Sarong Leksion Hale sa Poon nin Palma

“SARONG makawiwiling korte na pambihira an gayon.” Iyan an paglaladawan nin sarong ensiklopedya sa Biblia sa palmang datiles. Kaidtong mga panahon kan Biblia asin ngonyan, an mga palmang datiles an nagpapagayon sa Kababan nin Nilo sa Egipto, asin nagtatao iyan nin nakakapapreskong lindong sa palibot nin mga oasis sa Desierto nin Negeb.

Arog kan kadaklan na klase nin poon nin palma, an palmang datiles risang marhay an pagkatiso. An nagkapira minaabot sa langkaw na 30 metros asin padagos na namumunga sa laog nin 150 taon. Iyo, an palmang datiles magayonon paghelingon asin makangangalas man an pagkamabunga. Kada taon namumunga iyan nin nagkapirang bagikoy nin datiles. An saro sanang bagikoy puedeng igwa nin labing 1,000 datiles. Mapadapit sa mga datiles, an sarong eksperto nagsurat: “An mga . . . an aram sana iyo an inalang na mga ispesimen kan prutas na iyan na nakapakete sa mga tindahan, dai nanggad maimahinar kun gurano kasiram iyan kun kakakanon na dai prinoseso.”

Angay nanggad, may mga tawo na ibinabaing kan Biblia sa mga poon nin palma. Tanganing magin nakapaoogma sa pagheling nin Dios, arog nin mabungang poon nin palma, an sarong tawo kaipuhan na magin tanos sa moral asin kaipuhan na padagos na magpaluwas nin marahay na mga gibo. (Mateo 7:17-20) Sa rason na ini, an inukit na mga pigura nin mga poon nin palma ginamit na dekorasyon sa templo ni Salomon sagkod sa templo sa bisyon ni Ezequiel. (1 Hade 6:​29, 32, 35; Ezequiel 40:14-16, 20, 22) Sa siring, tanganing akoon nin Dios an pagsamba nin saro, kaipuhan na magkaigwa an saro nin kawiliwiling mga kualidad nin palmang datiles. Ipinaliliwanag kan Tataramon nin Dios: “An matanos mamumurak arog kan poon nin palma.”​—Salmo 92:12.