Paano Nindo Matatabangan an Sarong “Gastador” na Aki?

“Maggayagaya huli ta . . . sia nawara asin nakua.”—LUCAS 15:32.

1, 2. (a) Ano an nagin reaksion nin nagkapirang hoben sa Kristianong katotoohan? (b) Ano an puedeng mamatean kan mga magurang asin aki sa siring na mga situwasyon?

“BABAYAAN ko na an katotoohan!” Abaa kanakabibigla para sa matatakton sa Dios na mga magurang na naghingoang marhay na padakulaon an saindang mga aki sa Kristianong pamumuhay na madangog an mga tataramon na ini sa sarong aki! An ibang mga hoben basta na sanang ‘inaanod’ na dai talaga nagsasabi kan saindang mga intension. (Hebreo 2:1) An dakol sa mga ini kapareho kan aking gastador sa parabola ni Jesus, na naghale sa harong kan saiyang ama asin sinayang an saiyang mana sa sarong harayong daga.​—Lucas 15:11-16.

² Minsan ngani an kadaklan na Saksi ni Jehova mayo kan problemang ini, para sa mga may siring na problema, dai kayang haleon nin biyo nin ano man na tataramon nin karangahan an saindang kamondoan. Asin dai dapat lingawan an kamondoan na puedeng maeksperyensiahan kan nalalagalag na hoben mismo. Sa kairairaromi, puedeng riniribok sia kan saiyang konsensia. Sa parabola ni Jesus, an aking gastador sa kahurihurihi ‘nakapag-isip-isip,’ na ikinagayagaya kan saiyang ama. Paano matatabangan kan mga magurang asin kan iba pa sa kongregasyon an mga gastador na ‘makapag-isip-isip’?​—Lucas 15:17.

Kun Taano an Nagkapira ta Nagdedesisyon na Bumaya

3. Ano an nagkapirang dahelan kun taano ta nagdedesisyon an mga hoben na bayaan an Kristianong kongregasyon?

³ Ginatos na ribong hoben an maogmang naglilingkod  ki Jehova sa Kristianong kongregasyon. Kun siring, taano an iba ta nagbabaya? Tibaad nagsasaboot sinda na may nawawara sa sainda na iinaalok kan kinaban. (2 Timoteo 4:10) O tibaad iniisip nindang sobra kamapamogol kan nagpoprotehir na toril nin mga karnero ni Jehova. An nagkasalang konsensia, makosog na pagkagusto sa bakong kasekso, o an pagmawot na akoon nin mga kaedad puedeng magin dahelan man na an sarong hoben ianod parayo sa aripompon ni Jehova. An sarong hoben tibaad pumondo sa paglilingkod sa Dios huli sa garo baga pagsaginsagin kan saiyang mga magurang o ibang Kristiano.

4. Ano sa parate an pinakaugat kan pagkalagalag nin mga hoben?

⁴ An rebeldeng aktitud asin gawe-gawe nin sarong aki sa parate mga sintoma nin espirituwal na kaluyahan, nagpaparisa kan nasa saiyang puso. (Talinhaga 15:13; Mateo 12:34) Ano man an dahelan kan pagkalagalag nin sarong hoben, an pinakaugat kan problema sa parate huli ta mayo sia nin “tamang kaaraman kan katotoohan.” (2 Timoteo 3:7) Imbes na mekanikal sanang pagsamba ki Jehova, mahalaga na kultibaron kan mga hoben an dayupot na personal na relasyon sa saiya. Ano an makatatabang sa sainda na gibohon iyan?

Rumani Kamo sa Dios

5. Ano an kaipuhan tanganing makultibar nin hoben an personal na relasyon sa Dios?

⁵ “Rumani kamo sa Dios,” an isinurat ni disipulo Santiago, “asin sia marani sa saindo.” (Santiago 4:8) Tanganing magibo iyan, an sarong hoben dapat na matabangan na kultibaron an gana para sa Tataramon nin Dios. (Salmo 34:8) Sa primero kakaipuhanon nia an “gatas”​—an pundamental na katokdoan kan Biblia. Alagad mantang sia nagkakaigwa nin kaogmahan sa Tataramon nin Dios asin nagkakaigwa nin gana para sa “matagas na kakanon,”​—hararom na espirituwal na impormasyon​—dai mahahaloy maaabot nia an espirituwal na pagkamaygurang. (Hebreo 5:11-14; Salmo 1:2) An sarong hoben na nag-admitir na sia biyong naimpluwensiahan kan ugale kan kinaban nagpoon na apresyaron an espirituwal na mga prinsipyo sa buhay. Ano an nakatabang sa saiya na magbakle? Hinihimate an suhestion na basahon an bilog na Biblia, sinunod nia an regular na iskedyul sa pagbasa nin Biblia. Iyo, an regular na pagbasa kan Tataramon nin Dios kaipuhan sa pagkultibar nin kadayupotan ki Jehova.

