Kapitulo Nuebe: Magtiwala ki Jehova Kun Napapaatubang sa Kasakitan
Hula ni Isaias—Liwanag Para sa Bilog na Katawohan I
Kapitulo Nuebe: Magtiwala ki Jehova Kun Napapaatubang sa Kasakitan
1. Taano ta makikinabang an mga Kristiano ngonyan sa pagsiyasat kan Isaias kapitulo 7 asin 8?
An Isaias kapitulo 7 asin 8 marahay na halimbawa nin magkalaen na reaksion. Si Isaias asin Acaz pareho miembro nin sarong nasyon na dusay ki Jehova; pareho sinda may tao nin Dios na asignasyon, an saro bilang propeta, an saro man bilang hade kan Juda; asin pareho sinda napapaatubang sa iyo man sanang peligro—an pagsakyada sa Juda nin nakalalabing mga hukbo nin kalaban. Minsan siring, inatubang ni Isaias an peligro na may pagkompiar ki Jehova, mantang si Acaz napadaog sa takot. Taano ta magkalaen an reaksion? Mantang an mga Kristiano ngonyan napalilibotan man nin mga puersang antipatiko, marahay na siyasaton ninda an duwang kapitulong ini nin Isaias tanganing madiskobre kun ano an mga leksion dian.
Pag-atubang sa Sarong Desisyon
2, 3. Anong sumaryo an itinatao ni Isaias sa saiyang enot na mga tataramon?
2 Kapareho nin sarong pintor na paagi sa pirang kurit ikinokrokis an sarong bagong ipipinta, pinoponan ni Isaias an saiyang salaysay paagi sa pirang pankagabsan na deklarasyon na tanda kan kapinonan asin katapusan kan mga pangyayari na saiyang isasaysay: “Nangyari kan kaaldawan ni Acaz na aki ni Jotam na aki ni Uzias, na hade kan Juda, na si Rezin na hade kan Siria Isaias 7:1.
asin si Peka na aki ni Remalias, na hade kan Israel, nagtukad pasiring sa Jerusalem tangani na makiguerra tumang dian, asin dai nia nakayang makiguerra tumang dian.”—3 Ikawalong siglo B.C.E. kaidto. Suminalihid si Acaz sa saiyang ama, si Jotam, bilang hade sa Juda. Sinakyada an Juda ni Rezin, an hade kan Siria, asin ni Peka, an hade kan amihanan na kahadean nin Israel, asin maisog an pananalakay kan saindang mga hukbo. Sa kahurihurihi, sasalikopan mismo ninda an Jerusalem. Minsan siring, mapaprakaso an pagsalikop. (2 Hade 16:5, 6; 2 Cronica 28:5-8) Taano? Maaaraman niato iyan sa huri.
4. Taano ta napano nin takot an puso ni Acaz asin kan saiyang banwaan?
4 Sa kapinonan kan guerra, “may ibinareta sa kamag-anakan ni David, na sinasabi: ‘An Siria suminandig sa Efraim.’ Asin an puso nia saka an puso kan saiyang banwaan nagpoon na magtakig, arog kan pagtakig kan mga kahoy sa kadlagan huli sa doros.” (Isaias 7:2) Iyo, ikinakubhan ni Acaz asin kan saiyang banwaan an pakaaram na magkakampi na an mga Sirio asin Israelita asin na nagkakampo na an saindang mga hukbo sa mismong oras na idto sa daga ni Efraim (nin Israel). Duwa o tolong aldaw na sanang martsahon an rayo ninda sa Jerusalem!
5. Sa anong paagi na an banwaan nin Dios ngonyan kapareho ni Isaias?
5 Sinabihan ni Jehova si Isaias: “Luwas, tabi, sa pagsabat ki Acaz, ika asin si Sear-jasub na aki mo, sa poro kan pasulogan kan tangke sa itaas sa may tinampo kan oma kan paralaba.” (Isaias 7:3) Isip-isipa na sana! Sa panahon na an hade maninigo kutanang hinahanap an propeta ni Jehova asin naghahagad nin paggiya, an propeta an kinaipuhan na paduman asin hanapon an hade! Dawa siring, gikan sa boot na kinuyog ni Isaias si Jehova. Kaagid kaiyan, an banwaan nin Dios ngonyan magian sa boot na minaluwas sa paghanap sa mga tawo na natatakot huli sa mga sakit kan kinaban na ini. (Mateo 24:6, 14) Abaa kanakakokontento na kada taon ginatos na ribo an naghihimate sa mga pagsongko kan mga parahulit na ini kan maogmang bareta asin minakapot sa nagpoprotehir na kamot ni Jehova!
