Puede Kamong Magkaigwa nin Tunay na Pagtubod

Kan si Sarah Jayne 19 anyos, naaraman nia na sia may kanser sa obaryo. Pagkatapos kan operasyon, marahay an pagmate nia asin sia optimistiko manongod sa ngapit. Sa katunayan, optimistikong marhay kaya kan sia nag-20 anyos, nakipagtrato sia asin nagpoon na magplano para sa saiyang kasal. Kan taon man sanang idto nagbalik an kanser, asin naaraman nia na pirang semana na sana an saiyang buhay. Si Sarah Jayne nagadan kan Hunyo 2000, bago sia nag-21.

AN HINANGAAN kan mga bisita ni Sarah Jayne mantang yaon sa ospital iyo an saiyang kalmadong kompiansa manongod sa ngapit, kaiba an saiyang hararom na pagtubod sa Dios asin sa saiyang Tataramon, an Biblia. Sa ibong kan grabe kamamondong pangyayari na inaatubang nia, nakasisierto sia sa paglaom na pagkabuhay liwat​​—na maheheling nia giraray an gabos niang katood. (Juan 5:​28, 29) “Maherelingan kita gabos sa bagong kinaban nin Dios,” an sabi nia.

Sinasabi kan nagkapira na an siring na klase nin pagtubod salang paniniwala. “Ano pa an buhay pagkagadan kundi saro sanang paniniwala sa tahaw kan mga mayo nin kompiansa,” an hapot ni Ludovic Kennedy, “na sa huring pagtanog nin trumpeta magkakaigwa nin keyk asin serbesa, caviar pa ngani asin mga trumpeta man para sa sainda, na sa sarong madahon na Eden mag-oorogma sinda kaiba kan mga naenot sa saindang nagadan asin kan iba pa na masurunod?” Sa tataramon na iyan, mapalataw man kita nin kontra hapot. Arin an mas rasonable​—magtubod na “an buhay arog na sana kaini, kaya kaipuhan niatong aprobetsaran iyan,” siring kan iiniinsinwar ni Kennedy, o magtubod sa Dios asin sa saiyang panugang pagkabuhay liwat? Pinili ni Sarah Jayne an ikaduwa. Paano nia napatalubo an siring na pagtubod?

 ‘Hanapon an Dios Asin Talagang Makua Sia’

Tanganing mapatalubo an pagtubod asin pagtitiwala sa sarong tawo, kaipuhan na mamidbid nindo sia asin maaraman kun paano sia nag-iisip asin naghihiro. Imbuelto sa prosesong ini an puso siring man an isip. Talagang totoo man iyan pag-abot sa pagpatalubo nin tunay na pagtubod sa Dios. Kaipuhan nindo na mamidbid sia, maaraman an saiyang mga kualidad asin an saiyang personalidad, maaraman kun gurano sia kamapagtitiwalaan asin kamasasarigan sa gabos na sinabi asin ginibo nia.​—Salmo 9:10; 145:1-21.

An nagkapira nagsasaboot na ini imposible. An Dios, sabi ninda, harayong marhay, misteryosong marhay​​—kun sia nag-eeksister man nanggad. “Kun an Dios tunay man nanggad siring sa pagtubod kan mga Kristiano na arog ki Sarah Jayne,” an hapot kan mapagduda, “taano ta dai sia magpamidbid samo?” Alagad talaga daw na an Dios harayong marhay asin dai marorop? Sa pakikipag-olay sa mga pilosopo asin intelektuwal sa Atenas, si apostol Pablo nagsabi na “an Dios na naggibo kan kinaban asin kan gabos na yaon dian” nagtao man kan gabos na bagay na kaipuhan tanganing “hanapon [sia] . . . asin talagang makua sia.” Sa katunayan, si Pablo nagsabi: “Sia bakong harayo sa lambang saro sa sato.”​—Gibo 17:24-27.

Kun siring, paano nindo ‘mahahanap an Dios asin talagang makua sia’? Ginibo ini kan nagkapira paagi sa pag-obserbar sana sa uniberso sa palibot ninda. Para sa dakol, iyan mismo igo nang ebidensia tanganing kombensiron sinda na seguradong igwa nin sarong Kaglalang. * (Salmo 19:1; Isaias 40:26; Gibo 14:​16, 17) Naniniwala sinda, siring ni apostol Pablo, na an “dai naheheling na mga kualidad [nin Dios] malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.”​—Roma 1:20; Salmo 104:24.