6, 7. Paano puedeng tabangan kan mga magurang an saindang mga aki na mapatalubo an hilig para sa Tataramon nin Dios?

⁶ Mahalagang marhay nanggad na tabangan kan mga magurang an saindang mga aki na kultibaron an hilig para sa Tataramon nin Dios! Sa ibong nin pagkaigwa nin regular na pampamilyang pag-adal, an sarong daragita nakiibaiba sa mga delingkuente. Mapadapit sa saiyang pampamilyang pag-adal, nagigirumdoman nia: “Kun si Tatay naghahapot, binabasa ko sana an mga simbag, na dai ngani nagheheling sa saiyang lalauogon.” Imbes na kobrehan sana an materyal durante nin pampamilyang pag-adal, an madonong na mga magurang naggagamit nin teknika sa pagtotokdo. (2 Timoteo 4:2) Tanganing ikaogma nin hoben an pag-adal, dapat mamatean nia na imbuelto sia dian. Taano ta dai gumamit nin mga hapot sa punto de vista asin bayaan siang ipahayag an nasa boot nia? Enkaminaron an hoben na magtao nin praktikal na aplikasyon kan materyal na pinag-oolayan. *

⁷ Dugang pa, gibohon na buhay an pag-orolay sa Kasuratan. Kun angay, ipaakto sa mga hoben an mga pangyayari asin drama sa Biblia. Tabangan sinda na iladawan sa isip an mga lugar asin karakteristiko kan daga na pinangyarihan kan pinag-oolayan na mga pangyayari. Puedeng makatabang an paggamit nin mga mapa asin tsart. Iyo, paagi sa dikit na imahinasyon, an pampamilyang pag-adal puedeng gibohon na buhay asin may pagkalaenlaen. An mga magurang maninigo man na siyasaton an saindang relasyon ki Jehova. Mantang sinda minarani nin orog ki Jehova, matatabangan ninda an saindang mga aki na gibohon iyan.​—Deuteronomio 6:5-7.

8. Paano an pamibi nakatatabang sa saro na rumani sa Dios?

⁸ An pamibi nakatatabang man sa saro na rumani sa Dios. An sarong daragita nababanga an isip sa Kristianong dalan nin pamumuhay asin sa saiyang pakikiiba sa mga katood na bako niang kapagtubod. (Santiago 4:4) Ano an ginibo nia manongod dian? “Sa kaenot-enote,” sia nagtuga, “talagang namibi ako ki Jehova manongod sa namatean ko.” Nagkonklusyon sia na sinimbag an saiyang pamibi kan sa kahurihurihi nakanompong sia sa  laog kan Kristianong kongregasyon nin katood na puede niang tugaan nin sekreto. Nagsasaboot na ginigiyahan sia ni Jehova, pinonan niang pataluboon an saiyang personal na relasyon sa Dios. Matatabangan kan mga magurang an saindang mga aki paagi sa pagpaoswag kan kualidad kan sainda mismong mga pamibi. Kun namimibi bilang pamilya, puedeng biyong ipahayag kan mga magurang an nasa puso ninda tangani na mamatean kan saindang mga aki an personal na bungkos kan mga magurang asin ni Jehova.

Magin Mapasensia Alagad Marigon

9, 10. Anong halimbawa an itinao ni Jehova sa pagigin matinios sa nalagalag na mga Israelita?

⁹ Kun pumoon nang ianod parayo an sarong hoben, tibaad sia magsolosolo asin kontrahon an ano man na paghihingoa kan saiyang mga magurang na magkaigwa nin espirituwal na pakikipag-olay sa saiya. Ano an magigibo kan mga magurang sa siring na masakit na situwasyon? Estudyare an ginibo ni Jehova sa suanoy na Israel. Tinios nia an “matagas an liog” na mga Israelita sa laog nin labing 900 na taon bago nia sinda binayaan sa saindang dalan nin pagkalagalag. (Exodo 34:9; 2 Cronica 36:17-21; Roma 10:21) Sa ibong kan saindang paorootrong ‘pagbalo sa saiya,’ si Jehova “maheherakon” sa sainda. “Dakol na beses na pinopogolan nia an saiyang kaanggotan, asin dai nia pinupukaw an bilog niang kabangisan.” (Salmo 78:38-42) An Dios daing sala sa saiyang pagtratar sa sainda. Inaarog kan mamomoton na mga magurang si Jehova asin mapasensia kun an aki dai tolos naghihimate sa saindang mga paghihingoa na tabangan sia.

