . Siertong isinurok iyan sa irarom kan pinto.” Dai nahaloy sia sigido nang nag-aadal sa Biblia kaiba kan mga Saksi ni Jehova. Sia nagpapadagos: “Sa kaenot-enoteng pangyayari sa buhay ko, nanigoan ako. . . . Nagpoon na mamansayan ko an sarong sinag nin paglaom.” Dai nahaloy  si Virgil kasaro na kan mga nag-aalok sa mga tawo kan solamenteng tunay na paglaom na yaon sa Tataramon nin Dios, an Biblia.

Si Charo na taga Latin Amerika naghanga kan an sarong Saksi na an ngaran Gladys naheling siang nadedepisilan sa saiyang saradit na aki asin nagpoon na tabangan sia paagi sa paghatod sa saiya sa sadan. Pag-abot nin panahon, inako ni Charo an alok ni Gladys​—sarong daing bayad na pag-adal sa Biblia. Kan naaraman ni Charo sa sadiri niang Biblia na bakong gabos na marahay na tawo maduman sa langit kundi na bebendisyonan man ni Jehova an mga tawo sa daga nin buhay na daing katapusan, sia napangalas. (Salmo 37:​11, 29) Si Charo mismo naghihiras sa iba kan paglaom na ini sa nakaaging 15 taon na.

Imahinaron an bilog na daga na iniistaran nin sinserong mga tawo na nagkakasararo sa pagsamba ki Jehova, an iyo sanang tunay na Dios! Bako ining imahinasyon. Ini an ipinanuga ni Jehova. Paagi sa saiyang propetang si Sofonias, an Dios nagsabi: “Wawalatan ko nanggad sa tahaw mo nin sarong banwaan na mapakumbaba asin may kababaan, asin sinda magpapaili nanggad sa ngaran ni Jehova. . . . Dai sinda magibo nin karatan, ni magtataram nin kaputikan, ni may makukua man sa saindang ngoso na madayang dila; . . . asin mayo nin siisay man na mapatakig sa sainda.” (Sofonias 3:​12, 13) Kun an panugang ini nakaaakit sa saindo, isapuso an sadol kan Biblia: “Hanapa nindo si Jehova, kamo gabos na mahoyo sa daga, na naggibo kan Saiyang hudisyal na desisyon. Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.”​—Sofonias 2:3.