Kaipuhan Nindo an Biblia

Minsan siring, tanganing mapatalubo an tunay na pagtubod sa Kaglalang, kaipuhan nindo an saro pang bagay na itinagama nia. Ano iyan? An Biblia​​—an ipinasabong na Tataramon nin Dios, na dian ihinahayag nia an saiyang kabotan asin katuyohan. (2 Timoteo 3:​16, 17) “Alagad halat nguna,” masabi an nagkapira, “paano nindo posibleng tutubodon an ano man na sinasabi kan Biblia mantang naheheling nindo an teribleng mga bagay na ginigibo kan mga tawong naghihingakong nagsusunod sa Biblia?” Totoo, an Kakristianohan igwa nin labi-labi karaot na rekord nin pagsaginsagin, kabangisan, asin inmoralidad. Alagad maheheling nin minsan siisay na rasonableng tawo na an Kakristianohan nagsasaginsagin sanang nagsusunod sa mga prinsipyo sa Biblia.​—Mateo 15:8.

An Biblia mismo nagpapatanid na dakol na tawo an maghihingakong nagsasamba sa Dios pero, an totoo, “magpapainda minsan sa kagsadiri na buminakal sa sainda.” “Huli kan mga ini,” an sabi ni apostol Pedro, “an dalan kan katotoohan pagtataraman na may panlilibak.” (2 Pedro 2:​1, 2) Sinabi ni Jesu-Cristo na an mga ini “paragibo nin katampalasanan” na malinaw na mamimidbid paagi sa saindang maraot na mga ginigibo. (Mateo 7:15-23) An paghabo sa Tataramon nin Dios basado sa rekord kan Kakristianohan garo pagtapok nin sarong surat na hale sa sarong pinagtitiwalaan na katood huli sana ta an naghatod kaiyan nanongod na saro na maraot an dangog.

Kun mayo an Tataramon nin Dios imposibleng magpatalubo nin tunay na pagtubod. Paagi sana sa mga pahina kan Biblia na ipinepresentar ni Jehova an saiyang lado manongod sa mga bagay, sabi ngani. Ihinahayag nia an simbag sa nagdadanay na mga hapot na siring baga kan kun taano ta tinotogotan nia an pagsakit asin kolog saka kun ano an gigibohon nia manongod sa situwasyon. (Salmo 119:105; Roma 15:4) Si Sarah Jayne nagtubod na an Biblia iyo an ipinasabong na Tataramon nin Dios. (1 Tesalonica 2:13; 2 Pedro 1:19-21) Paano? Bako sanang huli ta iyan an sabi sa saiya kan saiyang mga magurang, kundi huli ta tinawan nia nin panahon na ebalwaron nin sadiosan an gabos na ebidensia na nagpapaheling na an Biblia sarong daing kaagid na kapahayagan hale sa Dios. (Roma 12:2) Halimbawa, naobserbaran nia an mapuersang impluwensia kan Biblia sa buhay kan mga nagsususog sa mga prinsipyo kaiyan. Sa tabang kan mga publikasyon na siring baga kan The Bible​​—God’s Word or Man’s?, * maingat man niang siniyasat an kadakoldakol na panlaog na ebidensia na nagpapatunay na iyan ipinasabong nin Dios.

“An Pagtubod Minasunod sa Bagay na Nadangog”

Minsan siring, bakong igo na magkaigwa sana  nin Biblia o dawa magtubod na iyan ipinasabong. An “pagtubod,” an isinurat ni apostol Pablo, “minasunod sa bagay na nadangog.” (Roma 10:17) An pagdangog sa Biblia, bako sanang pagkaigwa nin Biblia, an nagpapatalubo nin pagtubod. “Dinadangog” nindo an sinasabi nin Dios paagi sa pagbasa asin pag-adal kan saiyang Tataramon. Dawa an mga aki pa puedeng gibohon ini. Sinabi ni Pablo na “poon sa pagkaomboy” si Timoteo tinokdoan sa “banal na mga kasuratan” kan saiyang ina asin lola. Nagsusuherir daw ini na may kalabot na pagdoktrina? Dai! Si Timoteo dai pigmanipular o dinaya sa ano man na paagi. Sia “nakombensir na paniwalaan” an saiyang nadangog asin nabasa.​—2 Timoteo 1:5; 3:​14, 15.