6. (a) Anong nakapakokosog sa boot na mensahe an ipinaabot kan propeta ki Hadeng Acaz? (b) Ano an situwasyon ngonyan?
6 Si Acaz nanompongan ni Isaias sa luwas kan mga lanob nin Jerusalem, na duman, bilang preparasyon sa inaasahan na pagsalikop, iniinspeksion kan hade an suplay na tubig kan siudad. Itinao sa saiya ni Isaias an mensahe ni Jehova: “Magmaan ka asin magdanay kang toninong. Dai ka matakot, asin hari pagtogoti na manluya an boot kan saimong puso huli sa duwang saporo kan nag-aasong mga nugpong ini, huli sa mainit na kaanggotan ni Rezin asin kan Siria patin kan aki ni Remalias.” (Isaias 7:4) Kan destrosaron an Juda kan mga suminalakay bago kaidto, an kaanggotan ninda arog kainit nin mga laad. Ngonyan sinda ‘duwang saporo na sana nin nag-aasong mga nugpo.’ Dai kaipuhan na matakot si Acaz ki Hadeng Rezin kan Siria o ki Hadeng Peka kan Israel, na aki ni Remalias. Arog man kaiyan ngonyan. Sa dakol na siglo, an tunay na mga Kristiano pinapagdusa kan mga namomoon sa Kakristianohan sa nagkakalayong paglamag. Pero, ngonyan, an Kakristianohan garo na sarong nugpo na haros tumtom na. Bilang na an saiyang mga aldaw.
7. Taano an ngaran ni Isaias asin kan saiyang aki ta nagtatao nin dahelan na maglaom?
7 Kan kaaldawan ni Acaz, bako sanang an mensahe ni Isaias kundi pati an kahulogan kan ngaran ni Isaias asin kan saiyang aki nagtatao nin paglaom sa mga nagtitiwala ki Jehova. Totoo, nasa peligro an Juda, alagad an ngaran ni Isaias, na nangangahulogan “Pagliligtas ni Jehova,” tanda na si Jehova matao nin pagliligtas. Sinabihan ni Jehova si Isaias na ipag-iba an aki niang si Sear-jasub, na an ngaran nangangahulogan “Natatada Sana an Mabalik.” Dawa kun sa katapustapusi bumagsak na an kahadean kan Juda, maheherakon na ibabalik nin Dios sa daga an sarong natatada.
Bako Sanang Guerra sa Pag-oltanan nin mga Nasyon
8. Taano an pagsalakay sa Jerusalem ta bako sanang guerra sa pag-oltanan nin mga nasyon?
8 Ihinayag ni Jehova, paagi ki Isaias, an estratehiya kan mga kalaban kan Juda. Uya an pinaplano ninda: “Tumukad kita tumang sa Juda asin rugtason niato iyan asin paagi sa mga pakalusot Isaias 7:5, 6) Nagpakana an ligang Siro-Israelita na kongkistaron an Juda asin salidahan si Acaz, na aki ni David, kan gusto ninda. Malinaw nanggad, an pagsalakay sa Jerusalem bako na sana ngonyan na guerra sa pag-oltanan nin mga nasyon. Iyan nagin nang pagdinaogan ni Satanas asin ni Jehova. Taano? Huli ta nakipagtipan si Jehova Dios ki Hadeng David, sa siring inaasegurar sia na an saiyang mga aki mamamahala sa banwaan ni Jehova. (2 Samuel 7:11, 16) Abaa kadakulang kapangganahan para ki Satanas kun mapatutukaw nia sa trono sa Jerusalem an ibang dinastiya nin mga hade! Tibaad masudya pa ngani nia an katuyohan ni Jehova na an linahe ni David luwasan nin permanenteng paramana, an “Prinsipe nin Katoninongan.”—Isaias 9:6, 7.
sa kalaban kuanon niato iyan para sa satong sadiri; asin papagreynaron niato dian an ibang hade, an aki ni Tabeel.” (An Mamomoton na mga Garantiya ni Jehova
9. Anong mga garantiya an maninigong magtao nin kosog nin boot ki Acaz saka sa mga Kristiano ngonyan?
9 Magigin mapanggana daw an pakana nin Siria asin Israel? Dai. Sinasabi ni Jehova: “Dai iyan magdadanay, ni mangyayari man iyan.” (Isaias 7:7) Paagi ki Isaias, sinasabi ni Jehova na bako sana na mapaprakaso an pagsalikop sa Jerusalem kundi “sa laog sana nin anom na polo may limang taon an Efraim pipiropidasohon tangani na dai na magin banwaan.” (Isaias 7:8) Iyo, sa laog nin 65 taon dai na maeksister bilang sarong banwaan an Israel. * An garantiyang ini, kaiba an espesipikong iskedyul kaiyan, maninigong magtao nin kosog nin boot ki Acaz. Sa kaparehong paagi, an banwaan nin Dios ngonyan napakokosog kan pakaaram na paubos na an panahon na natatada para sa kinaban ni Satanas.