¹⁰ An pagigin matinios, o mapasensia, dai nangangahulogan nin “pagtios nin halawig”; nagpaparisa iyan nin pagsayumang mawaran kan gabos na paglaom na rumahay an naraot na relasyon. Si Jehova nagtao nin halimbawa kun paano magin matinios. Sia na an nagsadiring boot paagi sa pagsugo “nin paorootro” sa saiyang mga mensahero sa mga Israelita. Si Jehova “nakamate nin pagdamay sa saiyang banwaan,” minsan ngani “padagos na pinag-oolog-olog ninda an mga mensahero kan tunay na Dios asin dinuduhagi an saiyang mga tataramon.” (2 Cronica 36:​15, 16) Sia nakiolay sa mga Israelita, na nagsasabi: “Tumalikod tabi an lambang saro sa saiyang maraot na dalan.” (Jeremias 25:​4, 5) Pero, dai ikinompromiso ni Jehova an saiyang matanos na mga prinsipyo. An mga Israelita pinagbotan na bumalik sa Dios asin sa saiyang mga dalan.

11. Paano puedeng magin matinios an mga magurang alagad marigon sa pagtratar sa sarong nagsusuway na aki?

¹¹ Puedeng arogon kan mga magurang si Jehova sa pagigin matinios paagi sa pagigin dai tolos  nawawaran nin paglaom dapit sa nagsusuway na aki. Huling dai nawawaran nin paglaom, puedeng sinda na an magsadiring boot na pagdanayon na bukas an linya nin komunikasyon o magkaigwa liwat nin komunikasyon. Mantang nagsususog sa matanos na mga prinsipyo, sinda puedeng “paorootrong” makiolay sa aki na bumalik sa dalan kan katotoohan.

Kun Matiwalag an Sarong Menor de Edad

12. Ano an paninimbagan kan mga magurang sa sarong menor de edad na kaibahan ninda sa harong alagad hinale sa kongregasyon?

¹² Kumusta kun an sarong menor de edad na kaiba sa harong nin mga magurang maimbuelto sa magabat na paggibo nin sala asin huli sa saiyang daing pagsolsol na aktitud haleon sa kongregasyon? Huling an aki kaiba sa harong kan saiyang mga magurang, sinda may paninimbagan pa man giraray na tokdoan asin disiplinahon sia kaoyon sa Tataramon nin Dios. Paano ini magigibo?​—Talinhaga 6:20-22; 29:17.

13. Paano puedeng hingoahon nin mga magurang na taroson an puso kan napasalang aki?

¹³ Tibaad posible​—sa katunayan, pinakamarahay​—na itao an siring na pagtotokdo asin disiplina durante nin sarong pribadong pag-adal kan Biblia. Dapat na helingon nin magurang an nasa likod kan tuminagas na aktitud kan aki asin hingoahon na mansayon kun ano an nasa puso nia. Sagkod saen an apektado kan saiyang espirituwal na helang? (Talinhaga 20:5) Puede daw na mataros an sensitibong kabtang kan saiyang puso? Anong mga teksto an puedeng gamiton nin epektibo? Inaasegurar kita ni apostol Pablo: “An tataramon nin Dios buhay asin mapuersa asin mas matarom kisa arin man na espada na may duwang tarom asin nakalalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakamamansay kan mga kaisipan asin intension kan puso.” (Hebreo 4:12) Iyo, an magigibo kan mga magurang bako sanang sabihon sa saindang mga aki na dai na liwat maimbuelto sa paggibo nin sala. Puede nindang hingoahon na ponan asin susteniran an pagpaomay.

14. Ano an primerong lakdang na maninigong gibohon nin sarong napasalang hoben tanganing ibalik an saiyang relasyon ki Jehova, asin paano matatabangan nin mga magurang an aki na gibohon an lakdang na iyan?

