Bareta kan mga Parabalangibog kan Kahadean

Pag-abot sa mga Masakit Aboton

AN Mga Saksi ni Jehova nagmamaigot na ipakipag-olay an mensahe kan Kahadean sa gabos na mahihimo nindang kaolayon. Kun beses, kaipuhan an ekstraordinaryong paghihingoa tanganing aboton an mga bihirang manompongan sa harong. (Marcos 13:10) Sa bagay na ini, an sarong espesyal payunir na ministro sa sarong nasyon sa Amerika del Sur nagsasaysay kan minasunod na eksperyensia.

“Sarong aldaw naaraman ko na an gobernador kan estado masongko sa teritoryo na nadestinohan ming mag-agom. Huling malinaw na saro sia sa mga bihirang maabotan sa harong, naggibo ako nin surat sa saiya asin linakipan ko nin nagkapirang publikasyon sa Biblia, kaiba an brosyur na Ano an Kahagadan sa Sato nin Dios? asin an librong Mankind’s Search for God asin Kaaraman na Minagiya Pasiring sa Buhay na Daing Katapusan. Ipinaliwanag kan sakong surat an katuyohan kan kada saro kan mga publikasyon na ini.

“Huling interesado akong maaraman an saiyang reaksion sa mga babasahon, naghagad ako na makipagmiting sa saiya. Pakaagi nin pirang semana tinogotan akong makipagmiting, asin nagdara ako nin kopya kan video na Jehovah’s Witnesses​​—The Organization Behind the Name. An miting uminabot nin mga duwang oras. Pakadalan kan video kaiba an gobernador, hinapot ko sia kun ano an saboot nia manongod dian. Sia nagsimbag: ‘Mayo nang ibang organisasyon sa daga na arog kan saindo. Mawot ko na kutana igwa ako nin mga namamanwaan na arog nindo na makatatabang sa sako na mahaman an mga proyekto kan sakong gobyerno!’ Dangan naghapot sia kun nakaduman na ako sa pankinaban na opisina prinsipal kan samong organisasyon. Sinabi ko saiya na minsan ngani iyan an pasohan ko poon pa kan ako 14 anyos, dai ako nagkaoportunidad na sumongko sa samong pankinaban na opisina prinsipal sa Brooklyn, Nueva York. Saro iyan sa mga masakit aboton na mga pasohan. Hineling nia nguna akong marhay. Dangan sinabi nia na gusto niang magkaigwa ako kan oportunidad na iyan. Inasikaso nia an samong legal na mga permiso asin tinawan kami nin tiket sa eroplano bilang regalo!

“An gobernador regular ngonyan na nakareresibi kan magasin na Torrengbantayan asin Awake! Naglalaom kami na sa dai mahahaloy mapoponan mi siang adalan sa Biblia.”