Si Sarah Jayne nakombensir sa kaparehong paagi. Arog kan mga taga Berea kan enot na siglo, “inako [nia] an tataramon [hale sa saiyang mga magurang asin sa iba pang paratokdo] na igwa nin dakulang pagkagalaga sa isip.” Kan sia aki pa, daing duda na natural sanang nagtiwala sia sa sinabi sa saiya kan saiyang mga magurang. Sa huri, kan sia nagdadakula na, dai nia basta na sanang inako an gabos na itinokdo sa saiya. “Maingat [niang] sinisiyasat an Kasuratan aroaldaw kun baga an mga bagay na ini iyo man nanggad.”​—Gibo 17:11.

Puede Nindong Pataluboon an Tunay na Pagtubod

Puede man nindong pataluboon an tunay na pagtubod​​—an klase nin pagtubod na ilinaladawan ni apostol Pablo sa saiyang surat sa mga Kristianong Hebreo. An siring na pagtubod, sabi nia, iyo “an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” (Hebreo 11:1) Kun igwa kan siring na pagtubod, biyo kamong makasesegurado na an gabos nindong linalaoman asin hinahalat, kaiba an panuga nin Dios na pagkabuhay liwat, maootob. Makokombensir kamo na an siring na mga paglaom basado sa seguradong garantiya, bakong sa pagmawot sa boot. Maaaraman nindo na nungkang naprakaso si Jehova sa pag-otob sa saiyang mga panuga. (Josue 21:45; 23:14; Isaias 55:​10, 11; Hebreo 6:18) An ipinanuga nin Dios na bagong kinaban magigin tunay sa saindo na garo man sana yaon na iyan. (2 Pedro 3:13) Asin malinaw na maheheling kan saindong mga mata nin pagtubod na si Jehova Dios, si Jesu-Cristo, asin an Kahadean nin Dios gabos totoo, bakong salang paniniwala.

Dai kamo nagsosolo sa pagpatalubo nin tunay na pagtubod. Apuera sa paggibo sa saiyang Tataramon na pasil makua, itinao man ni Jehova an sarong pambilog na kinaban na Kristianong kongregasyon na dusay sa pagtabang sa mga tawo na tama an kamugtakan nin puso na pataluboon an pagtubod  sa Dios. (Juan 17:20; Roma 10:​14, 15) Akoon an gabos na tabang na itinatao ni Jehova paagi sa organisasyon na iyan. (Gibo 8:​30, 31) Asin mantang an pagtubod sarong bunga kan banal na espiritu nin Dios, daing ontok na mamibi para sa espiritung iyan na tabangan kamong pataluboon an tunay na pagtubod.​—Galacia 5:22.

Dai magpadesganar sa mga mapagduda na tinutuya an siisay man na naghihingakong nagtutubod sa Dios asin sa saiyang Tataramon. (1 Corinto 1:18-21; 2 Pedro 3:​3, 4) Sa katunayan, dakulang marhay an halaga kan tunay na pagtubod sa pagpakosog kan saindong paninindogan tumang sa siring na mga pag-atake. (Efeso 6:16) Naaraman ni Sarah Jayne na iyan totoo, asin pirme niang ineenkaminar an mga nagbibisita sa saiya sa ospital na pataluboon an sadiri nindang pagtubod. “Isapuso nindo an katotoohan,” an sinasabi nia. “Pag-adalan nindo an Tataramon nin Dios. Magdanay na dayupot sa organisasyon nin Dios. Dayaday na mamibi. Magdanay na aktibo sa paglilingkod ki Jehova.”​—Santiago 2:​17, 26.

Naoobserbaran an saiyang pagtubod sa Dios asin sa pagkabuhay liwat, nagsabi an saro sa saiyang nars: “Talagang tinutubod mo ini, bako daw.” Kan hapoton kun ano an nagtao sa saiya nin siring kaoptimistikong paglaom sa ngapit sa ibong kan saiyang kasakitan, sia nagsimbag: “Iyan an pagkaigwa nin pagtubod ki Jehova. Sia sarong tunay na katood sa sako, asin namomotan ko siang marhay.”

[Mga Nota sa Ibaba]

[Ritrato sa pahina 6]

“Poon sa pagkaomboy” tinokdoan si Timoteo sa “banal na mga kasuratan” kan saiyang ina asin lola

[Ritrato sa pahina 6]

Kinomendaran an mga taga Berea sa pagsiyasat sa Kasuratan aroaldaw

[Credit Line]

Hale sa “Photo-Drama of Creation,” 1914

[Mga Ritrato sa pahina 7]

An pagdangog asin paghimate sa Biblia, bako sanang pagkaigwa kaiyan, an nagpapatalubo sa pagtubod

[Ritrato sa pahina 7]

“Maherilingan kita gabos sa bagong kinaban nin Dios”