10. (a) Paano maaarog nin tunay na mga Kristiano ngonyan si Jehova? (b) Ano an iinopresir ni Jehova ki Acaz?
10 Tibaad nabanaag sa panlauog ni Acaz an dai pakapaniwala, ta sinasabi ni Jehova paagi ki Isaias: “Kun dai kamo matubod, sa siring dai kamo maghahaloy.” Huli sa saiyang pasensia, si Jehova “nagtaram pa ki Acaz.” (Isaias 7:9, 10) Abaa karahay na halimbawa! Ngonyan, dawa dakol an dai tolos naghihimate sa mensahe kan Kahadean, marahay na arogon niato si Jehova paagi sa ‘pagtaram pa’ mantang paorootro kitang minasongko. Sumunod, sinabi ni Jehova ki Acaz: “Humagad ka para sa saimo man sana nin tanda ki Jehova na saimong Dios, na pinarararom iyan arog kan Sheol o pinalalangkaw iyan arog kan mga rehion sa itaas.” (Isaias 7:11) Si Acaz makahahagad nin tanda, asin gigibohon iyan ni Jehova bilang garantiya na saiyang poprotehiran an kamag-anakan ni David.
11. Anong garantiya an yaon sa pananaram ni Jehova na “saimong Dios”?
11 Mangnoha na sinasabi ni Jehova: ‘Humagad ka nin tanda sa saimong Dios.’ Tunay na maboot si Jehova. Si Acaz nagsasamba na daa kaidto sa falsong mga dios asin nagsusunod sa makababaldeng mga gibong pagano. (2 Hade 16:3, 4) Sa ibong kaiyan asin sa ibong kan matatakton na aktitud ni Acaz, inaapod pa man giraray ni Jehova an saiyang sadiri na Dios ni Acaz. Sinisierto kaini sa sato na dai pabiglabiglang hinahaboan ni Jehova an mga tawo. Andam siang tumabang sa mga nasasala o luminuya an pagtubod. An garantiya daw na ini kan pagkamoot nin Dios mapahiro ki Acaz na kumapot sa kamot ni Jehova?
Poon sa Pagduda Sagkod sa Pakisuway
12. (a) Ano an nagin maabhaw na aktitud ni Acaz? (b) Imbes na dumolok ki Jehova, kiisay nagpatabang si Acaz?
12 Palaban na suminimbag si Acaz: “Dai ako mahagad, ni ibubugtak ko man sa pagbalo si Jehova.” (Isaias 7:12) Dai inootob digdi ni Acaz an mga tataramon kan ley: “Dai nindo dapat na ibugtak si Jehova na saindong Dios sa pagbalo.” (Deuteronomio 6:16) Pakalihis nin mga siglo, kinotar ni Jesus an iyo man sanang ley na iyan kan sugotan sia ni Satanas. (Mateo 4:7) Pero, sa kaso ni Acaz, inaagda sia ni Jehova na bumalik sa tunay na pagsamba asin nag-oopresir si Jehova na pakosogon an saiyang pagtubod paagi sa paggibo nin sarong tanda. Minsan siring, mas gusto ni Acaz na humanap nin proteksion sa iba. Posible na sa puntong ini na an hade nagpadara nin dakulang kantidad nin kuarta sa Asiria, na nagpapatabang tumang sa saiyang mga kalaban sa amihanan. (2 Hade 16:7, 8) Mientras tanto, an Jerusalem pinalibotan kan hukbong Siro-Israelita asin nagpoon an pagsalikop.
13. Anong pagkaliwat an naririsa niato sa bersikulo 13, na tanda nin ano?
13 Nasa isip an kadaihan nin pagtubod kan hade, sinasabi ni Isaias: “Paghinanyog tabi kamo, O kamag-anakan ni David. Sadit-sadit na bagay daw para sa saindo na pagalon an mga tawo, kaya pinapagal man nindo an sakong Dios?” (Isaias 7:13) Iyo, puedeng mapagal si Jehova sa daing ontok na paglaban. Mangnoha man na an sabi na ngonyan kan propeta “sakong Dios,” bakong “saindong Dios.” Tanda nin nagdadangadang na maraot an pagkaliwat na ini! Kan haboan ni Acaz si Jehova asin dumolok sia sa Asiria, nawara nia an marahay na oportunidad na ibalik an saiyang relasyon sa Dios. Logod na nungka niatong isakripisyo an relasyon niato sa Dios paagi sa pagkompromiso kan mga tinutubod niato sono sa Kasuratan tangani na kamtan an temporaryong mga bentaha.