¹⁴ An napasalang hoben kaipuhan na ibalik an saiyang relasyon ki Jehova. An enot na lakdang na dapat niang gibohon iyo an ‘pagsolsol asin pagbakle.’ (Gibo 3:19; Isaias 55:​6, 7) Sa pagtabang sa mga hoben sa saindang harong na magbakle, an mga magurang dapat na “padagos na nagpopogol sa irarom nin karatan, nagtotokdo na may kahoyoan” sa aki na minatumang. (2 Timoteo 2:24-26) Kaipuhan ninda siang ‘sagweon’ sono sa pakahulogan kan Biblia. An termino sa Griego na trinadusir ‘sagweon’ puede man na tradusiron na “magtao nin nakakokombensir na patotoo.” (Kapahayagan 3:19; Juan 16:8) Kun siring, kalabot sa pagsagwe an pagpaheling nin igong ebidensia tanganing makombensir an aki na kasalan an saiyang iginawe. Totoo, bakong madali an paggibo kaiyan. Kun posible, puedeng pukawon kan mga magurang an saiyang puso, na ginagamit an gabos na sono sa Kasuratan na paaging angay tanganing kombensiron sia. Maninigong hingoahon nindang tabangan sia na masabotan an pangangaipo na “kaongisan an maraot, asin mamotan an marahay.” (Amos 5:15) Tibaad sia “maulian giraray hale sa siod kan Diablo.”

15. Ano an nagigibo kan pamibi sa pagbabalik kan relasyon ki Jehova nin sarong napasala?

¹⁵ Sa pagbabalik kan relasyon nin saro ki Jehova, kaipuhan nanggad an pamibi. Siempre, mayo nin siisay man na maninigong “humagad” may labot sa hayag na kasalan na malinaw na daing pagsolsol na ginigibo nin siisay man na indibiduwal na dati asosyado sa Kristianong kongregasyon. (1 Juan 5:​16, 17; Jeremias 7:16-20; Hebreo 10:​26, 27) Pero, puedeng arangon kan mga magurang ki Jehova na tawan sinda nin kadonongan sa pag-atubang sa situwasyon.  (Santiago 1:5) Kun an sarong natiwalag na hoben nagpapaheling nin ebidensia nin pagsolsol alagad mayo nin “katalingkasan sa pagtaram sa Dios,” puedeng ipamibi kan mga magurang na kun manompongan nin Dios an basehan para sa pagpatawad kan sala kan aki, na logod gibohon an Saiyang kabotan. (1 Juan 3:21) An pakadangog sa mga pamibi na ini maninigong makatabang sa hoben na mansayon si Jehova bilang maheherakon na Dios. *​—Exodo 34:​6, 7; Santiago 5:16.

16. Paano ta matatabangan an mga miembro kan pamilya kan natiwalag na mga menor de edad?

¹⁶ Kun matiwalag an sarong bautisadong hoben, linalaoman na an mga miembro kan kongregasyon “umontok sa pakikiiba sa” saiya. (1 Corinto 5:11; 2 Juan 10, 11) Sa kahurihurihi tibaad makatabang ini sa saiya na “makapag-isip-isip” asin bumalik sa nagpoprotehir na toril nin Dios. (Lucas 15:17) Minsan siring, baga man sia bumalik o dai, an mga miembro kan kongregasyon puedeng parigonon an boot kan pamilya kan natiwalag na hoben. Kita gabos puedeng humanap nin mga oportunidad tanganing ipaheling an “pakikipagkapwa” asin magin “madinamayon sa mapagpadangat na paagi” sa sainda.​—1 Pedro 3:​8, 9.

Kun Paano Makatatabang an Iba

17. Ano an maninigong girumdomon kan mga miembro kan kongregasyon kun naghihingoang tabangan an nalalagalag na aki?

¹⁷ Kumusta man an sarong hoben na bakong tiwalag sa Kristianong kongregasyon alagad nagluya an pagtubod? “Kun an sarong kabtang nagdudusa,” an isinurat ni apostol Pablo, “an gabos na ibang kabtang nagdudusa na kadamay [nia].” (1 Corinto 12:26) An iba puedeng magpaheling nin aktibong interes sa siring na hoben. Siempre, kaipuhan an pagmamaan, huli ta an sarong hoben na may helang sa espirituwal puedeng maraot an magin impluwensia sa ibang mga hoben. (Galacia 5:7-9) Sa sarong kongregasyon, an may marahay na intension na mga nasa edad na na gustong tabangan an nagkapirang hoben na nagluya sa espirituwal inagda sinda sa mga pagtorotiripon tanganing iribang tumugtog nin popular na musika. Minsan ngani an mga hoben suminunod tolos asin ikinaogma an siring na mga sesyon, an saindang impluwensia sa lambang saro sa kahurihurihi nagresulta sa saindang pagpondo sa pakikiasosyar sa kongregasyon. (1 Corinto 15:33; Judas 22, 23) An makatatabang sa may helang na aki, bakong sosyal na pagtorotiripon  na mayo nin espirituwal na direksion, kundi asosasyon na nakatatabang sa saiya na kultibaron an gana para sa espirituwal na mga bagay. *