An Tanda ni Emmanuel
14. Paano ipinaheheling ni Jehova an pagigin fiel nia sa tipan nia ki David?
14 Si Jehova nagdanay na fiel sa saiyang tipan ki David. Iinopresir an sarong tanda, itatao an sarong tanda! Nagpapadagos si Isaias: “Si Jehova mismo matao nin tanda sa saindo: Uya! An hoben na babae mismo talagang magbabados, asin mangangaki sia nin lalaki, asin aapodon nia nanggad an ngaran kaini na Emmanuel. Mantikilya asin tangguli an kakakanon nia sa panahon na tatao na siang haboan an maraot asin pilion an marahay. Huli ta bago an aki magin tataong haboan an maraot asin pilion an marahay, an daga kan duwang hade na kinatatakotan nindo nin grabe biyong pababayaan.”—Isaias 7:14-16.
15. Anong duwang hapot an sinisimbag kan hula manongod ki Emmanuel?
15 Uya an maogmang bareta para sa siisay man na natatakot na tataposon kan mga nananakyada an dinastiya ni David. An “Emmanuel” nangangahulogan “Nasa Sato an Dios.” An Dios nasa Juda asin dai nia pababayaan na maimbalido an tipan nia ki David. Dugang pa, sinabi ki Acaz asin sa banwaan nia bako sanang an gigibohon ni Jehova kundi siring man kun noarin nia iyan gigibohon. Bago umabot sa edad an aking si Emmanuel na nakakamidbid na sia kan marahay asin maraot, malalaglag an kalaban na mga nasyon. Asin ini nagkatotoo!
16. Ano an tibaad dahelan na pinabayaan ni Jehova na dai maseguro kun siisay si Emmanuel kan kaaldawan ni Acaz?
16 Dai ihinahayag kan Biblia kun kiisay na aki si Emmanuel. Alagad mantang magseserbing tanda an aking si Emmanuel asin sa huri sinasabi ni Isaias na sia asin an saiyang mga aki “mga tanda,” si Emmanuel tibaad aki kan propeta. (Isaias 8:18) Tibaad pinabayaan ni Jehova na dai maseguro kun siisay si Emmanuel kan kaaldawan ni Acaz tangani na dai ikarayo an atension kan masurunod na kapag-arakian ki Emmanuel na Orog na Dakula. Siisay iyan?
17. (a) Siisay an Emmanuel na Orog na Dakula, asin ano an nagin kahulogan kan saiyang pagkamundag? (b) Taano ta makakukurahaw ngonyan an banwaan nin Dios, “Nasa sato an Dios”?
17 Apuera sa libro ni Isaias, sarong beses sanang minalataw an ngaran na Emmanuel sa Biblia, sa Mateo 1:23. Pinasabngan ni Jehova si Mateo na iaplikar an hula kan pagkamundag ni Emmanuel sa pagkamundag ni Jesus, an lehitimong Paramana kan trono ni David. (Mateo 1:18-23) An pagkamundag kan enot na Emmanuel tanda na dai binayaan nin Dios an kamag-anakan ni David. Siring man, an pagkamundag ni Jesus, an Emmanuel na Orog na Dakula, tanda na dai binayaan nin Dios an katawohan o an saiyang pakitipan sa Kahadean sa kamag-anakan ni David. (Lucas 1:31-33) Mantang nasa tahaw na kaidto nin katawohan an pangenot na representante ni Jehova, masasabi nin totoo ni Mateo na ‘Nasa sato an Dios.’ Ngonyan, si Jesus namamahala bilang langitnon na Hade asin nasa saiyang kongregasyon digdi sa daga. (Mateo 28:20) Daing duwa-duwa, an banwaan nin Dios may dagdag na dahelan na pusoan na magkurahaw: “Nasa sato an Dios!”
[Nota sa Ibaba]
^ par. 9 Para sa dagdag na detalye manongod sa kaotoban kan hulang ini, helingon an Insight on the Scriptures, Tomo 1, pahina 62 asin 758, na ipinublikar kan Watchtower Bible and Tract Society of New York, Inc.
[Mga Hapot Para sa Pag-adal]