18. Paano niato maaarog an aktitud kan ama kan aking gastador sa parabola ni Jesus?

¹⁸ Kun an sarong hoben na nagbaya sa kongregasyon bumalik sa Kingdom Hall o umatender sa sarong asamblea, isipon kun ano an puedeng mamatean nia. Bako daw na maninigong ipaheling niato an aktitud nin may kaogmahan na pagsabat kan ama kan aking gastador sa parabola ni Jesus? (Lucas 15:18-20, 25-32) An sarong tinedyer na nagbaya sa Kristianong kongregasyon asin kan huri nag-atender sa sarong pandistritong kombension nagsabi: “Paghona ko an gabos dai iintindihon an tawong arog ko, alagad dinolok ako kan mga tugang na lalaki asin babae asin maogma akong inako. Napahirong marhay an boot ko.” Pinonan nia giraray na mag-adal sa Biblia asin kan huri nabautismohan.

Dai Mawaran nin Paglaom

19, 20. Taano ta maninigo niatong papagdanayon an positibong aktitud mapadapit sa sarong gastador na aki?

¹⁹ An pagtabang sa sarong “gastador” na aki na “makapag-isip-isip” nangangaipo nin pasensia asin puedeng magin angat sa mga magurang asin iba pa. Alagad dai mawaran nin paglaom. “Si Jehova bakong maluway kun dapit sa saiyang panuga, siring sa paghona nin nagkapira sa kaluwayan, kundi sia mapasensia sa saindo huli ta dai nia mawot na an siisay man malaglag kundi mawot nia na an gabos makapagsolsol.” (2 Pedro 3:9) May garantiya kita sono sa Kasuratan na boot ni Jehova na an mga tawo magsolsol asin mabuhay. Sa katunayan, sia na an nagsadiring boot na gumibo nin areglo tanganing ipakipag-ulian sa saiya an mga tawo. (2 Corinto 5:​18, 19) Huli sa saiyang pasensia nagin posible para sa minilyon na sinda makapag-isip-isip.​—Isaias 2:​2, 3.

²⁰ Kun siring, bako daw na maninigo man na gamiton kan mga magurang an gabos na posibleng sono sa Kasuratan na paagi tanganing tabangan an saindang gastador na menor de edad na makapag-isip-isip? Inaarog si Jehova, magin kamong matinios mantang ginigibo nindo an positibong mga lakdang tanganing tabangan an saindong aki na bumalik ki Jehova. Marigon na susogon an mga prinsipyo sa Biblia, asin hingoahon na ipabanaag an mga kualidad ni Jehova na pagkamoot, hustisya, asin kadonongan mantang inaarang an saiyang tabang sa pamibi. Kun paanong dakol na tuminagas nang rebelde an naghimate sa mamomoton na pangagda ni Jehova na bumalik, an saindong aking gastador tibaad bumalik sa nagpoprotehir na aripompon nin Dios.​—Lucas 15:​6, 7.

[Mga Nota sa ibaba]

Nagigirumdoman daw Nindo?

• Ano an tibaad pinakaugat kan problema kun an mga hoben nagbabaya sa kongregasyon?

• Paano matatabangan an mga hoben na kultibaron an personal na relasyon ki Jehova?

• Taano ta kaipuhan kan mga magurang na magin matinios alagad marigon sa pagtabang sa gastador na aki?

• Paano matatabangan kan mga nasa kongregasyon an sarong gastador na hoben na bumalik?

[Mga Hapot Para sa Pag-adal]

[Ritrato sa pahina 15]

An odok sa puso na pamibi kan mga magurang puedeng makatabang na mamatean kan mga aki ninda an personal na relasyon kan mga magurang asin ni Jehova

[Ritrato sa pahina 15]

An pagbasa kan Tataramon nin Dios mahalagang marhay para sa pagkultibar nin kadayupotan ki Jehova

[Ritrato sa pahina 17]

Maogmang akoon an gastador na aki kun sia “makapag-isip-isip” na

[Ritrato sa pahina 18]

Gumibo nin positibong mga lakdang na tabangan an saindong aki na bumalik ki Jehova